December

Hi nga sungula ku kanakana loko hi nga swi twisisi swin’wana leswi Bibele yi swi dyondzisaka kumbe loko Yehovha a nga swi hlamuli hi ndlela leyi a hi langutele hayona swikhongelo swa hina. Loko hi honisa ku kanakana ka hina, ripfumelo ra hina ri nga tsana naswona vuxaka bya hina na Yehovha byi ta onhaka. (Yak. 1:7, 8) Nakambe swi nga endla leswaku ntshembo lowu hi nga na wona hi vumundzuku wu hela. Muapostola Pawulo u fanise ntshembo lowu hi nga na wona hi vumundzuku ni nsoma. (Hev. 6:19) Nsoma wu endla leswaku xikepe xi nga ndlengandlengisiwi hi xidzedze nileswaku xi nga chayisi maribye. Nsoma wu ta tirha kahle loko nketana leyi boheleriweke exikepeni yi nga tsemeki. Loko nketana yi rhusile yi nga tsemeka hi ku olova, hilaha ku fanaka, na hina loko hi kanakana ripfumelo ra hina ri nga tsana. Munhu loyi a kanakanaka loko a kanetiwa, a nga heleriwa hi ntshembo wa leswaku Yehovha u ta swi endla leswi a hi tshembisaka swona. Loko ripfumelo ra hina ri tsana ni ntshembo wa hina na wona wu ta hela. Munhu loyi a nga exiyin’weni xo tano u ta heleriwa hi ntsako! w21.02 30 ¶14-15

Swi nga endleka Abrahama a a ri ni malembe yo tlula 70 loko yena ni ndyangu wa ka vona va rhurha eUra. (Gen. 11:31–12:4) U hete malembe ya kwalomu ka 100, a tshama ematendeni etikweni ra Kanana. Abrahama u fe a ri ni malembe ya 175. (Gen. 25:7) A nga ku vonanga ku hetiseka ka xitshembiso lexi Yehovha a n’wi tshembiseke xona xo nyika vatukulu vakwe tiko ra Kanana. Nakambe, a nga ku vonanga ku simekiwa ka muti, ku nga Mfumo wa Xikwembu. Hambiswiritano, Abrahama u hlamuseriwa tanihi loyi a feke “a kurile naswona a a enerisekile.” (Gen. 25:8) Ku nga khathariseki mitlhontlho leyi Abrahama a a langutane na yona, u tshame a ri ni ripfumelo leri tiyeke naswona u rindzele Yehovha a tsakile. I yini lexi endleke a kota ku tiyisela? Yehovha u n’wi sirhelerile vutomi byakwe hinkwabyo naswona a a n’wi teka tanihi munghana wakwe. (Gen. 15:1; Esa. 41:8; Yak. 2:22) Ku fana na Abrahama, na hina hi rindzele muti lowu nga ni masungulo lama tiyeke. (Hev. 11:10) Kambe a hi rindzelanga leswaku wu akiwa. Mfumo wa Xikwembu wu simekiwe hi 1914 naswona se wa fuma etilweni. (Nhlav. 12:7-10) Kambe hi rindzele leswaku wu ta fuma misava hinkwayo. w20.08 4-5 ¶11-12

Leswaku hi kota ku yingisela van’wana hi vurhon’wana, hi fanele hi titsongahata hi tlhela hi lehisa mbilu. Ku ni swivangelo swinharhu leswi endlaka mhaka leyi yi va ya nkoka. Xo sungula, a hi nge hatliseli ku ehleketelela van’wana swilo swo biha. Xa vumbirhi, hi ta twisisa ndlela leyi makwerhu a titwaka hayona ni swikongomelo swakwe, sweswo swi ta endla hi n’wi twela vusiwana. Xa vunharhu, hi nga pfuna makwerhu a dyondza swo karhi hi yena n’wini. Mikarhi yin’wana, a hi yi twisisi ndlela leyi hi titwaka hayona kukondza hi vulavula hayona. Vamakwerhu van’wana swa va tikela ku vulavula hi ndlela leyi va titwaka hayona hikwalaho ka ndlela leyi va kurisiweke hayona, ndhavuko wa vona kumbe vumunhu bya vona. Swi nga va tekela nkarhi ku tiphofula eka hina, kambe loko va tiphofula hi kona va nga ta twisisa ndlela leyi va titwaka hayona. Loko hi tekelela Yehovha hi va lehisela mbilu, eku heteleleni va ta hi tshemba. Loko se va lunghekile ku hi byela ndlela leyi va titwaka hayona, hi fanele hi va yingisela hi vurhon’wana. w20.04 15-16 ¶6-7

Hi ntolovelo tihlampfi ti kumeka endhawini leyi nga ni mati lawa ti ma rhandzaka naswona yi nga ni swakudya swo tala. Xana nkarhi lowu muphasi wa tihlampfi a a sungula ntirho wakwe ha wona a wu ri wa nkoka? Ku twa hi ta nkarhi lowunene wo phasa tihlampfi, xiya leswi Mbhoni yin’wana ya le Pacific island yi swi byeleke murhumiwa un’wana loko yi n’wi rhamba leswaku va ya phasa tihlampfi. Murhumiwa u te: “Hi ta hlangana mundzuku nimixo hi awara ya kaye.” Mbhoni yoleyo yi te: “Ndza vona a wu swi twisisi. Hi sungula ku phasa tihlampfi hi nkarhi lowu ti kumekaka ha wona, ku nga ri hi nkarhi lowu hina hi lavaka ha wona.” Hilaha ku fanaka, vadyondzisiwa vo sungula va Yesu, a va ya laha vanhu va kumekaka kona ni hi nkarhi lowu va kumekaka ha wona. Hi xikombiso, a va chumayela etempeleni, emasinagogeni, hi yindlu ni yindlu ni le timakete. (Mit. 5:42; 17:17; 18:4) Na hina hi fanele hi wu tiva kahle nkarhi lowu vanhu va le nsin’wini ya ka hina va kumekaka ha wona. Hi fanele hi fambisana ni swiyimo, hi chumayela laha vanhu va kumekaka kona ni hi nkarhi lowu va kumekaka ha wona.—1 Kor. 9:19-23. w20.09 4 ¶8-9

