Ntsombano Wa Muganga Wa “Vadzunisi Lava Tsakeke” Wa 1995
1 I swivangelo swingani leswi hi nga na swona swo tsaka? Kumbexana va nga ri vangani va hina hi ringete ku swi hlaya hinkwaswo ka swona. Hambi leswi hi hanyaka emisaveni ya mpfilumpfilu ni leyi cinca-cincaka, hi ni swivangelo swo tala ngopfu swo tsaka. Hi laha swi tivisiweke ha kona eka Xihondzo xo Rindza xa May 1, 1995, “Vadzunisi Lava Tsakeke” i nhloko-mhaka leyi khutazaka ya mintsombano ya muganga ya 1995.
2 Hi dzunisa Yehovha hikuva u hi dyondzise ntiyiso. (Esa. 54:13; Yoh. 8:32) Nakambe, hi ntsako hi twarisa ntiyiso eka hinkwavo lava lavisisaka nsirhelelo ni ntsako. (Ezek. 9:4; Mint. 20:35) Vumakwerhu bya hina bya Vukreste na byona byi hi tisela ntsako. Ndyangu wa moya wa rirhandzu wu tisa ku eneriseka ni ntsako. Leswi i swivangelo swi nga ri swingani swa ntsako wa hina leswi hi susumetelaka ku dzunisa Yehovha. Tinkulumo ta ntsombano ni minkombiso swi ta kokela nyingiso wa hina eka swivangelo leswi engetelekeke swa Matsalwa swa ntsako wa hina emasikwini lawa ya makumu lama nga ni maxangu.
3 Ntsombano Wa Masiku Manharhu: Xana se u ma endlile malunghiselelo ni muthori wa wena ya leswaku u kuma nkarhi wo wisa u ta kota ku va kona hi masiku manharhu ya ntsombano? Hi wihi ntsombano lowu nga ekusuhi na wena? Vutirheli Bya Hina Bya Mfumo bya May byi longoloxe masiku ni madoroba laha mintsombano ya 30 yi nga ta va kona ensin’wini ya rhavi ra Afrika Dzonga. Sweswi ana se matsalana wa vandlha ra ka n’wina u mi tivisile hi vuxokoxoko lebyi khumbaka vandlha ra ka n’wina. Ku engetela eka mintsombano ya Xinghezi ku ta va ni ya Ririmi Ra Mavoko, Xibunu, Xikwanyama, Xipedi, Xiputukezi, Xisuthu, Xitsonga, Xitswana, Xivenda, Xixhosa na Xizulu.
4 Nongonoko wu ta sungula hi 9:40 ni mixo hi siku ro sungula ivi wu hela hi kwalomu ka 3:50 ni ndzhenga hi siku ro hetelela. Esikwini ra vumbirhi ni ra vunharhu, nongonoko wu ta sungula hi 9:30 ni mixo. Tinyangwa ti ta pfuriwa hi 8:00 ni mixo. Ku ta pfumeleriwa ntsena lava va nga ni swiavelo swo karhi ku nghena ka ha ri na nkarhi.
5 Xana U Ta Va U Ri Kona?: Hi khutaziwa ku va kona hi masiku manharhu ya ntsombano. Ha yini hi khutaziwa tano? Yehovha u lava leswaku hi va kona. Namuntlha ripfumelo ra hina ni rihanyo ra hina ra moya swi le hansi ka nhlaselo lowukulu swinene. Pawulo u nyikele ndzayo mayelana ni ku nga “tshiki ku hlengeletana” hi nkarhi lowu Vakreste va le Yudiya a va langutane ni ntshikilelo lowukulu. (Hev. 3:12, 13; 10:25) Vafilipiya a va hanya “exikarhi ka rixaka lero homboloka.” Kambe a va ‘vangama kukota timboni emisaveni.’ (Flp. 2:15) Ha yini Vakreste lava va lembe-xidzana ro sungula a va hambanile? Hikuva hi ku titsongahata va landzelele nkongomiso wa moya lowo kwetsima lowu va kongomiseke ku hlangana swin’we “leswaku [va] kombana rirhandzu ni mintirho leyinene.”—Hev. 10:24.
