Bokisi Ra Swivutiso

◼ Xana i swinene ku hlengeleta rungula leri ku nga ta buriwa ha rona eka Xikolo xa Vutirheli bya le Tilweni, u ri nyika vahuweleri van’wana?

I swinene loko rungula leri ri ta tirhisiwa ntsena hi swirho swa ndyangu ni vanghana va wena lavakulu. Kambe, rungula leri a ri fanelanga ri nyikiwa mani na mani kumbe ri xavisiwa hikuva sweswo ku ta va ku ri ku tlula milawu ya mpfumelelo wo kandziyisa.—Rhom. 13:1.

Tinkulumo tin’wana ta Xikolo xa Vutirheli bya le Tilweni to va ni nhloko-mhaka ntsena; a ku na swikombo swa laha rungula ra kona ri humaka kona. Xana swi ta pfuna loko muhuweleri un’wana a hlengeleta nxaxamelo wa swikombo kumbe rungula leri nga tirhisiwaka eka tinkulumo to tano? Doo! Nakambe a swi fanelanga leswaku ku hlengeletiwa tinhlamulo ta Bulo Ra Mpfuxeto wa Xikolo xa Vutirheli bya le Tilweni, ivi ri nyikiwa van’wana hikuva sweswo a swi nge va pfuni leswaku va tsundzuka tinhla ta nkoka. Swichudeni swi fanele swi tiendlela ndzavisiso hi swoxe. Leyi i ndlela ya nkoka yo letela leyi Yehovha a yi tirhisaka hi lunghiselelo ra xikolo, leswaku hi kota ku vulavula hi “ririmi ra lava dyondzisiweke.”—Esa. 50:4.