Ndlela yin’wana yo endla vunghana na Yesu i ku seketela vandlha ra Vukreste. Vunghana bya hina na Yesu bya tiya loko hi tirhisana ni vamakwerhu lava hlawuriweke leswaku va hi kongomisa. (Efe. 4:16) Hi xikombiso, sweswi hi le ku endleni ka matshalatshala ya leswaku Tiholo ta hina ta vugandzeri ti tirhisiwa hi ndlela leyinene. Hikwalaho ka sweswo, mavandlha man’wana ma hlanganisiwile leswaku ma va vandlha rin’we. Leswi swi endle leswaku ku hlayisiwa mali yo tala leyi nyikeriwaka. Hambiswiritano, vamakwerhu van’wana va boheke ku tiyisela ku cinca loku ka swiyimo. Vamakwerhu volavo vo tshembeka, swi nga endleka va hete malembe yo tala va ri karhi va hlanganyela evandlheni ro karhi naswona se a va va tolovele ngopfu vamakwerhu va kwalaho. Kambe sweswi va komberiwa ku cinca vandlha. Yesu wa tsaka swinene loko a vona vadyondzisiwa lava vo tshembeka va fambisana ni ku cinca loku! w20.04 24 ¶14

Hosi ya le n’walungwini ni hosi ya le dzongeni ti ye emahlweni ti lwela ku fuma misava. Hi xikombiso, xiya leswi endlekeke endzhaku ka Nyimpi ya Vumbirhi ya Misava, loko mfumo wa Soviet Union ni matiko lawa a ma tirhisana na wona va sungule ku fuma xiphemu lexikulu xa Yuropa. Swiendlo swa hosi ya le n’walungwini swi susumetele hosi ya le dzongeni ku twanana ni matiko man’wana leswaku ma hlanganisa masocha ya wona ma vumba nhlangano lowu vuriwaka NATO. Hosi ya le n’walungwini yi ya emahlweni yi phikizana ni hosi ya le dzongeni hi ku tirhisa mali yo tala yi ringeta ku vumba vuthu leri nga ni matimba swinene. Hosi ya le n’walungwini yi lwisane ni hosi ya le dzongeni hi ku seketela nala wa hosi leyin’wana etinyimpini eAfrika, Asia ni le Latin Amerika. Emalembeni ya sweswinyana, tiko ra Rhaxiya ni matiko lama ri seketelaka ma ve ni matimba swinene emisaveni hinkwayo. Ma tlhela ma lwisana ni hosi ya le dzongeni hi ku tirhisa tikhompyuta. Tihosi letimbirhi ti hehlanile hi leswaku leyin’wana yi tirhisa tiprogreme ta khompyuta ku endlela leswaku ti lahlekeriwa hi mali ni ku onha mfumo wa tona. Naswona hilaha Daniyele a profeteke hakona, hosi ya le n’walungwini yi ya emahlweni yi hlasela vanhu va Xikwembu.—Dan. 11:41. w20.05 13 ¶5-6

“Xana wansati a nga rivala n’wana loyi a n’wi an’wisaka?” Lexi i xivutiso lexi Yehovha a xi vutiseke enkarhini wa muprofeta Esaya. Yehovha u byele vanhu va yena a ku: “Vavasati lava va nga rivala, kambe mina a ndzi nge [mi] rivali.” (Esa. 49:15) A swi talanga ku va Yehovha a ti fanisa ni manana. Kambe laha u swi endlile. U tirhise vuxaka lebyi manana ni n’wana va nga na byona, ku kombisa ndlela leyi a ma rhandzaka hayona malandza yakwe. Vamanana vo tala va nga pfumelelana na Jasmin loyi a nga te: “Loko u an’wisa n’wana, vuxaka bya wena na yena bya kula swinene naswona byi ta tshama hilaha ku nga heriki.” Yehovha wa swi vona loko un’wana wa vana va yena a tshika ku ya etinhlengeletanweni ta vandlha ni le nsin’wini. Vamakwerhu vo tala lava a va tshike ku tirhela Yehovha va tlhela va vuya evandlheni, laha va fikaka va amukeriwaka hi mandla mambirhi! Yehovha u lava leswaku va vuyela eka yena, na hina hi lava sweswo.—1 Pet. 2:25. w20.06 18 ¶1-3

A hi xuma hinkwaxo lexi nga voniwaka. Entiyisweni, xuma xa risima a xi vonaki. Eka Dyondzo ya le Ntshaveni, Yesu u vulavule hi xuma xa le tilweni lexi nga xa nkoka ngopfu ku tlula swilo hinkwaswo. U ye emahlweni a ku: “Laha xuma xa wena xi nga kona ni mbilu ya wena yi ta va kona.” (Mat. 6:19-21) Mbilu yi ta hi susumetela ku rhangisa swilo leswi hi swi tekaka swi ri swa nkoka ngopfu. Hi tihlayisela “xuma etilweni” hi ku va ni vuxaka lebyinene ni Xikwembu. Xuma xexo lexi Yesu a vulavuleke hi xona, a xi nge pfuki xi yiviwile. Muapostola Pawulo u hi khutaza ku “anakanya hi swilo . . . leswi nga voniwiki.” (2 Kor. 4:17, 18) Swilo leswi nga vonakiki i xuma lexi katsaka mikateko leyi hi nga ta tiphina hayona emisaveni leyintshwa. Xana ha xi tlangela xuma lexi, lexi nga vonakiki? w20.05 26 ¶1-2

