“Ku Vonakala Ka Misava”—n’wana Wa Xikwembu

Hi siku ro hetelela ra Nkhuvo wa Titabernakela, ku nga siku ra vunkombo, Yesu u le ku dyondziseni eka xiphemu xin’wana xa le tempeleni lexi vuriwaka ‘mabokisi.’ (Yohane 8:20; Luka 21:1) Ndhawu leyi yi le Xivaveni xa Vavasati, laha vanhu a va hoxa kona minyikelo.

Nivusiku hi nkarhi wa nkhuvo, ndhawu leyi ya tempele yi tshama yi lumekiwe timboni. Ku ni swilo swo tlhoma timboni swa mune naswona xin’wana ni xin’wana xi ni swo hlambela mavoko leswi tatiweke hi mafurha. Timboni leti ti voninga ku ya fika endhawini ya le kule swinene. Marito ya Yesu ma nga tsundzuxa vayingiseri vakwe xifaniso lexi nge: “Hi mina ku vonakala ka misava. Loyi a ndzi landzelaka a nge pfuki a fambe emunyameni, kambe u ta va ni ku vonakala ka vutomi.”—Yohane 8:12.

Vafarisi a va pfumelelani ni leswi Yesu a swi vulaka hi ku vula va ku: “Vumbhoni lebyi u byi vulaka a hi ntiyiso; hikuva u nyikela vumbhoni hi wena n’wini.” Yesu u va hlamula a ku: “Hambiloko ndzi nyikela vumbhoni hi mina n’wini, leswi ndzi swi vulaka i ntiyiso, hikuva ndza ku tiva laha ndzi humaka kona. Kambe n’wina a mi ku tiva laha ndzi humaka kona ni laha ndzi yaka kona.” A engetela a ku: “Enawini wa n’wina ku tsariwe leswi: ‘Vumbhoni bya vanhu vambirhi byi tiyile.’ Hi mina ndzi nyikelaka vumbhoni mayelana na mina na Tatana na yena loyi a ndzi rhumeke u nyikela vumbhoni hi mina.”—Yohane 8:13-18.

Leswi a va nga pfumelelani ni leswi a swi vulaka, Vafarisi va vutisa va ku: “Tata wa wena u kwihi?” Yesu a va hlamula hi ku kongoma a ku: “A mi ndzi tivi ni Tata wa mina a mi n’wi tivi. Loko a mi ndzi tiva ni Tata wa mina a mi ta n’wi tiva.” (Yohane 8:19) Hambileswi Vafarisi va lavaka leswaku Yesu a khotsiwa, a nga kona loyi a n’wi khomaka.

Yesu u phindha marito lama a ma vuleke a ku: “Ndza famba naswona mi ta ndzi lava kambe mi ta fela exidyohweni xa n’wina. Laha ndzi yaka kona a mi nge fiki.” Leswi Vayuda va nga ma twisisiki marito ya Yesu va sungula ku tivutisa va ku: “Xana u lava ku tidlaya? Hikuva u ri, ‘Laha ndzi yaka kona a mi nge fiki.’” A va swi twisisi leswi Yesu a swi vulaka hikuva a va swi tivi leswaku u huma kwihi. U hlamusela a ku: “N’wina mi huma etindhawini ta le hansi; mina ndzi huma etindhawini ta le henhla. Mi huma emisaveni leyi; mina a ndzi humi eka yona misava leyi.”—Yohane 8:21-23.

Yesu u vulavula hi vutomi byakwe loko a ha ri etilweni ni hi ku va Mesiya la tshembisiweke kumbe Kreste, loyi varhangeri lava va vukhongeri va faneleke va n’wi langutela. Hambiswiritano, va lava a va nyika vuxokoxoko hi ku n’wi vutisa va ku: “Hi wena mani?”—Yohane 8:25.

Leswi a va n’wi kaneta, Yesu u va hlamula a ku: “Kahlekahle ndzo tidyela nkarhi hi ku vulavula na n’wina.” Hambiswiritano, u ye emahlweni a vulavula hi Tata wakwe nileswaku hikwalahokayini Vayuda va fanele va yingisela N’wana, a ku: “Loyi a ndzi rhumeke u vulavula ntiyiso, naswona leswi ndzi mi byelaka swona swi huma eka yena.”—Yohane 8:25, 26.

Yesu u kombisa ku tshemba Tata wakwe, ku nga leswi Vayuda lava va nga swi endliki, u ri: “Loko mi ta va mi hayeke N’wana wa munhu emhandzini, hi kona mi nga ta swi tiva leswaku ndzi yena, ni leswaku a ndzi endli nchumu hi ku tisungulela; ni leswi ndzi mi byelaka swona ndzi dyondzisiwe hi Tatana. Loyi a ndzi rhumeke u na mina; a nga ndzi lahlanga, hikuva ndzi endla swilo leswi n’wi tsakisaka nkarhi hinkwawo.”—Yohane 8:28, 29.

Hambiswiritano, Vayuda van’wana va pfumela eka Yesu kutani u va byela a ku: “Loko mi yingisa leswi ndzi swi vulaka, mi vadyondzisiwa va mina, mi ta tiva ntiyiso kutani ntiyiso wu ta mi tshunxa.”—Yohane 8:31, 32.

Van’wana a va swi twisisi loko a vulavula hi ku tshunxiwa. Va ala va ku: “Hina hi vana va Abrahama naswona a hi si tshama hi va mahlonga ya munhu. Hikwalaho ka yini u ku, ‘Mi ta tshunxeka’?” Vayuda va swi tiva leswaku mikarhi yin’wana a va fumiwa hi vafumi va matiko man’wana kambe va ala ku vuriwa mahlonga. Kambe Yesu u hlamusela leswaku va ha ri mahlonga, hi ku vula a ku: “Hakunene ndzi tiyisile ndzi ri eka n’wina, loyi a endlaka xidyoho i hlonga ra xidyoho.”—Yohane 8:33, 34.

Ku ala ka Vayuda leswaku i mahlonga ya xidyoho swi va veka ekhombyeni. Yesu u hlamusela a ku: “Hlonga a ri tshami endlwini ya n’wini wa rona hilaha ku nga heriki; kambe n’wana u tshama hilaha ku nga heriki.” (Yohane 8:35) Hlonga a ri na mfanelo yo kuma ndzhaka naswona ri nga ha tshunxiwa nkarhi wun’wana ni wun’wana. I n’wana loyi a tswariweke emutini kumbe loyi a tisiweke emutini wolowo leswaku a ta hlayisiwa “hilaha ku nga heriki,” vutomi byakwe hinkwabyo.

Hikwalaho, ntiyiso lowu vulavulaka hi N’wana wu tshunxa vanhu hilaha ku nga heriki eka xidyoho lexi dlayaka. Yesu u ri: “Loko N’wana a mi tshunxa, mi ta tshunxeka hakunene.”—Yohane 8:36.