Xingheniso Xa Xiyenge 14

Vakreste vo sungula va chumayele mahungu lamanene ya Mfumo ku ya fikela etindhawini ta le kule ta misava. Yesu u va kongomise laha a va fanele va chumayela kona naswona hi singita u endle leswaku va kota ku chumayela vanhu hi tindzimi ta vona. Yehovha u va nyike xivindzi ni matimba yo langutana ni nxaniso lowukulu.

Yesu u kombe muapostola Yohane xivono xa ku vangama ka Yehovha. Eka xivono xin’wana, Yohane u vone Mfumo wa matilo wu hlula Sathana ni ku byi herisela makumu vulawuri byakwe. Yohane u vone Yesu a ri karhi a fuma tanihi Hosi ni vanhu va 144 000 lava nga ta fuma na yena. Nakambe Yohane u vone misava hinkwayo yi ri paradeyisi laha vanhu hinkwavo va gandzelaka Yehovha hi ku rhula ni hi vun’we.