Leswi Muxe a swi dyondziseke Vaisrayele, swi va tiyisile ni ku va phyuphyisa ku fana ni mpfula leyi naka kahle ehenhla ka swimilana. Xana hina hi nga dyondzisa njhani hi ndlela leyi fanaka? Loko hi ri ensin’wini, hi nga komba vanhu vito ra Xikwembu, leri nge Yehovha eTibibeleni ta hina. Hi nga va nyika tibuku, hi va komba tivhidiyo ni swin’wana leswi yisaka ku dzuneka eka Yehovha leswi kumekaka eka website ya hina. Loko hi ri entirhweni, exikolweni kumbe eriendzweni, hi nga pfulekeriwa hi nkarhi wo byela van’wana hi Xikwembu xa hina xa rirhandzu. Loko hi byela vanhu van’wana xikongomelo xa Yehovha hi vanhu ni misava, swi nga endleka ku ri ro sungula va twa rungula rero. Loko hi byela vanhu ntiyiso mayelana ni Tata wa hina wa rirhandzu, hi hoxa xandla eku kwetsimiseni ka vito ra Xikwembu. Hi basisa vito ra Yehovha eka swihehlo ni tidyondzo ta mavunwa leti van’wana va ti dyondzisaka mayelana na yena. Leswi hi swi dyondzisaka swi endla leswaku vanhu va phyuphya.—Esa. 65:13, 14. w20.06 10 ¶8-9

Hi tihi timfanelo leti hi faneleke hi va na tona leswaku hi ta kota ku pfuna vanhu va tlhelela eka Yehovha? Xiya leswi hi nga swi dyondzaka eka xifaniso lexi Yesu a xi tirhiseke xa n’wana loyi a rhurhe ekaya. (Luka 15:17-24) N’wana yoloye u swi xiyile leswaku u endle xihoxo kutani a teka xiboho xo tlhelela ekaya. Tatana u hlanganise n’wana wakwe a fika a n’wi angarha, ku kombisa leswaku wa n’wi rhandza. N’wana u kingindziwe hi ripfalo lerova a a tivona a nga faneleki ku vuriwa n’wana. Tata wakwe u n’wi twele vusiwana endzhaku ka loko a tiphofurile. Leswi se a hundzukile tatana u n’wi tiyisekisile leswaku u amukelekile ekaya tanihi xirho xa ndyangu. U endle nkhuvo kutani a n’wi nyika nguvu leyinene. Yehovha u fana ni tatana wa le xifanisweni lexiya. Wa va rhandza vamakwerhu lava tshikeke ku n’wi tirhela naswona u lava va tlhelela eka yena. Loko hi tekelela Yehovha, hi nga swi kota ku va pfuna va tlhelela eka yena. Kambe, hi fanele hi lehisa mbilu, hi va ni ntwelavusiwana ni rirhandzu. w20.06 25-26 ¶8-9

Yesu u vule leswaku van’wana a va ta amukela ntiyiso hi “ntsako” kambe ripfumelo ra vona a ri ta tsana loko va ringiwa. (Mat. 13:3-6, 20, 21.) Swi nga endleka a va nga swi tivi leswaku loko va landzela Yesu, va ta langutana ni mitlhontlho. (Mat. 16:24) Kumbexana a va ehleketa leswaku ku va Mukreste swi vula ku hanya bya ka byandlana, va to kuma mikateko handle ko langutana ni mitlhontlho. Kambe emisaveni leyi, mitlhontlho yi lo vuya! Swiyimo swi nga cinca nkarhi wun’wana ni wun’wana kutani swi hi tekela ntsako wa hina. (Ps. 6:6; Ekl. 9:11) Vamakwerhu vo tala va tiyiseka leswaku va kume ntiyiso. Hikwalahokayini hi vula tano? Ripfumelo ra vona a ri tsekatseki hambiloko Mukrestekulobye a va twise ku vava kumbe a endle xidyoho. (Ps. 119:165) Loko va langutana ni ndzingo ripfumelo ra vona ri ya ri tiya ku tlula rini na rini. (Yak. 1:2-4) Ripfumelo ra hina ri fanele ri va tano. w20.07 8 ¶1; 9 ¶4-5

Loko u nga si sungula ku hlaya Bibele, kombela Yehovha a ku pfuna u twisisa leswi u nga ta swi hlaya. Hi xikombiso, loko u lava xitsundzuxo lexi nga ku pfunaka loko u langutane ni xiphiqo, n’wi kombele a ku pfuna u kuma matsalwa lama nga ku pfunaka. (Filp. 4:6, 7) Yehovha u hi endle hi kota ku vona swilo hi mahlo ya mianakanyo. Leswaku u kota ku teka leswi u swi hlayaka eBibeleni swi ri swa xiviri, ringeta ku vona leswi endlekaka hi mahlo ya mianakanyo u tlhela u ti teka u ri munhu loyi ku vulavuriwaka ha yena. Ringeta ku vona swilo leswi munhu yoloye a swi voneke u tlhela u titwa ku fana na yena. Tlhela u anakanyisisa. Ku anakanyisisa swi vula ku ehleketisisa hi leswi u swi hlayeke ni ku ehleketa hi ndlela leyi u nga swi tirhisaka hayona. Swi endla u kota ku yi twisisa hi vuenti mhaka leyi a wu yi hlaya. Ku hlaya Bibele handle ko anakanyisisa swi fana ni tinsimbi ta xitendara leti nga si hlanganisiwaka. Ku anakanyisisa swi hi pfuna ku vona leswi endlekaka hi mahlo ya mianakanyo. w21.03 15 ¶3-5

