Ntsombano Wa Muganga Wa “Vabyarhi Va Ku Vonakala” Wa 1992
1 Yesu u vule leswaku valandzeri vakwe va ta va “ku vonakala ka misava.” (Mt. 5:14) Ku hambana ni sweswo, munyama wa misava wa moya ni wa mahanyelo wu ya wu kula siku rin’wana ni rin’wana. (Esa. 60:2; Rhom. 1:21) Vutihlamuleri bya hina tanihi vabyarhi va ku vonakala byi ya byi va lebyikulu leswi hi tshinelaka emakun’wini ya mafambiselo lawa. Hi ku vona xiphemu xa nkoka lexi hi xi endlaka, hi langutele hi mahlo-ngati ku va kona eka Ntsombano Wa Muganga Wa “Vabyarhi Va Ku Vonakala” Wa 1992. Nongonoko wo sungula wa minongonoko leyi wu sungula hi Ravuntlhanu, December 4.
2 Ntsombano Wa Masiku Manharhu: Nan’waka hi lunghiselele mintsombano ya 23 eAfrika Dzonga ni le ka matiko ya le kusuhi. Nongonoko hinkwawo wu ta nyikeriwa hi Xibunu, Xinghezi, Xipedi, Xiputukezi, Xisuthu, Xitsonga, Xitswana, Xixhosa ni Xizulu, ni swiphemu swin’wana hi Xigriki ni Xivenda. Eka tindhawu timbirhi ku ta tolokiwa ni hi ririmi ro vulavula hi mavoko, ku nga eDurban ni le Joni. Nongonoko wu ta sungula hi 10:20 a.m. hi Ravuntlhanu kutani wu pfala hi risimu ni xikhongelo kwalomu ka 4:15 p.m. hi Sonto. Tinyangwa ti ta pfuriwa hi 7:30 a.m., naswona a ku nge pfumeleriwi munhu leswaku a nghena nkarhi wolowo wu nga si fika handle ka loko a averiwe ku ta tirha. Vanhu va Yehovha hinkwavo va fanele ku va kona eka nongonoko hinkwawo. Xana se u kunguhatile leswaku u va kona masiku lawa manharhu hinkwawo? Tiyiseka leswaku u khongela leswaku Yehovha a ku katekisa eka matshalatshala ya wena.
3 Ku sukela eka nkulumo yo pfula hi Ravuntlhanu ni mixo ku fikela eka marito yo pfala hi Sonto ni ndzhenga, hi fanele hi yingiserisisa nongonoko hinkwawo. Ku ta va ni rungula leri nyanyulaka, leri nga ta nyikeriwa etinkulumeni, eminkombisweni, eka mimbulavurisano ni le ka drama. Hlela leswaku u va u tshamisekile nongonoko wu nga si sungula hi Ravuntlhanu. Hakanyingi, eka siku ro sungula ku laveka nkarhi wo tala wa ku paka, ku lava switulu ni ku endla swin’wana. Kutani tinyike nkarhi lowu eneleke. Loko hi yingisela xiyimiso hinkwaxo ni loko hi yimela risimu ni xikhongelo xo pfala, hi pfuneka ngopfu ni ku kombisa ku tlangela lunghelo ra hina ra ku tirha tanihi vabyarhi va ku vonakala.
4 Ndleve Ya Wena A Yi Yingisele Swinene: Mupisalema u te: “Nḍi hlayisa ku lerisa ka wena ŝinene. E nawu wa wena nḍi wu ranḍisa ku yini! Nḍi wu anakanya hi siku hikwaro.” (Ps. 119:95b, 97) Nkarhi wun’wana ni wun’wana lowu hi hlanganaka ha wona leswaku hi ta dyondzisiwa hi Yehovha, ku ni xilaveko xa ku yingiserisisa ku nga ri hi tindleve ta hina ntsena kambe ni hi timbilu ta hina. Kambe, xilaveko xa ku endla leswi i xikulu swinene loko hi ya eka tinhlengeletano letikulu to tanihi ntsombano wa muganga. Swi tele leswi swi nga ta voniwa hi mahlo ni leswi nga ta twiwa hi tindleve. Vona leswaku a hi ta va hi lahlekeriwe njhani hi hexe loko a hi hlayise nkarhi ni mali leswaku hi va kona entsombanweni kambe hi muka hi ri ni tinhla titsongo letinene ta ndlela leyi hi nga antswisaka ha yona tanihi vabyarhi va ku vonakala! Hi fanele hi tiyimisela ku hlula swihinga swihi na swihi leswaku hi vuyeriwa hi xitalo enongonokweni. Hi nga swi endlisisa ku yini leswaku rungula ri kota ku tshama etimbilwini ni mianakanyo ya hina loko nongonoko wa ntsombano wu hela?
