Yesu A Va Ni Valandzeri Vo Tala Kambe Va Yohane Va Hunguteka

Endzhaku ko tlangela Paseka hi ximun’wana xa 30 C.E., Yesu ni vadyondzisiwa vakwe va suka eYerusalema. Hambiswiritano, a va vhelanga va tlhelela emakaya ya vona eGaleliya. Va kongome eYudiya laha va nga fika va khuvula vanhu vo tala. Yohane Mukhuvuri se a ri ni kwalomu ka lembe a ri karhi a khuvula vanhu naswona a ha ri ni van’wana va vadyondzisiwa vakwe kumbexana eNambyeni wa Yordani.

Yesu a a nga khuvuli munhu kambe a rhuma vadyondzisiwa va yena ku khuvula vanhu. Hi nkarhi lowu wa ku dyondzisa ka Yesu, Yena na Yohane va dyondzisa ntsena Vayuda lava se va hundzukeke eka swidyoho swa vona swo tlula ntwanano wa Nawu wa Xikwembu.—Mitirho 19:4.

Kambe vadyondzisiwa va Yohane va ve ni mavondzo kutani va ku: “Wanuna loyi [Yesu] a wu ri na yena . . . u le ku khuvuleni ka vanhu naswona hinkwavo va tsutsumela eka yena.” (Yohane 3:26) Kambe Yohane a nga ri na mavondzo. A a tsakisiwa hi ntirho lowu Yesu a wu endla naswona a a lava leswaku ni vadyondzisiwa vakwe va tsaka. Yohane u tlhele a va tsundzuxa a ku: “Mi ndzi twile loko ndzi ku, ‘A hi mina Kreste, kambe Xikwembu xi ndzi rhume leswaku ndzi rhanga ndzi ta a nga si fika.’” U tirhise xifaniso leswaku a va pfuna va twisisa leswi a swi vulaka, u te: “Loyi a nga ni mutekiwa i muteki. Kambe munghana wa muteki loko a yima a n’wi yingisa wa tsaka swinene loko a twa rito ra muteki. Kutani ndzi tsakile swinene.”—Yohane 3:28, 29.

Leswi Yohane a nga munghana wa muteki, a a tsakile loko a tivisa Yesu eka vadyondzisiwa vakwe eka tin’hweti leti nga hundza. Van’wana va vona va landzele Yesu naswona hi ku famba ka nkarhi a va ta totiwa hi moya lowo kwetsima. Yohane a a lava leswaku ni vadyondzisiwa lava a a ri na vona va landzela Yesu. Kahlekahle xikongomelo xa Yohane i ku lunghiselela ndlela ya vutirheli bya Kreste. Yohane u ri: “Valandzeri va Kreste va fanele va andza, kambe va mina va ta hunguteka.”—Yohane 3:30.

Yohane wun’wana loyi a sunguleke khale ku landzela Yesu, hi ku famba ka nkarhi u tsale hi ta laha Yesu a humaka kona ni ntirho wakwe wa nkoka eku poniseni ka vanhu, u te: “Loyi a humaka ematilweni u tlula vanhu hinkwavo. . . . Tatana u rhandza N’wana naswona u n’wi nyike swilo hinkwaswo. Loyi a vaka ni ripfumelo eka N’wana u ta kuma vutomi lebyi nga heriki; loyi a nga yingisiki N’wana a nge byi kumi, kambe u ta weriwa hi vukarhi bya Xikwembu.” (Yohane 3:31, 35, 36) Mawaku ntiyiso wonghasi lowu vanhu va faneleke ku wu tiva!

Loko Yohane Mukhuvuri a ta va a hlamusele leswaku ntirho wakwe a wu ta hunguteka, a swi tekanga nkarhi hiloko a khotsiwa hi Hosi Heroda. Heroda u teke Herodiya nsati wa Filipi makwavo a va nsati wa yena. Loko Yohane a paluxa vuoswi lebyi Heroda a byi endlaka, Heroda u n’wi pfalele ekhotsweni. Loko Yesu a twa leswaku Yohane u le khotsweni, yena ni vadyondzisiwa va yena va sukile eYudiya va ‘ya eGaleliya.’—Matewu 4: 12; Marka 1:14.