Pawulo a a ta va a ehlekete hi swilo swa khale, a tibyela leswaku loko a a hlawule ntirho wun’wana, a ta va a nga ri ejele sweswi. A ta va a hlundzukele vanghana vakwe lava balekeke va n’wi siya exifundzheni xa Asiya naswona a ta va a tshike ku tshemba vanghana vakwe lavan’wana. Kambe Pawulo a nga swi endlanga sweswo hinkwaswo. Hambiloko rifu se ri n’wi ahlamisele nomu, Pawulo a nga tshikanga ku vangamisa Yehovha hikuva sweswo hi swona leswi a swi ri swa nkoka eka yena. U ye emahlweni a ehleketa hi ndlela leyi a nga va khutazaka hayona van’wana. Nkarhi ni nkarhi a a khongela eka Yehovha. Ematshan’wini yo tshamela ku ehleketa hi vanghana vakwe lava balekeke va n’wi siya, a a ehleketa ngopfu hi vanghana vakwe lava n’wi seketeleke hi nkarhi wa mangava. Nakambe, a nga tshikanga ku hlaya Rito ra Xikwembu. (2 Tim. 3:16, 17; 4:13) Xa nkoka swinene, a a swi tiva leswaku Yehovha na Yesu va n’wi rhandza. w21.03 18 ¶17-18

Hi lembe ra 100, vandlha ra Vukreste ra ntiyiso ri sungule ku taleriwa hi Vakreste va mavunwa, lava a va dyondzisa tidyondzo ta vuhedeni naswona a va tumbeta ntiyiso lowu kumekaka eRitweni ra Xikwembu. Ku sukela hi nkarhi wolowo ku ya eka lembe ra 1870, Xikwembu a xi nga ri na nhlangano laha misaveni. Ku fana ni mfava, Vakreste va mavunwa a va tele ngopfu lerova Vakreste va ntiyiso va nga ha ti kombi. (Mat. 13:36-43) Hikwalahokayini swi ri swa nkoka ku tiva sweswo? Swi kombisa leswaku leswi hi swi hlayaka hi hosi ya le n’walungwini ni hosi ya le dzongeni, a swi nge tirhi eka vafumi kumbe mifumo leyi a yi fuma ku sukela hi lembe ra 100 ku fikela hi lembe ra 1870. A ku nga ri na ntlawa lowu hleriweke wa vanhu va Xikwembu lowu a va ta wu hlasela. Hambiswiritano, hi nga langutela leswaku a ku ta va ni hosi ya le n’walungwini ni hosi ya le dzongeni endzhakunyana ka 1870. w20.05 3 ¶5

Yuwele u profete leswaku tiko ra Israyele ri ta hlaseriwa hi ntungu wa tinjiya, ti ta dya swimilana hinkwaswo etikweni! (Yuw. 1:4) Ku ringana malembe yo tala, a hi twisisa leswaku vuprofeta byebyo byi fanekisela ndlela leyi vanhu va Yehovha va chumayelaka hayona hi ku hiseka, ku fana ni ntlawa wolowo wa tinjiya lowu nga sivelekiki. A hi twisisa leswaku ntirho lowu wu ta vanga mpfilumpfilu “etikweni” kumbe eka vanhu lava lawuriwaka hi varhangeri va vukhongeri. Hambiswiritano, loko hi kambisisa vuprofeta lebyi hi ku ya hi mongo wa byona, ha swi xiya leswaku ndlela leyi hi byi twisisaka hayona yi fanele yi antswisiwa. Xiya xitshembiso lexi xa Yehovha mayelana ni ntungu wa tinjiya: “Ndzi ta hlongola munhu wa le n’walungwini [ku nga tinjiya] a ya ekule na n’wina.” (Yuw. 2:20) Loko ku ri leswaku tinjiya ti fanekisela Timbhoni ta Yehovha tanihi leswi ti yingisaka xileriso xa Yesu xo chumayela ni ku endla vadyondzisiwa, hikwalahokayini Yehovha a tshembisa leswaku u ta ti veka ekule? (Ezek. 33:7-9; Mat. 28:19, 20) Swi le rivaleni leswaku Yehovha a nge ma veki ekule malandza yakwe yo tshembeka kambe u ta veka nchumu kumbe munhu loyi a vengaka vanhu vakwe. w20.04 3 ¶3-5

