NDZIMA 79
Leswi Endlaka Makumu Ma Va Kwala Nyongeni
YESU U DYONDZISA HI MAKHOMBO MAMBIRHI
WANSATI LA LAMALEKE A HORISIWA HI SAVATA
Yesu u ringete hi tindlela to tala leswaku a khutaza vanhu ku va ehleketa hi vuxaka bya vona ni Xikwembu. Loko a ha ku heta ku vulavula ni vanhu, ku endleka mhaka yin’wana ehandle ka yindlu ya Mufarisi.
Vanhu van’wana va vulavula hi xiendlakalo xin’wana lexi tsemaka nhlana. Va vulavula hi “Vagaleliya lava Pilato [Pontiyo Mufumi Wa Rhoma] a va dlayeke loko va ri karhi va endla magandzelo.” (Luka 13:1) Va vula yini hi sweswo?
Swi nga endleka Vagaleliya lava ku ri lava dlayiweke loko magidi ya Vayuda va lwisana na Pilato hikwalaho ko tirhisa mali ya tempele leswaku a aka mugerho wo tisa mati eYerusalema. Pilato a nga va a sindzise valawuri va le tempeleni leswaku va n’wi nyika mali leyi. Lava hlamuselaka mhaka leyi swi nga endleka va vona onge Vagaleliya va weriwe hi khombo leri hikwalaho ka swidyoho swa vona. Yesu a nga pfumelelani na vona.
U va vutisa a ku: “Xana mi anakanya leswaku leswi Vagaleliya lava, va humeleriweke hi khombo leri, a va dyohe ngopfu ku tlula Vagaleliya lavan’wana hinkwavo?” Nhlamulo yakwe i doo! Kambe u tirhisa mhaka yoleyo ku lemukisa Vayuda, u ri: “Loko mi nga hundzuki, na n’wina mi ta lovisiwa hinkwenu ku fana na vona.” (Luka 13:2, 3) Yesu u ya emahlweni a vulavula hi khombo rin’wana leri ra ha ku endlekaka ni leri yelanaka ni ku akiwa ka mugerho wolowo.
U vutisa a ku: “Kumbe lava 18 lava weriweke hi xihondzo xa le Silowama, xi va dlaya, xana mi anakanya leswaku a va dyohe ngopfu ku tlula vanhu hinkwavo lava tshamaka eYerusalema?” (Luka 13:4) Ntshungu wu vona onge vanhu volavo va fe hikwalaho ka vubihi bya vona. Ni le mhakeni leyi, Yesu a nga pfumelelani na vona. Wa swi tiva leswaku “nkarhi ni swiendlakalo leswi nga languteriwangiki” swa endleka naswona ku nga va ku ri swona leswi vangeke mhangu leyi. (Eklesiasta 9:11) Nilokoswiritano, vanhu va fanele va dyondza eka xiendlakalo lexi. Yesu u ri: “Loko mi nga hundzuki na n’wina mi ta lovisiwa hinkwenu ku fana na vona.” (Luka 13:5) Kambe i yini leswi endlaka leswaku sweswi a kandziyisa dyondzo leyi?
Swi fambisana ni ntirho lowu a wu endlaka wo chumayela kutani u endla xifaniso xa mhaka yoleyo hi ndlela leyi: “Wanuna un’wana a a ri ni nkuwa lowu a wu byariwe ensin’wini yakwe ya madiriva, hiloko a ya lava mihandzu eka wona, kambe a nga kumanga nchumu. Kutani a byela mutirhi a ku, ‘Se swi endla malembe manharhu ndzi ta lava mihandzu eka nkuwa lowu kambe a ndzi kumi nchumu. Wu tseme hikuva a wu pfuni nchumu!’ A n’wi hlamula a ku, ‘N’wini wanga, wu tshike lembe leri, ndzi ta cela ematlhelweni ka wona ndzi chela manyoro. Swi ta va swinene loko wo humesa mihandzu; kambe loko swi nga ri tano, wu tseme.’”—Luka 13:6-9.
Se swi endla malembe manharhu no tlurisa, Yesu a ri karhi a ringeta ku endla leswaku Vayuda va va ni ripfumelo. Kambe i vanhu vatsongo lava veke vadyondzisiwa ni lava ku nga vuriwaka leswaku va hundzukile hileswi a va chumayeleke. Eka lembe leri ra vumune ra ku chumayela kakwe, u tirha hi matimba. Swi fana ni loko a ri eku celeni ni ku chela manyoro eka murhi wa nkuwa wa Vayuda hi ku chumayela ni ku dyondzisa eYudiya ni le Periya. Vuyelo byi ve byihi? I nhlayo yitsongo ya Vayuda yi angulaka kahle. Tiko hinkwaro a ri lavi ku hundzuka naswona se ri yimele ku lovisiwa.
Ku sihalala koloko ka vanhu vo tala, ku tlhela ku vonaka endzhaku ka Savata. Yesu u dyondzisa esinagogeni. U vona wansati loyi a heteke malembe ya 18 a nga swi koti ku ololoka hikwalaho ka leswi a nga ni dimona. Yesu u byela wansati loyi hi ndlela yo n’wi kombisa ntwelavusiwana, a ku: “Wansati, u hanyisiwile.” (Luka 13:12) Yesu u n’wi tlhandleka mavoko, xikan’wekan’we a ololoka ivi a sungula ku dzunisa Xikwembu.
Sweswo swi hlundzukisa ndhuna ya sinagoga, leyi yi nge: “Ku ni masiku ya tsevu lawa ntirho wu faneleke ku endliwa ha wona; tanani hi masiku wolawo leswaku mi ta hanyisiwa, ku nga ri hi siku ra Savata.” (Luka 13:14) Ndhuna yoleyo a yi ali leswaku Yesu u ni matimba yo horisa kambe yi sola vanhu hileswi va taka va ta horisiwa hi Savata! Yesu u hlamula hi ku kongoma a ku: “Vakanganyisi ndzin’wina, xana a mi yi tshunxi nkuzi kumbe mbhongolo exivaleni hi Savata leswaku mi ya yi nwisa mati? Xana a swi nga fanelanga leswaku wansati loyi, loyi a nga ntukulu wa Abrahama, loyi Sathana a n’wi xaniseke malembe ya 18, a horisiwa hi siku ra Savata?”—Luka 13:15, 16.
Vakaneti va khomiwa hi tingana kambe mitshungu yi tsakisiwa hi masingita lawa Yesu a ma endlaka. Loko a ha ri eYudiya, Yesu u ya emahlweni a phindha swifaniso swimbirhi swa vuprofeta leswi vulavulaka hi Mfumo, leswi a swi hlamuseleke eku sunguleni loko a ri exikepeni eLwandle ra Galeliya.—Matewu 13:31-33; Luka 13:18-21.