November

Loko hi dyondza hi leswaku Abrahama a a “kurile naswona a enerisekile,” leswi a swi vuli leswaku a a nga swi lavi ku hanya enkarhini lowu taka. Ha yini hi tiyiseka leswaku Abrahama a nga tisolanga hi ku va a yingise Yehovha hi ku tshembeka? Bibele yi vula leswaku Abrahama “a a rindzele muti lowu nga ni masungulo lama tiyeke, muti lowu muaki ni muendli wa wona ku nga Xikwembu.” (Hev. 11:10) Anakanya ndlela leyi Abrahama a nga ta tsaka ha yona ku hanya eparadeyisini laha misaveni ni ku ya emahlweni a tiyisa vunghana bya yena ni Xikwembu. U ta tsaka ku tiva leswaku xikombiso xa yena xa ripfumelo xi pfune malandza ya Xikwembu eka malembe yo tala! EParadeyisini u ta swi tiva leswaku gandzelo ra le Ntshaveni ya Moriya a ri fanekisela nchumu wun’wana wa nkoka swinene. (Hev. 11:19) Naswona u ta swi tiva leswaku ku vava loku a ku tweke loko a lunghiselela ku endla gandzelo hi n’wana wa yena Isaka ku pfune vanhu va timiliyoni lava nga ni ripfumelo ku twisisa ku vava loku Yehovha a ku tweke loko N’wana wa yena, Yesu Kreste, a va nkutsulo eka vanhu.—Yoh. 3:16. w16.02 1:15, 16

Hi nga tlhela hi tshembeka eka Yehovha loko makwerhu la rhangelaka a nga hi khomi kahle. Hosi Sawulo a a totiwe hi Xikwembu, kambe a nga n’wi khomanga kahle n’wana wa yena. A a nga swi twisisi leswaku ha yini Yonathani a rhandza Davhida. Kutani loko Yonathani a ringeta ku pfuna Davhida, Sawulo u hlundzukile swinene naswona u n’wi khomise tingana emahlweni ka vanhu vo tala. Kambe Yonathani u hambete a komba tata wakwe xichavo. Naswona u tshame a tshembekile eka Yehovha ni le ka Davhida, loyi a hlawuriweke hi Xikwembu leswaku a va hosi leyi landzelaka eIsrayele. (1 Sam. 20:31-41) Namuntlha, vamakwerhu lava rhangelaka emavandlheni va ringeta ku khoma vamakwerhu hi ndlela leyi fanaka. Kambe a va hetisekanga. Hikwalaho ka sweswo, swi nga ha endleka leswaku va nga swi twisisi leswaku ha yini hi endle swilo swo karhi. (1 Sam. 1:13-17) Kutani hambiloko va nga hi twisisi a hi tshameni hi tshembekile eka Yehovha. w16.02 3:14, 15

Vantshwa van’wana swi nga ha endleka va nga swi koti ku hambanisa ku tinyiketela ni ku khuvuriwa. Van’wana va nga ha vula leswaku se va tinyiketerile eka Yehovha kambe a va si lunghekela ku khuvuriwa. Kambe xana sweswo swa koteka hakunene? Loko munhu a tinyiketela, hi loko a byela Yehovha hi xikhongelo leswaku u ta n’wi tirhela hilaha ku nga heriki. Loko u khuvuriwa, u komba van’wana leswaku se u tinyiketerile eka Yehovha. Kutani loko u nga si khuvuriwa, u fanele u twisisa leswi vulaka swona ku tinyiketela eka Xikwembu. Loko u nyikela vutomi bya wena eka Yehovha, u n’wi byela leswaku u ta hanyela yena ntsena. U n’wi tshembisa leswaku ku tirhela yena ku ta va nchumu wa nkoka swinene evuton’wini bya wena. Ku endla xitshembiso xo tano eka Xikwembu i nchumu lowu u faneleke u wu tekela enhlokweni swinene!—Mat. 5:33. w16.03 1:14, 15

Pawulo u tirhise xikombiso xa miri ku hlamusela ndlela leyi Mukreste ha un’we a nga pfunaka ha yona evandlheni leswaku ri tshama ri ri ni vun’we ni ku yingisa Yesu, Murhangeri wa vandlha. U vule leswaku swirho hinkwaswo swa miri swa tirhisana “hi mahlangano hinkwawo lama nyikaka leswi lavekaka.” (Efe. 4:16) Kutani ku nga khathariseki leswaku ha ha ri vantshwa kumbe se hi kurile, hi hanye kahle kumbe doo, i yini leswi ha un’we wa hina a faneleke a swi endla? Yesu u veke vakulu leswaku va rhangela vandlha naswona u lava hi va xixima ni ku yingisa nkongomiso lowu va hi nyikaka wona. (Hev. 13:7, 17) Minkarhi yin’wana a swi olovi ku endla tano. Kambe hi nga kombela leswaku Yehovha a hi pfuna. Moya wakwe lowo kwetsima wu nga hi pfuna hi yingisa nkongomiso wihi ni wihi lowu vakulu va hi nyikaka wona. Nakambe ehleketa ndlela leyi hi nga pfunaka vandlha ra hina ha yona loko hi titsongahata ni ku tirhisana ni vakulu. Ri ta va ni vun’we naswona ndlela leyi hi rhandzanaka ha yona yi ta ya yi kula. w16.03 3:8, 9

