Vuyeriwa Swinene Eka Ntsombano Wa Muganga Wa “Dyondzo Ya Xikwembu” Wa 1993
1 “Oho Yehova, nḍi dyonḍise.” (Ps. 86:11) Lexi ku fanele ku va xikombelo lexikulu xa nandza un’wana ni un’wana wa Xikwembu la tinyiketeleke. Hi tiyimisele leswaku hi nga kali hi tshika ku dyondza naswona hi nga tshiki ku tirhisa leswi hi swi dyondzaka. Minkarhi yin’wana hi lava ku ololoxiwa, naswona ku kotisa mupisalema, hi fanele hi kombela Xikwembu leswaku xi endla mbilu ya hina yi va yin’we leswaku yi nga avani. Nongonoko wa Ntsombano wa Muganga wa “Dyondzo Ya Xikwembu” wu ta nyika ndzetelo lowu tirhaka ni ndzulamiso lowu hi wu lavaka leswaku hi tirhela Yehovha hi ku tshembeka exikarhi ka mintshikilelo ya mafambiselo lawa ya swilo.
2 Ntsombano Wa Masiku Ya Mune: Nongonoko wu ta nyikeriwa eka tindhawu ta 19 leti fanelekaka eAfrika Dzonga ni le matikweni ya le kusuhi. Nongonoko hinkwawo wu ta va kona hi Xinghezi, wu tlhela wu nyikeriwa hi Xibunu, Xipedi, Xiputukezi, Xisuthu, Xitsonga, Xitswana, Xixhosa ni Xizulu, ni swiphemu swin’wana hi Xigriki ni Xivenda. Eka tindhawu tinharhu ku ta va ni vuhundzuluxeri bya ririmi ra mavoko, kona hi le Cape Town, Durban ni le Joni. Nongonoko wu ta sungula hi Ravumune hi 1:20 p.m. naswona wu ta hela hi Sonto ni ndzhenga, kwalomu ka 4:15 p.m. Tinyangwa ta ntsombano wun’wana ni wun’wana ti ta pfuriwa hi 7:30, mpundzu wun’wana ni wun’wana. Hi kombela mi xiya leswaku a nga kona loyi a nga ta pfumeleriwa ku nghena ku nga si ba 7:30 a.m. handle ka loko a averiwe ku ta tirha ku nga si fika nkarhi wolowo.
3 Xana i yini leswi hi nga ta swi kuma? Swakudya swo tala leswi tiyeke swa moya, leswi phameriwaka hi tindlela to hambana-hambana: tinkulumo, minkombiso, mimbulavurisano ni tidrama timbirhi. U nga kayeriwi hi mindzetelo leyi ya nkoka! Ku engetela kwalaho hi langutele ku pfuxeta vanghana va khale ni ku kuma van’wana lavantshwa. Varhumiwa lava tirhaka ehansi ka rhavi ra Afrika Dzonga swi nga ha endleka va va kona eka ntsombano wa ka n’wina. Tirhisa nkarhi lowu leswaku u tivana ni vamakwerhu lava va xinuna ni va xisati lavo tshembeka. Loko u ri mutswari, katsa vana va wena ebulweni. Moya wa ntsako ni wa ku tinyiketela ka varhumiwa lava, wu nga ha endlela vana va wena masungulo leswaku va ehleketa hi ntirho-vutomi wa nkarhi hinkwawo.
4 Xana U Ta Tisa Vukhume Hinkwabyo eNdlwini Ya Vuhlayiselo? Eka Malakiya 3:10, Yehovha u tshembise Vaisrayele leswaku loko va swi tsakela ku n’wi ringa kutani va tisa vukhume hinkwabyo endlwini ya vuhlayiselo, u ta va chululela mikateko ku kondza ku nga ha vi na xilaveko.