5 Ku yingisela i vuswikoti lebyi faneleke ku hlakuleriwa ni ku endliwa. Rito leri nge “yingisela” ri vula “ku twa hi nyingiso wa ku twisisa.” Languta swiringanyeto leswi landzelaka: (1) Endla matshalatshala ya ku fika exivandleni xa ntsombano u wise kahle mixo wun’wana ni wun’wana. Leswi swi lava ku kunguhata ni ku khomisana ka ndyangu. Loko u va u karhele hi mhaka ya leswi u nga etlelangiki kumbe u ri ni ndlala hi mhaka ya ku va u nga fihlulanga kumbe loko misiha ya wena yi karhele hi mhaka ya ku tsutsuma, a wu nge twi swo tala enongonokweni. (2) Langutela ndlela leyi nhloko-mhaka yi nga ta ndlandlamuxiwa ha yona. Eka mavhiki ma nga ri mangani ya le mahlweni ka ntsombano, tanihi xiyenge xa dyondzo ya n’wina ya ndyangu, ha yini xirho xin’wana ni xin’wana xi nga hlamuseli leswaku ku va mubyarhi wa ku vonakala swi vula yini eka xona. Loko wa ha ri entsombanweni, kamba xiyenge xin’wana ni xin’wana xa siku rero nongonoko wu nga si sungula. (3) Ambala kahle, naswona u tshika ku dya ni ku nwa hi nkarhi wa nongonoko. Van’wana va tshame va voniwa eholweni kumbe exitediyamu lomu ku tshamiwaka kona va ri karhi va dya kumbe va nwa hi nkarhi wa nongonoko. Leswi a hi ku kombisa xichavo, swi kavanyeta van’wana, naswona swi kombisa ku hluleka ku tikhoma.—Vona Xihondzo xo Rindza xa November 15, 1991, matluka 8-18.
6 Hi fanele hi xiyisisa mhaka ya ku tsala tinotsi. Loko yi endliwa hi mfanelo, yi ta ku pfuna leswaku u landzelela xivulavuri hi vukheta ni ku hlayisa leswi u swi twaka. Tanihi leswi mianakanyo ya hina yi hatlisaka ku tlula ndlela leyi hi vulavulaka ha yona hi makhamba ya mune, ndlela leyinene ya ku sivela ku lahleka ka mianakanyo i ku tsala tinotsi. Hi laha mutsari un’wana a vuleke ha kona, “Ku yingisela nkulumo hakanyingi swi tika ku tlula ku yi nyikela.” U nga ha tsundzuka leswaku Vakreste vo sungula a va tiviwa va ri lava fambaka ni swirhengele eminhlanganweni, va tsala matsalwa eka swona hi inki. Nkateko wa kona, hina hi nga swi endla ku antswa hi buku ya mpimo lowu ringaneleke yo tsala ka yona ni xitsalo kumbe pensele. Ku va ni vutshila eku tsaleni ka tinotsi swi vula ku tsala marito ya ku endla leswaku u twisisa mhaka-nkulu, kambe a hi ku tsala swo tala, leswi swi hi endlaka hi tshama hi ri eku tsaleni. Leswi swi ta onha xikongomelo xa hina naswona swi ta endla leswaku hi lahlekeriwa hi tinhla ta nkoka leti vuriwaka hi xivulavuri. Tsala marito-nkulu naswona u tirhisa marito yo komisa. Tinotsi ta wena ti ta ku pfuna swinene loko u ti kambisisa madyambu wolawo ni le mahlweni ka bulo ra vandlha ra tinhla-nkulu ta nongonoko eka Nhlangano wa Ntirho.
