Ntsombano Wa Muganga Wa “Ku Xixima Xikwembu” Wa 1994
1 Vavanuna va ripfumelo va kombise “ku xixima Xikwembu” ku sukela enkarhini wa Avele ni wa Nowa ku ta fikela sweswi. (Hev. 11:4, 7, NW) Ku xixima Xikwembu swi vula ku “fundzha ni ku kombisa xichavo lexikulu eka Muvumbi ni ku chava ku endla leswi nga n’wi tsakisiki.” (it-1 tl. 818) Hi December hi ta kombisa xichavo lexi lexikulu hi ku va kona eNtsombanweni wa Muganga wa “Ku Xixima Xikwembu.” Xana u ta va kona u ta tiphina hi nongonoko hinkwawo, ku sukela eka risimu ro pfula ku ya fika exikhongelweni xo pfala?
2 Lembe na lembe hi ya entsombanweni wa muganga hi ku langutela lokukulu. Hambi leswi ku nga ha lavekaka matshalatshala lamakulu ni timali to tala, mikateko leyi nga ta kumiwa yi tele. Hi tlhelela ekaya hi tsakile naswona hi akekile emoyeni. (Ringanisa 1 Tihosi 8:66.) Ku hlangana loku ka khutaza, naswona ntsombano wa hi wisisa. Kambe tsundzuka leswaku hi hlengeletanela ku gandzela Yehovha. U hi lerisa leswaku hi endla sweswo. U hi dyondzisa ndlela leyi hi nga pfunekaka ha yona.—Det. 31:12, 13; Ps. 122:1.
3 Ntsombano Wa Masiku Manharhu: Nongonoko wu ta nyikeriwa emintsombanweni ya 22 eAfrika Dzonga ni le matikweni ya le kusuhi. Nongonoko hinkwawo wu ta va kona hi Xitsonga, wu tlhela wu nyikeriwa hi Xibunu, Xinghezi, Xipedi, Xiputukezi, Xisuthu, Xixhosa ni Xizulu, ni swiphemu swin’wana hi Xigriki ni Xivenda. Eka tindhawu timbirhi ku ta va ni vuhundzuluxeri bya ririmi ra mavoko, kona hi le Cape Town ni le Joni.
4 Nongonoko wu ta sungula hi Ravuntlhanu hi 10:20 ni mixo naswona wu ta hela hi Sonto kwalomu ka 4:15 ni ndzhenga. Hi Mugqivela ni Sonto, nongonoko wu ta sungula hi 9:30 ni mixo. Tinyangwa ta ntsombano ti ta pfuriwa hi 7:30 ni mixo. Lava nga ta pfumeleriwa ku nghena ku nga si ba 7:30 hi lava nga ni swiavelo swa ntirho.
5 Ku Va Ni Xichavo Lexikulu Eka Yehovha Swi Hi Susumetela Ku Va Kona: Pawulo u laye Vaheveru leswaku va ‘endlela Xikwembu ntirho wo hlawuleka hi ku xixima ni ku chava Xikwembu.’ (Hev. 12:28) Ntsombano wa hina wa muganga nan’waka wu lunghiseleriwe ku hi pfuna leswaku hi endla sweswo. Ku nga ha pfuka swihinga leswi ringaka ku tiyimisela ka hina ku va kona. Swi nga ha kotisa tintshava, kambe hi mpfuno wa Yehovha swi nga hluriwa. (Mt. 17:20) Loko swi nga koteki ku hlela nkarhi wa wena wo wisa wu katsa ntsombano hinkwawo, hi Ravuntlhanu ni mixo ku ya eka Sonto ni ndzhenga, xana u yile eka muthori wa wena u ya kombela ku ka u nga tirhi nkarhi wolowo?—Yak. 1:6-8.
6 Tirhisa Rifuwo Leri Hi Laha Ku Vuyerisaka: Rifuwo rihi? Nkarhi ni matshalatshala lawa u ma endleke leswaku u va kona entsombanweni. A swi nge vi swinene leswaku u endla makungu lamanene ya ku va kona entsombanweni wa muganga wa nan’waka kambe loko u muka hi Sonto u va u lahlekeriwile hi xiyenge lexikulu xa nongonoko. Xana loko u ri enkhubyeni a wu ta huma wu nga si hela leswaku u ya endla swilo swin’wana? Emintsombanweni yo tala n’wexemu ku xiyiwe leswaku van’wana a va famba endzhaku ka minongonoko ya ni mixo. Kambe, ku wupfa ka hina emoyeni ni ku xixima Xikwembu a swi fanelanga swi hi pfumelela ku hundziwa hi leswi Yehovha a hi lunghiseleleke swona.—Ringanisa 1 Vakorinto 2:9, 10.
