Xana U Anakanyisisa Hi Matsalwa?
1 Socha leri tiyeke leri yaka enyimpini ri hloma ri helela, ri sirheleleka. Muaki la nga ni vutshila loyi a lunghiselelaka ku endla ntirho lowukulu wo aka u rhwala switirho leswi lavekaka leswaku a heta ntirho wolowo. Nandza wa Yehovha loyi a yaka evutirhelini bya nsimu u ta rhwala “fumu” rakwe a tlhela a ri tirhisa kahle loko a kuma nkarhi. (Ef. 6:17) Xana leswi swi tano eka wena? Loko u hlanganyela ensin’wini, xana u pfumelela Rito ra Xikwembu ri vulavula, leswaku moya lowo kwetsima wu khumba timbilu ta vayingiseri va wena?—Swiv. 8:1, 6.
2 Ku chumayela a swi olovi nkarhi wun’wana. Eka masimu man’wana vanhu a va kumeki emakaya, kasi lava va kumiwaka hakanyingi va kumeka va khomekile, leswi hi nyikaka nkarhi wutsongo wo va ni mabulo yo leha ya Bibele. Tanihi leswi Bibele yi nga buku ya hina leyikulu, xana hi nga yi tirhisa njhani hi laha ku engetelekeke ensin’wini kutani hi endla leswaku rungula ra yona leri huhuteriweke ri khumba timbilu ta lava hi yingisaka?
3 Nkarhi Wun’wana Ni Wun’wana: Eka yindlu yin’wana ni yin’wana hi ta tsakela ku tirhisa Bibele leswaku hi khutaza n’wini wa muti. Hi fanele hi tiyimisela ku swi endla ku nga khathariseki leswaku hi fambisa buku yihi. Loko munhu a khomekile naswona ku nga ri na nkarhi lowu ringaneke wo pfula Bibele hi hlaya ndzimana yin’we kumbe timbirhi, xana u nga tshaha tsalwa kumbe u ri vula hi ku komisa u nga si fambisa buku? Sweswo swi nga ha endla munhu a yimanyana a yingisa.—Hev. 4:12.
4 Hi xikombiso, loko u fambisa Xalamuka! ya December 8, 1993, leyi nga ni xihloko lexi nge “Misava Leyi Nga Riki Na Vuvabyi,” endzhaku ko kombisa xifaniso xa xifunengeto, vutisa xivutiso lexi, “Xana wa tshemba leswaku wu ta va kona nkarhi lowu vuvabyi byi nga ta hela, nkarhi lowu un’wana ni un’wana a nga ta va ni rihanyo lerinene?” Hambi o hlamurisa ku yini, u nga swi kota ku hlaya eBibeleni ya wena hi ku kongoma kumbe u vula tsalwa hi ku komisa, tanihi Esaya 33:24 kumbe Nhlavutelo 21:4. Hi ndlela leyi u pfumelela Rito ra Xikwembu ri vulavula.
5 Eka Maendzo Yo Vuyela: Hi fanele ku lunghiselela hi nga si endla maendzo yo vuyela. Hambi swi ri tano, hakanyingi ku ta humelela timhaka leti hi nga lunghiselelangiki ku bula ha tona. Hi kona laha Reasoning From the Scriptures yi nga vaka xitirho xa risima. Ku tshaha kumbe ku hlaya ka hina matsalwa lama seketelaka mhaka, lama humaka ebukwini leyi nge Reasoning swi ta pfuna vanhu ku vona leswaku hi vatirheli va Xikwembu ku nga ri vaendli va bindzu ro biha hi Rito.—2 Kor. 2:17.
6 Loko u vuyela eka munhu loyi u nga bulangiki na yena hi mhaka yo karhi, u nga ha pfula buku leyi nge Reasoning eka nhloko-mhaka leyi faneleke, tanihi “Jesus Christ,” “Last Days,” kumbe “Resurrection,” kutani u tirhisa xin’wana xa swihlokwana leswi nga kwalaho leswaku u sungula bulo. Vini va miti va nga ha komberiwa ku hlaya matsalwa man’wana eTibibeleni ta vona. Hi ndlela yoleyo Bibele yi ta hanya eka vona, naswona va ta kuma moya wo kwetsima wa Yehovha loko va voyamele eka leswinene.
7 Vutihlamuleri bya hina bya ku chumayela mahungu lamanene ni ku tsundzuxa lavo biha i byikulu. I rungula ra Yehovha, a hi ra hina. Pfumelela Rito rakwe, tlharhi ra moya, ri ku pfuna.