Vo tala va vona va vule leswaku loko vamakwerhu van’wana va xinuna va ha ri vantshwa, vatswari va vona a va va khutazi leswaku va tivekela tipakani to tirhela Yehovha. Hikwalaho a va si tshama va rhangisa ku tirhela Xikwembu evuton’wini bya vona. (Mat. 10:24) Hikwalaho, nkulu u fanele a tinyika nkarhi wo va munghana wa makwerhu yoloye a lavaka ku n’wi letela leswaku a kuma malunghelo evandlheni a tlhela a n’wi byela leswaku vandlha ri lava mpfuno wa yena. Kutani, loko nkarhi wu ri karhi wu famba, nkulu u fanele a tshama na makwerhu yoloye ehansi a burisana na yena hi matsalwa lama nga n’wi pfunaka ku anakanya hi ku tinyiketela ka yena eka Yehovha. (Ekl. 5:4; Esa. 6:8; Mat. 6:24, 33; Luka 9:57-62; 1 Kor. 15:58; 2 Kor. 5:15; 13:5) Nkulu a nga ha n’wi vutisa swivutiso leswi nga ta n’wi khumba mbilu swo tanihi leswi nge: ‘I yini leswi u swi tshembiseke Yehovha loko u nyiketela vutomi bya wena eka yena? U anakanya leswaku Yehovha u titwe njhani loko u khuvuriwa?’ (Swiv. 27:11) ‘Sathana yena u titwe njhani?’ (1 Pet. 5:8) Vakulu va fanele va tsundzuka leswaku matsalwa yo tano ma nga va ni matimba swinene naswona ma nga yi khumba swinene mbilu ya makwerhu yoloye. w15 4/15 2:9, 11

Ha yini Yehovha minkarhi yin’wana a nga swi hlamuli hi nkarhi wolowo swikhongelo swa hina? Bibele yi vula leswaku Yehovha i Tata wa hina naswona hina hi vana vakwe. (Ps. 103:13) Tatana a nga nyiki n’wana wa yena nchumu wun’wana ni wun’wana lowu a wu kombelaka kumbe a n’wi nyika wona hi nkarhi lowu a wu kombelaka ha wona. Tatana wa swi tiva leswaku n’wana a nga ha lava nchumu wo karhi ivi a cinca a nga ha wu lavi. Nakambe tatana wa swi tiva leswi nga vuyerisaka n’wana wa yena, naswona wa yi tiva ndlela leyi swi nga va khumbaka ha yona van’wana. Wa swi tiva leswi n’wana wa yena a swi lavaka ni nkarhi lowu a faneleke a swi kuma ha wona. Loko tatana a a nyika n’wana wa yena swilo hinkwaswo leswi a swi kombelaka hi nkarhi lowu a swi kombelaka ha wona, tatana yoloye a a ta va hlonga ra n’wana wa yena. Yehovha, Tata wa hina wa le tilweni wa hi rhandza. Leswi a nga Muvumbi wa hina la tlhariheke, wa swi tiva leswi hi swi pfumalaka naswona hi yena a endlaka xiboho xa leswaku hi wihi nkarhi lowunene wo hi nyika leswi hi swi kombelaka. I swinene leswaku hi rindza kutani hi vona ndlela leyi Yehovha a swi hlamulaka ha yona swikhongelo swa hina.—Esa. 29:16; 45:9. w15 4/15 4:6, 7

Makumu ya mafambiselo lawa ya swilo ma kwala nyongeni, Sathana u lava leswaku hi ‘titsetselela,’ hi dzikisa mianakanyo ya hina eku endleni ka leswaku swilo swi hi fambela kahle emisaveni leyi. U lava hi rivala leswaku hi hanya emasikwini ya makumu kutani hi tshika ku tshama hi xalamukile. U nga swi pfumeleli sweswo swi endleka eka wena. Ku ri na sweswo, ‘tshama u rindzile.’ (Mat. 16:22, 23; 24:42) U nga pfuki u ma tshembile mavunwa ya Sathana ya leswaku makumu ma ha ri ekule kumbe a ma nge pfuki ma fikile. Sathana u lava hi anakanya leswaku a hi faneriwi hi ku rhandziwa hi Yehovha ni leswaku Xikwembu a xi nge pfuki xi hi rivalerile swidyoho swa hina. Kambe wolawo i mavunwa ya Sathana. Anakanya hi mhaka leyi, i mani loyi entiyisweni a nga faneriwiki hi ku rhandziwa hi Yehovha? I Sathana. I mani loyi Xikwembu xi nga taka xi nga pfuki xi n’wi rivalerile? I Sathana. Kambe hina Bibele yi hi byela leswi: “Xikwembu a xi pfumali ku lulama lerova xi nga rivala ntirho wa n’wina ni rirhandzu leri mi ri kombiseke hikwalaho ka vito ra xona.” (Hev. 6:10) Yehovha u swi teka swi ri swa nkoka swilo hinkwaswo leswi hi swi endlaka leswaku hi n’wi tsakisa, naswona ntirho lowu hi n’wi endlelaka wona a wu nge pfuki wu ve wa hava. (1 Kor. 15:58) Hikwalaho u nga xisiwi hi mavunwa ya Sathana. w15 5/15 1:16-19