7 Swi le rivaleni leswaku vo tala va hina a hi nge lavi ku hatla hi famba. Hambi swi ri tano, hi nga ha lahlekeriwa hi xiyenge lexikulu xa nongonoko. Xana leswi swi nga endlekisa ku yini? Hi ku ka hi nga kunguhati ka ha ri emahlweni leswaku hi vuyeriwa swinene etinkulumeni leti nyikeriwaka. Hi fanele ku vindzuka leswaku hi ta fihlula kahle hi tlhela hi endla swin’wana leswi hi faneleke ku swi endla, leswaku hi ta va hi tshamile ku nga si sungula nongonoko. Ku etlela nkarhi lowu ringaneke na swona i swa nkoka leswaku hi xalamuka ni ku kota ku yingiserisisa nongonoko wa siku hinkwaro.
8 Endlelo leri tirhaka ra ku vuyeriwa swinene enongonokweni i ku tsala tinotsi leti ringaneleke. I swa nkoka leswaku vana va tsala tinotsi ku fana ni vanhu lavakulu. Muhuweleri un’wana wa malembe ya 16 hi vukhale u ri: “Ndzi tsala matsalwa lama vuriwaka enkulumeni. Kutani ndzi kota ku pfuxeta nkulumo ekaya.” Muntshwa un’wana wa malembe ya 16 hi vukhale wa engetela: “Mina ndzi tsala tinhla-nkulu. Swi ndzi pfuna ku yingiserisisa.” Hakanyingi lexi u faneleke ku va na xona enongonokweni i Bibele, buku ya tinsimu, buku yo tsalela eka yona ni xitsalo xa wena. Ina, vatswari lava nga ni vana lavatsongo va fanele ku khathalela swilaveko swa vona, kambe i swinene leswaku hi nga kavanyeti van’wana na hina vini hi nhulu ya swingolongondzwana swa hina.
9 Vamakwerhu van’wana va rhekhoda nongonoko, va tirhisa thepi kumbe khamera ya vhidiyo, leswaku va swi tlanga ekaya. Munhu a nga ha swi endla loko a swi lava, kambe ntokoto wa van’wana hi leswaku loko se va tlhelele evuton’wini bya siku na siku, a va xi kumi ni xinkarhana xo tlanga leswi va swi rhekhodeke. Ku engetela kwalaho, u nga ha lahlekeriwa hi tinhla-nkulu tin’wana u ri karhi u lunghisa muchini wo rhekhoda.
10 Hi fanele ku tikarhatela ku tshamiseka ku nga si sungula nongonoko. Hambi loko hi ri karhi hi rungulelana mintokoto yo tsakisa ni vanghana lava ku nga khale hi nga si va vona, loko mutshama-xitulu a tivisa leswaku nongonoko se wu ta sungula, swi kombisa ku xixima lava nga enongonokweni, ni vamakwerhu hinkwavo, loko hi hatlisa hi tsema bulo hi tshamisa.
11 Nkarhi hinkwawo mintsombano ya muganga ya tsakisa hikwalaho ka mikateko ya Yehovha leyi teleke. Hi kuma mimbuyelo ya moya ni ya nyama. Hi fanele ku tsundzuka leswaku swi dya mali yo tala ku qacha ndhawu ya ntsombano. Xana mali leyi ni leyin’wana yi kumiwa njhani? Hi minyikelo ya hina ya ku tirhandzela, leyi endliwaka hi mali kumbe hi cheke yi rhumeriwa eka “Watch Tower Convention.” Leswi swi fambisana ni moya wa Pisalema 96:8, leyi hi khutazaka ku ‘nyika Yehovha ku dzuneka ni ku yisa nyiko eswivaveni swakwe.’