Hi fanele hi endla yini loko hi vona onge Yehovha wa hlwela ku hlamula xikhongelo xa hina? Yakobo u vula leswaku hi fanele hi ya ‘emahlweni hi kombela’ eka Xikwembu. Yehovha a nga borheki loko hi tshamela ku kombela vutlhari eka yena naswona a nge hi kwateli. Loko hi khongela eka Tata wa hina wa le tilweni hi kombela vutlhari byo kota ku tiyisela miringo, u ta hi ‘nyika byona hi mbilu yo basa.’ (Ps. 25:12, 13) Wa yi vona miringo leyi hi langutanaka na yona, wa hi twela naswona u tiyimisele ku hi pfuna. Leswi hi swona leswi endlaka hi tsaka! Xana Yehovha u hi nyika vutlhari hi ndlela yihi? Hi ku tirhisa Rito ra yena. (Swiv. 2:6) Leswaku hi kuma vutlhari byebyo, hi fanele hi hlaya Rito ra Xikwembu ni mikandziyiso leyi yi hi pfunaka ku twisisa leswi Bibele yi swi dyondzisaka. A swi heleli kwalaho, hi fanele hi tlhela hi hanya hi vutlhari lebyi hi byi dyondzaka eRitweni ra Xikwembu. Yakobo u te: “Vanani vaendli va rito, mi nga vi vatwi ntsena.” (Yak. 1:22) Loko hi tirhisa switsundzuxo leswi Xikwembu xi hi nyikaka swona, hi ta va ni ku rhula, hi ta va lava anakanyelaka naswona hi ta va ni tintswalo. (Yak. 3:17) Leswi swi ta hi pfuna hi kota ku tiyisela miringo hi tsakile. w21.02 29 ¶10-11

Xichudeni xa Bibele xi kota ku khuvuriwa loko xi tihlanganisa ni vamakwerhu. Hinkwerhu hi nga hoxa xandla eku kuriseni ka vandlha. Phayona rin’wana ri ri: “Ku vuriwa leswaku n’wana a hi wa un’we. Ndzi ehleketa leswaku swi tano ni hi ku endla vadyondzisiwa, i ndzhwalo wa vandlha ku pfuna munhu a amukela ntiyiso.” Vatswari, maxaka, vanghana ni mathicara va hoxa xandla eku kuriseni ka n’wana. Va endla tano hi ku n’wi khutaza ni ku n’wi dyondzisa swilo swa nkoka. Hilaha ku fanaka, hinkwerhu evandlheni hi nga vekela swichudeni swa Bibele xikombiso lexinene ni ku swi khutaza leswaku swi kota ku khuvuriwa. (Swiv. 15:22) Hikwalahokayini makwerhu loyi a nga ni xichudeni xa Bibele a fanele a tsaka loko vamakwerhu van’wana va pfuna xichudeni xakwe? Hikuva va ta xi pfuna leswaku xi endla nhluvuko. w21.03 8 ¶1-3

Vakreste hinkwavo, ku nga khathariseki malembe ya vona, va fanele va papalata ku hanya vutomi bya mikoka yimbirhi. Muapostola Yohane u vule leswaku a hi nge swi koti ku famba entiyisweni loko hi hala tlhelo hi tikhoma ku biha. (1 Yoh. 1:6) Loko hi lava ku amukeleka eka Xikwembu namuntlha ni le nkarhini lowu taka, hi fanele hi tikhoma hi ndlela leyi kombisaka leswaku swilo hinkwaswo leswi hi swi endlaka swi lo tlangandlaa, erivaleni. A ku na xidyoho lexi hi nga xi endlaka exihundleni lexi Yehovha a nga taka a nga xi voni. (Hev. 4:13) Hi fanele hi papalata ndlela leyi vanhu va misava leyi va xi langutaka hayona xidyoho. Enkarhini wa Yohane, vagwinehi a va vula leswaku munhu a nga endla xidyoho kambe a tama a ri ni vuxaka lebyinene ni Xikwembu. Ninamuntlha, hi hanya ni vanhu lava nga ni langutelo ro tano. Vanhu vo tala va vula leswaku va gandzela Xikwembu kambe a va na mhaka ni ndlela leyi Yehovha a langutaka xidyoho hayona, ngopfungopfu loko xidyoho xexo xi fambisana ni timhaka ta masangu. Swilo leswi nga xidyoho eka Yehovha vona a va swi teki ku ri xidyoho, va vula leswaku munhu a nga tihlawulela ndlela yin’wana ni yin’wana leyi a lavaka ku hanya hayona. w20.07 22 ¶7-8

Xana wa va yimela vamakwerhu vaxisati loko va lava ku pfuniwa? Hi xikombiso, ehleketa hi xiyimo lexi landzelaka. Vamakwerhu van’wana va xiya leswaku makwerhu wa xisati loyi nuna wakwe a nga riki Mbhoni, u fika leti etinhlengeletanweni ta vandlha a tlhela a hatla a muka. Va swi xiya leswaku u pfa a siya vana ekaya. Va vula leswaku u debyisa voko hileswi a tshikaka nuna wakwe a sivela vana ku ta etinhlengeletanweni ta vandlha. Kambe a va swi tivi leswaku makwerhu loyi wa tikarhata swinene. A swi le henhla ka matimba yakwe ku lawula xiyimo xakwe ni vana vakwe. Loko u bumabumela makwerhu loyi ni ku vulavula kahle ha yena eka van’wana, u ta endla leswaku va tshika ku n’wi solasola. Vakulu va swi tiva leswaku Yehovha u lava vamakwerhu vaxisati va khomiwa kahle. (Yak. 1:27) Ku fana na Yesu, va anakanyela naswona a va veki milawu eka swiyimo leswi lavaka leswaku va pfumelelana ni xiyimo. (Mat. 15:22-28) Vakulu lava tekaka goza ro pfuna hi ku hatlisa, va endla vamakwerhu vaxisati va titwa va ri ekaya. w20.09 24-25 ¶17-19