Abrahama a a swi tiva leswaku minkarhi hinkwayo Yehovha u swi hetisisile switshembiso swakwe enkarhini lowu hundzeke, hikwalaho a a tiyiseka leswaku switshembiso hinkwaswo swa Yehovha hi vumundzuku na swona swi ta hetiseka. Leswi Abrahama a a ri ni ripfumelo eka leswi Yehovha a n’wi tshembiseke swona, u ye emahlweni a endla leswi Yehovha a n’wi kombeleke leswaku a swi endla. Hi xikombiso, u siye kaya rakwe emutini wa Ura naswona vutomi bya yena hinkwabyo a nga akanga yindlu emutini wo karhi. A a swi tiva leswaku miti leyi a yi ri ekusuhi ni laha a a tshama kona a yi nga ta tshama hilaha ku nga heriki hikuva valawuri va yona a va nga tirheli Yehovha. (Yox. 24:2) Ku ri na sweswo, a a wu langutele hi mahlo ngati nkarhi lowu Yehovha ni mfumo wa yena va nga ta fuma misava hilaha ku nga heriki. Mfumo lowu i “muti lowu nga ni masungulo lama tiyeke, muti lowu muaki ni muendli wa wona ku nga Xikwembu.” (Hev. 11:10) Abrahama swin’we na Avele, Enoko, Nowa ni van’wana a va tshemba leswaku ku ta va ni ku pfuxiwa ka vafi. Nkarhi wun’wana ni wun’wana loko va anakanya hi ku hanya hilaha ku nga heriki emisaveni yo saseka, ripfumelo ra vona eka Yehovha a ri ya ri tiya.—Hev. 11:15, 16. w15 5/15 3:8, 9

Yehovha u kombise matimba yakwe hi ku ma nyika Yesu Kreste leswaku a endla swilo swo hlamarisa. Loko Yesu a ha ri laha misaveni, u endle masingita. Hi nga hlaya hi man’wana ya wona eBibeleni naswona ma nga tiyisa ripfumelo ra hina. (Mat. 9:35; Luka 9:11) Yehovha u nyike Yesu matimba lamakulu, lerova muapostola Pawulo u te: “Kreste i matimba ya Xikwembu.” Kambe masingita lama endliweke hi Yesu ma hi khumba njhani? Muapostola Petro u vule leswaku Yesu u endle “swihlamariso” kumbe masingita. (Mint. 2:22) Masingita lawa ma hi dyondzisa yini? Ma hi dyondzisa hi leswi Yesu a nga ta swi endla hi nkarhi wa Mfumo wakwe wa Gidi ra Malembe. Hi nkarhi wolowo, u ta endla masingita lamakulu lama nga ta vuyerisa vanhu hinkwavo emisaveni. Masingita lawa a ma endleke,ma tlhela ma hi pfuna ku twisisa swo tala malunghana ni timfanelo ta yena ni ta Tata wakwe. Exihlokweni lexi, hi ta bula hi masingita manharhu lawa Yesu a ma endleke naswona hi ta dyondza ni leswaku ma nga hi vuyerisa njhani namuntlha ni le nkarhini lowu taka. w15 6/15 1:1, 2

Loko Yesu a xiye i Tata wa yena, Yehovha la hanyiseke wansati loyi, u vulavule na yena hi musa a ku: “N’wananga, ripfumelo ra wena ri ku hanyisile. Famba hi ku rhula, naswona u hanya swinene evuvabyini bya wena bya khombo.” (Mar. 5:34) Swa hi tsakisa swinene ku vona ndlela leyi Yesu a a va rhandza ha yona vanhu, ngopfungopfu lava a va vabya. U hambane swinene na Sathana loyi a ringetaka ku hi khorwisa leswaku a hi pfuni nchumu ni leswaku a ku na munhu la hi rhandzaka. Hambiswiritano, masingita lama endliweke hi Yesu ma kombise leswaku u ni mhaka na hina ni swiphiqo swa hina. Ha swi tlangela swinene leswi hi nga ni Hosi tlhelo Muprista Lonkulu la nga ni rirhandzu! (Hev. 4:15) Swi nga ha hi tikela ku twisisa ndlela leyi munhu loyi a nga ni nkarhi wo leha a ri karhi a vabya a titwaka ha yona, ngopfungopfu loko hina hi nga vabyi. Kambe anakanya hi Yesu. U va twele vusiwana vanhu lava a va vabya hambileswi yena a nga si tshamaka a vabya. Onge hi nga tikarhatela ku tekelela xikombiso xakwe xa rirhandzu.—1 Pet. 3:8. w15 6/15 2:11, 12

Hi ni lunghelo ra ku tiva vito ra Xikwembu ni ra ku va “vanhu va vito ra xona.” (Mint. 15:14; Esa. 43:10) Hi khongela hi ku, “Vito ra wena a ri kwetsimisiwe,” hileswaku ri endliwa ri va leri kwetsimaka. (Mat. 6:9) Hi tlhela hi kombela Yehovha leswaku a hi pfuna leswaku hi nga endli kumbe ku vula nchumu lowu nga ha tisaka xisandzu eka yena. A hi fanelanga hi fana ni van’wana va le nkarhini wa vaapostola lava a va nga swi endli leswi a va dyondzisa van’wana leswaku va swi endla, hilaha ndzimana ya namuntlha yi swi kombisaka hakona. Yehovha u ta ri kwetsimisa hi ku helela vito rakwe loko a ta va a lovise vanhu hinkwavo lava n’wi sandzaka va tlhela va nga pfumeli leswaku a va Mufumi wa vona. (Ezek. 38:22, 23) Hi nkarhi wolowo, vanhu va ta va va hetisekile naswona swivumbiwa hinkwaswo swa le tilweni ni laha misaveni swi ta gandzela Yehovha ni ku dzunisa vito rakwe lero kwetsima. Eku heteleleni, Tata wa hina la nga ni rirhandzu u ta va “swilo hinkwaswo eka vanhu hinkwavo.”—1 Kor. 15:28. w15 6/15 4:7, 10