6 Misava yi nga hi kucetela hi ndlela yin’wana, yi tsanisa ku navela ka hina ko hlangana ni vamakwerhu va hina ni ku dzunisa Yehovha. Ximumu lexi hi rhambiwa ku titsongahatela moya wa Yehovha ni ku tsakela masiku manharhu ya ntsombano. Xana hi tiyimisele ku va kona ni mindyangu ya hina hinkwayo? Hi fanele hi tiyisa rirhandzu ni ripfumelo ra hina nkarhi na nkarhi. Yehovha u hi lunghiselele mintsombano ya lembe na lembe leswaku a hi pfuna emhakeni leyi.
7 Yana Ni Rifuwo eKaya: Xana u nga pfuneka njhani hi laha ku engetelekeke entsombanweni? Nhlamulo ya kona i “ku nyikela nyingiso.” Leswi a swi olovi eka vanhu va namuntlha lava hatlaka va hlundzuka ni lava tshamaka va khomekile. Vantshwa lava teleke matimba va nga swi kuma swi nonon’hwa ku nyikela nyingiso, kambe lexi i xiphiqo lexi hinkwerhu ka hina hi langutanaka na xona loko hi ri entsombanweni wa muganga. Ku nyikela nyingiso swi ta hi olovela loko hi hlela ka ha ri emahlweni. Tivutise, ‘Xana nhloko-mhaka ya ntsombano yi ri yini?’ Anakanyisisa hi yona! ‘Hikwalaho ka yini ndzi ya, naswona ndzi ta va ndzi endla yini hi masiku lawa manharhu? Xana madyambu ya mina ma ta va ma tele hi vuhungasi, kumbe ndzi hlele nkarhi lowu ringaneke wo wisa ni ku pfuxeta tinhla-nkulu ta ntsombano?’
8 Xihloko xa Watchtower ya February 1, 1984, lexi nge “Xana Wa Anakanyisisa Kumbe U Lorha Ri Lo Hosi?” xi nyikele swiringanyeto swi nga ri swingani swa ndlela leyi u nga pfunekaka ha yona enhlanganweni ivi xi fikelela makumu lawa: “Ku tshinya mianakanyo kumbexana hi yona mhaka ya nkoka.” Loko xivulavuri xi sungula, hi ntolovelo hi rhiya ndleve, kambe loko nkulumo yi ri karhi yi ya emahlweni hi pfumelela mianakanyo ya hina yi “famba-famba.” Xana hi nga swi sivela njhani leswi leswaku swi nga humeleli?
9 Swiringanyeto leswi nyikeriweke enkarhini lowu hundzeke swi fanele ku phindhiwa hikuva swa tirha. Loko swi koteka, ringeta ku wisa hi laha ku ringaneke vusiku byin’wana ni byin’wana. Leswi a swi olovi minkarhi yin’wana hikuva swi nga ha endleka u famba, mpfhuka wo leha, naswona loko u nga etleli kona ekaya ra wena, u nga ha hlwela ku ya eku etleleni kumbe u nga wisi ku fana ni le kaya. Ku kunguhata kahle hi ntolovelo ku nga ha ku endla u kuma ku wisa loku lavekaka.
10 Ku teka tinotsi to olova ku tikombe ku ri xipfuneto xa ku nyikela nyingiso. Loko u ringeta ku tsala rungula leri taleke ku tlula mpimo, u nga ha hupiwa hi tinhla tin’wana ta nkoka hi ku helela. Tanihi xiringanyeto, tsala tinotsi onge hi loko u lava ku ya nyikela nkatsakanyo wa nongonoko eka xichudeni xa Bibele kumbe eka la pfaleriweke. Hambi loko u nga ri na munhu wo karhi emiehleketweni ya wena, u ta va ni xikongomelo loko u tsala tinotsi, naswona endzhaku ka ntsombano u nga ha kuma minkarhi yo nyikela tinhla-nkulu ta nongonoko loko u nyikela vumbhoni hi xitshuketa eka swirho swa ndyangu leswi nga pfumeriki. Hi ku tsala tinotsi ni ku avela van’wana leswi u swi tweke, a wu nge hatlisi u ri rivala rungula. Rito ri ku tsundzuxa leswi engetelekeke.