Nkarhi hinkwawo muprofeta Daniyele, a titsongahata eka Xikwembu naswona a a lava nkongomiso wa Yehovha. Hi xikombiso, loko Yehovha a n’wi pfunile a hlamusela norho wa Nebukadnetsara, a nga lavanga leswaku ku dzuneka ku ya eka yena. Kurinasweswo, hi ku titsongahata u yise ku dzuneka eka Yehovha. (Dan. 2:26-28) Hi dyondza yini? Loko vamakwerhu va rhandza ndlela leyi hi andlalaka mivulavulo hayona kumbe swi hi fambela kahle entirhweni wa nsimu, hi fanele hi yisa ku dzuneka hinkwako eka Yehovha. Hi fanele hi tsundzuka leswaku a hi nga ta swi kota ku endla swilo leswi handle ko pfuniwa hi Yehovha. (Filp. 4:13) Loko hi ri ni langutelo ro tano, hi va hi tekelela langutelo lerinene ra Yesu. Yesu Mikarhi hinkwayo a a titshega hi Yehovha. (Yoh. 5:19, 30) A nga kalanga a ringeta ku teka vulawuri bya Tata wakwe. Vafilipiya 2:6 yi hi byela leswaku Yesu “a nga [telanga] hi miehleketo yo lwela ku ringana ni Xikwembu.” Leswi a a ri N’wana loyi a titsongahataka, a swi tiva swipimelo swakwe naswona a a xixima vulawuri bya Tata wakwe. w20.08 11 ¶12-13

Van’wana lava tsutsumaka egondzweni ra vutomi, va langutana ni swiyimo swo tika leswi van’wana va nga swi voniki naswona va nga taka va nga swi twisisi. Loko u vabya naswona u vona onge vanhu a va yi voni ndlela leyi u titwaka hayona, ku dyondza hi Mefiboxete swi nga ku khutaza. (2 Sam. 4:4) A a lamarile naswona Hosi Davhida u n’wi teke hi ndlela leyi hoxeke. Kambe, a nga swi pfumelelanga sweswo swi n’wi endla a va ni langutelo leri hoxeke; a a tlangela swilo leswinene leswi a swi n’wi humelela. A a wu tlangela musa lowu Davhida a n’wi kombeke wona enkarhini lowu hundzeke. (2 Sam. 9:6-10) Hikwalaho, loko Davhida a n’wi teke hi ndlela yo biha, Mefiboxete u ringete ku twisisa xiyimo. A nga xi pfumelelanga xihoxo xa Davhida xi n’wi hlundzukisa. Nakambe a nga xi solanga Xikwembu hikwalaho ka leswi Davhida a n’wi endleke swona. U anakanyisise hi leswi a nga swi endlaka leswaku a seketela hosi leyi hlawuriweke hi Yehovha. (2 Sam. 16:1-4; 19:24-30) Yehovha u endle leswaku mhaka ya Mefiboxete yi tsariwa eBibeleni leswaku yi ta hi pfuna.—Rhom. 15:4. w20.04 26 ¶3; 30 ¶18-19

Van’wana evandlheni i varhumiwa, maphayona yo hlawuleka kumbe maphayona. Va teka ntirho wo chumayela ni wo endla vadyondzisiwa wu ri wa nkoka swinene. Hambileswi vamakwerhu lava hi ntolovelo va nga riki na nchumu, Yehovha wa va katekisa swinene. (Mar. 10:29, 30) Ha va tlangela vamakwerhu lava naswona ha tinyungubyisa leswi hi nga na vona evandlheni! Xana i vamakwerhu lava hlawuriweke ni lava nga eka ntirho wa nkarhi hinkwawo ntsena lava nga va risima evandlheni? Doo! Vahuweleri hinkwavo va mahungu lamanene i va risima eka Xikwembu ni le vandlheni. (Rhom. 10:15; 1 Kor. 3:6-8) Xikongomelonkulu xa vandlha i ku endla vanhu va va vadyondzisiwa va Hosi ya hina Yesu Kreste. (Mat. 28:19, 20; 1 Tim. 2:4) Vahuweleri hinkwavo evandlheni swi nga ri na mhaka leswaku va khuvuriwile kumbe a va khuvuriwanga, va fanele va rhangisa ntirho lowu evuton’wini bya vona.—Mat. 24:14. w20.08 21 ¶7-8

Hilaha swi kombisiweke hakona eka ndzimana ya hina ya siku ya namuntlha, loko hi langutane na swiphiqo Yesu wa hi seketela. Kahlekahle marito ya Yesu ma hi tiyisa nhlana. Hikwalahokayini? Hikuva masiku man’wana swiyimo swa tika. Hi xikombiso, loko hi loveriwa hi va ni gome ku ringana malembe yo tala. Van’wana va langutana ni swiphiqo swa rihanyo hileswi ti dyaka ti ya emagoveni. Van’wana va karhatiwa hi ntshikilelo wa mianakanyo. Hambiswiritano, swa hi tiyisa ku tiva leswaku hambiloko swiyimo swi tika Yesu u na hina ‘masiku hinkwawo.’ (Mat. 11:28-30) Rito ra Xikwembu ri hi tiyisekisa leswaku Yehovha u hi pfuna hi ku tirhisa tintsumi takwe. (Hev. 1:7, 14) Hi xikombiso, tintsumi ta hi seketela ni ku hi kongomisa loko hi chumayela “mahungu lamanene . . . ya Mfumo” eka vanhu “va matiko hinkwawo, tinyimba hinkwato [ni] tindzimi hinkwato.”—Mat. 24:13, 14; Nhlav. 14:6. w20.11 13-14 ¶6-7