Eka Matsalwa ya Xiheveru, rito leri nge “vunavelo” ri tlhela ri tirhiseriwa ku hlamusela tempele ya khale ya le Israyele. (1 Tikr. 28:2; Ps. 132:7) Tempele a yi saseke swinene eka Yehovha hikuva a yi ri ndhawu leyi a a gandzeriwa eka yona. Naswona a yi tirhiseriwa ku vangamisa Yehovha laha misaveni. (Esa. 60:13) Hi yihi ndhawu leyi Yehovha a gandzeriwaka eka yona namuntlha? A nga gandzeriwi emuakweni lowu fanaka ni tempele. U gandzeriwa etempeleni ya moya naswona yi vangamisa Yehovha swinene ku tlula muako wihi ni wihi. I yini tempele ya moya? I lunghiselelo ra Xikwembu leri endlaka leswaku vanhu va kota ku va vanghana va xona va tlhela va xi gandzela. Lunghiselelo leri ri ve kona hikwalaho ka nkutsulo wa Yesu. Ri sungule ku tirha hi lembe ra 29 C.E. loko Yesu a khuvuriwa a tlhela a totiwa a va Muprista Lonkulu wa tempele ya Yehovha ya moya.—Hev. 9:11, 12. w15 7/15 1:1-3

Ku ta humelela yini loko Yesu a ta “hi matimba ni ku vangama lokukulu”? U ta hakela lava tshembekaka ivi a xupula lava nga tshembekiki. (Mat. 24:46, 47, 50, 51; 25:19, 28-30) Yesu u tirhise xifaniso leswaku a hlamusela mhaka leyi hi vuenti. U te: “Loko N’wana wa munhu a fika hi ku vangama kakwe, tintsumi hinkwato ti ri na yena, u ta tshama exiluvelweni xakwe xo vangama. Naswona matiko hinkwawo ma ta hlengeletiwa emahlweni kakwe, kutani u ta hambanisa vanhu van’wana eka van’wana, ku fana ni loko murisi a hambanisa tinyimpfu eka timbuti. Naswona u ta veka tinyimpfu evokweni rakwe ra xinene, kambe timbuti eka lera ximatsi.” (Mat. 25:31-33) Ku ta endleka yini hi tinyimpfu ni timbuti? Ti ta avanyisiwa. Timbuti kumbe vanhu lava nga tshembekiki “va ta loviseriwa makumu.” Kambe tinyimpfu kumbe vanhu lava tshembekaka va ta kuma vutomi lebyi nga heriki.—Mat. 25:46. w15 7/15 2:11, 12

Hakanyingi ha swi tsakela swakudya, ririmi, tindhawu to saseka ni mikhuva ya le ndhawini leyi hi kuleleke eka yona. Kambe, xana hi vona onge leswi hi swi rhandzaka minkarhi hinkwayo swi tlula leswi vanhu van’wana va swi rhandzaka? Yehovha u lava leswaku hi tsakela swilo swo hambanahambana leswi a swi tumbuluxeke. (Ps. 104:24; Nhlav. 4:11) Kutani, ha yini hi fanele hi sindzisa leswaku ndlela leyi hi endlaka swilo ha yona ya antswa ku tlula ya van’wana? Yehovha u lava leswaku vanhu va mixaka hinkwayo va dyondza ha yena, va n’wi gandzela va tlhela va hanya hilaha ku nga heriki. (Yoh. 3:16; 1 Tim. 2:3, 4) Hikwalaho loko vamakwerhu va ri ni mavonelo lama hambaneke ni ya hina, hi tiyimiserile ku va yingisa loko ntsena mavonelo ya vona ma amukeleka eka Yehovha. Loko hi endla tano, vutomi bya hina byi ta tsakisa naswona hi ta tshama hi ri ni vun’we ni vamakwerhu. Hilaha se hi buleke hakona, leswi hi tshembekaka eka Yehovha ni le ka Mfumo wakwe, a hi hlanganyeli eka tinyimpi ta misava leyi. Hi venga ku tikukumuxa ni ku phikizana loku nga kona emisaveni ya Sathana. w15 7/15 3:17, 18