11 Hambi leswi swakudya swi nga ta ka swi nga ha lunghiseleriwi, ka ha ri ni timali to tala leti katsekaka eku hireni ka ndhawu ya ntsombano, leswi hakanyingi swi katsaka timali ta swikurisa-marito ni swin’wana. Xana mali leyi yi kumiwa njhani? Hi minyikelo ya hina ya ku tirhandzela, ku nga ha va ku ri hi mali kumbe hi cheke leyi yisiwaka eka “Watch Tower Convention.” Leswi swi fambisana na Pisalema 96:8 na 2 Tikronika 31:12.
12 Vadzunisi Lava Tsakeke Va Xixima Yehovha Hi Mahanyelo Lamanene: N’wexemu le United States ku kumiwe tinhlamuselo letinene ni leti khutazaka leti humaka eka vatirhi va le hotela ni le ka vatirhi va le tindhawini ta ntsombano mayelana ni ku tikhoma ka hina. Mufambisi un’wana wa hotela u te: “Nkarhi hinkwawo swa tsakisa ku rhurhela Timbhoni hikuva ti lehisa mbilu naswona ti ni ntirhisano ni ku hlayisa vana va tona kahle.” Mukongomisi un’wana wa hotela u vule leswaku Timbhoni ti vonaka ti tsakile ni ku hleleka ku tlula mintlawa yin’wana. Hambi leswi ntsombano wa hina lowu khomeriweke endhawini yoleyo a wu ri lowukulu, u te: “Hi va ni swivilelo ni swiphiqo switsongo ngopfu ku tlula swa mintlawanyana leyitsongo.”
13 Mutirhi un’wana wa le hotela u kombise leswaku ntsombano lowu a wa ha ku khomiwa emahlweni ka wa hina wu vange ku onhaka lokukulu ku katsa ni ku yiva, hambi leswi vatirhi va le hotela hinkwavo a va ri kona. Kambe mayelana ni ntsombano wa hina, u ye emahlweni a ku: “A hi kali hi vilela hi sweswo mayelana ni Timbhoni. . . . Loko ti ri laha, ho veka munhu un’we kumbe vambirhi lava lunghisaka naswona vona vo lunghisa swiphiqo leswi tshukaka swi va kona emichinini.”
14 A hi tsakela leswaku swiviko hinkwaswo leswi kumiweke swi va leswinene, kambe lexi khomisaka tingana a swi vanga tano. Mutshama-xitulu wa ntsombano wun’wana u te: “Endzhaku ka nongonoko, vantshwa vo tala va hlengeletane hi mintlawa leyikulu etiphasejini [ta tihotela] ni vusiku, va hlekela ehenhla ni ku huwelela. Leswi swi kavanyeta van’wana . . . , lava vonakeke va nyangatsekile. Vana van’wana va tsutsuma-tsutsuma etiphasejini, va hima mavanti loko va ri karhi va endzelana etikamareni naswona va vulavulela ehenhla loko va ri etikamareni.”
15 Xiphiqo xin’wana lexi phindha-phindheke hi malembe layo tala i vunyingi bya vamakwerhu lava yimaka etiphasejini ni le handle ka swivandla swa mintsombano loko nongonoko wu ya emahlweni. Entsombanweni wun’wana n’wexemu, ku kumiwe xipapilana ebokisini ra minyikelo lexi a xi huma eka xichudeni xa Bibele. A xi hlayeka hi ndlela leyi: “Huwa, ku famba-famba, ku vulavula ni ku tlanga ehandle, loko tinkulumo ti ri karhi ti ya emahlweni a swi ndzi nyangatsa ni ku ndzi heta matimba swinene . . . a ndzi si va Mbhoni, ndza ha ri un’wana la hlayaka ni ku dyondza ku chava ni ku xixima Xikwembu.” Entiyisweni, ku hava ni un’we wa hina la lavaka ku tiendla a vonaka onge a nga ma tlangeli malunghiselelo ya Yehovha.