7 Risimu Ni Xikhongelo Lexi Humaka eMbilwini: Ku yimbelelela Yehovha swidzuniso ni ku ya eka yena hi xichavo i swiphemu leswikulu swa vugandzeri bya hina. (2 Tikr. 30:21, 27) Leswi i swiyenge swa nkoka swa ntsombano leswi hinkwerhu hi nga hlanganyelaka eka swona. Emasikwini manharhu ya Ntsombano wa hina wa Muganga wa “Vabyarhi Va Ku Vonakala,” hi ta yimbelela 18 wa tinsimu ta ku dzunisa Yehovha hi tlhela hi va swin’we eka nhungu wa swikhongelo leswi yaka eka Tata wa hina wa le tilweni. Lawa i malunghelo lamakulu ngopfu hakunene. Yehovha u hi nyika nkarhi wo tlula 12 wa tiawara ta dyondzo ni vuleteri bya moya. Eka timinete ti nga ri tingani leti vekeriweke risimu ni xikhongelo, hi khensa Yehovha hikwalaho ka tinyiko takwe ta rirhandzu ni ku n’wi dzunisa. Tanihi leswi hi yaka eka Yehovha hi xikhongelo hi ri ntshungu lowu hlanganeke, xana hi nga lava leswaku a hi languta hi ri vanhu va vutitivi ni lava nga riki na ku khensa hi mhaka ya leswi hi hlulekaka ku hlanganyela eka risimu ni xikhongelo hi ku va hi nga kunguhatanga kahle? Nakambe, lembe leri mimphakelo ya tibuku yi ta va yi tele eka ntsombano wun’wana ni wun’wana leswaku ti ta eneta hinkwavo lava va tshamaka kahle eswitulwini swa vona ku kondza ku hetiwa nongonoko. Hi laha ku fanaka, a nga kona loyi a faneleke a suka ku nga si hetiwa xiyimiso leswaku a ya folela swakudya, a rhangela van’wana.—Mt. 7:12; Rhom. 12:10; Flp. 2:1-4.
8 Endla Swilo Hinkwaswo Leswaku Swi Dzunisa Xikwembu: Lembe na lembe hi nyikiwa switsundzuxo swa rirhandzu malunghana ni nkoka wa mahanyelo lamanene ni ku tikhoma loku faneleke entsombanweni. Vunyingi bya hina bya khensiwa hikwalaho ko yingiserisisa switsundzuxo leswi. Tanihi leswi mafambiselo lawa ma tshinelaka eku heleni ka wona, swiyimo swi ya swi hi boha hi laha ku engetelekeke leswaku hi tikuma hi ri exikarhi ka vanhu entirhweni ni le xikolweni, lava mahanyelo ya vona ma fanaka ni lawa ma vhumbhiweke eka 2 Timotiya 3:1-5. Ku hlangana loku ka hina na vona ku nga va ni nkucetelo wo biha loko hi nga tivoneli. Hi nga tshuki hi endla leswaku vanhu ‘va hi vula vadyohi.’ (1 Pet. 2:12) Leswi swi lava leswaku hi kambisisa vumunhu bya hina bya Vukreste hi laha ku hlawulekeke. Hinkwerhu hi fanele hi xiya mahanyelo ya hina entsombanweni ni kun’wana exikarhi ka vanhu, tanihi le tihotela ni le tikhefini to dyela ka tona. Vakulu va khumbeka hi vamakwavo hinkwavo. (Flp. 2:4) Va fanele va pfuna ni ku bumabumela van’wana hi mahanyelo ya vona lamanene. Naswona vakulu va fanele va titwa va ntshunxekile ku nyika xitsundzuxo xa rirhandzu loko xi laveka, hambi loko va nga tolovelananga na yena makwerhu wa kona. Swiphiqo swihi na swihi leswikulu leswi swi voniwaka swi fanele swi vikiwa eka Hofisi yo Fambisa Ntirho entsombanweni.
