Vuxaka Lebyi Yesu A Nga Na Byona Ni Tata Wakwe

Loko Vayuda va lumbeta Yesu leswaku u tlule nawu wa Savata hi ku hanyisa wanuna u va hlamule a ku: “Tata wa mina wa ha tirha ku fikela sweswi, na mina ndzi ya emahlweni ndzi tirha”—Yohane 5:17.

Kambe leswi Yesu a swi endleke a swi nga lwisani ni nawu wa Xikwembu mayelana ni Savata. Ntirho wa yena wo chumayela ni ku horisa a wu fambisana ni mitirho leyinene ya Xikwembu. Kutani Yesu u ye emahlweni a endla leswinene siku ni siku. Hambiswiritano, ndlela leyi Yesu a hlamuleke vakaneti vakwe hayona yi endle leswaku va hlundzuka swinene ku tlula eku sunguleni naswona va lave ni ku n’wi dlaya. Hikwalahokayini va hlundzuke hi ndlela leyi?

Ku engetela eka vonelo ra vona leri hoxeke ra leswaku Yesu u tlule nawu wa Savata hi ku horisa vanhu, a va hlundzukisiwa swinene hileswi a vuleke leswaku i N’wana wa Xikwembu. A va n’wi teka a ri la sandzaka loko a vula leswaku Xikwembu i Tata wakwe, onge hiloko ku vula ka Yesu a ku Yehovha i Tata wakwe i ku tiringanisa ni Xikwembu. Hambiswiritano, Yesu a nga chavisiwi hi malebvu lawa ya nghala naswona u ya emahlweni a va byela hi vuxaka bya yena byo hlawuleka ni Xikwembu. Yesu u te: “Hikuva Tatana u rhandza N’wana naswona u n’wi komba swilo hinkwaswo leswi a swi endlaka.”—Yohane 5:20.

Tatana i Munyiki wa Vutomi naswona leswi u swi kombise enkarhini lowu hundzeke hi ku nyika vavanuna matimba yo pfuxa lava feke. Yesu u ye emahlweni a ku: “Tanihi leswi Tatana a pfuxaka lava feke, kutani na yena N’wana u pfuxa lava a rhandzaka ku va pfuxa.” (Yohane 5:21) Mawaku marito lama nyikaka ntshembo hi vumundzuku! Hambi ku ri sweswi N’wana u le ku pfuxeni ka lava feke hi ndlela yo fanekisela. Hi yona mhaka Yesu a nga te: “Loyi a ndzi yingisaka a tlhela a tshemba Loyi a nga ndzi rhuma, u ta kuma vutomi lebyi nga heriki naswona a nge avanyisiwi kambe u ta pona rifu a kuma vutomi.”—Yohane 5:24.

Hambileswi hi nkarhi wolowo Yesu a a nga si tshama a pfuxa vanhu kambe u byele vakaneti vakwe leswaku a ku ta va ni ku pfuxiwa ka vafi. U te: “Nkarhi wa ta lowu hinkwavo lava nga emasirheni va nga ta twa rito ra yena kutani va huma.”—Yohane 5:28, 29.

Tanihi leswi Yesu a nga ni xikhundlha lexi tlakukeke, u swi veke erivaleni leswaku u yingisa Xikwembu loko a ku: “A ndzi nge endli xilo ni xin’we hi ku tisungulela. . . . A ndzi endli ku rhandza ka mina, kambe ndzi endla ku rhandza ka loyi a ndzi rhumeke.” (Yohane 5:30) Hambiswiritano, Yesu u hlamusele xikhundlha xakwe lexi fambisanaka ni xikongomelo xa Xikwembu, ku nga nchumu lowu a a nga si tshama a wu vula exikarhi ka vanhu. Kambe vanhu lava a va kaneta Yesu a va yi tiva kahle mhaka leyi. Yesu u va tsundzuxe a ku: “Mi rhumele vanhu eka Yohane [Mukhuvuri] naswona leswi a mi byeleke swona hi mina i ntiyiso.”—Yohane 5:33.

Vakaneti va Yesu va nga ha va va swi twile leswaku eka malembe mambirhi lama hundzeke, Yohane u byele varhangeri va vukhongeri bya Vayuda hi Loyi a taka endzhaku ka yena—loyi a a ta vitaniwa “Muprofeta” na “Kreste.” (Yohane 1:20-25) Loko a tsundzuxa vakaneti vakwe lava a va teka Yohane a ri wa nkoka kambe loyi sweswi se a a ri ekhotsweni, Yesu u te: “A mi tsakile swa nkarhinyana hikwalaho ka ku vonakala kakwe.” (Yohane 5:35) Kambe vumbhoni lebyi Yesu a byi nyikeleke a byi tlula bya Yohane Mukhuvuri.

“Kambe ndzi ni vumbhoni bya nkoka lebyi kombaka leswaku ndzi rhumiwe hi Tatana [ku katsa ni singita ra ku horisa vanhu leri a ha ku ri endla].” Kambe Yesu u ye emahlweni a ku: “Tatana u vurile leswaku hi yena loyi a nga ndzi rhuma.” (Yohane 5:36, 37) Hi xikombiso, Xikwembu xi vulavule hi Yesu loko a khuvuriwa.—Matewu 3:17.

Kahlekahle vakaneti va Yesu a va nga ri na xivangelo xa ku n’wi kaneta. Matsalwa lama a va vula leswaku va ma tiva a ma vulavula hi yena. Yesu u gimete hi ku vula a ku: “Loko a mi tshemba Muxe na mina a mi ta ndzi tshemba, hikuva u tsale ha mina. Kambe loko mi nga swi tshembi leswi a swi tsaleke, mi ta swi tshemba njhani leswi ndzi swi vulaka?”—Yohane 5:46, 47.