Hlawula Swihloko Leswi Nga Ta Pfuxa Ku Tsakela Lokukulu Ka Vanhu
1 Ku fana ni vahloti lava copaka hi vukheta hi vurhwa bya vona, vahuweleri ni maphayona yo tala evandlheni va humelela swinene loko va tirhisa swihloko leswi hlawuriweke swa Xihondzo xo Rindza ni Xalamuka! leswaku va fikelela swilaveko swo hlawuleka swa vanhu lava nga ensin’wini ya vona. Va lavisisa hi vukheta leswaku i vamani lava ngopfu-ngopfu va nga ta tsakela ku hlaya swihloko swo karhi swa timagazini. Xana leswi va swi endlisa ku yini?
2 Xo sungula va hlaya nkandziyiso wun’wana ni wun’wana ku sukela eku sunguleni ku ya fika emakumu. Kutani va tivutisa xivutiso lexi nge, Xana i munhu wa muxaka muni loyi xihloko lexi xi nga ta n’wi tsakisa? Kutani va tikarhatela ku endzela vanhu lava nga swi tsakelaka ku hlaya xihloko xolexo. Loko va anakanya leswaku nkandziyiso wo karhi wu ta tsakeriwa hi vo tala ensin’wini ya vona, va oda nkandziyiso wa kona hi vunyingi.
3 Timagazini Ta Hina Ta Xiximiwa Swinene: Un’wana wa vaendli va swikhokhelo swa hina wa le Nigeria la tirhaka eka ndzawulo ya timagazini leti hlayiwaka ngopfu emisaveni u vule leswi malunghana ni Xalamuka!: “Hoyohoyo eka timagazini letinene swonghasi emisaveni leti endleriweke ku hlayiwa hi vanhu hinkwavo.” Muhlayi la hisekaka wa timagazini ta hina u te: “Mayana tindzalama to hlamarisa ta vutlhari bya risima! A swi endleki leswaku mhaka leyi ndzi tsakisaka yi nga hlamuseriwi eka wun’wana wa [timagazini] leti.”
4 Timagazini leti ti vulavula hi timhaka to tala swinene, to tanihi Bibele, swiendlakalo swa misava, timhaka ta ndyangu, swiphiqo swa ntshamisano, matimu, sayense, vutomi bya swiharhi ni swimilana, ku boxa swi nga ri swingani. Entiyisweni munhu u tsakela ku hlaya nchumu lowu fambisanaka ni swilaveko, swiyimo kumbe ntirho wakwe lowu a wu thwaseleke. Tanihi leswi hi vulavulaka ni vanhu vo tala, un’wana ni un’wana u ni swiyimo ni swiphiqo leswi khumbaka yena n’wini, ku hlawula swihloko leswi pfuxaka ku tsakela ka vanhu lava hi hlanganaka na vona hi ku kongoma swa pfuna swinene.
5 Xiya leswi humeleleke loko Timbhoni timbirhi ti fambise Xalamuka! ya September 8, 1996 eka mutsari wa phepha-hungu. U tsarile: “A ndzi nga si kuma ni nkarhi wo vula leswaku a ndzi tsakeli loko un’wana wa vona a ku: ‘Ku ni xihloko lexi vulavulaka hi Maindiya ya le Amerika. Ha swi tiva leswaku i khale u tsala swo tala hi mhaka leyi.’” U teke timagazini naswona hi nkarhi wo fihlula, u hlaye mhaka leyi vulavulaka hi Maindiya, ivi endzhaku a pfumela leswaku “a ti ri letinene” ni “ku tshembeka hi ndlela leyi hlamarisaka.”
6 I Yini Lexi Tsakisaka Vanhu eNsin’wini Ya Ka N’wina? I yini lexi u xi voneke eka timagazini ta tin’hweti leta ha ku hundzaka lexi nga ha tsakisaka vini va switolo ni vanhu lava dyondzekeke ensin’wini ya ka n’wina kumbe vaakelani va wena, vatirhi-kuloni ni lava u dyondzaka na vona xikolo? I yini lexi nga tsakisaka ngopfu magqweta, vadyondzisi, vatsundzuxi va mindyangu ni va swikolo, vatsundzuxi va vantshwa, lava pfunaka hi ku endla mintirho ya tiko ni vativi va ta rihanyo? Ku anakanya hi swiyimo swo hambana-hambana swa vanhu lava u chumayelaka eka vona loko u ri karhi u kambisisa nkandziyiso wun’wana ni wun’wana swi ta ku nyika tindlela letinene to hangalasa rito ra ntiyiso.
7 Loko u kuma munhu la kombisaka ku tsakela eka xihloko xo karhi xa Xihondzo xo Rindza kumbe xa Xalamuka! naswona a amukela magazini, u nga ha ku: “Loko ndzi vona xihloko enkandziyisweni lowu landzelaka lexi ndzi vonaka onge xi ta ku tsakisa, ndzi ta tsakela ku ku tisela kopi ya wona.” U nga ha kota ku nghenisa munhu loyi eka ntila wa wena wa timagazini, ivi u hambeta u tlhelela eka yena ni timagazini leta ha ku humesiwaka. Leswi swa fana ni leswi hi swi endlaka eka vanhu lava va hi pfumeleleke leswaku hi tlhela hi vuya, lava va nga ha vaka va tsakela muxaka wo karhi wa swihloko leswi humelelaka eka timagazini ta hina.
8 Vana Ni Xikongomelo Hi Tlhelo Ra Moya: Malembe ma nga ri mangani lama nga hundza, wanuna un’wana la rhandzaka ntirho-vutomi u kume magazini wa Xalamuka! lowu vulavulaka hi mhaka leyi n’wi tsakisaka. Hambiswiritano, wanuna loyi wa vukhongeri u tlhele a hlaya nkandziyiso wa Xihondzo xo Rindza lowu fambisanaka na wona, lowu nga ni xihloko lexi n’wi susumeteleke ku kambisisa ripfumelo rakwe eka dyondzo ya Vunharhu-un’we leyi a yi namarheleke nkarhi wo leha evuton’wini byakwe. U khuvuriwe endzhaku ka tin’hweti ta tsevu! Hikwalaho, u nga kanakani ku nghenisa vahlayi va timagazini ta hina emabulwini ya Matsalwa. U nga ha n’wi kombisa broxara leyi nge I Yini Leswi Xikwembu Xi Swi Languteleke Eka Hina? ivi hi timinete ti nga ri tingani u burisana na yena hi dyondzo yin’we eka riendzo rin’wana ni rin’wana loko u n’wi yisela minkandziyiso leyintshwa ya timagazini.
9 Ehleketisisa kahle leswaku i vamani lava nga tsakelaka ku va ni minkandziyiso ya sweswinyana ya Xihondzo xo Rindza ni Xalamuka! exikarhi ka lava u tlhelelaka eka vona ni ka van’wamabindzu. Kutani tikarhatele ku va fikelela. Tihlanganise ni vanhu vo tala hilaha u nga kotaka hakona hi ku tirhisa timagazini leti ta risima. Naswona u nga tshuki u rivala leswaku loko u tikarhatela ku pfuna vanhu vo tala leswaku va hlaya timagazini ta hina, u “tšukumeta v̌uŝa bya wena e henhla ka mati.” Hi ku famba ka nkarhi, u nga ha humelela eku kumeni ka vadyondzisiwa-kuloni va nkarhi lowu taka.—Ekl. 11:1, 6.