9 Vumunhu lebyintshwa lebyi boxiwaka eka Vaefesa 4:24 byi fananisiwa ni nguvu leyi ambariwaka hi munhu loko se a hluvule munhu wa khale. Ku cinca loku ka vumunhu bya hina ku fanele ku kombisiwa ni le ka tinguvu ta xiviri. Vamakwerhu van’wana va xinuna ni va xisati, ngopfu-ngopfu lavantshwa, va vonaka va ambala hi ndlela leyi ntshunxekeke swinene, minkarhi yin’wana va ambala ni hi ndlela leyi nga langutekiki. Van’wana va hluvula tintangu ta vona ivi va tlhandleka milenge ya vona exitulwini lexi nga emahlweni ka vona kumbe va famba-famba hi masokisi. Xana hi swona leswi hi swi endlaka eHolweni ya Mfumo? Nakambe, van’wana lava yaka eku khuvuriweni va ambala swikipa leswi tsariweke marito ya misava ni leswi navetisaka swilo swo hambana-hambana. Vakulu lava pfuxetaka swivutiso kun’we ni lava lunghiselelaka ku khuvuriwa va fanele va tiyiseka leswaku lava va yaka eku khuvuriweni va swi twisisa leswaku ku vuriwa yini loko ku vulavuriwa hi maambalelo lama faneleke ya xiendlakalo lexi.—Vona Xihondzo xo Rindza xa Xinghezi xa June 1, 1985, tluka 30 na April 15, 1973, matluka 254-5.
10 Michini Ya Ku Rhekhoda: Hambi leswi tikhamera ta video ti pfumeleriwaka, hi kombela lava va ti tirhisaka leswaku va ehleketelela van’wana, va hlawula leswi va swi thepaka ni ku ka va nga va karhati lava va nga swi laviki ku tekiwa xifaniso va ri karhi va dya, va ri karhi va yingisela nongonoko kumbe loko ku khongeriwa. Un’wana ni un’wana loyi a thepaka hi video kumbe a rhekhoda hi khasete u fanele a papalata ku tinga vayingiseri kumbe ku va kavanyeta. Ku hava lexi xi nga biha hi ku rhekhoda nongonoko wo karhi u tshame endhawini ya wena. Kambe hi nkarhi wa nongonoko, a swi nge vi swinene leswaku munhu a famba-famba etiphasejini ni le mahlweni ka vayingiseri, a thepa tinkulumo. Loko swi fanerile, varindzi va fanele va vulavurisana ni un’wana ni un’wana loyi a hlulekaka ku kombisa rirhandzu ra vumakwerhu emhakeni leyi. Hi kombela mi tsundzuka leswaku ku hava tikhamera kumbe michini ya ku rhekhoda leyi yi nga ta tlhomiwa eka muchini wa gezi kumbe wa mpfumawulo wa ntsombano, kumbe ku veka michini yo karhi etiphasejini kumbe endleleni.
11 Eka Vatswari: Hi lava ku tlhela hi kandziyisa mhaka ya leswaku vatswari va fanele ku langutela vana va vona nkarhi hinkwawo, endzeni ka rivala ra ntsombano kumbe endhawini ya vona ya byetlelo. (Swiv. 29:15b; Lk. 2:48) Loko nongonoko wu ya emahlweni, tiyiseka leswaku vana va wena va yingisela ni leswaku va tsala tinotsi. Hi nkarhi wo wisa wu kona nkarhi wa ku endzela vanghana va le ka mavandlha man’wana.
12 Ku kombisa nkoka wa ku tiva lomu vana va wena va nga kona nkarhi hinkwawo, muchayeri wa thekisi eka ntsombano wun’wana u byele makwerhu un’wana leswaku u khandziyise vanhwanyana van’wana vambirhi lavatsongo erivaleni ra ntsombano. Swi tikomba onge a va hlele leswaku a va nge vi kona nhlikanhi wolowo naswona va byele muchayeri leswaku mana wa vona a nga na mhaka, u ta va lava hi 5:00 p.m. ntsena. Muchayeri loyi wa thekisi a a karhatekile hi vuhlayiseki bya vona, kambe ku vuriwa yini hi mana wa vona? Vona leswaku a ku ta va mhangu muni loko a va lo weriwa hi khombo ro karhi, hi nga ha vuli xisandzu lexi a xi ta va evitweni ra Xikwembu ni vanhu va xona!