Hi lava leswaku xichudeni xa hina xi twisisa leswaku leswi xi swi dyondzaka swi huma eBibeleni. (1 Tes. 2:13) Hi nga swi endla njhani leswi? Xi khutaze ku byela van’wana hi leswi xi swi dyondzaka. Ematshan’weni yo xi hlamusela matsalwa loko mi dyondza, kombela xona xi ma hlamusela. Xi pfune xi vona ndlela leyi Bibele yi nga xi pfunaka hayona. Xi vutise swivutiso leswi nga ta endla xi vula ndlela leyi xi titwaka hayona hi matsalwa lawa xi ma hlayeke. (Luka 10:25-28) U nga xi vutisa swivutiso leswi: “Tsalwa leri ri ku pfune njhani leswaku u vona vumunhu bya Yehovha?” “Leswi u swi dyondzaka eBibeleni swi nga ku pfuna njhani?” “U titwa njhani hi leswi wa ha ku swi dyondzaka?” Mhaka ya nkoka, i ku va xichudeni xi rhandza ni ku tirhisa leswi xi swi dyondzaka, ku nga ri ku tiva swo tala. Endla leswaku Bibele ku va yona yi n’wi dyondzisaka. Leswaku u kota ku antswisa madyondziselo ya wena u fanele u titsongahata. w20.10 15 ¶5-6

Ha tiyiseka leswaku ntirho wo chumayela wu ta hela hi nkarhi lowu faneleke. Xiya leswi endlekeke enkarhini wa Nowa. Yehovha u kombise leswaku mikarhi hinkwayo u endla swilo hi nkarhi lowu faneleke. Yehovha u veke nkarhi lowu Ndhambi a yi ta sungula ha wona ka ha sale malembe ya kwalomu ka 120. Endzhaku ka malembe yo tala, Yehovha u lerise Nowa leswaku a aka ngalava. Kumbexana Nowa u sungule ntirho wakwe ka ha sale malembe ya 40 kumbe 50 leswaku ku va na Ndhambi. Hambileswi vanhu a va nga n’wi yingisi loko a chumayela kambe u ye emahlweni a chumayela ku fikela loko Yehovha a n’wi byela leswaku a nghena engalaveni. Kutani hi nkarhi lowu faneleke “Yehovha [u pfale] nyangwa.” (Gen. 6:3; 7:1, 2, 16) Ku nga ri khale Yehovha u ta yimisa ntirho wo chumayela; u ta lovisa misava ya Sathana kutani a tisa misava yo lulama. Loko ha ha rindzele sweswo, a hi tikarhateleni ku tekelela Nowa ni van’wana lava nga wisangiki. Onge hi nga ka hi nga pfumeli ku kavanyetiwa entirhweni wa hina, hi lehisa mbilu, hi tlhela hi va ni ripfumelo leri tiyeke eka switshembiso leswi Yehovha a hi tshembisaka swona. w20.09 13 ¶18-19

Loko a ku nga ri na vanhu lava nyikiweke vulawuri, a ku ta va ni hasahasa endyangwini wa Yehovha naswona vanhu a va nga ta tsaka. Hi xikombiso, a swi nga ta tiveka leswaku i mani loyi a faneleke a teka swiboho ni ku tiyiseka leswaku swiboho sweswo swa landzeriwa. Loko ku ri leswaku Xikwembu xi nyike van’wana vutihlamuleri bya ku va tinhloko hi xikongomelo lexinene, hikwalahokayini vavasati vo tala va xanisiwa? Leswi swi vangiwa hileswi vavanuna vo tala va nga wu yingisiki nawu wa Yehovha naswona va landzelaka ndhavuko. Nakambe va xanisa vasati va vona hi xikongomelo xo titsakisa. Hi xikombiso, wanuna a nga xanisa nsati wakwe hi xikongomelo xo lava ku xiximiwa kumbe ku komba van’wana leswaku yena i wanuna. A nga tibyela leswaku a nge n’wi sindzisi nsati wakwe leswaku a n’wi rhandza kambe a nga endla leswaku a n’wi chava. Nakambe a nga tirhisa ku chava koloko leswaku a lawula nsati wakwe. Langutelo ro tano, ri endla leswaku vavasati va nga xiximiwi naswona a hi yona ndlela leyi Yehovha a lavaka va khomiwa hayona.—Efe. 5:25, 28. w21.02 3 ¶6-7

Vakreste lava karhatiwaka hi swiphiqo swo karhi, va nga kuma ku rhula loko va khongela va kombela Yehovha a va pfuna. Yehovha u ta hlamula swikhongelo swa wena hi ku endla leswaku u va ni ‘ku rhula loku tlulaka ku twisisa ka vanhu hinkwavo.’ (Filp. 4:6, 7) Yehovha u endla leswaku hi va ni ku rhula hi ku tirhisa moya wakwe wo kwetsima. (Gal. 5:22) Loko u khongela, phofulela Yehovha hinkwaswo leswi ku karhataka. Swi boxe hi ku kongoma. N’wi byele xiphiqo xa kona ni ndlela leyi u titwaka hayona hi xiphiqo xexo. Loko yi ri kona ndlela yo xi tlhantlha, kombela vutlhari ni matimba yo endla tano. Loko xiphiqo xa kona xi nga koteki ku xi herisa, kombela Yehovha a ku pfuna, u nga tshameli ku vilela hi xona. Loko u boxa swilo leswi ku vilerisaka hi ku kongoma, u ta kota ku vona ndlela leyi Yehovha a swi hlamulaka hayona swikhongelo swa wena. Loko xikhongelo xa wena xi nga hlamuriwi hi ku hatlisa, u nga wi mapa. Yehovha u lava u n’wi byela leswi ku vilerisaka hi ku kongoma, u tlhela u khongela hi ku phikelela.—Luka 11:8-10. w21.01 3 ¶6-7