16 Minkarhi hinkwayo hi fanele ku tivutisa leswaku: ‘Ndzi yimela mani, naswona ha yini ndzi ri kona entsombanweni?’ Vumoya ni ku chava ka hina Xikwembu swi kombisiwa hi mavulavulelo ya swa moya. (Yak. 3:13; 1 Pet. 2:2, 3, 12) Vamakwerhu lava tiyiseleke malembe ya minsivelo ni ku yirisiwa hakanyingi va vonaka va rhiya ndleve swinene ni ku va ni xichavo emintsombanweni, va tshama eswitulwini swa vona, va fambisana ni tinkulumo ni minkombiso.
17 Maambalelo Ni Ku Tisasekisa Ka Wena Swi Vula Swo Karhi: Eka 1 Samuwele 16:7, hi tsundzuxiwa leswaku “v̌anhu v̌a languta ngohe, kambe Yehova o languta mbilu.” Xisweswo, hakanyingi vanhu va hi avanyisa hi ku ya hi xivumbeko xa hina. Maambalelo ni ku tisasekisa ka hina swi xiyiwa swinene, ngopfu-ngopfu loko hi ri entsombanweni leswaku hi ya gandzela ni ku leteriwa hi ndlela ya Vukreste. Loko u ri muntshwa la nghenaka xikolo kumbe loko ntirho wa wena wo tihanyisa wu ku tshineta ekusuhi ni vanhu lava landzelelaka switayele swa misava, swi nga ha ku nonon’hwela ku namarhela mimpimanyeto ya Vukreste ya maambalelo lama langutekaka.
18 Mimpimanyeto ya maambalelo ni ku tisasekisa ya hambana emisaveni hinkwayo. Vakreste va languteriwa ku ambala hi ndlela leyi langutekaka ni ku ambala swiambalo leswi hlelekeke. I mani la faneleke ku kambisisa leswi? Vatswari va fanele ku tiyiseka leswaku vana va vona va kondlo-a-ndzi-dyi a va ambali ku fana ni vantshwa va misava exikolweni. Ku vekiwe swiletelo leswi akaka leswaku swi hi pfuna ku endla swiboho leswi twalaka emhakeni leyi yo tika. Hi mi khutaza ku pfuxeta Awake! ya February 8, 1987, exihlokweni lexi nge “Xana Swiambalo Swi Vula Yini Eka Wena?” I yini leswi xiyiweke eka yin’wana ya mintsombano ya hina n’wexemu?
19 Endzhaku ka wun’wana wa Mintsombano ya Muganga ya “Ku Xixima Xikwembu,” hi kume marito lama nge: “Vamakwerhu va xinuna ni va xisati va antswise swinene eka maambalelo, ku tisasekisa ni mahanyelo ya vona entsombanweni lembe leri. . . . Hambi swi ri tano, ka ha ri ni swiyimo swin’wana ni mikhuva yin’wana leyi lavaka ku antswisiwa hi laha ku engetelekeke.” Endzhaku ka ntsombano wun’wana ku vikiwe leswaku ku xiyiwe ngopfu maambalelo lama nga langutekiki. Xiviko xi boxe leswaku maambalelo ya van’wana a ma khunguvanyisa van’wana. Vanhu van’wana va le handle lava a va ri kona na vona va xiye maambalelo lama nga langutekiki. Swiambalo swa van’wana a swi vonikela swinene swi tlhela swi manya swinene.