5 Eka van’wana, ku ringa Yehovha swi ta vula ku ya eka muthori wa vona hi ku hatlisa hi laha swi kotekaka ha kona va ya kombela masiku kumbe nkarhi wo wisa leswaku va ya entsombanweni. Minkarhi yin’wana vamakwerhu va kanakana ku endla tano, va ehleketa leswaku muthori wa vona a nge va pfumeleli ku ya entsombanweni. Kambe, etimhakeni leti nga riki ta moya, swi nga va olovela kumbe swi nga va tikeli ngopfu ku byela muthori wa vona leswi va lavaka ku swi endla.
6 Hi fanele hi tivutisa leswi: Loko munghana la rhandzekaka a a cata eka ndhawu yin’wana, xana a hi nga ta ya eka muthori wa hina hi ya kombela nkarhi wo ya eka mucato lowu? Naswona loko a kanakana, xana a hi nga ta ringeta ku n’wi hlamusela hi xichavo leswaku a hi ta tsaka njhani loko ho kota ku famba? Entiyisweni i swa nkoka swinene ku dyondzisiwa hi Yehovha ku tlula ku ya emucatweni! Loko hi kholwa leswaku nongonoko wa ntsombano i wa nkoka leswaku hi kula emoyeni, swi ta olova ku hlamusela muthori wa hina leswaku a hi nyika nkarhi wo ya entsombanweni.—Yak. 1:7, 8.
7 Le Israyele, vukhume a byi katsa ku seketela ndhawu ya Yehovha ya vugandzeri hi swilo leswi vonakaka. Enkarhini wa hina vukhume byi yimela nkarhi, ntamu ni timali leti tirhisiwaka hi ku kongoma entirhweni wa Yehovha ni le ku seketeleni ka ntirho wa Mfumo. Vukhume byi katsa nkarhi lowu hi wu hetaka eminhlanganweni, etinhlengeletanweni ni le mintsombanweni, swin’we ni le ku hlayiseni ni le ku basiseni ka tindhawu ta hina leti hi hlanganaka eka tona. Ntsombano wa Muganga wa “Dyondzo Ya Xikwembu” wu ta hi nyika nkarhi wo tala wa ku tisa vukhume hinkwabyo endlwini ya Yehovha ya vuhlayiselo bya moya. Hi byihi byin’wana bya kona?
8 Hi nga tisa vukhume hi ku rhiya ndleve eka nongonoko wa ntsombano, hi ku hlanganyela hi ku hiseka eku yimbeleleni ka risimu rin’wana ni rin’wana ra Mfumo, ni ku yingiserisisa xikhongelo xin’wana ni xin’wana, leswaku hi ta vula amen wa hina la humaka embilwini.
9 Nhluvuko wa hina entiyisweni, wu titshege hi ndlela leyi hi yingiselaka ha yona. Eholweni leyikulu kumbe xitediyamu, swa olova ku kavanyetiwa hi leswi van’wana va swi endlaka ekusuhi na hina, kutani hi fanele hi hlayisa mianakanyo ya hina yi nga hambuki. Tana entsombanweni u lunghiselele kahle, u ri ni Bibele ya wena, risimu, xitsalo ni phepha ro tsalela ka rona ni Xihondzo xo Rindza lexi nga ta dyondziwa vhiki rero. Swa pfuna ku tsala tinhla ni matsalwa lama tirhisiwaka hi xivulavuri xin’wana ni xin’wana. Tsala tinotsi to koma; ku tsala tinotsi to tala swi nga ku endla u nga yingiseli kahle. Vana na vona va fanele va dyondzisiwa ku yingiserisisa. Vana va nga tisa vukhume kun’we ni vatswari va vona hi ku fambisana swinene ni nongonoko.
10 Vatswari van’wana va hlela nkarhi wa ku miyela ekaya siku na siku lowu vana va vona va faneleke va hlaya kumbe va languta swifaniso leswi nga eka yin’wana ya tibuku ta Sosayiti. Ndzetelo lowu lowunene wu swi endla swi olova swinene leswaku vana va tshama va miyerile eminhlanganweni ni le mintsombanweni. Vatswari lava kuriseke vana lava vekaka xikombiso lexinene va vula leswaku a va nga pfumeli leswaku vana va vona va ta ni swilo swo tlangisa kumbe tibuku to tlangisa eminhlanganweni. Hambi ku ri vana lavatsongo va nga dyondza leswaku xivangelo xo va kona eminhlanganweni i ku ta gandzela Yehovha. Vatswari lava dyondzisaka vana va vona ku tisa vukhume endlwini ya vuhlayiselo va fanele ku bumabumeriwa hakunene!