13 Ntirhisano Wa Wena Lowukulu Wa Tlangeriwa: I swa nkoka hi ndlela yihi leswaku un’wana ni un’wana wa hina a fambisana ni nkongomiso wa Sosayiti malunghana ni ku ya eka ntsombano lowu vandlha ra hina ri averiweke eka wona? Ku kunguhata hi vukheta ka Sosayiti ni vamakwerhu lava nga ni vutihlamuleri va ndhawu yin’wana ni yin’wana ya ntsombano ka endliwa loko ku lunghiseleriwa ntsombano wun’wana ni wun’wana. Swi katsa ku va ni vutshamo lebyi ringaneke, tibuku ni swin’wana. Loko vamakwerhu vo tala va ya eka mintsombano leyi va nga averiwangiki ka yona, ku va ni ku nonon’hweriwa. Ina, va nga ri vangani va ta va na swona swiyimo leswi lavaka leswaku va ya eka ntsombano wun’wana. Tindhawu tin’wana ta ntsombano ti nga ha vonaka ti tsakisa hi swivangelo swo hambana, kambe loko vamakwerhu vo tala va ya endhawini leyi va yi rhandzaka, vuyelo bya kona byi nga ha va lebyi kavanyetaka.
14 Ku khomisana ka wena ka komberiwa emhakeni ya ku hlayisa switshamo. U komberiwa ku tsundzuka leswaku SWITSHAMO SWI NGA HLAYISERIWA NTSENA SWIRHO SWA LE KUSUHI SWA NDYANGU WA WENA NA MANI NA MANI LA NGA HA VAKA A FAMBA NA WENA EMOVHENI WA WENA. Swiyenge leswi siyeriweke lava dyuhaleke ni lava lamaleke swi ta va kona eka mintsombano yo tala. Hi kombela leswaku un’wana ni un’wana a langutisa kahle mimfungho ni ku landzelela nkongomiso wa varindzi. Vamakwerhu van’wana lava kuleke swi lave leswaku va lava switshamo etindhawini leti nga nghenekiki kahle hikuva vana a va tate ndhawu ya lava dyuhaleke. U komberiwa leswaku u ehleketelela lava dyuhaleke. Hi mi tivisa leswaku a swi koteki ku va ni tindhawu kumbe makamara ya le tlhelweni ya lava va nga ni swiphiqo swo tanihi ku ka va nga twanani ni ku tshama etindhawini to karhi.
15 Ku ringanyetiwa leswaku swilo swa wena n’wini leswi u taka na swona entsombanweni swi nga tali ngopfu. Loko nchumu wo karhi wu nga ngheni ehansi ka xitulu, swi nga antswa leswaku u wu siya ekaya. Swigwitsirisi leswikulu a swi pfumeleriwi etiphasejini hi mhaka ya vuhlayiseki naswona loko u swi veke eka xitshamo lexi nga ekusuhi na wena, un’wana a nga ha kala xitshamo.
16 Vanhu va Yehovha va tlangela ku hlangana swin’we eka tindhawu letinene leswaku va pfuniwa hi nongonoko wa moya lowu lunghiseleriweke. Na hina hi tlangela mintirho leyinene ni ku tshamiseka loku hi ku kumaka eka tinhlengeletano to tano. Sosayiti ya tiyiseka leswaku, hambi loko leswi swi dya mali yo tala, ku endliwa malunghiselelo ya vutshamo lebyi ringaneke, ku nghenisiwa swikurisa-marito leswi durhaka, ku fambisa Ndzawulo ya Ntirho wa Swakudya, ni mintirho yin’wana yo tala leyi endlaka ku va kona entsombanweni ku tsakisa naswona ku phyuphyisa hi tlhelo ra moya.
