Xana Tata Wa Vona I Abrahama Kumbe I Diyavulosi?

Loko a ha ri eYerusalema eNkhubyeni wa Titabernakela (kumbe wa Mitsonga), Yesu u ya emahlweni a dyondzisa ntiyiso wa nkoka. Vayuda van’wana lava a va ri kona va ta eka yena va ku: “Hina hi vana va Abrahama naswona a hi si tshama hi va mahlonga ya munhu.” Yesu u hlamula a ku: “Ndza swi tiva leswaku mi vana va Abrahama. Kambe mi lava ku ndzi dlaya hikuva leswi ndzi swi vulaka a swi vuli nchumu eka n’wina. Ndzi mi byela leswi ndzi swi voneke loko ndza ha ri na Tatana, kambe n’wina mi endla swilo leswi mi swi tweke eka tata wa n’wina.”—Yohane 8:33, 37, 38.

eswi Yesu a swi vulaka swi twisiseka hi ndlela leyi: Tata wakwe a nga fani ni tata wa vona. Leswi Vayuda va nga swi twisiseki leswi Yesu a swi vulaka, va ya emahlweni va ku: “Tata wa hina i Abrahama.” (Yohane 8:39; Esaya 41:8) Leswi va nga vatukulu va Abrahama munghana wa Xikwembu, va vona onge na vona va ni ripfumelo leri fanaka ni ra yena.

Hambiswiritano, Yesu u va hlamula hi ndlela leyi va tsemaka nhlana, u ri: “Loko a mi ri vana va Abrahama, a mi ta endla mitirho ya Abrahama.” Swi le rivaleni leswaku n’wana u tekelela swiendlo swa tata wakwe. Kutani Yesu u ya emahlweni a ku: “Kambe sweswi mi lava ku ndzi dlaya, mina loyi a mi byeleke ntiyiso lowu ndzi wu tweke eka Xikwembu. Abrahama a nga swi endlanga sweswo.” Yesu u ya emahlweni a vula swin’wana leswi nga va pfilunganya, u ri: “Mi endla mitirho ya tata wa n’wina.”—Yohane 8:39-41.

Vayuda a va swi twisisi leswaku u vulavula hi mani. Va tibyela leswaku i vana va Abrahama, va ri: “Hina a hi velekiwanga evuoswini; hi ni Tatana un’we, ku nga Xikwembu.” Xana hakunene Xikwembu i Tata wa vona? Yesu u ri: “Loko Xikwembu a xi ri Tata wa n’wina, a mi ta ndzi rhandza, hikuva ndzi huma eka xona. A ndzi titelanga, kambe hi xona xi ndzi rhumeke.” Yesu u vutisa xivutiso a tlhela a xi hlamula hi yexe, u ri: “Hikwalaho ka yini mi nga swi twisisi leswi ndzi mi byelaka swona? Hikuva a mi swi yingisi leswi ndzi swi vulaka.”—Yohane 8:41-43.

Yesu u ringete ku va hlamusela vuyelo lebyi vaka kona loko va n’wi amukeli. Kutani sweswi u va byela hi ku kongoma a ku: “Mi huma eka tata wa n’wina Diyavulosi naswona mi lava ku endla ku rhandza ka yena.” Xana tata wa vona u njhani? Loko Yesu a n’wi hlamusela, u ri: “A a ri mudlayi ku sukela eku sunguleni [naswona] u hambukile entiyisweni.” Yesu u engetela a ku: “Loyi a humaka eka Xikwembu u yingisa leswi Xikwembu xi n’wi byelaka swona. N’wina a mi yingisi, hikuva a mi humi eka Xikwembu.”—Yohane 8:44, 47.

Leswi a swi vulaka swi hlundzukisa Vayuda, ivi va n’wi hlamula va ku: “Xana ha hemba loko hi ku, ‘U Musamariya naswona u ni dimona’?” Va kombisa ku delela loko va vula leswaku Yesu i “Musamariya.” Yesu u swi ba hi makatla leswi va swi vulaka hi ku vula a ku: “A ndzi na dimona kambe ndzi xixima Tatana, n’wina a mi ndzi xiximi.” Leswaku mhaka leyi i ya nkoka swi tikomba hi xitshembiso xa Yesu xo hlamarisa loko a ku: “Loyi a yingisaka leswi ndzi swi vulaka, a nge pfuki a file.” A nga vuli swona leswaku vaapostola ni van’wana lava n’wi landzelaka va nge fi. Ku ri na sweswo, a va nge pfuki va ri vonile “rifu ra vumbirhi,” ku nga ku loviseriwa makumu, laha ku nga riki na ntshembo wa ku pfuxiwa.—Yohane 8:48-51; Nhlavutelo 21:8.

Vayuda a va swi twisisi leswi Yesu a swi vulaka kutani va ri: “Sweswi ha swi tiva leswaku u ni dimona. Abrahama u file ni vaprofeta va file, kambe wena u ri, ‘Loyi a ndzi yingisaka, a nge pfuki a file.’ Xana u vula leswaku u nkulu eka tata wa hina Abrahama, loyi a nga fa? . . . Xana wena u ehleketa leswaku u mani?”—Yohane 8:52, 53.

Swi le rivaleni leswaku Yesu u va byela leswaku hi yena Mesiya. Ku ri ni ku hlamula xivutiso xa vona hi ku kongoma xa leswaku hi yena mani, Yesu u ri: “Loko ndzi tidzunisa, a swi pfuni nchumu. Tatana hi yena loyi a ndzi dzunisaka, yena loyi mi vulaka leswaku i Xikwembu xa n’wina. N’wina a mi n’wi tivi, kambe mina ndza n’wi tiva. Loko ndzo vula leswaku a ndzi n’wi tivi ndzi ta va ndzi ri muhembi ku fana na n’wina.”—Yohane 8:54, 55.

Sweswi Yesu u vulavula hi xikombiso lexinene xa kokwa wa vona wo tshembeka a ku: “Abrahama tata wa n’wina a a langutele siku leri a ndzi ta ta ha rona hi mahlongati. U ri vonile siku rero kutani a tsaka.” Ina, leswi Abrahama a a tshemba Xikwembu, a swi langutele hi mahlongati ku vona ku fika ka Mesiya. Leswi a va nga n’wi tshembi, Vayuda va hlamula va ku: “U hi byela leswaku u vone Abrahama kambe a wu si va ni malembe ya 50.” Yesu u va hlamula a ku: “Hakunene ndzi tiyisile ndzi ri eka n’wina, ndzi ve kona Abrahama a nga si va kona.” U vulavula hi vutomi byakwe bya le tilweni loko a ha ri ntsumi naswona a nga si ta laha misaveni.—Yohane 8:56-58.

Loko Yesu a vula leswaku u hanye Abrahama a nga si va kona, sweswo swi hlundzukise Vayuda kutani va lava ku n’wi khandla hi maribye. Kambe Yesu u fambe a nga vavisekanga.