Ndzima 38

Xana Yohane A A Pfumala Ripfumelo?

YOHANE Mukhuvuri, loyi manuku a a ri ekhotsweni ku ringana lembe, u amukela xiviko xa ku pfuxiwa ka n’wana wa noni ya le Nayini. Kambe Yohane u lava ku twa hi ku kongoma eka Yesu malunghana ni ntikelo wa leswi, kutani u rhuma vambirhi va vadyondzisiwa va yena ku ya vutisa va ku: “Xana hi wena loyi va nge wa ta, kumbe ha ha langutela un’wana ke?”

Sweswo swi nga ha tikomba ku ri xivutiso lexi hlamarisaka, ngopfu-ngopfu tanihi leswi Yohane a voneke moya wa Xikwembu wu xikela ehenhla ka Yesu naswona u twile rito ra Xikwembu ro nkhensa loko a khuvula Yesu ku ringana malambe mambirhi lama hundzeke. Xivutiso xa Yohane xi nga ha vangela van’wana ku heta hi ku vula leswaku ripfumelo ra yena a ri tsanile. Kambe leswi a swi tano. Yesu a a nga ta vulavula ngopfu hi Yohane, leswi a swi endleke enkarhini lowu, loko Yohane a a sungurile ku kanakana. Kutani, hikwalaho ka yini Yohane a vutisa xivutiso lexi?

Hi ku olova Yohane a nga ha va a lava xitiyisekiso xo huma eka Yesu xa leswaku I Mesiya. Leswi a swi ta va leswi nyikaka matimba eka Yohane loko a ri karhi a xaniseka ekhotsweni. Kambe swi le rivaleni leswaku ku na swo tala eka xivutiso xa Yohane ku tlula sweswo. Entiyisweni u lava ku tiva loko ku ta va ni un’wana loyi a taka, kavula, musivi loyi a nga ta hetisisa ku hetiseka ka swilo hinkwaswo leswi a swi vhumberiwe ku endliwa hi Mesiya.

Hi ku ya hi vuprofeta bya Bibele lebyi Yohane a tolovelaneke na byona, Mutotiwa wa Xikwembu a a ta va hosi, muponisi. Kambe, Yohane wa ha hlayisiwe tanihi mukhotsiwa, hambi ku ri tin’hweti to tala endzhaku ko khuvuriwa ka Yesu. Kutani kahle-kahle Yohane u vutisa Yesu a ku: ‘Xana entiyisweni hi wena loyi a nga ta tlhoma Mfumo wa Xikwembu hi ku tirhisa matimba, kumbe ha ha langutela un’wana, musivi, loyi hi faneleke ku n’wi rindzela ku hetisisa vuprofeta hinkwabyo lebyinene lebyi hlamuseriweke mayelana ni ku kwetsima ka Mesiya?’

Ematshan’wini yo byela vadyondzisiwa va Yohane a ku, ‘Kavula hi mina loyi a a ta ta!’ Yesu hi nkarhi wolowo u veka xikombiso lexi xiyekaka hi ku tshungula vanhu vo tala, eka tinxaka hinkwato ta mavabyi ni switlhavi. Kutani u byela vadyondzisiwa: “Fambani, mi ya rungulela Yohane leswi mi swi voneke ni leswi mi swi tweke; lavo-fe-mahlo va tlhela va vona, swilema swa famba, vanhlokonho va basisiwa, lavo-fe-tindleve va twa, vafi va pfuka, swisiwana swi byeriwa Evhangeli.”

Hi marito man’wana, xivutiso xa Yohane xi nga ha tisa ku rindzela ka leswaku Yesu a endla swo tala ku tlula leswi a swi endlaka, kumbexana ku ntshunxa Yohane hi yexe. Hambi swi ri tano, Yesu u byela Yohane ku nga rindzeli swo tlula mahlori lama Yesu a ma endlaka.

Loko vadyondzisiwa va Yohane va suka, Yesu u hundzulukela eka ntshungu ivi a wu byela leswaku Yohane i “ntsumi” ya Yehova leyi vhumbiweke eka Malakia 3:1 naswona i muprofeta Eliya loyi a vhumbiweke eka Malakia 4:5, 6. Xisweswo u dzunisa Yohane tanihi loyi a ringanaka ni muprofeta wihi na wihi loyi a hanyeke emahlweni ka yena, a hlamusela a ku: “Ndzi tiyisile ndzi ri ka n’wina: Exikarhi ka vanhu lava tswariweke hi vavasati, a ku humelelanga loyi a tlulaka Yohane Mukhuvuri; kasi la nga lontsongo eka hinkwavo eMfun’weni wa matilo i nkulukumba eka yena. Ku sukela enkarhini wa Yohane Mukhuvuri ku fikela enkarhini wa sweswi, ku ngheniwa hi matimba eMfun’weni wa matilo, kutani va matimba hi vona lava titekelaka wona.”

Laha Yesu u komba leswaku Yohane a nga ka a nga vi eMfun’weni wa matilo, tanihi leswi lontsongo eka hinkwavo a tlulaka Yohane. Yohane u lunghiselele Yesu ndlela, kambe u fe emahlweni ka ku va Kriste a lemela ntwanano, kumbe mpfumelelano, ni vadyondzisiwa va yena, leswaku va va vafumi-kulobye na yena eMfun’weni wakwe. Hi yona mhaka leyi Yesu a vulaka leswaku Yohane a nge vi kona eMfun’weni wa matilo. Ku ri na sweswo Yohane u ta va mufumiwa wa la misaveni wa Mfumo wa Xikwembu. Luka 7:18-30; Matewu 11:2-15.

▪ Ha yini Yohane a vutisa loko Yesu a ri Loyi a Taka kumbe loko ka ha ri na un’wana loyi a rindzeriwaka?

▪ I vuprofeta byihi lebyi Yesu a vulaka leswaku Yohane u byi hetisisile?

▪ Hikwalaho ka yini Yohane Mukhuvuri a ta ka a nga vi etilweni na Yesu?