Yohane U Lava Ku Twa Hi Ta Yesu

Yohane Mukhuvuri u ni lembe a ri ekhotsweni. Nilokoswiritano, u twa hi ta masingita lawa Yesu a ma endlaka. Ehleketa ndlela leyi Yohane a titwaka hayona loko vadyondzisiwa vakwe va n’wi byela leswaku Yesu u pfuxe n’wana wa noni wa jaha eNayini. Hambiswiritano, Yohane u lava ku titwela hi yexe ku suka eka Yesu leswi sweswo swi vulaka swona. Hikwalaho, Yohane u rhuma vadyondzisiwa vakwe vambirhi. U va rhuma ku ya endla yini? U va rhuma ku ya vutisa Yesu, va ku: “Xana hi wena Loyi a Taka kumbe hi fanele ku langutela un’wana?”—Luka 7:19.

Xana xivutiso xexo xi kombisa leswaku Yohane wa kanakana? Yohane i wanuna loyi a tinyiketeleke naswona loko a khuvula Yesu kwalomu ka malembe mambirhi lama hundzeke, u vone moya wa Xikwembu wu xikela ehenhla ka Yesu a tlhela a twa rito ra Xikwembu ra ku n’wi amukela. A hi na xivangelo xo ehleketa leswaku xivutiso xa Yohane xi kombisa leswaku ripfumelo rakwe ri tsanile. Loko ku ri hileswaku ripfumelo ra Yohane ri tsanile, Yesu a nga ta vulavula kahle hi yena hilaha a endleke hakona eka xiendlakalo lexi. Loko Yohane a nga ri eku kanakaneni, i yini lexi endlaka a vutisa xivutiso lexi hi Yesu?

Swi tikomba onge Yohane u lava ku tiyisekisiwa hi Yesu leswaku hi yena Mesiya. Sweswo a swi ta tiyisa ripfumelo ra Yohane ekhotsweni. Hikwalaho, xivutiso xa yena xa twisiseka. Yohane u byi tiva kahle vuprofeta bya le Bibeleni lebyi kombisaka leswaku Muhlawuriwa wa Xikwembu u ta va hosi ni muponisi. Nilokoswiritano, Yohane u le khotsweni endzhaku ka tin’hweti to hlayanyana Yesu a khuvuriwile. Hikwalaho, Yohane u vutisa loko ku ri ni un’wana loyi a taka loyi a nga ta siva Yesu naswona a nga ta hetisisa vuprofeta hinkwabyo bya leswi Mesiya a nga ta swi endla.

Ku ri ni ku va a byela vadyondzisiwa va Yohane a ku, ‘Ina hi mina Loyi a taka,’ Yesu u va komba vumbhoni bya leswaku Xikwembu xi na yena hileswi a horisaka mavabyi yo hambanahambana. U byela vadyondzisiwa a ku: “Fambani mi ya vikela Yohane leswi mi swi twaka ni ku swi vona: Lava a va fe mahlo se va vona, lava a va nga koti ku famba se va famba, lava a va ri ni nhlokonho va horile, lava a va fe tindleve se va twa, kasi vafi va pfuxiwa ni swisiwana swi byeriwa mahungu lamanene.”—Matewu 11:4, 5.

Swi nga ha endleka xivutiso xa Yohane a xi kombisa leswaku u langutele swo tala eka Yesu ku tlula leswi a nga eku swi endleni sweswi, kumbexana hambi ku ri ku n’wi tshunxa ekhotsweni. Hambiswiritano, Yesu u byela Yohane leswaku a nga languteli masingita yo tala ku tlula lawa a nga eku ma endleni sweswi.

Loko vadyondzisiwa va Yohane va famba, Yesu u tiyisekisa ntshungu leswaku Yohane a ngo va muprofeta ntsena. Kambe i “murhumiwa” wa Yehovha loyi ku profetiweke ha yena eka Malakiya 3:1. Nakambe, hi yena muprofeta Eliya loyi ku vulavuriwaka hi yena eka Malakiya 4:5, 6. Yesu u hlamusela a ku: “Ndzi tiyisile ndzi ri eka n’wina, eka vanhu hinkwavo lava tshameke va hanya a nga kona lonkulu eka Yohane Mukhuvuri, kambe lontsongo eMfun’weni wa matilo i nkulu eka yena.”—Matewu 11:11.

Loko Yesu a vula leswaku lontsongo eMfun’weni wa matilo i nkulu eka Yohane, u vula leswaku Yohane a nge vi kona eMfun’weni wa le tilweni. Yohane u basisele Yesu ndlela kambe u fe Kreste a nga si pfula ndlela yo ya etilweni. (Vaheveru 10:19, 20) Nilokoswiritano, Yohane i muprofeta wo tshembeka wa Xikwembu naswona u ta fumiwa hi Mfumo wa Xikwembu laha misaveni.