Mahanyelo Ya Wena A Ma Ve Lama Kwetsimaka Minkarhi Hinkwayo
1. Ha yini swi ri swa nkoka leswaku hi va lava kwetsimaka eka hinkwaswo leswi hi swi endlaka?
1 Tanihi malandza ya Xikwembu lexi kwetsimaka, ku nga Yehovha, hi lwela ku va lava kwetsimaka eka hinkwaswo leswi hi swi endlaka. (1 Pet. 1:15, 16) Leswi swi vula leswaku hi lwela ku hanya hi milawu ya Yehovha eka xin’wana ni xin’wana lexi hi xi endlaka evuton’wini bya hina. Ntsombano wa muganga wa nan’waka wu ta hi nyika lunghelo ro hlawuleka ra leswaku hi va lava kwetsimaka eka hinkwaswo leswi hi swi endlaka.
2. Xana hi nga ma kombisa njhani mahanyelo lamanene lomu hi etlelaka kona?
2 Malunghiselelo Ya Byetlelo: Ndzawulo ya byetlelo ya muganga wa ka hina yi heta nkarhi wo tala yi ri karhi yi lunghiselela ndhawu leyi faneleke ya byetlelo bya vatsombani. Hambi u ya etlela ehotela, ekharavhanini kumbe ekaya ra munhu, hi kombela u lava byetlelo lebyi u nga ta byi tirhisa ntsena. Laha swi lavekaka, hakela mali yo vekisa leyi lavekaka ka ha ri ni nkarhi. Etihotela tin’wana hi minkarhi leyi ku ngheniwaka ha yona ni leyi ku humiwaka ha yona ku va ku ri ni vanhu vo tala swinene, hikwalaho swi tsakisa swonghasi loko ho kombisa mihandzu ya moya. Loko u nga ha byi lavi byetlelo lebyi u byi kombeleke hatlisa u va tivisa. Tsundzuka ku nyika vatirhi mali yo va nkhensa.
3. Xana mahanyelo ya vantshwa lava nga Timbhoni ma nga va khumba njhani van’wana?
3 Ku tikhoma ka hina lokunene i yin’wana ya tindlela leti hi chumayelaka ha tona. N’wexemu muntshwa un’wana la nga Mbhoni u kombele phepha ni xo tsala eka matsalana wa hotela endzhaku ka sweswo a n’wi nkhensa. Sweswo swi tsakise matsalana yoloye, naswona van’wana va n’wi twe a ku: “Entiyisweni, a va ha ri kona vantshwa lava nga ni mahanyelo lamanene.” Hambiswiritano, vana lava vatswari va vona va nga va vekiki tihlo va voniwe va ri karhi va tlangela emadan’wini yo hlambela, etilifitini, va tlatlarhuka naswona va ri karhi va tsutsuma-tsutsuma lomu tiphasejini. Vatswari a va fanelanga va tshika vana va vona va tilawula kambe va fanele va va veka tihlo leswaku va tiyiseka leswaku ku tikhoma ka vona ku dzunisa Yehovha.—Swiv. 29:15.
4. Hi nga kombisa njhani leswaku ha va anakanyela van’wana loko hi ri karhi hi dya exitolo xa swakudya?
4 ESwitolo Swa Swakudya: Un’wana wa vatirhi va xitolo xa swakudya xa le kusuhi ni laha ntsombano wun’wana a wu khomeriwe kona, u te: “Timbhoni ti hambanile ni vanhu lavan’wana. Ta va xixima vanhu.” Ku tikhoma hi ndlela leyinene swi katsa ku nga tlatlarhuki loko hi vulavula kumbe ku nga hlekeli ehenhla lerova hi kavanyeta van’wana lava na vona va nga eku dyeni. Nakambe hi fanele hi tsundzuka leswaku etindhawini to tala i mukhuva wa kona ku nyika vatirhi mali yo nkhensa, hi ku ya hi ntirho lowu va mi endleleke wona. Phela, hambiloko hi dya kumbe hi nwa, hi lava ku endla hinkwaswo leswaku hi vangamisa Xikwembu.—1 Kor. 10:31.
5. Xana mahanyelo lamanene ma katsa yini laha ntsombano wu nga ta va wu khomeriwe kona?
5 ENtsombanweni: Mahanyelo ya hina lamanene ma fanele ma vonaka, ngopfu-ngopfu laha ntsombano wu khomeriwaka kona. Hi kombela leswaku u khomisana ni varindzi loko va ku kongomisa laha mimovha yi pakaka kona ni laha vayingiseri va nga ta va va tshame kona. (Hev. 13:17) Swirho swa ndyangu swi fanele swi tshama swin’we ku ri ni ku tshika vana va ya tshama va ri voxe ni tintangha ta vona, ku katsa ni vana va kondlo-a-ndzi-dyi. Michini yihi ni yihi yo rhekhoda a yi fanelanga yi tlhomiwa eka gezi ra ndhawu ya ntsombano kumbe eka fambiselo ra mpfumawulo naswona yi fanele yi tirhisiwa hi ndlela leyi nga taka yi nga kavanyeti van’wana. Loko u lava ku teka swifaniso, u nga tshuki u tirhisa rivoni ra khamera loko minongonoko yi ri karhi yi ya emahlweni. Swiciyoti ni tiselfoni swi fanele swi timiwa leswaku swi nga kavanyeti munhu. Loko un’wana o humeleriwa hi mhangu kwalaho, tivisa murindzi kumbe Ndzawulo ya Xilamulela-mhangu.
6. Xana swiendlo swa hina emintsombanweni swi kwetsimisa Xikwembu hi ndlela yihi?
6 Mahanyelo ya hina ma hi endla hi va lava hambaneke ni vanhu van’wana kutani ma kwetsimisa Xikwembu xa hina. (1 Pet. 2:12) Swiendlo swa Timbhoni ta Yehovha swi ta voniwa hi mani na mani entsombanweni. Hikwalaho, tiyimisele leswaku mahanyelo ya wena ma va lama kwetsimaka minkarhi hinkwayo.
[Bokisi leri nga eka tluka 5]
Kombisa Swiendlo Swo Kwetsima
◼ Xixima milawu hinkwayo ya hotela
◼ Tshama u veke vana va wena tihlo
◼ Anakanyela van’wana