11 Nakambe hi nga tisa vukhume hi ku nyikela nkarhi ni ntamu wa hina hi ku pfuna eka vufambisi bya ntsombano. Eka tindhawu to tala ku hleriwa xiyimiso xa ku basisa emahlweni ka ntsombano, ka ha sele siku rin’we kumbe mambirhi leswaku ntsombano wu sungula. Loko u tshama ekusuhi, ha yini u nga hleli leswaku ndyangu hinkwawo wu va kona? Vamakwerhu van’wana va te ni swichudeni swa vona swa Bibele leswi endlaka nhluvuko, leswaku hambi loko va nga si khuvuriwa vanhu lava lavantshwa va tiva leswi katsekaka eku seketeleni ka vugandzeri bya Yehovha. Ku ni swo tala leswi faneleke ku endliwa leswaku ntsombano wu famba khwatsi. Ha yini mi nga pfuni tanihi ndyangu?
12 Ku seketela ka hina ntsombano hi mali i ndlela yin’wana ya ku tisa vukhume. Loko a hlamusela ndlela leyi swilo leswi vonakaka a swi fanele ku endliwa ha yona leswaku ku seketeriwa vugandzeri byo tenga, Yehovha u byele tiko ra Israyele a ku: “V̌a nga ka v̌a nga humeleli mahlweni ka Yehova, v̌a nga tamelanga ntšhumu: Uṅwana ni uṅwana o ta tisa nhlengo wa yena hi laha Yehova, Šikwembu ša wena, a nga ta ku katekisa ha kona.” (Det. 16:16, 17) Ku nga khathariseki leswaku vanhu a va kota ku nyika swo tala kumbe leswitsongo, gandzelo ra vona leri lunghiseleriweke ka ha ri emahlweni, a ri tsakisa eka Yehovha. Hi laha ku fanaka, vamakwerhu vo tala va khongela, va ehleketisisa hi munyikelo lowu va nga ta wu endla, hi mali kumbe hi cheke (va tsalela “Watch Tower Convention”). Xana wa va nyika vana va wena lavatsongo munyikelo va wu hoxa ebokisini?
13 Sasekisa Dyondzo Ya Xikwembu, Muponisi Wa Hina: Hi mahanyelo ya hina lamanene ni ku tikhoma ka hina lokunene, hi nga “ḍunisa e timhakeni hikwato e dyonḍo ya Šikwembu, Mukuṭuri wa hina.” (Tito 2:10) Hi marito man’wana, entsombanweni, hi nga komba leswaku hi tirhisa dyondzo ya Xikwembu evuton’wini bya hina.
14 Ku vuriwa yini hi mahanyelo ya hina? Namuntlha vanhu a va va tweli van’wana. Kambe vanhu va Yehovha, lava kongomisiwaka hi misinya ya milawu ya Matsalwa, a va ehleketi hi swilo swa vona ntsena, kambe va ehleketa ni hi swilo swa vanhu van’wana. (Flp. 2:4) Hi ehleketelela lava hi nga na vona. A hi susumeti kumbe ku titlhotlhometa loko hi fola layini ya swakudya kumbe ya tibuku. Hi ehleketelela lava kuleke ni vana lavatsongo lava va nga ha vaka va yimile elayinini swin’we ni vatswari va vona, lava va nga ha susumetiwaka hi ku olova hi lavakulu lava kumbexana va nga va voniki. Etikhefini hi kombisa moya wo rhula ni ku khoma vatirhi hi ndlela leyinene, ematshan’wini yo kariha kumbe ku va karhata loko va nga hi endleli leswi hi swi languteleke.