17 Swakudya swi ta va kona entsombanweni hinkwawo. Hi khutaza hikwavo lava nga kona leswaku va tirhisa lunghiselelo ra ntirho wa swakudya. Emintsombanweni hinkwayo ku endliwa malunghiselelo leswaku ku tiyisekiwa leswaku ku va ni swakudya leswi eneleke swa vapfhumba. Laha nhlayo leyikulu ya vupfhumba yi rhurheriwaka eswikolweni, komiti ya ntsombano yi ta langutisisa mhaka ya ku va ni swakudya swa ni madyambu kun’we ni swa ku fihlula ni mpundzu. Leswi swi ta sivela xilaveko xa leswaku vapfhumba va ta ni switofu swa gasi ni swa pharafini, hikuva swi nga vanga khombo ra ndzilo emiakweni leyi vapfhumba va rhurheriwaka ka yona. Hi mi khutaza hinkwenu leswaku mi seketela lunghiselelo ra ntirho wa swakudya. Hi nga ha tlhela hi vula leswaku hi mhaka ya ku tlakuka ka mali ya tindhawu ta ntsombano, se swa nonon’hwa leswaku Tindzawulo ta Ntirho wa Swakudya ti fikelela timali ta ku hakelela ndhawu. Hi mhaka ya leswi, mi nga ha rhandza ku endla minyikelo ya ndhawu ya ntsombano ka ha ri na nkarhi laha vandlha ra ka n’wina ri nga ta ya kona. Loko u hlawula ku rhumela cheke, u nga ha yi hakela eka “Watch Tower Convention.” Minyikelo hinkwayo ya tlangeriwa swinene naswona Sosayiti yi rhandza ku mi khensa ka ha ri emahlweni hikwalaho ka nseketelo wa n’wina wa ku hanana ni lowu hlanganeke wa swilaveko swa Mfumo hi ndlela leyi.—Lk. 6:38.
18 Vana Kona Eka Ntsombano Wa Muganga Wa “Vabyarhi Va Ku Vonakala”: Hi ku va kona eka Ntsombano wa Muganga wa “Vabyarhi Va Ku Vonakala” hi ta nyanyuriwa hi ku twa mhaka leyi swi nga xichavo ni lunghelo ha yona ku va vabyarhi va ku vonakala. Hi ta tsundzuxiwa ni hi leswaku i vutihlamuleri lebyikulu. Hi ku nyikela nyingiso lowukulu eka swilo leswi hi swi twaka entsombanweni, hi ta antswisa vutshila bya hina ni ku tlangela xiphemu xa hina tanihi vabyarhi va ku vonakala. Endla makungu ya wena ka ha ri sweswi leswaku u va kona eka minongonoko hinkwayo, ku sukela eka risimu ro pfula hi Ravuntlhanu ku fika exikhongelweni xo pfala hi Sonto ni ndzhenga.
[Bokisi leri nga eka tluka 10]
Switsundzuxo Swa Ntsombano Wa Muganga
Byetlelo: Vahuweleri vo tala va ta endla malunghiselelo ya vona vini ya ndhawu yo etlela. Hambi swi ri tano, loko u lava leswaku vahleri va ntsombano va ku lunghiselela ndhawu u nga ha kuma phepha leri nge Room Request Form eka matsalana wa vandlha. Kutani matsalana wa vandlha u ta hatlisa a rhumela fomo leyi tatiweke eka adirese ya ntsombano lowu faneleke. Eka mintsombano yin’wana swi ya swi nonon’hwa ngopfu ku kuma byetlelo bya vapfhumba vo tala. Leswaku ku hluriwa ku nonon’hweriwa loku tikomiti ta ntsombano ti ta hlela ku hakelela swikolo swa le ndhawini ya ntsombano hi laha a ku endliwa ha kona enkarhini lowu hundzeke. Hambi swi ri tano, hikwalaho ka nhlayo leyi kulaka ya lava lavaka ndlela leyi ya byetlelo, sweswi hi ta tirhisa ndlela leyi yi vitaniwaka “ku etlela hi ntshungu.” Hi marito man’wana vamakwerhu va xisati va ta etlela eka makamara yo karhi ivi vamakwerhu va xinuna eka man’wana ya vona. Kutani a swi nge he pfumeleriwi leswaku mindyangu yi etlela swin’we etlilasini yin’we. (Hi kombela mi vona Awake! ya December 22, 1991, tluka 17.) Leswi swi nga ha nonon’hwa nkarhi wun’wana kambe ha tshemba leswaku hinkwenu mi ta xi twisisa xivangelo xa leswi. Lunghiselelo leri ana se ri tirhisiwile eka mintsombano yo karhi naswona ri humerile.