Ku ni tindlela to tala to kombisa Yehovha leswaku ha n’wi rhandza. Hi xikombiso, hi nga kombisa ndlela leyi hi rhandzaka Yehovha ha yona hi ku chumayela van’wana mahungu lamanene ya Mfumo hi ku hiseka. (Mat. 24:14; 28:19, 20) Hi nga tlhela hi kombisa ndlela leyi hi xi rhandzaka ha yona Xikwembu hi ku yi tiyisela hi ku tshembeka miringo leyi ringaka ripfumelo ra hina. (Ps. 84:11; Yak. 1:2-5) Hambiloko miringo ya hina yi tika, hi nga tiyiseka leswaku Yehovha wa ku vona ku xaniseka ka hina naswona u ta hi pfuna hikuva hi va risima eka yena. (Ps. 56:8) Ndlela leyi hi rhandzaka Yehovha ha yona yi hi susumetela ku anakanyisisa hi swilo hinkwaswo swo hlamarisa leswi a swi vumbeke. Hi kombisa Yehovha leswaku ha n’wi rhandza swin’we ni Rito rakwe hi ku hisekela ku dyondza Bibele. Hi khongela eka Yehovha nkarhi ni nkarhi hikuva ha n’wi rhandza naswona hi lava ku tiyisa vuxaka bya hina na yena. Naswona loko hi anakanyisisa hi nyiko yakwe ya risima ya nkutsulo, ndlela leyi hi n’wi rhandzaka ha yona yi ya yi kula swinene. (1 Yoh. 2:1, 2) Leti ko va tin’wana ta tindlela to tala leti hi kombisaka Yehovha ha tona leswaku hi yi teka yi ri ya nkoka ndlela leyi a hi kombisaka rirhandzu leri tiyeke ha yona. w15 8/15 1:6, 17, 18

Minkarhi yin’wana swi nga ha lava hi lehisa mbilu emisaveni leyintshwa. Hi xikombiso, hi nga ha twa leswaku vanhu van’wana va tsake swinene hileswi maxaka ni vanghana va vona va pfuxiweke eku feni. Kambe, hi nga ha boheka ku rindza leswaku varhandziwa va hina va pfuxiwa eku feni. Loko sweswo swo endleka, xana hi ta tsaka ni van’wana hi tlhela hi lehisa mbilu? (Rhom. 12:15) Loko hi dyondza sweswi ku rindzela Yehovha hi ku lehisa mbilu leswaku a hetisisa switshembiso swakwe, swi ta hi pfuna leswaku hi lehisa mbilu hi nkarhi wolowo. Hi nga tlhela hi tilunghiselela ku ya hanya emisaveni leyintshwa hi ku lehisa mbilu loko ndlela leyi hi wu twisisaka ha yona ntiyiso wa le Bibeleni yi antswisiwa. Xana ha ri dyondza rungula rolero lerintshwa naswona xana hi lehisa mbilu loko hi nga ri twisisi kahle? Loko swi ri tano, emisaveni leyintshwa, swi ta hi olovela ku lehisa mbilu nkarhi wun’wana ni wun’wana loko Yehovha a hi nyika swileriso leswintshwa.—Swiv. 4:18; Yoh. 16:12. w15 8/15 3:9, 10

Muapostola Pawulo a a lava leswaku Vakreste va le Efesa va va lava wupfeke. U va khutaze ku va ni vun’we eripfumelweni ni ku ya emahlweni va dyondza hi Yesu leswaku va va “vanhu lava kuleke hi ku helela, hi mpimo wa vukulu lebyi nga bya ku tala ka Kreste.” (Efe. 4:13) Vandlha ra le Efesa se a ri ri ni malembe yo hlayanyana ri ri kona loko Pawulo a ri tsalela papila. Vo tala evandlheni rolero se a va ri Vakreste lava nga ni ntokoto naswona va wupfeke. Kambe van’wana va vona a va ha fanele va tiyisa vuxaka bya vona na Yehovha. Ninamuntlha, vamakwerhu vo tala va ni nkarhi wo leha va tirhela Yehovha naswona i Vakreste lava wupfeke. Hambiswiritano, van’wana emavandlheni a va si wupfa. Hi xikombiso, vanhu va magidi va khuvuriwa lembe ni lembe, hikwalaho van’wana va ha fanele va tikarhatela ku va lava wupfeke. Ku vuriwa yini hi wena?—Kol. 2:6, 7. w15 9/15 1:2, 3

Vo tala va vula leswaku ku endla vutiolori nkarhi ni nkarhi swa va phyuphyisa swi tlhela swi va endla va va ni rihanyo lerinene. Kambe, ku vuriwa yini loko hi lava ku endla vutiolori hi ri ntlawa? Xana swi ni mhaka leswaku hi byi endla na vamani? Swivuriso 13:20 yi ri: “Loyi a fambaka ni vanhu vo tlhariha u ta tlhariha, kambe loyi a tirhisanaka ni lavo hunguka, a swi nge n’wi fambeli kahle.” Swi le rivaleni leswaku i swa nkoka ku tirhisa ripfalo ra hina leri leteriweke hi Bibele loko hi hlawula vuhungasi. U heta nkarhi wo tanihi kwihi u ri eku tihungaseni? Xana u rhangisa mintirho yo fana ni minhlangano, nsimu ni ku dyondza Bibele evuton’wini bya wena kumbe u rhangisa vuhungasi? I yini lexi nga xa nkoka swinene eka wena? Yesu u te: “Kutani, hambetani mi lava mfumo ni ku lulama ka yena ku sungula, xisweswo swilo leswin’wana hinkwaswo mi ta engeteleriwa swona.” (Mat. 6:33) Loko u endla xiboho xa ndlela leyi u nga ta wu tirhisa ha yona nkarhi wa wena, xana ripfalo ra wena ri ku tsundzuxa ndzayo leyi ya Yesu? w15 9/15 2:13, 15