12 Xana Ku Tikhoma Ka Wena Ku Ta Tisa Ku Dzuneka? Lembe na lembe hi tsundzuxiwa hi musa hi nkoka wa ku tikhoma lokunene loko hi ri entsombanweni wa muganga. Kavula, ku tikhoma ka hina ku fanele ku va xikombiso lexinene nkarhi hinkwawo, kambe loko hi hlengeletanile hi vunyingi, hakanyingi hi xiyisisiwa hi lava nga riki kona entiyisweni. Ku tikhoma ka hina, lokunene kumbe loko biha, ku nga ha vulavula ku tlula ku chumayela ka hina. Hi lava leswaku Yehovha a dzunisiwa hi leswi hi swi vulaka ni leswi hi swi endlaka.—Swiv. 27:2; 1 Pet. 2:12.
13 Endzhaku ka Ntsombano wa Muganga wa “Dyondzo Ya Xikwembu” n’wexemu, murindzi wa hotela yin’wana u te: “Lowu i ntlawa lowunene ngopfu wa vantshwa eka lava ndzi tshameke ndzi va langutela evuton’wini bya mina.” Kutani endzhaku ko vulavula hi mikhuva yo biha ni ku onhetela ka mintlawa yin’wana ya vantshwa, u tlhele a vula leswi hi vana va Timbhoni: “Va tikhome kahle naswona swa tsakisa ku va na vona. Onge mintsombano yin’wana leyi khomiwaka laha yi nga fana ni lowu.”
14 Mutsari wa phepha-hungu u vule leswi hi ntsombano: “Vavasati ni vanhwanyana a va ambale tirhoko leti langutekaka, kasi vavanuna ni vafana a va ambale mabaji, va bohe ni tithayi. A va tsala tinotsi hi ku hiseka loko va yingisela swivulavuri emasikwini wolawo ya mune. Loko ku basa ku ri kusuhi ni vukwembu hakunene, kutani, Timbhoni ta Yehovha ti endla sweswo hi ndlela ya le henhla.” Hambi swi ri tano swiviko swin’wana a swi nga khutazi.
15 Emintsombanweni yin’wana ku vikiwe leswaku a ku ri ni vanhu vo tala lava a va famba-famba, nongonoko wu ri karhi wu ya emahlweni, vo tala va vona a va ri vantshwa, leswi kombaka leswaku vatswari va fanele va tiyisa voko hi tlhelo ra vuleteri ni vulawuri lebyi engetelekeke. Ku tshamela ku famba-famba loko nongonoko wu ya emahlweni swi vanga pongo lerikulu leri kavanyetaka lava ringetaka ku yingisela. Vanhu va nga ri vangani va ni mintirho leyi va faneleke va yi endla hi nkarhi wa nongonoko, xana hina van’wana a hi fanelanga hi tshama ehansi, hi rhiya ndleve?
16 Vatswari vo tala va tiyisa voko leswaku vana va vona va va kona eminhlanganweni ya vandlha vhiki na vhiki. Xana a va fanelanga va tiyisa voko hi laha ku fanaka va tiyiseka leswaku vana va vona va tshama ekusuhi na vona, va nga famba-fambi loko nongonoko wu ya emahlweni? Ndhawu ya ntsombano yi hundzuriwe Holo ya Mfumo leyikulu, kambe yona i ya mafambiselo ya Sathana, naswona swi nga olova leswaku vanhu vo homboloka va nghena exivandleni lexi hi mianakanyo yo biha. U FANELE KU TIVA LOMU VANA VA WENA VA NGA KONA, U TIVA NI LESWI VA SWI ENDLAKA NKARHI HINKWAWO.
17 Swiambalo Ni Ku Tilunghisa: Hi hanya eka nguva leyi ku ambala hi ndlela leyi nga langutekiki ni leyi nga tsakisiki swi tekiwaka tanihi leswi amukelekaka. Vanhu vo tala va ya etikerekeni ni le tikhonsatini kumbe va dya eswitolo va ambale hi ndlela leyi nga langutekiki. Rungula leri tshahiweke eka ndzimana 14 ri kombisa leswaku va ha ri kona vanhu lava tsakelaka maambalelo lama nga ni xindzhuti, ngopfu-ngopfu malunghana ni vugandzeri lebyi faneleke. Swiambalo leswi nga langutekiki ni ku tilunghisa loku nga fanelangiki ku paluxa leswi hi nga swona. U nga tshuki u rivala leswaku xivandla xa ntsombano a xa ha ri xa mintlango. I Holo ya Mfumo leyi kurisiweke. Van’wana va ambala hi ndlela yo xiximeka entsombanweni kambe endzhaku ka minongonoko va ya eswitolo swa ndhawu yoleyo ni kun’wana va ambale hi ndlela leyi nga faneriki kumbe leyi nga riki yinene.
