Rito Ro Rhanga

XIKWEMBU XA MATIMBA HINKWAWO i Hosi ya vuako hinkwabyo. Vutomi bya hina bya sweswi ni bya nkarhi lowu taka byi le mavokweni ya xona. Xi kota ku katekisa ni ku xupula. Xi ni matimba yo nyika vutomi ni matimba yo byi herisa. Loko hi amukelaka eka xona, swilo swi ta hi fambela kahle; loko hi nga amukeleki eka xona, swilo swi ta hi fambela ximatsi. Hakunene i swa nkoka leswaku vugandzeri bya hina byi amukeleka eka xona!

Vanhu va gandzela hi tindlela to tala. Loko hi teka vukhongeri hi byi fanisa ni gondzo, xana hi nga vula leswaku magondzo hinkwawo ya vukhongeri ma amukelaka eka Xikwembu? Nikatsongo. Yesu, muprofeta wa Xikwembu, u vule leswaku ku ni magondzo mambirhi ntsena. U te: “Gondzo leri yisaka endzovisweni ri anamile ri tlhela ri pfuleka, naswona va tele lava nghenaka ha rona; kambe nyangwa leyi yisaka evuton’wini yi khumile, ni gondzo ra kona ri larile, naswona a hi vangani lava ri kumaka.”—Matewu 7:13, 14.

Ku ni tinxaka timbirhi ntsena ta vukhongeri: ku nga vukhongeri lebyi yisaka evuton’wini ni lebyi yisaka endzovisweni. Broxara leyi yi tsaleriwe ku ku pfuna leswaku u kuma gondzo leri yisaka evuton’wini lebyi nga heriki.