15 Ku tikhoma ka hina ka ku chava Xikwembu ka va dyondzisa swinene lava hi nga na vona. Eka doroba rin’wana lomu a ku ri ni ntsombano n’wexemu, phorisa leri nga ni malembe ya 21 ri ri karhi ri tirha ri vule leswi: “Ndzi tsakisiwa hi ku tikhoma ka vanhu va n’wina. [I] vanene ngopfu; va rhola thyaka handle ko komberiwa hi munhu naswona va layiwile. Ntsombano wa n’wina wu hleleke kahle.” U tlhandlekerile: “Loko vanhu va n’wina va hi vona va n’wayitela. Sweswo i swinene. Hina hi lava swona. I xikombiso xa vunghana, lexi nga tumbetiki nchumu. Naswona hi vona ndlela leyi vana va tshamaka ha yona ni vatswari va vona naswona va layiwe kahle. Wa tiva, ndzi tsakile. Swa tsakisa ku tirha laha.”
16 Vatirhi van’wana va mfumo va endle maendzo yo hlawuleka va ta eBethele ya le Brooklyn va ta hi rhamba leswaku hi khomela ntsombano edorobeni ra vona. Sosayiti yi xi amukerile xirhambo lexi xa musa, naswona vatirhi va doroba rero a va khomiwanga hi tingana. Mufambisi lonkulu wa doroba u te: “Ha tsaka swinene ku va ni ntlawa lowunene wo fana ni wa n’wina wu tsombana edorobeni ra hina. Hi endle matshalatshala lamakulu leswaku mi va laha . . . naswona a swi kona leswi nga hi tsakisaka ku tlula leswi.” Hi ku tikhoma ka vona lokunene, makwerhu un’wana ni un’wana u hoxe xandla eka vumbhoni lebyinene lebyi nyikeriweke kwalaho.
17 Xana wena hi wexe u ta sasekisa dyondzo ya Xikwembu, Muponisi wa hina, hi mahanyelo ya wena lama nga xikombiso lexinene? Hi leti tindlela to hlayanyana leti leswi swi nga endliwaka ha tona:
Swiambalo ni ku tilunghisa: Hi nkarhi lowu hi nga entsombanweni, a hi fanelanga hi anakanya leswaku hi le ku wiseni. Ematshan’wini ya sweswo hi ya eka Yehovha leswaku a hi dyondzisa. Tanihi leswi swi nga tano, xana a hi fanelanga hi ambala hi laha a hi ta ambala ha kona loko hi ya eminhlanganweni eHolweni ya Mfumo? (1 Tim. 2:9, 10) Ku engetela kwalaho, hi fanele hi anakanyisisa swinene hi leswi hi nga ta swi ambala endzhaku ka minongonoko. Loko hi vuyela ebyetlelweni bya hina, xana a swi ta saseka eka hina, ku nga khathariseki leswaku hi ni malembe mangani, leswaku hi hundzula maambalelo lama langutekaka, lama xiximekaka ya ntsombano, hi teka swiambalo leswi swi nga ta hi fanisa ni vanhu va misava lava ambalaka swilo leswi nga langutekiki? Xana leswi a swi nge kombisi leswaku swiambalo swa hina swa le minhlanganweni ko va xifaniso ntsena, ku nga ri ndlela leyi hi hanyaka ha yona? Tsundzuka, hi rhwala vito ra Yehovha, naswona un’wana ni un’wana u fanele a vona leswaku a ku tisiwi xisolo endleleni ya ntiyiso.
Lava yaka eku khuvuriweni va fanele va tsundzuxiwa leswaku eka xiendlakalo xo tano xo hlawuleka a va fanelanga va ambala swikipa leswi tsariweke swiga swa misava, mavito yo karhi kumbe vunavetisi bya bindzu. Vakulu va fanele va tiyiseka leswaku swivutiso swa nkhuvulo swi pfuxetiwa ka ha ri ni nkarhi ni leswaku un’wana ni un’wana la yaka eku khuvuriweni u byeriwa ka ha ri emahlweni leswaku u fanelekela nkhuvulo kumbe doo. (Loko mi ri karhi mi kambela swivutiso, ku nga ha va nkarhi lowunene wo nyika swiringanyeto malunghana ni maambalelo lama faneleke, lama langutekaka ya nkhuvulo.) A swi bohi leswaku lava yaka eku khuvuriweni, lava pfumeriweke hi vakulu leswaku va tsarisa entsombanweni.