20 Vunyingi bya vamakwerhu va xinuna ni va xisati va ambala swiambalo leswi langutekaka, leswi xiximekaka endhawini ya ntsombano. Hambi swi ri tano, endzhaku ka nongonoko, vamakwerhu van’wana va xinuna ni va xisati a va ambale “swihakaboyi leswi va manyaka swinene, tibokati to hlakala, maburuku yo koma swinene ni . . . swiambalo swa fexeni leyi nga va faneliki vanhu va Xikwembu.” Loko vakulu va xiya leswaku van’wana va tala ku ambala hi ndlela leyi hi nkarhi wo titsakisa, swi ta va swi fanerile ku nyikela ndzayo ya musa kambe leyi tiyeke ku nga si fika ntsombano va va komba leswaku swiambalo swo tano a swi faneleki, ngopfu-ngopfu tanihi vapfhumba lava vaka kona eka ntsombano wa Vukreste. Hi kombela u pfuxeta ni xichudeni xa wena xa Bibele lexi nga ta va kona entsombanweni swiletelo leswi xaxametiweke laha henhla mayelana ni ku tikhoma ni maambalelo.
21 Tihotela: Lembe na lembe matshalatshala lama xiyekaka ya endliwa leswaku ku va na byetlelo hi mali ya le hansi leswaku ku nga tikiseriwi munhu hi tlhelo ra timali. Hi kombela mi tsundzuka ku lehisa mbilu ni ku va ni musa loko mi tirhisana ni vatirhi va le hotela. Hi nga ha va hi karharisiwe hi riendzo ivi hi kuma leswaku malunghiselelo ya kona ya hlwela, kambe ku lehisa ka n’wina mbilu a ku nge vi ka hava. Hi fanele hi tlhela hi tsundzuka xilaveko xo tlangela hi ku va nyika mali hi ndlela leyi faneleke.—Awake! ya June 22, 1986.
22 Tikhamera Ni Michini Yo Rhekhoda: Swa fanela ku nyikela switsundzuxo leswinene mayelana ni tikhamera ni swilo swo rhekhoda. Hi kombela u tsundzuka leswaku loko u kunguhata ku tirhisa tikhamera, tikhamera ta tivhidiyo kumbe muxaka wihi na wihi wa swilo swo rhekhoda, ehleketelela lava nga ekusuhi na wena. Ku famba-famba hi nkarhi wa nongonoko kumbe hambi ku ri ku rhekhoda u tshame exitulwini xa wena swi nga ha kavanyeta van’wana. Ku hava michini yo rhekhoda ya muxaka wihi na wihi leyi nga ta tlhomiwa eka mafambiselo ya gezi kumbe ya mpfumawulo, kumbe yi vekiwa laha yi pfalaka tiphaseji kumbe tindlela. Loko u kunguhata ku teka swifaniso kumbe ku rhekhoda swiyenge swa nongonoko hi khamera ya vhidiyo kumbe hi thepi i mhaka ya munhu hi xiyexe. Swifaniso ni leswi rhekhodiweke swi nga ha ku tsundzuxa minkarhi yo tsakisa loko u swi vona endzhakunyana. Switirho swo tano hinkwaswo swi fanele ku tirhisiwa kahle, hi ndlela leyi nga va kavanyetiki van’wana kumbe swi ku sivela ku pfuneka swinene enongonokweni. Endzhaku ko tlhelela ekaya, xana u ta wu kuma nkarhi wo tlanga leswi rhekhodiweke? U nga kuma leswaku ku teka tinotsi swi ta va swi enerile.
23 Vutshamo: Entsombanweni wa Muganga wa “Ku Xixima Xikwembu” wa 1994, xana u yi vonile ndlela leyi antswisiweke yo hlayisa switshamo? Ku antswisiwa ko karhi ku endliwile, kambe ha ha lava ku xiya xitsundzuxo lexi: SWITSHAMO SWI NGA HLAYISERIWA NTSENA SWIRHO SWA NDYANGU WA WENA NA MANI NA MANI LOYI A NGA HA VAKA A FAMBA NA WENA EMOVHENI WA WENA. Hi va hi ri kwalaho tanihi vaendzi va Sosayiti. Mali ya xivandla xa ntsombano yi hakeleriwe hi minyikelo yo tirhandzela. Xana ku ta va ku ri rirhandzu ku anakanyela ku hlayisa xitshamo lexi hi nga tiyisekiki leswaku ku ta tshama munhu eka xona? Mi hi khomela hikuva a hi nge swi koti ku tamela xikombelo xa tindhawu ta le tlhelo ta lava nga ni swiphiqo swa ndhawu, ku fana ni lava miri wa vona wu nga twananiki ni swo karhi.