18 Lava yaka eku khuvuriweni va fanele va tsundzuxiwa leswaku ku ni swiambalo swo karhi swo hlambela leswi nga fanelangiki. Swiambalo swi fanele swi komba ku ringanisela, swi languteka. I mani loyi a faneleke ku kombisa leswi? Vakulu va ni vutihlamuleri bya ku vona leswaku un’wana ni un’wana la khuvuriwaka evandlheni ra ka vona a nga veki xikhunguvanyiso. (2 Kor. 6:3, 4) Leswi swi vula leswaku swiambalo swo hlambela leswi vonikelaka ni swikipa leswi nga ni marito ya misava kumbe vunavetisi bya yona a swi fanelanga. Swi ta va swinene leswaku vakulu va bula hi mhaka leyi ni loyi a yaka eku khuvuriweni loko va pfuxeta swivutiso swa buku leyi nge Vutirheli Bya Hina.
19 Tihotela: Hi lava ku kombisa mihandzu ya moya minkarhi hinkwayo kambe ngopfu-ngopfu loko hi ri karhi hi tirhisana ni vatirhi va le tihotela ni leswitolo swa swakudya.
20 Michini Yo Rhekhoda: Hi laha swi vuriweke ha kona eku sunguleni, munhu a nga tihlawulela ku tirhisa michini yo rhekhoda, ngopfu-ngopfu tivhidiyo to rhekhoda. Loko u rhekhoda, hi kombela u ehleketelela van’wana lava nga kona. Swi nga ha kavanyeta hambi loko u rhekhoda u ri exitshan’weni xa wena. A nga kona loyi a faneleke ku sirha vatsombani-kulobye loko a thepa. Ku tlula kwalaho, ku hava michini yo rhekhoda ya muxaka wihi na wihi leyi nga ta tlhomiwa eka mafambiselo ya gezi kumbe ya mpfumawulo ya le ntsombanweni, yi pfala tiphaseji kumbe tindlela.
21 Vutshamo: Swiphiqo leswi fambelanaka ni ku hlayisa switshamo swa ha lava ku lulamisiwa. Nakambe hi tsakela ku tsundzuxa un’wana ni un’wana: SWITSHAMO SWI NGA HLAYISERIWA NTSENA SWIRHO SWA NDYANGU WA WENA NA MANI NA MANI LOYI A NGA HA VAKA A FAMBA NA WENA EMOVHENI WA WENA. Emintsombanweni yin’wana loko tinyangwa ti pfuriwa hi 7:30 mixo wun’wana ni wun’wana, vamakwerhu a va nghena hi ku tsutsuma leswaku va ta hlayisa ndhawu leyikulu yo tshama kutani switshamo swo tala leswi va swi hlayiseke swi kumeka swi nga ri na munhu. Mikhuva leyi yi tikomba yi ya emahlweni yi endliwa hambi leswi ku nyikeriwaka switsundzuxo nkarhi na nkarhi. Xana a hi fanelanga hi kambisisa timbilu ta hina emhakeni leyi ivi hi anakanyisisa hi misinya ya milawu leyi nga eka Vafilipiya 2:3, 4?
22 Ntsombano wun’wana ni wun’wana wu va ni malunghiselelo ya lava nga ni swilaveko swo hlawuleka, tanihi vadyuhari ni lava lamaleke. Hi kombela leswaku u nga tshami eka xiyenge lexi loko u nga faneleki. Nakambe, xalamukela ku pfuna lava nga ni swilaveko swo hlawuleka leswaku va kuma xitshamo loko va nga heleketiwi hi munhu loyi a va hlayisaka.
23 Ntirho Wa Swakudya: Nakambe malunghiselelo ya swakudya ma ta va kona emintsombanweni hinkwayo. Hi khutaza hinkwavo lava nga ta va kona emintsombanweni leswaku va seketela lunghiselelo leri.
24 Hi December ku ta va ni Mintsombano yo tala ya Muganga ya “Ku Xixima Xikwembu.” Xana se u hetile ku lunghiselela, naswona xana u swi lulamerile ku tiphina hi masiku lawa manharhu ya ku hlangana loku ku tsakisaka ni swilo leswinene swa moya? Hi khongela hi matimba leswaku onge Yehovha a nga katekisa matshalatshala ya n’wina ya ku tsombana lembe leri, mi wundliwa etafuleni ra Yehovha ra swilo swo saseka eNtsombanweni wa Muganga wa “Ku Xixima Xikwembu.”