Yoleyo a ku ri ndzayo leyi faneleke ni leyi fikeke hi nkarhi. Loko Yehovha a xiye leswaku Kayini a a ri ekhombyeni ro endla nchumu wo biha swinene, u ringete ku n’wi pfuna. Khombo ra kona Kayini a nga pfumelanga ku pfuniwa hi Yehovha naswona u xanisekile hikwalaho ka sweswo. (Gen. 4:11-13) Hi nkarhi wun’wana Yehovha u xiye leswaku langutelo leri hoxeke ra Baruku a ri n’wi endla a karhala a tlhela a hela matimba. Hikwalaho Yehovha u byele Baruku leswaku ndlela leyi a a anakanya ha yona a yi hoxile ni leswaku a a fanele a cinca. Baruku u yingise ndzayo ya Yehovha naswona yi ponise vutomi bya yena. (Yer. 45:2-5) Pawulo u tsale a ku: “Loyi Yehovha a n’wi rhandzaka wa n’wi tshinya; entiyisweni, u ba un’wana ni un’wana la n’wi tekaka a ri n’wana.” (Hev. 12:6) A nga hi tshinyi loko swi fanerile ntsena, kambe u tlhela a hi letelaEBibeleni, hi hlaya hi malandza yo tshembeka lawa Yehovha a ma leteleke leswaku ma va vanhu vo antswa. w15 9/15 4:12, 13

Vagibiyoni hi vutlhari va swi xiyile leswaku Vaisrayele a va seketeriwa hi Xikwembu xa ntiyiso. Rahava na yena u vone matimba ya Yehovha. A a nga ri Muisrayele, kambe u swi twile leswaku Yehovha u va ponise njhani vanhu vakwe aEgipta. Loko tinhlori timbirhi ti fika eka yena, u te: “Ndzi swi tiva kahle leswaku Yehovha u ta mi nyika tiko hakunene.” Rahava a a tshemba leswaku Yehovha a nga ponisa yena ni ndyangu wa ka vona. (Yox. 2:9-13; 4:23, 24) Swikombiso leswi ni swin’wana swo tala swa le Bibeleni swi ta hi pfuna ku twisisa leswi swi vulaka swona ku “vona Xikwembu” kumbe ku vona matimba ya Xikwembu. Loko se hi tiva Yehovha ni timfanelo ta yena, hi vona matimba ya yena hi ‘mahlo ya timbilu ta hina.’ (Efe. 1:18) Leswi swi hi susumetela ku tekelela vanhu vo tshembeka va le nkarhini lowu hundzeke ni va namuntlha lava voneke ndlela leyi Yehovha a pfuneke vanhu va yena ha yona. w15 10/15 1:6, 7, 9

Bibele yi kombisa leswaku Marta a a ri munghana lonkulu wa Yesu, naswona yi vula leswaku Yesu a a n’wi rhandza. Entiyisweni a a ku nga ri yena ntsena wansati loyi Yesu a a n’wi rhandza a tlhela a n’wi xixima. Hi xikombiso, Mariya makwavo wa Marta na yena a ri munghana lonkulu wa Yesu. Naswona Yesu a a rhandza mana wakwe, Mariya. (Yoh. 19:25-27) Kutani ha yini Yesu a a rhandza Marta? Yesu a a rhandza Marta hikuva a a ri ni musa a tlhela a hanana naswona a a tirha hi matimba. Kambe xa nkoka swinene, Yesu a a n’wi rhandza hileswi a a ri ni ripfumelo leri tiyeke. A a swi pfumela hinkwaswo leswi Yesu a a swi dyondzisa, naswona a a nga kanakani leswaku a a ri Mesiya la tshembisiweke. (Yoh. 11:21-27) Nilokoswiritano, Marta a a nga hetisekanga. A a swi endla swihoxo ku fana na hina hinkwerhu. Hi xikombiso, siku rin’wana loko Yesu a va endzerile, Marta u hlundzukele Mariya makwavo wa yena ivi a byela Yesu leswaku a n’wi tshinya. Marta u te: “Hosi, xana a swi na mhaka eka wena leswi makwerhu a ndzi siyeke ndzi ri swanga ndzi tirha swin’wana? Hikokwalaho, n’wi byele leswaku a ta ndzi pfuna.”—Luka 10:38-42. w15 10/15 3:1, 2

Ku anakanyisisa hi Yehovha na Yesu swi hi pfuna leswaku hi tshama hi ri karhi hi hisekela ntiyiso. Ku hiseka ka wena ku ta khutaza vamakwenu ni vanhu lava u hlanganaka na vona ensin’wini. Naswona loko u anakanyisisa hi leswi Yehovha a ku endleleke swona hi ku lunghiselela gandzelo ra nkutsulo ra Yesu, u ta ya emahlweni u teka vuxaka bya wena ni Xikwembu byi ri bya nkoka. (Rhom. 3:24) Mark, makwerhu un’wana wa xinuna wa laha Afrika Dzonga loyi a heteke malembe manharhu a ri ekhotsweni hikwalaho ka ripfumelo rakwe, u te: “Ku anakanyisisa ku nga fanisiwa ni riendzo ro tsakisa. Loko hi ya hi anakanyisisa hi swilo swa moya, hi ta ya hi dyondza swilo leswintshwa malunghana ni Xikwembu xa hina, Yehovha. Minkarhi yin’wana loko ndzi titwa ndzi helenyana matimba kumbe ndzi vilela hi swa le nkarhini lowu taka, ndzi teka Bibele kutani ndzi anakanyisisa hi ndzimana yo karhi. Sweswo swi ndzi endla ndzi rhulisa mbilu.” w15 10/15 4:15