24 Ntsombano wun’wana ni wun’wana wu va ni malunghiselelo ya lava nga ni swilaveko swo hlawuleka, tanihi vadyuhari ni lava lamaleke. Hi kombela leswaku u nga tshami eka xiyenge lexi loko u nga faneleki. Nakambe, xalamukela ku pfuna lava nga ni swilaveko swo hlawuleka leswaku va kuma xitshamo loko va nga heleketiwi hi munhu loyi a va hlayisaka.
25 Ku Khathalela Swilaveko Swa Wena Swa Swakudya eNtsombanweni: Hi laha mi swi tivaka, Vutirheli Bya Hina Bya Mfumo bya July 1995 byi tivisile: “Ku sukela hi September 1995 etinhlengeletanweni ta swifundzha ni ta siku ra nhlengeletano yo hlawuleka kun’we ni le Mintsombanweni ya Muganga ya ‘Vadzunisi Lava Tsakeke’ eku heleni ka lembe leri, a ku nge vi na malunghiselelo ya swakudya. Un’wana ni un’wana u fanele ku titela ni swakudya ni swakunwa swa yena.” Kutani xiengetelo xa Vutirheli Bya Hina Bya Mfumo bya September 1995 xi hlamusele xivangelo xa ku cinca loku endliweke ivi xi nyika ni swiringanyeto swa kahle swa ndlela leyi un’wana ni un’wana a nga lunghiselelaka ha yona swakudya ni swakunwa swakwe entsombanweni. Swi ta va swinene ku va un’wana ni un’wana a nga pfuxeti xiengetelo xexo a ri yexe kambe a tlhela a bula hi xona ni swichudeni swakwe swa Bibele loko swi ri karhi swi tilunghiselela ku va kona entsombanweni. I swa nkoka leswaku swichudeni swa Bibele swi tivisiwa leswaku hinkwavo lava yaka entsombanweni va fanele va titela ni swakudya ni swakunwa swa vona vini entsombanweni. Hi tlhela hi mi tsundzuxa leswaku vatsombani a va fanelanga va ta ni switofu swa gasi ni swa pharafini laha va nga ta etlela kona loko va ri entsombanweni tanihi leswi swi nga ha vangaka ndzilo. Hi mi khutaza hinkwenu ku yingisa xikombelo lexi hi mbilu hinkwayo. Varindzi va le ntsombanweni ni lava langutelaka ndhawu ya byetlelo exikolweni va ta tiyisa voko swinene emhakeni leyi.
26 Ku kandziyisa tinhla ti nga ri tingani, tsundzuka swilo leswi ku faneleke ku tiwa na swona hi nkarhi wo wisa ni nhlikanhi: swakudya swa ni nhlikanhi leswi xurhisaka ni leswi olovaka leswi fanaka ni leswi vanhu hakanyingi va swi dyaka loko va ri entirhweni wo tihanyisa, swo tanihi masangweji, mihandzu leyi omisiweke, timanga, swilo leswi bakiweke ni mihandzu yo xawula. Swakunwa swi nga ha katsa kofi, namuleti, tijuzi ta mihandzu kumbe mati lama nga le ka xilo lexi nga fayekiki kumbe eka fulaski. Loko swititimeti leswitsongo swi laveka, swa amukeriwa loko swi ta kota ku nghena ehansi ka xitulu xa wena. Hambi swi ri tano, ku hava swititimeti leswikulu leswi ringanaka ndyangu swa pikiniki, swakunwa swa xihoko kumbe swilo leswi endliweke hi nghilazi a swi faneleki ku tisiwa endhawini ya ntsombano. Ku dya hi nkarhi wa nongonoko swi fanele ku papalatiwa. Leswi swi ta kombisa ku nga xiximi swakudya swa moya leswi nga ta va swi ri karhi swi nyikeriwa.