Switsundzuxo Swa Ntsombano Wa Muganga
Nkhuvulo: Lava yaka eku khuvuriweni va fanele va va eswitshan’weni swa vona endhawini leyi vekeriweke vona ku nga si sungula nongonoko hi Mugqivela ni mixo. Ku xiyiwe leswaku van’wana va ambala swiambalo leswi nga langutekiki ni leswi nga xi faneriki xiendlakalo lexi. Un’wana ni un’wana loyi a kunguhataka ku khuvuriwa u fanele a ta ni swiambalo leswi langutekaka swo hlambela ha swona ni thawula. Endzhaku ka nkulumo ya nkhuvulo ni xikhongelo hi xivulavuri, mutshama-xitulu wa nongonoko u ta nyika swiletelo swo koma eka lava yaka eku khuvuriweni kutani endzhaku a tivisa risimu. Endzhaku ka ndzimana yo hetelela, varindzi va ta kongomisa lava yaka eku khuvuriweni exivandleni xa nkhuvulo. Tanihi leswi ku kombisa ku tinyiketela hi nkhuvulo ku nga mhaka ya nkoka ni ya munhu hi xiyexe na Yehovha, a ku na lunghiselelo ra leswi vuriwaka ku khuvuriwa ka xinghana laha vanhu vambirhi kumbe ku tlula lava khuvuriwaka va angarhanaka kumbe va khomana loko va khuvuriwa.
Tibeji: U komberiwa ku ambala beji ya 1994 entsombanweni ni loko u ya ni ku vuya exivandleni xa ntsombano. Leswi hakanyingi swi endla leswaku hi kota ku nyikela vumbhoni lebyinene loko hi ri endleleni. Leswi swi tirhile swinene n’wexemu malunghana ni mintsombano leyi khomiweke eMoscow ni le Kiev. Tibeji ni swifunengeto swi fanele ku kumiwa evandlheni ra ka n’wina, hikuva a swi nge vi kona entsombanweni. Tsundzuka ku tshama u ri ni khadi ra wena ra sweswinyana ra Medical Directive. Swirho swa ndyangu wa Bethele ni maphayona, va fanele va ta ni makhadi ya vona ya ku titivisa.
Byetlelo: Nakambe hi kombela ntirhisano wa un’wana ni un’wana eku tirhiseni ka byetlelo lebyi lunghiseleriwaka hi ntsombano. Vamatsalana va vandlha va fanele ku tiyiseka leswaku tifomo leti nge Room Request Form ti rhumeriwa handle ko hlwela eka adirese leyi faneleke ya ntsombano hayi eka Sosayiti. Loko u boheka ku cinca byetlelo lebyi u lunghiseleriweke byona, u fanele u hatlisa u tivisa n’wini wa ndhawu ya kona kumbe hotela ni Ndzawulo ya Byetlelo ya ntsombano leswaku kamara ra kona ri ta averiwa van’wana. Eka mintsombano yin’wana swi ya swi nonon’hwa ngopfu ku kuma byetlelo bya vanhu vo tala. Leswaku ku lulamisiwa xiphiqo lexi tikomiti ta ntsombano ti ta hlela ku hakelela swikolo swa le ndhawini ya ntsombano hi laha a ku endliwa ha kona enkarhini lowu hundzeke. Hambi swi ri tano, hikwalaho ka nhlayo leyi kulaka ya lava lavaka byetlelo bya muxaka lowu, sweswi hi ta tirhisa ndlela leyi yi vitaniwaka “ku etlela hi ntlawa.” Hi marito man’wana vamakwerhu va xisati va ta etlela eka makamara yo karhi ivi vamakwerhu va xinuna va etlela eka man’wana ya vona. Kutani a swi nge he pfumeleriwi leswaku mindyangu yi etlela swin’we etlilasini yin’we. (Hi kombela mi vona Awake! ya December 22, 1991, tluka 17.) Leswi swi nga ha nonon’hwa nkarhi wun’wana kambe ha tshemba leswaku mi ta xi twisisa xivangelo xa leswi. Lunghiselelo leri ana se ri tirhisiwile eka mintsombano yin’wana naswona se ri humelerile swinene.