Kuma nkarhi lowunene wo hlamusela n’wana wa wena wa muntshwa xivangelo xo va u veke nawu kumbe xo va u endle xiboho xo karhi. Loko a twisisa xivangelo xa kona, swi nga endleka a ku yingisa. Barry, loyi a kuriseke vana va mune, u ri: “Ku nyikela swivangelo swi pfuna vantshwa leswaku va ku tshemba.” Vantshwa va ta swi vona leswaku a wu endlanga nawu kumbe xiboho ntsena hi leswi u nga ni vulawuri byo endla tano kambe hikwalaho ka leswi u nga ni xivangelo lexi twalaka. Nakambe tsundzuka leswaku vantshwa a va ha ri swihlangi. Va dyondza ku tiehleketelela va tlhela va tiendlela swiboho. (Rhom. 12:1) Barry wa hlamusela: “Vantshwa va fanele va dyondza ku endla swiboho leswi twisisekaka leswi sekeriwe eka swivangelo ku nga ri eka mintlhaveko.” Hikwalaho titsongahate u tlhela u hlamusela n’wana wa wena xivangelo xo va u endle xiboho xo karhi. Hi ndlela yoleyo, u ta dyondza ku tiendlela swiboho naswona u ta swi tiva leswaku wa n’wi xixima ni leswaku wa swi xiya leswaku se wa kula. w15 11/15 2:11

Namuntlha, vanhu va timiliyoni emisaveni hinkwayo va gandzela Yehovha. I vamakwerhu. Hi fanele hi titwa njhani hi vona? (Rhom. 12:10) Muapostola Petro u tsale leswaku “ku yingisa ntiyiso” ku fanele ku endla leswaku hi va ni “xinakulobye xa vumakwerhu.” Petro na yena u byele Vakrestekulobye a ku: “Ku tlula hinkwaswo, rhandzanani hi rirhandzu ro enta.” (1 Pet. 1:22; 4:8) Nhlengeletano ya hina ya misava hinkwayo yi hlawulekile. Ha yini? Hikuva hi rhandza vamakwerhu hi rirhandzu ra xiviri. Xa nkoka swinene, leswi hi rhandzaka Yehovha ni ku yingisa milawu yakwe, wa hi seketela hi matimba lamakulu swinene evuakweni hinkwabyo, ku nga moya wakwe lowo kwetsima. Moya wa Xikwembu wu hi pfuna leswaku hi va vamakwerhu lava nga ni vun’we bya xiviri emisaveni hinkwayo.—1 Yoh. 4:20, 21. w15 11/15 4:8, 9

Yehovha a nga langutelanga leswaku hi vulavula ririmi ro karhi leswaku hi n’wi tiva kumbe hi tiva xikongomelo xakwe. (Nhlav. 7:9, 10) Vanhu va tirhisa tindzimi to tala to hambanahambana kambe Yehovha wa ti twisisa hinkwato ka tona. Hi swi tiva njhani? Bibele yi ni marito ma nga ri mangani ya Yesu ya ririmi ro sungula leri a ri tirhiseke. (Mat. 27:46; Mar. 5:41; 7:34; 14:36) Kambe Yehovha u endle leswaku rungula ra Yesu ri tsariwa ni ku hundzuluxeriwa hi Xigriki kutani hi ku famba ka nkarhi ni hi tindzimi tin’wana. Hikwalaho ka leswi Rito ra Xikwembu ri kopiweke ko tala hi Vayuda ni Vakreste, rungula ra Xikwembu ri hlayisiwile. Tikopi teto ti hundzuluxeriwe hi tindzimi to tala. Kwalomu ka malembe ya 400 Kreste a file, John Chrysostom u vule leswaku tidyondzo ta Yesu ti hundzuluxeriwe hi tindzimi leti vulavuriwaka hi vanhu vo tala ku katsa Vasiriya, Vaegipta, Maindiya, Vaperesiya ni Vaetiyopiya. w15 12/15 1:10, 11

Loko hi nga vulavuli hi nkarhi lowunene, vanhu a va nge swi twisisi kumbe a va nge swi amukeli leswi hi va byelaka swona. Hi xikombiso, ku tsekatseka ka misava ni tsunami swi hlasele madoroba yo tala ya le vuxeni bya Japani hi March 2011. Ku fe vanhu vo tlula 15 000. Hambileswi Timbhoni ta Yehovha to tala ti feriweke hi swirho swa mindyangu ya tona ni vanghana, a ti lava ku tirhisa Bibele leswaku ti chavelela lava a va ri eka xiyimo lexi fanaka ni xa tona. Kambe a ti swi tiva leswaku vo tala va vanhu lava a va ri Mabudha naswona a va nga tivi swo tala hi Bibele. Hikwalaho, ematshan’weni yo va byela hi ku pfuka ka vafi hi nkarhi wolowo, vamakwerhu lava va va chavelerile ni ku tlhela va va hlamusela leswi endlaka leswaku swilo swo tano swo biha swi humelela vanhu lavanene. w15 12/15 3:7