Tihotela: Kombisa mihandzu ya moya loko u ri ehotela. Vatirhi va le hotela swi nga ha endleka va nga swi koti ku pfuna vanhu vo tala hi nkarhi wo koma. Lehisa mbilu, u va ni tintswalo ni ku va bumabumela hi laha swi fanelaka ha kona.
Vana va nga hoxa xandla hi ku xixima nhundzu ya le hotela ni ku yingisa milawu leyi lawulaka matirhiselo ya damu ro hlambela ni swilo swin’wana. Swi nga pfuna loko vatswari va heta nkarhi wo karhi emahlweni ka ntsombano va bula ni vana va vona hi ku tikhoma loku va faneleke va va na kona, va va tsundzuxa hi vutihlamuleri bya vona byo fambisana ni mahanyelo ya Vukreste.
Michini yo rhekhoda: Hambi leswi tikhamera ta vhidiyo ti pfumeleriwaka, ha swi tiva leswaku mi ta anakanyela van’wana. A swi nge kombi rirhandzu ku sirha van’wana lava nga kona entsombanweni loko mi rhekhoda nongonoko. Loko u kota ku rhekhoda kahle u tshame endhawini ya wena, sweswo a swi hoxanga. Hambi swi ri tano, hi kombela u tsundzuka leswaku ku hava tikhamera kumbe michini yo rhekhoda leyi nga ta tlhomiwa eka mafambiselo ya gezi kumbe ya mpfumawulo ya le ntsombanweni, kumbe ku vekiwa ka michini etiphasejini kumbe etindleleni.
Vutshamo: U komberiwa ku tsundzuka leswaku SWITSHAMO SWI NGA HLAYISERIWA NTSENA SWIRHO SWA NDYANGU WA WENA NA MANI NA MANI LOYI A NGA HA VAKA A FAMBA NA WENA EMOVHENI WA WENA. Swiyenge leswi siyeriweke lava dyuhaleke ni lava lamaleke swi ta va kona eka mintsombano hinkwayo. Hi kombela u ehleketelela lava dyuhaleke. Eminkarhini leyi hundzeke, vamakwerhu van’wana lava kuleke swi lave leswaku va lava switshamo etindhawini leti nga nghenekiki kahle hikuva vana a va tate ndhawu ya lava dyuhaleke. Hi mi tivisa leswaku a swi nge koteki ku va ni tindhawu kumbe makamara ya le tlhelweni ya lava va nga ni swiphiqo swo tanihi ku ka va nga twanani ni ku tshama etindhawini to karhi.
Swilo swa wena n’wini: Ku ringanyetiwa leswaku u hunguta swilo swihi na swihi swa wena n’wini leswi u taka na swona entsombanweni. Loko nchumu wo karhi wu nga ngheni ehansi ka xitshamo xa wena, swi nga antswa u wu siya ekaya kumbe emovheni. Swigwitsirisi leswikulu a swi pfumeleriwi etiphasejini hi mhaka ya vuhlayiseki naswona loko u swi veke eka xitshamo lexi nga ekusuhi na wena, un’wana a nga ha pfumala xitshamo.
Ntirho wa swakudya: Lunghiselelo ra swakudya ri ta va kona eka mintsombano hinkwayo. Hi khutaza hinkwavo lava va nga ta va kona leswaku va tirhisa lunghiselelo leri ra swakudya.