Tipireme Ta Vana: Ndzawulo ya Ndzilo yi lava leswaku ti nga tisiwi eholweni ivi ti pakiwa etinyangweni ni le tiphasejini kumbe exikarhi ka tilayini ta switshamo. Tanihi leswi mintshungu leyikulu yi nga ha tlimbanaka, tipireme ta vana ngopfu-ngopfu ti ni khombo hayi eka vana ntsena kambe ni le ka hinkwavo lava va nga ha weleka ehenhla ka tona. Kutani hi kombela mi nga ti na tona exivandleni xa ntsombano. Hambi swi ri tano, switshamo swa vana kumbe swa le movheni swa amukeleka, hikuva swona swi nga boheleriwa eka switshamo leswi nga ekusuhi ni vatswari. Ntirhisano wa wena emhakeni leyi wu ta tlangeriwa swinene. Loko swi koteka Komiti ya Ntsombano yi ta lwela leswaku yi hlela ku va ni kamara leri vamanana va nga khathalelaka vana va vona kona loko xilaveko xi va kona.
Nkhuvulo: Lava va yaka eku khuvuriweni va fanele va va eswitshan’weni swa vona exivandleni lexi hlawuriweke, nongonoko wu nga si sungula hi Mugqivela ni mixo. Mpahla leyi langutekaka ya ku hlambela ha yona ni thawula swi fanele swi ta ni un’wana ni un’wana loyi a kunguhataka ku khuvuriwa. Endzhaku ka nkulumo ya nkhuvulo ni xikhongelo hi xivulavuri, mutshama-xitulu wa nongonoko u ta nyika swiletelo swo koma eka lava va yaka eku khuvuriweni ivi endzhaku a tivisa risimu. Endzhaku ka ndzimana yo hetelela, varindzi va ta kongomisa lava yaka eku khuvuriweni exivandleni xa nkhuvulo kumbe emimovheni leyi nga ta va yisa kona. Tanihi leswi nkhuvulo wa ku kombisa ku tinyiketela ka munhu ku nga mhaka ya nkoka ni ya munhu hi xiyexe exikarhi ka munhu na Yehovha, a ku na lunghiselelo ra leswi vuriwaka ku khuvuriwa ka xinghana laha eka rona vanhu vambirhi kumbe ku tlula lava yaka eku khuvuriweni va angarhanaka kumbe va khomananaka hi mavoko loko va ri karhi va khuvuriwa. A swi bohi leswaku lava yaka eku khuvuriweni va humesa papila leri humaka eka vakulu ri kombisa leswaku va fanelekela ku khuvuriwa. Hambi ku ri vakulu va vandlha a va nge yisi nxaxamelo wa mavito ya vanhu lava nga ta khuvuriwa.
Ntirho Wo Pfuneta: Mpfuno wa ku tirhandzela wa laveka leswaku ntsombano wa muganga wu famba khwatsi. Hambi loko u ta kota ku tirha xiyenge xo karhi xa ntsombano ntsena, mintirho ya wena yi ta tlangeriwa. Loko u ta swi kota ku pfuna, u komberiwa ku vika eka Ndzawulo ya Ntirho wo Pfuneta loko u fika entsombanweni. Vana lava nga ehansi ka malembe ya 16 hi vukhale na vona va nga hoxa xandla eku humeleleni ka ntsombano, kambe va fanele ku tirha ni mutswari kumbe munhu un’wana lonkulu loyi a nga ni vutihlamuleri. Hi khutaza hinkwavo vatirhi vo tirhandzela leswaku va fika hi nkarhi entirhweni wa vona. Malunghana ni valanguteri va ndzawulo kumbe valanguteri va xiyenge xa ndzawulo i swa nkoka swinene leswaku va va eka swiavelo swa vona ka ha ri emahlweni. Loko u ta hlwela hi xivangelo xo karhi hi kombela u tivisa mulanguteri wa ntirho.