Khombo ra kona, vanhu van’wana ni tikhampani tin’wana ti vula leswaku ti kume murhi lowu nga ta hi horisa. Va endla sweswo hikuva va lava mali yo tala. Va nga ha vula leswaku vanhu vo tala va yi tirhisile ivi va hola. Naswona loko hi vabya, hi nga ha lava ku ringeta xin’wana ni xin’wana lexi nga hi pfunaka leswaku hi hola ni ku hanya nkarhi wo leha. Loko hi tlharihile, hi ta va ni vuxiyaxiya eka leswi hi swi tshembaka ngopfungopfu loko munhu loyi a hi nyikaka switsundzuxo a nga leteriwanga kahle. Hi fanele hi tivutisa leswi: ‘U vula leswaku swilo leswi swi pfune van’wana, kambe xana ndza tiyiseka leswaku hakunene swi va pfunile? Hambiloko swi va pfunile, ndzi swi tiva njhani leswaku swi ta ndzi pfuna? Xana ndzi fanele ndzi endla ndzavisiso ni ku vulavula ni un’wana loyi a leteriweke kahle leswaku a ndzi tshungula?’—Det. 17:6. w15 12/15 4:14, 15

Pawulo a a swi tiva leswaku loko hi amukela rirhandzu lerikulu ra Yesu, ri ta hi susumetela ku rhandza Yesu ni ku n’wi xixima. Loko hi swi twisisa hilaha ku heleleke leswi Yehovha a nga hi endlela swona, rirhandzu rakwe ri ta hi susumetela ku hanya hi ndlela leyi kombisaka leswaku hi xixima Yesu. Xana hi nga swi endlisa ku yini sweswo? Rirhandzu ra Yehovha ri ta hi susumetela ku tekelela xikombiso xa Yesu, ni ku landzela mikondzo ya yena hilaha hi nga kotaka hakona. (1 Pet. 2:21; 1 Yoh. 2:6) Loko hi yingisa Xikwembu na Kreste hi kombisa leswaku ha va rhandza. Yesu u te: “Loyi a nga ni swileriso swa mina a tlhela a swi hlayisa, hi yena loyi a ndzi rhandzaka. Hi ku fanana loyi a ndzi rhandzaka u ta rhandziwa hi Tatana, naswona ndzi ta n’wi rhandza.” (Yoh. 14:21; 1 Yoh. 5:3) Kutani tivutise: ‘Hi le ka tindlela tihi leti se ndzi tekelelaka Yesu eka tona? Hi kwihi laha ndzi faneleke ndzi antswisa kona?’ I swa nkoka ku tivutisa swivutiso leswi hikuva misava yi lava hi hanya hi ndlela leyi yi hanyaka ha yona.—Rhom. 12:2. w16.01 2:7-9

Xana u anakanya leswaku u hiseka hi ndlela yo hlawuleka eka ntirho wo chumayela? Xana wa swi rhandza hakunene ku hlaya Bibele ni ku dyondza hi “swilo leswi enteke swa Xikwembu”? (1 Kor. 2:10) Xana u titwa onge Yehovha u ku nyike vuyelo byo hlamarisa entirhweni wo chumayela? Xana u rhangisa ku endla ku rhandza ka Yehovha ku tlula hinkwaswo? Xana wa va rhandza swinene van’wana ni ku titwa u ri ni vutihlamuleri lebyikulu byo va pfuna leswaku va tirhela Yehovha? Xana u vone vumbhoni lebyi kombisa leswaku Yehovha u ku pfunile hi tindlela to tala evuton’wini bya wena? Loko nhlamulo ya wena yi ri ina eka swivutiso leswi hinkwaswo, xana swi vula leswaku u rhamberiwe ku ya etilweni? Doo, a swi tano. Ha yini? Hikuva malandza hinkwawo ya Xikwembu ma nga titwa hi ndlela yoleyo, ku nga khathariseki leswaku va totiwile kumbe a va totiwanga. Naswona hi ku tirhisa moya wa yena lowo kwetsima, Yehovha a nga nyika malandza ya yena matimba lama fanaka, ku nga khathariseki leswaku va ni ntshembo wihi. Kahlekahle, loko u nga tiyiseki leswaku u ya etilweni, swi vula leswaku a wu rhambiwanga. w16.01 3:14, 15

Loko Yesu a tirha ni Tata wa yena, a a tsakile hikuva u hetisise swilo swo tala naswona a a swi tiva leswaku Yehovha wa n’wi rhandza. Kambe ku vuriwa yini hi hina? Yesu u vule leswaku hi ta kuma ntsako loko hi nyika ni loko hi amukela. (Mint. 20:35) Swa hi tsakisa loko hi kuma ntiyiso, kambe ha yini swi tlhela swi hi tisela ntsako loko hi wu byela van’wana? Hikuva hi va vona va tsaka swinene loko va twisisa leswi Bibele yi swi dyondzisaka ni ku sungula ku va ni vuxaka ni Xikwembu. Swa hi tsakisa loko hi va vona va cinca ndlela leyi va anakanyaka hi yona ni ndlela leyi va hanyaka hi yona. Ntirho wo chumayela i wa nkoka swinene naswona i ntirho lowu enerisaka swinene lowu hi faneleke hi wu endla. Wu endla swi koteka eka lava va vaka vanghana va Xikwembu leswaku va kuma vutomi lebyi nga heriki.—2 Kor. 5:20. w16.01 5:6, 7