Eka mintsombano hinkwayo ku endliwa malunghiselelo ya ku tiyisekisa leswaku ku va ni swakudya swa vapfhumba leswi ringaneke. Laha vapfhumba vo tala va nga ta etlela eswikolweni, Komiti ya Ntsombano yi ta lunghiselela swakudya swa ni madyambu ni swakudya swo fihlula. Leswi swi ta sivela xilaveko xa leswaku vapfhumba va ta ni switofu swa gasi ni swa pharafini. Leswi swi nga vanga khombo ra ndzilo eka miako leyi vapfhumba va rhurheriwaka eka yona. Hi mi khutaza hinkwenu leswaku mi seketela lunghiselelo ra ntirho wa swakudya hi mbilu hinkwayo. Hi nga tlhela hi vula leswaku hi mhaka ya ku tlakuka ka mali ya tindhawu ta ntsombano, se swa nonon’hwa leswaku ntirho wa swakudya wu fikelela timali ta ku hakelela ndhawu. Hikwalaho ka sweswo, mi nga ha rhandza ku rhumela munyikelo ka ha ri ni nkarhi wu ya eka doroba leri vandlha ra ka n’wina ri nga ta khomela ka rona ntsombano. Minyikelo hinkwayo ya tlangeriwa swinene naswona Sosayiti yi lava ku mi nkhensa ka ha ri emahlweni hikwalaho ka nseketelo lowu wa n’wina wa ku hanana ni lowu hlanganeke wa swilaveko swa Mfumo.—Lk. 6:38.
18 Hi ku ehleketelela van’wana, hlela leswaku u hatla u fika siku rin’wana ni rin’wana, ngopfu-ngopfu hi Ravumune laha swi nga ta teka nkarhi wo lehanyana ku tlula masiku man’wana, leswaku u kuma ndhawu yo veka movha ni vutshamo.
19 Mawaku lunghelo leri hi nga na rona ro dyondzisiwa hi Yehovha! Ku tirhisa ka hina nkarhi, matimba ni rifuwo ra hina leswaku hi seketela Ntsombano wa Muganga wa “Dyondzo Ya Xikwembu” swi ta hi tisela vuyelo lebyi nga heriki bya moya, eka hina ni mindyangu yerhu.
Switsundzuxo Swa Ntsombano Wa Muganga
Xichavo Lexinene: I swa nkoka leswaku hinkwavo lava vaka kona entsombanweni va va ni xichavo lexinene, va languta ndhawu ya vugandzeri hi xichavo tanihi ‘yindlu ya Xikwembu.’ (Ps. 55:14) Hi nkarhi wa tinkulumo, tidrama, tinsimu, ngopfu-ngopfu ni swikhongelo, hi kombela u nga endli nchumu wihi na wihi lowu wu nga kavanyetaka van’wana lava yingiselaka nongonoko. Ku famba-famba handle ka xivangelo, ku dya mabulo kumbe ku tirhisa tikhamera leti tsayitaka kumbe tivhidiyo to rhekhoda hi ndlela leyi kavanyetaka lava ringetaka ku rhiya ndleve eka leswi swi vuriwaka, swi ta va swi nga kombi xichavo. Ku ehleketelela ka hina ni ku tikhoma lokunene ku ta kombisa leswaku hakunene hi tlangela dyondzo ya Xikwembu naswona hi te entsombanweni leswaku hi ta leteriwa hi Yehovha.
Byetlelo: Ntirhisano wa wena eku tirhiseni ka byetlelo lebyi lunghiseleriweke hi ntsombano wa tlangeriwa swinene. Loko u hlela ku etlela endhawini ya ntsombano naswona u nga si tiyiseka hi ndhawu, hi kombela u hatlisa u swi endla.
