Vana Xikombiso Lexinene eMintirhweni Leyinene
1. Ha yini hi fanele hi yi xiyisisa swinene ndlela leyi hi tikhomaka ha yona loko hi ri entsombanweni?
1 Loko hi hlengeletana hi ri nhlayo leyikulu emintsombanweni ya matiko hinkwawo kumbe ya muganga, ndlela leyi hi tikhomaka ha yona ni ndlela leyi hi khomaka van’wana ha yona yi xiyiwa swinene hi vanhu. Hikwalaho, un’wana ni un’wana wa hina u fanele a xi yingisisa swinene xikhutazo lexi xa Bibele: “[Mi] va lava hlutekeke emianakanyweni, eswilweni hinkwaswo tikombiseni [mi] ri xikombiso xa mintirho leyinene.” (Tito 2:6, 7) Ku nga ha laveka matshalatshala lamakulu swinene leswaku ‘hi nga veki tihlo etimhakeni ta hina ntsena, kambe ni le timhakeni ta van’wana.’ (Filp. 2:4) A hi languteni tindhawu tin’wana leti hi nga xi tirhisaka eka tona xikhutazo lexi eka Ntsombano wa hina lowu taka lowu nga ni xihloko lexi nge “Vangamisa Xikwembu.”
2. I yini leswi hi faneleke hi swi tsundzuka loko hi endla malunghiselelo ya byetlelo?
2 Malunghiselelo Ya Byetlelo: Ndzawulo ya Byetlelo yi hete tin’hweti to hlaya yi karhi yi lunghiselela ndhawu leyi faneleke ya byetlelo. Nkarhi lowunene wo kombisa mintirho leyinene hi loko hi endla malunghiselelo ya byetlelo. Ku nga khathariseki leswaku mi ta va mi etlela ehotela, endlwini ya vaendzi, ekharavhanini kumbe ekaya ra munhu, hi kombela leswaku mi kombela tindhawu leti mi kunguhataka ku ti tirhisa ntsena. Loko swi fanela, tiyisekani leswaku mi hakela mali ya byetlelo ka ha ri ni nkarhi. Tanihi leswi hi nkarhi wa ku nghena ni ku huma ku vaka bizi, swi nga tlangeriwa swinene loko ho kombisa mihandzu ya moya wa Xikwembu.—Gal. 5:22, 23.
3. Xana hi nga ‘endla leswinene eka hinkwavo’ hi ndlela yihi loko hi ri etindhawini leti hi rhurheriweke eka tona?
3 Leswaku ha va anakanyela van’wana swi fanele swi vonaka eka ndlela leyi hi swi tirhisaka ha yona swakudya swihi ni swihi swo fihlula leswi va hi nyikaka swona. A hi fanelanga hi teka swakudya leswi nyikiwaka vaendzi hi ya na swona entsombanweni. Vanhu lava tirhaka etindhawini leti hi tshamaka eka tona va ta tsaka swinene loko hi landzelela milawu ni ku kombisa ku anakanyela vatirhi hi ku va nyika mali yo va nkhensa. Hi ku endla sweswo hi ta va hi ‘endla leswi nga swinene eka hinkwavo’ naswona hi ta nyikela vumbhoni lebyinene eka van’wana.—Gal. 6:10.
4, 5. Xana vana va nga endla leswaku Yehovha a dzunisiwa hi ndlela yihi naswona xana vatswari va ni vutihlamuleri byihi?
4 Vatswari Ni Vana: Emisaveni leyi eka yona vantshwa vo tala va pfumalaka mahanyelo lamanene, vana va hina va hlawulekile naswona leswi swi yisa ku dzuneka eka Yehovha ni nhlengeletano yakwe. Hambiswiritano, ku ni minkarhi leyi ku veke ni swiphiqo loko vana va nga languteriwi kahle. (Swiv. 29:15) Vatswari a va fanelanga va tshika vana va vona va ri voxe va nga languteriwanga loko va ri laha va rhurheriweke kona, emadan’wini yo hlambela eka wona, etindhawini to tlanga eka tona kumbe loko va ri entsombanweni.
5 Vatswari van’wana va swi kume swi pfuna ku bula ni vana va vona, va nga siya entsombanweni, malunghana ni ndlela leyi va faneleke va tikhoma ha yona. (Efe. 6:4) Va pfuna vana va twisisa leswaku rirhandzu ra xiviri ra Vukreste “a ri tikhomi hi ndlela leyi nga tengangiki” ni leswaku “a ri lavi leswi vuyerisaka rona ntsena.” (1 Kor. 13:5) Nkarhi wa ntsombano i nkarhi lowu vekeriweke ku dyondzisiwa hi Yehovha, naswona vana swin’we ni vanhu lavakulu, va nga kombisa leswaku va ri xixima lunghiselelo leri hi ndlela leyi va tikhomaka ha yona endhawini ya ntsombano ni le tindhawini tin’wana.—Esa. 54:13.
6. Xana ndlela leyinene leyi hi tikhomaka ha yona yi nga va khumba njhani vanhu van’wana?
6 Ndlela leyinene leyi hi tikhomaka ha yona yi nga cinca ndlela leyi vanhu va hi tekaka ha yona naswona yi nga kokela vanhu evugandzerini bya ntiyiso. (Mat. 5:16; 1 Pet. 2:12) Onge hinkwavo lava hi nga ta hlangana na vona hi nkarhi wa ntsombano, va nga kuma vumbhoni lebyinene hi ndlela leyi hi tikhomaka ha yona ni hi ndlela leyi na vona hi va khomaka ha yona. Hi ku endla sweswo hi ta va hi ‘tikombisa hi ri xikombiso xa mintirho leyinene’ naswona hi ta kwetsimisa Yehovha.—Tito 2:7.
[Bokisi leri nga eka tluka 4]
Anakanyela Van’wana
▪ Kombela vutshamo lebyi u nga ta byi tirhisa ntsena
▪ Lehisa mbilu hi nkarhi wo ya ni ku vuya entsombanweni
▪ U nga tirhisi swakudya swo fihlula hi ndlela yo biha
▪ Langutela vana va wena kahle
▪ Siya mali leyi eneleke yo nkhensa vatirhi