Ku Fambisa Swikhokhelo Hi Yindlu Na Yindlu
1 Xikongomelo xa Xalamuka! xi vekiwe erivaleni eka tluka 4 ra nkandziyiso wun’wana ni wun’wana: “Magazini lowu wu aka ku tiyiseka hi xitshembiso xa Muvumbi xa misava leyintshwa leyi nga ni ku rhula ni leyi sirhelelekeke, ku nga si hundza rixaka leri voneke swiendlakalo swa 1914.” Hakunene magazini lowu wu fanele ku hangalasiwa swinene hi laha hi nga kotaka ha kona evutirhelini bya hina bya yindlu na yindlu! Hi October hi ni lunghelo ro fambisa magazini lowu wo saseka hi xikhokhelo eka vanhu vo tala hi laha swi kotekaka ha kona.
2 Xalamuka! i magazini wa nkoka wo pfuxa ku tsakela ka vanhu lava kumbexana va nga swi rhandziki swilo swa moya. Loko u hlaya nkandziyiso wun’wana ni wun’wana, languta tinhla leti faneleke leti u nga ti avelaka van’wana. Vahuweleri van’wana va tsala tinhla eka kopi ya vona, naswona va nga si ya entirhweni wa nsimu ni nkandziyiso wolowo, va kambela leswi va swi tsaleke leswaku va ta tsundzuka tinhla to karhi leti va nga ta ti avela vini va miti.
3 Hi nga ha lava ku sungula rungula ra hina hi ku endla nhlamuselo yo kongoma emhakeni leyi hlamuseriwaka enkandziyisweni wa Xalamuka! lowu hi wu tirhisaka.
Endzhaku ka xingheniso xo koma hi nga vulavulela magazini kumbexana hi ku vula hi ku:
◼ “Xihloko lexi xa Xalamuka! xi ni vuxokoxoko bya mhaka leyi.” Kutani u hlaya xivulwa xin’we kumbe swimbirhi leswi u swi hlawuleke, ivi u ya emahlweni u ku: “Tanihi leswi u vonakaka u yi tsakela mhaka leyi, xana u nga swi tsakela ku hlaya xihloko lexi swin’we ni swihloko swin’wana leswi fikeke hi nkarhi swa nkandziyiso lowu wa Xalamuka!? Loko swi ri tano, ndzi nga tsakela ku hlela leswaku u endla xikhokhelo xa magazini lowu hi munyikelo wa R9,50 ntsena hi lembe. Kutani u ta amukela minkandziyiso ya 12 hi poso.” Loko n’wini wa muti a nga yi amukeli nyiko ya xikhokhelo, n’wi khutaze ku teka timagazini timbirhi. Loko n’wini wa muti a teka timagazini, swi nga ha va swi fanerile ku vula swo fana ni leswi: “Hi kombela munyikelo wa R1,60 wo hlanganisa nxavo wo kandziyisa timagazini leti timbirhi.”
4 Loko n’wini wa muti a kombisa ku tsakela swilo swa moya, hi nga ha pfula eka tsalwa ro tanihi 2 Timotiya 3:1-5 malunghana ni masiku ya makumu. Endzhaku ka sweswo, leswaku hi pfuxa ku tsakela ka yena timagazini ta hina, hi nga ha hlaya eka tluka 2 ra nkandziyiso wa sweswinyana wa Xihondzo xo Rindza, eka xiyenge lexi sungulaka hi ku: “Xikongomelo xa Xihondzo xo Rindza.” Endzhaku ka sweswo, n’wi fambisele xikhokhelo.
5 Eka masimu yo tala vanhu va karhateka hi swiyimo swa timali leswi yaka emahlweni swi biha kumbe ku andza ka vugevenga ni madzolonga. U nga ha ku:
◼ “Hi bula ni vaakelani va hina hi langutelo lerinene ra vumundzuku. Xana u ehleketa yini hi vumundzuku bya hina lebyi taka? Xana na wena wa karhateka hi swiyimo swa timali leswi yaka emahlweni swi biha kun’we ni ku andza ka vugevenga ni madzolonga? [Yimela nhlamulo.] Xana u vona onge u kona loyi a nga lulamisaka swiphiqo leswi? [Yimela nhlamulo.] Bibele ya pfuna swinene emhakeni leyi.” Tirhisa tsalwa rin’we kumbe ku tlula eka lawa ma nga ebukwini leyi nge Reasoning matluka 227-32, u hlamusela leswi Mfumo wa Xikwembu wu nga ta swi endlela vanhu. Komba n’wini wa muti xihloko lexi faneleke eka Xihondzo xo Rindza. Fambisa xikhokhelo.
6 Loko hi famba hi yindlu na yindlu, a hi tsundzukeni leswaku hi ni switirho swimbirhi leswinene emisaveni swa ku pfuna vanhu va endla nhluvuko wa moya, Xihondzo xo Rindza ni Xalamuka! A hi tikarhateleni ku endla vini va miti va tsakela timagazini leti naswona hi ti fambisa nkarhi wun’wana ni wun’wana.