Vamatsalana va mavandlha va fanele va tiyiseka leswaku tifomo leti nge Room Request ti hatlisa ti rhumeriwa eka adirese leyi faneleke ya ntsombano. Loko u lava ku cinca byetlelo lebyi u lunghiseleriweke hi Ndzawulo ya Byetlelo, u fanele u hatlisa u tivisa n’wini wa ndhawu ya kona kumbe hotela ni Ndzawulo ya Byetlelo ya ntsombano leswaku kamara ra kona ri ta averiwa van’wana. Eka mintsombano yin’wana swi ya swi nonon’hwa ngopfu ku kuma byetlelo bya vapfhumba vo tala. Leswaku ku hluriwa xiphiqo lexi tikomiti ta ntsombano ti ta hlela ku hakelela swikolo swa le ndhawini ya ntsombano hi laha a ku endliwa ha kona enkarhini lowu hundzeke. Kambe, hikwalaho ka nhlayo leyi kulaka ya lava lavaka byetlelo bya muxaka lowu, sweswi hi ta tirhisa ndlela leyi yi vitaniwaka “ku etlela hi ntshungu.” Hi marito man’wana, vamakwerhu va xisati va ta etlela eka makamara yo karhi ivi vamakwerhu va xinuna va etlela eka man’wana ya vona. Kutani a swi nge he pfumeleriwi leswaku mindyangu yi etlela swin’we etlilasini yin’we. (Hi kombela mi vona Awake! ya December 22, 1991, tluka 17.) Leswi swi nga ha nonon’hwa nkarhi wun’wana kambe ha tshemba leswaku hinkwenu mi ta xi twisisa xivangelo xa leswi. Lunghiselelo leri ana se ri tirhisiwile eka mintsombano yin’wana naswona ri humelerile swinene.
Tipireme Ta Vana: Ndzawulo ya Ndzilo yi lava leswaku ti nga tisiwi eholweni ivi ti pakiwa etinyangweni ni le tiphasejini kumbe exikarhi ka tilayini ta switshamo. Tanihi leswi mintshungu leyikulu yi nga ha tlimbanaka, tipireme ta vana ngopfu-ngopfu ti ni khombo hayi eka vana ntsena kambe ni le ka van’wana lava va nga ha welaka ehenhla ka tona. Kutani hi kombela mi nga ti na tona exivandleni xa ntsombano. Hambi swi ri tano, switshamo swa vana kumbe swa le movheni swa amukeleka, hikuva swona swi nga boheleriwa eka switshamo leswi nga ekusuhi ni vatswari. Ntirhisano wa wena emhakeni leyi wu ta tlangeriwa swinene. Lomu swi kotekaka kona Komiti ya Ntsombano yi ta lwela leswaku yi hlela ku va ni kamara leri vamanana va nga khathalelaka vana va vona kona loko xilaveko xi va kona.
Nkhuvulo: Lava yaka eku khuvuriweni va fanele ku ringeta ku va eswitshan’weni swa vona exivandleni lexi vekeriweke vona, nongonoko wu nga si sungula hi Mugqivela ni mixo. Un’wana ni un’wana loyi a kunguhataka ku khuvuriwa u fanele a ta ni swiambalo leswi langutekaka swo hlambela ha swona ni thawula. Endzhaku ka nkulumo ya nkhuvulo na xikhongelo hi xivulavuri, mutshami wa xitulu wa nongonoko u ta nyika swiletelo swo koma eka lava va yaka eku khuvuriweni ivi endzhaku a tivisa risimu. Endzhaku ka ndzimana yo hetelela, varindzi va ta kongomisa lava yaka eku khuvuriweni exivandleni xa nkhuvulo kumbe emimovheni leyi nga ta va yisa kona. Tanihi leswi munhu a kombisaka ku tinyiketela hi nkhuvulo, i mhaka ya nkoka ni ya munhu hi xiyexe swin’we na Yehovha, a ku na lunghiselelo ra leswi vuriwaka ku khuvuriwa ka xinghana laha vanhu vambirhi kumbe ku tlula lava yaka eku khuvuriweni va angarhanaka kumbe va khomana hi mavoko loko va ri karhi va khuvuriwa.
Ntirho Wo Pfuneta: Mpfuno wo tirhandzela wa laveka leswaku ntsombano wa muganga wu famba khwatsi. Hambi loko u ta kota ku tirha xiyenge xin’we ntsena xa ntsombano, mintirho ya wena yi ta tlangeriwa. Loko u ta pfuna, u komberiwa ku vika eka Ndzawulo ya Ntirho wo Pfuneta loko u fika entsombanweni. Vana lava nga ehansi ka malembe ya 16 hi vukhale na vona va nga hoxa xandla eku humeleleni ka ntsombano, kambe va fanele ku tirha ni mutswari kumbe munhu un’wana lonkulu loyi a nga ni vutihlamuleri.