27 Xitsundzuxo xin’wana hi leswaku a ku fanelanga ku swekiwa etikamareni ta xikolo handle ka loko ku ri na khixi leri endleriweke xikongomelo xexo. I swinene ku xiyisisa yinhla ya leswaku nkarhi wo wisa wu endleriwe ku dya swakudya swo olova ivi ku tsakeriwa mabulo ya swa le tilweni ni vamakwerhu. Tanihi vanhu va Yehovha, hi xiya leswaku swakudya swa moya emintsombanweni i swa nkoka swinene loko swi ringanisiwa ni swilo leswi vonakaka, naswona hi fanele hi kunguhata kahle.
28 Hi November 24, 1995, wun’wana wa Mintsombano wa Muganga wa “Vadzunisi Lava Tsakeke” wu ta sungula. Xana u hetile ku endla malunghiselelo ya wena, naswona se u lunghekele ku tsakela masiku manharhu ya xinakulobye lexi tsakisaka ni swilo leswinene swa moya ke? Hi khongela hi mbilu hinkwayo leswaku Yehovha a katekisa matshalatshala ya n’wina yo va kona entsombanweni wa ximumu lexi swin’we ni vamakwenu va xinuna ni va xisati tanihi leswi hi nga dyondza ndlela ya ku va vadzunisi lava tsakeke va Yehovha.
Switsundzuxo Swa Ntsombano Wa Muganga
Nkhuvulo: Lava yaka eku khuvuriweni va fanele va va eswitshan’weni swa vona endhawini leyi vekeriweke vona ku nga si sungula nongonoko hi mixo lowu landzelaka. Ku xiyiwe leswaku van’wana va ambala swiambalo leswi nga langutekiki ni leswi nga xi faneriki xiendlakalo lexi. Un’wana ni un’wana loyi a kunguhataka ku khuvuriwa u fanele a ta ni swiambalo leswi langutekaka swo hlambela ha swona ni thawula. Endzhaku ka nkulumo ya nkhuvulo ni xikhongelo hi xivulavuri, mutshama-xitulu wa nongonoko u ta nyika swiletelo swo koma eka lava yaka eku khuvuriweni kutani endzhaku a tivisa risimu. Endzhaku ka ndzimana yo hetelela, varindzi va ta kongomisa lava yaka eku khuvuriweni exivandleni xa nkhuvulo. Tanihi leswi ku kombisa ku tinyiketela hi nkhuvulo ku nga mhaka ya nkoka ni ya munhu hi xiyexe na Yehovha, a ku na lunghiselelo ra leswi vuriwaka ku khuvuriwa ka xinghana laha vanhu vambirhi kumbe ku tlula lava khuvuriwaka va angarhanaka kumbe va khomana loko va khuvuriwa.
Tibeji: U komberiwa ku ambala beji ya 1995 entsombanweni ni loko u ya ni ku vuya exivandleni xa ntsombano. Leswi hakanyingi swi endla leswaku hi kota ku nyikela vumbhoni lebyinene loko hi ri endleleni. Tibeji ni swifunengeto swi fanele ku kumiwa evandlheni ra ka n’wina, hikuva swi nge vi kona entsombanweni. Tsundzuka ku tshama u ri ni khadi ra wena ra sweswinyana ra Advance Medical Directive/Release. Swirho swa ndyangu wa Bethele ni maphayona, va fanele va ta ni makhadi ya vona ya ku titivisa.