Tipireme Ta Vana: Ndzawulo ya Ndzilo yi lava leswaku ti nga tisiwi eholweni ivi ti pakiwa etinyangweni ni le tiphasejini kumbe exikarhi ka tilayini ta switshamo. Tanihi leswi mintshungu leyikulu yi nga ha tlimbanaka, tipireme ta vana ngopfu-ngopfu ti ni khombo hayi eka vana ntsena kambe ni le ka van’wana lava nga ha welaka ehenhla ka tona. Kutani hi kombela leswaku mi nga ti na tona exivandleni xa ntsombano. Hambi swi ri tano, switshamo swa vana ni swa le movheni swa amukeleka, hikuva swona swi nga boheleriwa eka switshamo leswi nga ekusuhi ni vatswari. Ntirhisano wa wena emhakeni leyi wu ta tlangeriwa swinene. Ntirho Wo Tirhandzela: Xana u nga tinyika nkarhi entsombanweni u pfuna eka yin’wana ya tindzawulo? Ku pfuna vamakwerhu, hambi ko va tiawara ti nga ri tingani ntsena, swi nga pfuna swinene swi tlhela swi hi enerisa. Loko u ta swi kota ku pfuna, yana eka Ndzawulo ya Ntirho wa ku Tirhandzela entsombanweni. Vana lava nga ehansi ka malembe ya 16 hi vukhale va nga ha hoxa xandla na vona hi ku tirha swin’we ni mutswari kumbe munhu lonkulu la nga ni vutihlamuleri.
Tinsimu: Tanihi leswi ku yimbelela ku nga xiphemu xa vugandzeri byerhu, hi khutaziwa hinkwerhu leswaku hi titoloveta tinsimu leti landzelaka leti ti nga ta va xiphemu xa nongonoko: 53, 175, 85, 79, 187, 155, 19, 13, 47, 180, 177, 113, 143, 191, 33, 114, na 222. (Swi nga va swinene leswaku mavandlha ma sungula ku titoloveta tinsimu, hambi ko va rin’we endzhaku ka nhlangano wun’wana ni wun’wana.)
Nhlangano Wa Ntirho Wa Le Bethele: Hi siku ra vumbirhi ku ta va ni nhlangano wa vahuweleri vahi ni vahi lava tinyiketeleke lava nga exikarhi ka malembe ya 19 na 35 hi vukhale, lava tsakelaka ku nghenela ntirho wa le Bethele. Switiviso swi ta endliwa entsombanweni malunghana ni nkarhi ni ndhawu ya nhlangano lowu.
Marito Yo Tsundzuxa: Hi ku xalamukela swiphiqo leswi nga vaka kona, hi nga papalata ku nonon’hweriwa loku nga lavekiki. Hakanyingi makhamba ni vanhu vo homboloka va rhandza ku karhata vanhu lava nga ekule ni ndhawu ya ka vona. Tiyiseka leswaku movha wa wena wu lotleriwile minkarhi hinkwayo, naswona u nga siyi nchumu lowu vonakaka, lowu nga kokaka munhu leswaku a tshova. Makhamba ni vasechi va vuyeriwa ngopfu etinhlengeletanweni letikulu. A hi swinene ku siya swilo swa nkoka exitulwini xa wena. U nge tiyiseki leswaku un’wana ni un’wana la nga kona i Mukreste. Ha yini u vanga ndzingo? Ku kumiwe swiviko swa vanhu va le handle lava ringetaka ku yenga vana leswaku va famba na vona. TSHAMA NI VANA VA WENA MINKARHI HINKWAYO.
Ku vikiwe leswaku tihotela tin’wana ti ti kombisa mahala tifilimi ta thelevhixini leti kombaka mahanyelo yo biha kumbe leti kombaka vanhu lava nga ambalangiki. Leswi swi kandziyisa xilaveko xo xiya ku hlalela ka vana TV eka tindhawu leti to etlela.
Hi kombela leswaku mi nga bi riqingho ri ya eka mufambisi wa lunghiselelo ra ntsombano malunghana ni ku lava ku tiva timhaka ta ntsombano. Loko rungula mi nga ri kumi eka vakulu, kutani tsalelani eka Komiti ya Ntsombano endzhaku ka loko mi kume adirese eka matsalana wa vandlha.