Tinsimu: Tanihi leswi ku yimbelela ku nga xiphemu xa vugandzeri byerhu, mi khutaziwa hinkwenu leswaku mi titoloveta tinsimu leti landzelaka leti ti nga ta va xiphemu xa nongonoko: 91, 59, 111, 148, 191, 113, 114, 164, 183, 166, 156, 202, 105, 151, 181, 70, 42, 106, 53, 79 na 85. (Swi nga va swinene leswaku mavandlha ma sungula ku titoloveta tinsimu, hambi ko va rin’we endzhaku ka nhlangano wun’wana ni wun’wana.)
Nhlangano Wa Ntirho Wa Le Bethele: Hi siku ra vumbirhi ku ta va ni nhlangano wa vahuweleri vahi ni vahi lava tinyiketeleke lava nga exikarhi ka malembe ya 19 na 35 hi vukhale, lava tsakelaka ku nghenela ntirho wa le Bethele. Switiviso swi ta endliwa entsombanweni malunghana ni nkarhi ni ndhawu ya nhlangano lowu.
Tibeji: U komberiwa ku ambala beji leyi khavisiweke hi ndlela leyi hlawulekeke entsombanweni ni loko u ri karhi u ya ni ku vuya exivandleni xa ntsombano. Leswi hakanyingi swi endla leswaku hi kota ku nyikela vumbhoni lebyinene loko hi ri karhi hi famba. Tibeji ti fanele ku kumiwa hi ku tirhisa vandlha ra ka n’wina, hikuva ti nga ka ti nga kumeki emintsombanweni. (Hi kombela leswaku mavandlha ma xiya leswi: Tioda leti fikaka endzhaku ka November 1, 1993 a ti nge khathaleriwi. Vona Vutirheli Bya Hina Bya Mfumo bya August 1993, ehansi ka Switiviso.)
Ku Titivisa Ka Wena N’wini: Ku tlhandlekela eka beji ya Ntsombano wa “Dyondzo Ya Xikwembu,” un’wana ni un’wana u khutaziwa leswaku a tshama a ri ni khadi ra Advance Medical Directive. Swirho swa ndyangu wa Bethele ni maphayona na vona va fanele va ta ni makhadi ya vona ya ku titivisa.
Marito Yo Tsundzuxa: Ku nga khathariseki leswaku u paka kwihi, u fanele ku khiya movha wa wena minkarhi hinkwayo naswona u nga tshuki u siya nchumu wo karhi lowu vonakaka endzeni. Loko swi koteka tshama u khiyele mindzhwalo ya wena endzeni ka buti ya movha. Nakambe, tivonele eka makhamba ni vasechi lava kokiwaka hi tinhlengeletano letikulu. Leswi swi katsa ku ka u nga siyi nchumu wa nkoka ku nga ri na munhu eswitulwini emintsombanweni. Ku ve ni swiviko swi nga ri swingani swa vanhu vo biha lava va ringetaka ku kucetela vana leswaku va huma exivandleni xa ntsombano. Tivoneleni.
Ku vikiwe leswaku tihotela tin’wana ti ti kombisa mahala tifilimi ta thelevhixini leti kombaka mahanyelo yo biha kumbe leti kombaka vanhu lava nga ambalangiki. Leswi swi kandziyisa xilaveko xo xiya ku hlalela ka vana TV eka tindhawu leti to etlela.
Vamakwerhu van’wana ni vanhu lava tsakelaka va be riqingho ri ya eka mufambisi wa lunghiselelo ra ntsombano va lava ku tiva nkarhi wa ku sungula ka minongonoko ni timhaka tin’wana. Mi nga tshuki mi swi endla. Loko rungula mi nga ri kumi eka Vutirheli Bya Hina Bya Mfumo, mi fanele ku tsalela eka adirese ya ntsombano leyi mi nga yi kumaka eka matsalana wa vandlha ra ka n’wina.