Byetlelo: Nakambe hi kombela ntirhisano wa un’wana ni un’wana eku tirhiseni ka byetlelo lebyi lunghiseleriwaka hi ntsombano. Vamatsalana va vandlha va fanele ku tiyiseka leswaku tifomo leti nge Room Request ti rhumeriwa handle ko hlwela eka adirese leyi faneleke ya ntsombano. Loko u boheka ku cinca byetlelo lebyi u lunghiseleriweke byona hi Ndzawulo ya Byetlelo, u fanele u hatlisa u tivisa n’wini wa ndhawu ya kona kumbe hotela ni Ndzawulo ya Byetlelo ya ntsombano leswaku kamara ra kona ri ta averiwa van’wana. Hi khutaza vamakwerhu lava nga emadorobeni lawa mintsombano yi nga ta va eka wona, leswaku va amukela vatsombani vo tala hi laha va nga kotaka ha kona emakaya ya vona. Eka mintsombano yin’wana swi ya swi nonon’hwa ngopfu ku kuma byetlelo bya vanhu vo tala. Hi lemuka leswaku makaya yo tala i matsongo, hambi swi ri tano hi khutaza mindyangu leswaku yi pfula makaya ya yona leswaku vatsombani va kuma byetlelo.
Tipireme Ta Vana: Etindhawini ta tala, tipireme ta vana a ti tirhisiwa laha ku hlengeletanaka vanhu. Ndzawulo ya Ndzilo yi lava leswaku ti nga tisiwi eholweni ivi ti pakiwa etinyangweni ni le tiphasejini kumbe exikarhi ka tilayini ta switulu. Tanihi leswi mintshungu leyikulu yi nga ha tlimbanaka, tipireme ta vana ngopfu-ngopfu ti ni khombo hayi eka vana ntsena kambe ni le ka van’wana lava nga ha welaka ehenhla ka tona. Kutani hi kombela leswaku mi nga ti na tona exivandleni xa ntsombano. Hambi swi ri tano, switulu swa tincece kumbe swa le movheni swa amukeleka, hikuva swona swi nga boheleriwa eka switulu leswi nga ekusuhi ni vatswari. Ntirhisano wa wena emhakeni leyi wu ta tlangeriwa swinene.
Ntirho Wo Tirhandzela: Xana u nga tinyika nkarhi entsombanweni u pfuna eka yin’wana ya tindzawulo leti? Ku tirhela vamakwerhu, hambi ko va tiawara ti nga ri tingani ntsena, swi nga pfuna swinene swi tlhela swi hi enerisa. Loko u ta swi kota ku pfuna, yana eka Ndzawulo ya Ntirho wa ku Tirhandzela entsombanweni. Vana lava nga ehansi ka malembe ya 16 hi vukhale va nga ha hoxa xandla na vona hi ku tirha swin’we ni mutswari kumbe munhu lonkulu la nga ni vutihlamuleri.
Marito Yo Tsundzuxa: Hi ku xalamukela swiphiqo leswi nga vaka kona, hi nga papalata ku nonon’hweriwa loku nga lavekiki. Hakanyingi makhamba ni vanhu vo homboloka va rhandza ku karhata vanhu lava nga ekule ni ndhawu ya ka vona. Tiyiseka leswaku movha wa wena wu lotleriwile minkarhi hinkwayo, naswona u nga siyi nchumu lowu vonakaka, lowu nga kokaka munhu leswaku a tshova. Makhamba ni vasechi va lava ngopfu tinhlengeletano letikulu. A hi swinene ku siya swilo swa nkoka exitulwini xa wena. U nge tiyiseki leswaku un’wana ni un’wana la nga kona i Mukreste. Ha yini u vanga ndzingo? Ku kumiwe swiviko swa vanhu va le handle lava ringetaka ku yenga vana leswaku va famba na vona. TSHAMA NI VANA VA WENA MINKARHI HINKWAYO.
Tithelevhixini leti nga kona etindhawini ta byetlelo hakanyingi ti kombisa mahanyelo yo biha, ni vanhu lava nga ambalangiki. Xalamukela ntlhamu lowu, naswona u nga pfumeleli vana va hlalela ngopfu thelevhixini va ri voxe etindhawini leti.
Hi kombela leswaku mi nga bi riqingho ri ya eka mufambisi wa lunghiselelo ra ntsombano malunghana ni ku lava ku tiva timhaka ta ntsombano. Loko rungula mi nga ri kumi eka vakulu, kutani tsalelani eka Komiti ya Ntsombano endzhaku ka loko mi kume adirese eka matsalana wa vandlha.