Ndzima 18
Yohane Wa Tsongahala, Yesu Wa Kula
ENDZHAKU ka Paseka ya ximun’wana xa 30 C.E., Yesu ni vadyondzisiwa va yena va suka eYerusalema. Hambi swi ri tano, a va tlheleli emakaya ya vona eGaleliya kambe va ya etikweni ra Yudiya, laha va khuvulaka kona. Yohane Mukhuvuri a a endla ntirho lowu fanaka ku ringana lembe ku fikela sweswi, naswona wa ha ri ni vadyondzisiwa lava tirhaka na yena.
Kahle-kahle, Yesu a nga khuvuli hi yexe, kambe ku khuvula vadyondzisiwa va yena ehansi ka nkongomiso wa yena. Nkhuvulo wa vona wu ni xikongomelo lexi fanaka na lowu endliwaka hi Yohane, i xikombiso xa ku hundzuka ka Vayuda eka swidyoho swa ntwanano wa Xikwembu wa Nawu. Hambi swi ri tano, endzhaku ka ku pfuxiwa ka yena, Yesu u lerisa vadyondzisiwa va yena ku endla nkhuvulo lowu nga ni xikongomelo lexi hambaneke. Nkhuvulo wa Vakriste namuntlha i xikombiso xa ku tinyiketela ka munhu ko tirhela Yehova Xikwembu.
Hambi swi ri tano, eka yinhla leyi ya ku sungula ka vutirheli bya Yesu, yena na Yohane, hambi loko va nga tirhi swin’we, va dyondzisa ni ku khuvula lava hundzukaka. Kambe vadyondzisiwa va Yohane va tela hi mavondzo kutani va vilela eka yena mayelana na Yesu va ku: “Vona mufundhisi, . . . munhu loyi wa khuvula na yena, kutani hinkwavo va khitikana va ya eka yena.”
Ematshwan’weni ya ku tela hi mavondzo, Yohane wa tsaka hi ku humelela ka Yesu naswona u lava leswaku vadyondzisiwa va yena va tsaka. Wa va tsundzuxa a ku: “N’wina hi n’wexe mi timbhoni ta mina leswaku ndzi te: A hi mina [Kriste], kambe ndzi rhumiwile ku ta n’wi bulela ndlela.” Kutani u tirhisa xifaniso lexinene a ku: “N’wini wa mutekiwa, i muteki; nxangwana ya muteki leyi yimaka yi yingisa muteki loyi, yi tsaka swinene loko yi twa rito ra yena; hikokwalaho sweswi ku tsaka ka mina ku hetisekile.”
Yohane, tanihi munghana wa Muteki, u tsakile tin’hweti ta tsevu emahlweninyana loko a tivise vadyondzisiwa va yena eka Yesu. Van’wana va vona va ve swirho leswi a swi languteriwile swa ntlawa wa mutekiwa wa le tilweni wa Kriste lowu endliwaka hi Vakriste lava totiweke hi moya. Yohane u lava vadyondzisiwa va yena lava nga kona leswaku na vona va landzela Yesu, tanihi leswi xikongomelo xa yena ku nga ku lunghiselela ndlela ya vutirheli lebyi humelelaka bya Kriste. Hi laha Yohane Mukhuvuri a hlamuselaka ha kona: “Yena u fanele ku ya a kula, mina ndzi ya ndzi tsongahala.”
Mudyondzisiwa lontshwa wa Yesu, Yohane, loyi emahlweni a a ri mudyondzisiwa wa Yohane Mukhuvuri, wa tsala mayelana ni masungulo ya Yesu ni xikongomelo xa Yena xa nkoka eku ponisiweni ka vanhu, a ku: “Loyi a humaka ehenhla u le henhla ka hinkwavo. . . . Tatana u rhandza N’wana, kutani u vekile swilo hinkwaswo emavokweni ya yena. Loyi a pfumelaka eka N’wana, u ni vutomi lebyi nga heriki; loyi a nga yingisiki N’wana, a nga ka a nga kumi vutomi, kambe vukari bya Xikwembu byi tshame henhla ka yena.”
Ku nga ri khale endzhaku ka loko Yohane Mukhuvuri a hlamusele ku tsongahala ka ntirho wa yena, u khotsiwa hi Hosi Heroda. Heroda u teke Herodiya, nsati wa Filipi makwavo wa yena, tanihi wa yena, naswona loko Yohane a paluxe erivaleni xiendlo xa yena tanihi lexi biheke, Heroda wa n’wi khotsa. Loko Yesu a twa hi ta ku khotsiwa ka Yohane, u suka eYudiya ni vadyondzisiwa va yena va ya eGaleliya. Yohane 3:22–4:3; Mintirho 19:4; Matewu 28:19; 2 Vakorinto 11:2; Marka 1:14; 6:17-20.
▪ A yi fanekisela yini minkhuvulo leyi a yi endliwa ehansi ka nkongomiso wa Yesu emahlweni ka ku pfuxiwa ka yena? Ni le ndzhaku ka ku pfuka ka yena?
▪ Yohane u swi kombisa njhani leswaku ku vilela ka vadyondzisiwa va yena a swi pfuni nchumu?
▪ Ha yini Yohane a khotsiwa?