‘Lwela Ku Endla Leswinene Minkarhi Hinkwayo’
1 Ku hanya hi ndlela ya Vukreste swi vula ‘ku lwela ku endla leswi nga swinene minkarhi hinkwayo eka vanhu hinkwavo.’ (1 Tes. 5:15) Loko hi ya emintsombanweni ya hina ya muganga, hi pfulekeriwa hi tindlela to tala to endlela van’wana leswinene. Hi minkarhi yoleyo, hi voniwa hi vanhu va misava naswona hinkwavo lava hi hlanganaka na vona va anakanya swo karhi hi hina, hi ku ya hi ndlela leyi hi va khomaka ha yona. Leswaku hi tshama hi ri ni ndhuma leyinene tanihi Timbhoni ta Yehovha, hi fanele hi kombisa hi swiendlo swa hina leswaku hi ‘xixima vanhu va mixaka hinkwayo.’ (1 Pet. 2:17) Sweswo swi katsa ku “nga veki tihlo etimhakeni ta [hina] ntsena, kambe ni le timhakeni ta van’wana.” (Filp. 2:4) Anakanyisisa hi ndlela leyi leswi swi tirhaka ha yona eka malunghiselelo ya byetlelo entsombanweni.
2 Xana se u ma endlile malunghiselelo ya byetlelo? Loko u nga si ma endla, kombela fomo leyi nge Room Request eka matsalana wa vandlha ra ka n’wina, yi tate kutani u yi tlherisela eka yena leswaku a yi rhumela. Ku nga khathariseki muxaka wa byetlelo lebyi u byi lavaka, tsundzuka tinhla leti landzelaka loko swi ta laveka: (1) Lehisa mbilu u tlhela u xixima vatirhi. (2) Landzela milawu ya matirhiselo ya ndhawu yoleyo. (3) Siyela vatirhi nyiko yo nkhensa.
3 Ku Dyondzisa Vana Ku Endla Leswinene: Minkarhi yin’wana vana lava siyiweke va nga ri na nkongomiso wa munhu lonkulu endhawini ya byetlelo va vange swiphiqo. (Swiv. 29:15) Minkarhi yin’wana vatswari va khomeke hi mintirho yin’wana kutani va siya vana va ri voxe ekamareni, edan’wini ro hlambela kumbe kun’wana endhawini leyi va rhurheriweke eka yona. Vana van’wana a va nga lawuleki lerova va kavanyeta ni ku karhata vaendzi van’wana, lava nga Timbhoni ni lava nga riki Timbhoni.
4 Vatswari, swi ta va swinene leswaku loko mi nga si ya entsombanweni, mi tinyika nkarhi wo vulavula ni vana va n’wina hi mahanyelo ya Vukreste lawa va languteriweke leswaku va ma kombisa minkarhi hinkwayo etindhawini hinkwato. (Efe. 6:4) Hi xikombiso, va byeleni leswaku rirhandzu ra xiviri ra Vukreste “a ri tikhomi hi ndlela leyi nga tengangiki, a ri lavi leswi vuyerisaka rona ntsena, a ri hlundzuki.” (1 Kor. 13:5) Vatswari va nga endla leswaku marito lawa ma va ni ntikelo hi ku vekela vanhu hinkwavo xikombiso lexinene. Vana, mi nga endla leswinene hi ku yingisa vatswari va n’wina, mi xixima swilo swa le hotela ni ku anakanyela lava nga ekusuhi na n’wina. (Kol. 3:20) Loko hinkwerhu hi lwela ku endlela vanhu hinkwavo leswinene, hi ta va hi “sasekisa dyondzo ya Muponisi wa hina, Xikwembu, eka swilo hinkwaswo.”—Tito 2:10.
5 Ku tikhoma ka hina lokunene a ku vi ni vuyelo lebyinene eka lava va hi vonaka ntsena, kambe ni le ka lava va hi sandzaka hikwalaho ka swivangelo swo hambana-hambana. Eka xin’wana ni xin’wana lexi hi xi endlaka entsombanweni ni le ndhawini leyi ntsombano wu khomeriwaka eka yona—hambi hi famba exitarateni, hambi hi ri eku dyeni ekhefini, hambi hi titshamerile laha hi rhurheriweke kona, kumbe hi chumayela hi xitshuketa—mavulavulelo ni swiendlo swa hina swa Vukreste swi fanele swi kombisa leswaku hi lwela ku endla leswinene.
[Bokisi leri nga eka tluka 4]
Tsundzuka:
■ Lehisa mbilu u tlhela u xixima vatirhi.
■ Yingisa milawu ya ndhawu ya byetlelo leswaku ku vuyeriwa vaendzi hinkwavo.
■ U nga tlangisi swakudya swo fihlula leswi u nyikiweke swona.
■ Swi lawule hi mfanelo leswi vana va wena va swi endlaka.