Emavandlheni namuntlha ku ni vatekani lava nga riki na vana ni lava nga ni vana. Nakambe ku ni vamakwerhu va xinuna ni va xisati lava nga nghenelangiki vukati. Hi fanele hi va teka njhani lava nga nghenelangiki vukati? Xiya ndlela leyi Yesu a a swi teka hayona ku nga ngheneli vukati. Loko Yesu a ri laha misaveni a a nga tekanga. U tshame a nga tekanga leswaku a ta kota ku endla ntirho wakwe kahle. Yesu a nga kalanga a vula leswaku swa boha ku nghenela vukati kumbe ku nga byi ngheneli. Kambe, u vule leswaku Vakreste van’wana a va ta hlawula ku nga ngheneli vukati. (Mat. 19:12) Yesu a a va xixima vanhu lava nga nghenelangiki vukati naswona a a nga va tekeli hansi. Ku fana na Yesu, muapostola Pawulo u tirhele Xikwembu a nga tekanga. Pawulo a nga kalanga a vula leswaku swi ta va swi hoxile loko Mukreste a nghenela vukati. A a swi tiva leswaku leyi i mhaka ya munhu hi yexe. w20.08 28 ¶7-8

Yohane u hanye malembe yo tala naswona u vone swilo swo tala swo tsakisa. U langutane ni mitlhontlho yo tala leyi a yi ta va yi tsanise ripfumelo rakwe. Kambe u we a pfuka leswaku a yingisa swileriso swa Yesu, ku katsa ni xileriso xo rhandza vamakwavo. Yohane a a tiyiseka leswaku Yehovha na Yesu va n’wi rhandza naswona va ta n’wi nyika matimba yo tiyisela miringo. (Yoh. 14:15-17; 15:10) Sathana ni vanhu vakwe va tsandzekile ku sivela Yohane ku komba vamakwavo leswaku wa va rhandza hi marito ni hi swiendlo. Ku fana na Yohane, hi hanya ni vanhu lava lawuriwaka hi Sathana, xikwembu xa misava leyi lexi nga ni mona. (1 Yoh. 3:1, 10) U lava hi tshika ku rhandza vamakwerhu kambe a nge swi koti sweswo handle ka loko ho n’wi pfumelela. Onge hi nga tiyimisela ku komba vamakwerhu leswaku ha va rhandza hi marito ni hi swiendlo! Loko hi endla tano, hi ta tsaka hileswi hi nga xiphemu xa ndyangu wa Yehovha naswona hi ta tiphina swinene hi vutomi.—1 Yoh. 4:7. w21.01 13 ¶18-19

Emisaveni leyi yi lawuriwaka hi Sathana hi koka exilogweni, mikarhi yin’wana a hi swi tivi leswaku hi ta khoma kwihi hi tshika kwihi. (2 Tim. 3:1) Kambe a hi fanelanga hi karhateka kumbe ku chava. Yehovha wa ma vona maxangu lama hi langutanaka na wona. Loko hi langutana ni miringo, u vula leswaku u ta hi khoma swi tiya hi voko rakwe ra xinene. (Esa. 41:10, 13) Handle ko kanakana, hi ta swi kota ku hlula miringo hinkwayo leyi hi nga langutanaka na yona, hi ku pfuniwa hi Yehovha ni Rito rakwe. Tivhidiyo ta hina ni tidrama leti ngo yingiseriwa kunene ni tinhlokomhaka leti nge, “Tekelela Ripfumelo Ra Vona” ti endla hi kota ku vona swiendlakalo leswi ku vulavuriwaka ha swona eBibeleni. Loko u nga si hlalela, u nga si yingisela kumbe u nga si hlaya timhaka teto, kombela Yehovha a ku pfuna u vuyeriwa eka leswi u swi dyondzaka. Tivone u ri ximunhuhatwankulu lexi ku vulavuriwaka ha xona. Anakanyisisa hileswi malandza wolawo ya Yehovha ma swi endleke ni ndlela leyi Yehovha a ma pfuneke hayona ma hlula miringo. Endzhaku, ehleketa hi ndlela leyi u nga swi tirhisaka hayona leswi u swi dyondzaka. Khensa Yehovha hileswi a ku pfunaka. Khutaza u tlhela u seketela van’wana ku kombisa leswaku wa khensa leswi Yehovha a ku pfunaka. w21.03 19 ¶22-23

Loko mi catile naswona mi lava ku va ni vana tivutiseni leswi: ‘Xana hi vanhu lava rhandzaka Yehovha lerova a nga hi hlawula leswaku hi kurisa n’wana?’ (Ps. 127: 4) Loko u ri mutswari, tivutise: ‘Xana ndza va dyondzisa vana va mina mitirho?’ (Ekl. 3:12, 13) ‘Xana ndza va letela vana va mina ku tisirhelela eka mahanyelo yo biha lawa va nga ha langutanaka na wona?’ (Swiv. 22:3) A wu nge swi koti ku sirhelela vana va wena eka mitlhontlho hinkwayo. Kambe u nga swi kota ku va letela ni ku va hlomisa leswaku va titshega hi Rito ra Xikwembu loko va langutana ni mitlhontlho. (Swiv. 2:1-6) Hi xikombiso, loko xaka ri tshika ku tirhela Yehovha, pfuna vana va wena hi ku tirhisa Rito ra Xikwembu va tiva leswaku hikwalahokayini swi ri swa nkoka ku tshama va tshembekile eka Yehovha. (Ps. 31:23) Loko mi loveriwa, komba vana va wena ndlela leyi Rito ra Xikwembu ri nga va chavelelaka hayona.—2 Kor. 1:3, 4; 2 Tim. 3:16. w20.10 27 ¶7