Tibeji: U komberiwa leswaku u ambala beji leyi lunghiseleriweke hi laha ku hlawulekeke entsombanweni, loko u ya kona ni loko u vuya kona. Leswi hakanyingi swi endla leswaku hi kota ku nyikela vumbhoni lebyinene loko hi ri karhi hi famba. Tibeji ti fanele ku kumiwa hi ku tirhisa vandlha ra ka n’wina, tanihi leswi ti nga ta ka ti nga kumeki emintsombanweni.
Tinsimu: Tanihi leswi ku yimbelela ku nga xiyenge xa vugandzeri bya hina, hi mi khutaza hinkwenu leswaku mi titoloveta tinsimu leti landzelaka leti ti nga ta va xiphemu xa nongonoko: 33, 91, 111, 38, 221, 217, 43, 128, 152, 177, 207, 201, 35, 89, 50, 168, 42, 45. Loko mi titoloveta tinsimu leti ku ringanyetiwa leswaku mi tirhisa tikhasete ta Sosayiti.
Nhlangano Wa Lava Lavaka Ku Nghenela Ntirho Wa Le Bethele: Hi siku ra vumbirhi ku ta va ni nhlangano wa vahuweleri vahi ni vahi lava tinyiketeleke lava nga exikarhi ka malembe ya 19 na 35 hi vukhale lava tsakelaka ku nghenela ntirho wa le Bethele. Switiviso swi ta endliwa entsombanweni malunghana ni nkarhi ni ndhawu ya nhlangano lowu.
Ku Titivisa Ka Maphayona: Maphayona hinkwawo ya nkarhi hinkwawo ni lama hlawulekeke ni valanguteri lava famba-fambaka, varhumiwa ni lava nga entirhweni wa le Bethele kumbe lava va akaka eBethele va fanele ku ta ni khadi ra vona ra Pioneer Service Identification (S-202) entsombanweni. Maphayona wolawo ya nkarhi hinkwawo ni yo hlawuleka lama nga enxaxamelweni hi tin’hweti ta tsevu enkarhini wa ntsombano lowu wa muganga va ta amukela mathikithi ya ntsombano lama ringanaka R22 hi ku humesa khadi ra vona. Vatirhi lavan’wana hinkwavo va nkarhi hinkwawo lava boxiweke laha henhla va ta kuma mathikithi ya swakudya lama ringananaka ku nga khathariseki leswaku va sungule rini ntirho wa vona wa nkarhi hinkwawo. Hlayisa khadi ra wena ra ku Titivisa tanihi mali hikuva a wu nge kumi rin’wana entsombanweni. Swilo swihi na swihi leswi humesiwaka swa mahala kumbe tibuku tin’wana leti nga ni minxavo ya vuphayona ti ta kumeka eka maphayona endlwini ya tibuku ntsena. Tsundzuka ku ta ni khadi ra wena ra Pioneer Service Identification.
Marito Yo Tsundzuxa: Ku nga khathariseki leswaku u paka kwihi, u fanele ku khiya movha wa wena minkarhi hinkwayo naswona u nga tshuki u siya nchumu wo karhi lowu vonakaka endzeni. Hlayisa mindzhwalo ya wena yi khiyeleriwile endzeni ka buti loko swi koteka. Nakambe, tilangutele eka makhamba ni vasechi lava kokiwaka hi tinhlengeletano letikulu. Leswi swi katsa ku ka u nga tshiki nchumu wa nkoka wu nga ri na munhu eswitulwini emintsombanweni. Ku ve ni swiviko swi nga ri swingani swa vanhu vo biha lava va ringetaka ku kucetela vana leswaku va huma exivandleni xa ntsombano. Tivoneleni.