Swivutiso Swa Vahlayi
Hi ku ya hi Matewu 11:11, xana hi fanele hi gimeta hi leswaku Yesu u swi tive ka ha ri emahlweni leswaku Yohane Mukhuvuri a a ta fa emahlweni ka Yesu?
Ina, entiyisweni Yesu a a swi tiva leswaku Yohane a a nga ta hanyela ku va Mukriste la totiweke, hikuva Yesu u te: “Ndzi tiyisile ndzi ri ka n’wina: Exikarhi ka vanhu lava tswariweke hi vavasati, a ku humelelanga loyi a tlulaka Yohane Mukhuvuri; kasi lontsongo eka hinkwavo eMfun’weni wa matilo i nkulukumba eka yena.”—Matewu 11:11.
Loko ntsumi Gabriele yi twarise ta ku velekiwa ka Yohane, yi vhumbe leswaku Yohane, hi “moya wa Eliya ni matimba ya yena, . . . [a a ta] lunghiselela [Yehova, NW] tiko leri lulameke.” Yohane a a fanele a va mubulandlela, a lunghiselela Mesiya wa Yehova vanhu va yena. Kambe a ku na nchumu eka xitiviso xexo xa Xikwembu lexi kombisaka leswaku Yohane hi yexe a a ta va mudyondzisiwa wa Mesiya loyi a taka, naswona a ku nga ri ni xiringanyeto xa mhaka yoleyo eka nhlamuselo ya vuprofeta leyi vuriweke hi Zakariya, tata wa Yohane.—Luka 1:17, 67-79.
Xisweswo, endzhaku ko khuvula Yesu, Yohane u ye emahlweni a chumayela ni ku khuvula, a namarhele xiavelo xa yena xo lunghiselela vanhu. Yohane hi singita a a swi tiva leswaku Yesu u ta tisa nkhuvulo wa moya lowo kwetsima, kambe Yohane a nga kalanga a vula leswaku yena hi yexe a a ta amukela moya lowo kwetsima, a va Mukriste la totiweke. (Matewu 3:11) Yohane nakambe u xiye leswaku a a ta ya a tsongahala, loko Yesu a ya a kula.—Yohane 3:22-30.
Loko Yesu a vula leswi hi swi hlayaka eka Matewu 11:11, Yohane ana se a khotsiwile. Yesu u endle leswaku swi tiveka leswaku muprofeta loyi a khotsiwile a a ri ntsongo eka lontsongo loyi nkarhi lowu taka a a ta tirha tanihi hosi ni muprista ematilweni. Hambi swi ri tano, Yesu nakambe u vonaka a swi tivile leswaku Yohane a a ta fa ku nga ri khale, a hundza exivon’weni xa misava emahlweni ka leswaku ndlela “leyintshwa” ya vutomi bya le tilweni yi pfuriwa. (Vaheveru 10:19, 20) Sweswo a swi vula leswaku Yohane a a nga ta hanya ku fikela hi Pentekosta ya 33 C.E., loko ku totiwa ka vadyondzisiwa va Yesu hi moya ku sungula. Kutani ke, nhlamuselo ya Yesu eka Matewu 11:11 na yona yi nga ha tekiwa yi ri xikombiso xa leswaku u swi tivile leswaku Yohane a nge yi etilweni.