“Timhaka Ta N’wina Hinkwato A Ti Endleke Hi Rirhandzu”

¹ “Swa tsakisa hakunene ku va ni vanhu va ka n’wina; va anakanyela vanhu van’wana ni ku va xixima swinene.” Marito wolawo ma vuriwe hi ndzawulo ya ntsombano ni ya vaendzi edorobeni ra United States leri a ri rhurhele yin’wana ya mintsombano ya hina ya muganga. Swa hi khutaza ku amukela xibumabumelo xo tano xa ndlela leyi hi tikhomaka ha yona evanhwini. Leswi swi kombisa leswaku hinkwerhu hi ‘endla leswaku timhaka ta hina ti endleka hi rirhandzu.’ (1 Kor. 16:14) Hi nkarhi lowu fanaka, ku ni swilo leswi nga rhurisiki mbilu, leswi loko swo honisiwa swi nga ta onha ndhuma leyinene ya vanhu va Xikwembu.

² Ku Lulamisa Byetlelo: Edorobeni rin’wana ni rin’wana ra ntsombano, ku simekiwe Ndzawulo ya Byetlelo, leyi nga ta burisana ni vini va tihotela, va tihositele ni vanhu van’wana mayelana ni mali ya byetlelo leswaku un’wana ni un’wana a kota ku va kona entsombanweni. Van’wana va rhurheriwa eTiholweni ta Mfumo. Vamakwerhu va tirhisa nkarhi wo tala ni matshalatshala leswaku hi ta vuyeriwa. Hikwalaho hi fanele ku tlangela byetlelo lebyi hi nyikiwaka byona.

³ Hi kombela mi tsundzuka leswaku loko hotela yi nyika vaendzi swakudya nimixo, swi fanele swi tirhiseriwa xikongomelo xexo—ku nga swakudya swa ku kombisa ku tlangela eka lava va tshamaka kwalaho. A hi swa ku longiwa hi ya swi nyika vanghana entsombanweni.

⁴ Ku Endlela Vanhu Hinkwavo Leswinene: Ku rhandza Yehovha ni vaakelani va hina swi hi susumetela ku va ni mikhuva leyinene ni mahanyelo lama nga xikombiso lexinene. (Mat. 22:37-39; Yak. 3:13) Bibele yi hi khutaza ku rhandza ni ku anakanyela vanhu hinkwavo. (Gal. 6:10) Kunene nsinya wolowo wa nawu wa tirha loko swi ta emhakeni ya ku tshama etihotela. Ku tsandzeka ku khomisana ni vini va ndhawu ku onha ndhuma ya hina leyinene, ku ri veka ekhombyeni lunghiselelo ra leswaku hi kuma tindhawu leti hi mali ya le hansi naswona ku pfuxa rivengo exikarhi ka vamakwerhu.

⁵ Timbhoni ti tiviwa hi mpimanyeto wa tona wa le henhla wa ku rhandza ku basa. Komiti yin’wana ya Ntsombano yi vikile, “Eka hositele yin’wana munhu un’wana la ungamelaka eku sunguleni u ale ku tirhisana ni vamakwerhu. Kambe loko a vona ndlela leyi va tikhomeke ha yona, hakatsongo-tsongo vonelo rakwe ri sungule ku cinca. Nimixo u te ni ntlawa wa vanhu leswaku va ta basisa hositele, a langutele leswaku yi ta sala yi thyakile, hilaha mintlawa yin’wana yi endleke hakona. U sale a tikhome nomu loko a kuma leswaku vamakwerhu va siye ndhawu yoleyo yi base paa! U te, ‘A ndzi si tshama ndzi vona vanhu vo fana ni lava. Ndzi kombela leswaku mi endla xitiviso entsombanweni wa n’wina mi va nkhensa hikwalaho ka vumunhu bya vona lebyinene!’” Onge hinkwerhu hi nga hlayisa mpimanyeto lowu wa le henhla wa ku tenga, laha ntsombano wu nga ta khomeriwa kona ni laha hi nga ta etlela kona.

⁶ Matsalana wa vandlha rin’wana ni rin’wana u fanele ku oda tifomo ta swikombelo swa byetlelo eka Sosayiti loko ku ri leswaku a nga si endla tano. Tifomo leti ti fanele ti tatiwa hi muhuweleri kutani a ti tlherisela eka matsalana, ivi yena a ti rhumela laha ntsombano wolowo wu nga ta khomeriwa kona. Papila leri yaka Eka Mavandlha Hinkwawo ra July 31, 2000 ri tamele vuxokoxoko bya kona.

⁷ Hi swi langutele hi mahlo-ngati ku ya eNtsombanweni wa Muganga wa “Vaendli Va Rito Ra Xikwembu.” Xana se u endle malunghiselelo ya wena hinkwawo ku katsa ni byetlelo ni lexi u nga ta famba hi xona? Onge ndlela leyi hi nga ta tikhoma ha yona laha hi nga ta etlela kona ni le dorobeni ra ntsombano, minkarhi hinkwayo swi nga kombisa ntiyiso lowu nga etimbilwini ta hina ni rirhandzu ra hina hi Muvumbi wa hina.