‘Ku Londzovota Nkarhi’ eItaly
‘LONDZOVOTANI nkarhi,’ muapostola Pawulo u khutaze Vakriste-kulobye kambirhi loko a ri eRhoma, Italy. (Vaefesa 5:15, 16; Vakolosa 4:5) Vahlayi vakwe eka lembe xidzana ro sungula va swi amukele kahle. Va lave minkarhi yo hangalasa “Evangeli” ni ku pfuna van’wana ku va vagandzeri va Xikwembu xa ntiyiso.—Matewu 24:14.
Malandza ya manguva lawa ya Yehova eltaly, laha Pawulo a tsaleleke kona mapapila wolawo, va ha xi amukela kahle xitsundzuxo xakwe. Ku fana ni Vakriste vo sungula, va lava tindlela to andzisa ku hlanganyela ka vona entirhweni wo chumayela hi ta Mfumo. Xana va swi kotisa ku yini ku kuma “nkarhi.”?
Mimbuyelo Ya Ku Tikombisa
Giuseppe, mutirheli wa nkarhi hinkwawo la kuleke wa Timbhoni ta Yehova eRhoma, u tsundzuka nkarhi lowu a veke ni ntirho wo tihanyisa. A a tiyiseka leswaku hinkwavo vatirhi-kulobye va swi tiva leswaku hi un’wana wa Timbhoni ta Yehova. Ku tikombisa loku ku yise ‘enkarhini’ wo avela van’wana mintiyiso ya Bibele. Siku rin’wana a a averiwe ku letela wanuna la vitaniwaka Gianni. Kwalaho vatirhi van’wana va byele Gianni leswaku mudyondzisi wa yena a a ri un’wana wa Timbhoni ta Yehova. Loko mutirhi a ri yexe na Giuseppe, u byele Guiseppe a ku: “Sweswi hi vulavula hi ta ntirho wa hina, kambe hi dina ndzi lava ku dyondza swin’wana hi ta Yehova.”
Hi minkarhi ya dina va ve ni mabulo yo tala. Giuseppe u dyondzise Gianni leswaku Xikwembu xi na vito ra Yehova. Nakambe u hlamusele xikongomelo xa Xikwembu hi misava. Hambi swi ri tano, ku humelele yini loko nkarhi wo letela wu herile? “Ndzi n’wi nyikile nomboro ya mina ya riqingho ni tibuku ta Bibele,” ku vula Giuseppe. “U amukele tibuku kambe a ku: ‘Loko ndzi kuma xanchumu etibukwini leti lexi nga twananiki na ntiyiso wa Bibele, ndzi ta vuya la ni ku ku kombisa u hoxile emahlweni ka vatirhi-kuloni hinkwavo.’”
Tin’hweti ti hundzile. Ku hava rito ro huma eka Gianni. “Kambe kwalaho,” Giuseppe u ya emahlweni, “siku rin’wana u ndzi vitanile ivi a vula leswaku a a lava ku ndzi vona. Hi hlanganile, naswona a a ri na nxaxamelo wa swivutiso. Hi vulavule maawara ya khume! U amukele nyiko ya mina yo dyondza Bibele nkarhi na nkarhi.” Vuyelo byi ve byihi? Giuseppe u ri: “Ku hundzuka loku tsakisaka loku a ku endleke ku tsakise nsati wakwe ni mana wa yena swinene, laha na vona, va sunguleke ku kombisa ku tsakela dyondzo ya Bibele. Namuntlha Gianni, nsati wa yena ni mana wakwe hinkwavo i malandza lama tshembekaka ya Yehova.”
A Sindzisiwa Ku Hisa Bibele Yakwe
Mahanyelo lamanene ya Vukriste nakambe ma yisa eka ‘minkarhi’ yo avelana mintiyiso ya Bibele ni van’wana. Hi laha muapostola Pawulo a vulaka ha kona, mahanyelo lamanene ya nga “komba ku saseka ka leswi dyondzisiwaka hi tlhelo ra Xikwembu Muponisi wa hina.”—Tito 2:10.
Pietro, loyi sweswi a nga Mbhoni eka malembe yakwe ya le ku heleni ka va-20, u kokeriwile eka ‘dyondzo’ yo tano hi mahanyelo ya Vukriste ya munghana wa xikolo. “A ndzi ri eka ntangha nharhu,” ku tsundzuka Pietro, “kambe ndza ha tsundzuka mahanyelo ya mufana yoloye. Hi yena ntsena loyi a aleke ku tshama eklasini hi nkarhi wa ntivo-vukhongeri.”
Siku rin’wana Pietro u vutise mufana leswaku ha yini nkarhi na nkarhi a suka. Mufana u hlamusele leswaku a a ntshunxiwile eklasini hikuva a a ri un’wana wa Timbhoni ta Yehova. Ku tsakela ka Pietro ku pfuxiwile. U kombele mufana loyi ku n’wi tisela Bibele. Endzhaku ko hlaya swiphemu swin’wana swa Bibele, “ndzi twisise leswaku yi khome ntiyiso,” ku vula Pietro. “Ndzi tiyimisele ku yi landzela ku sukela kwalaho ku ya emahlweni. Ndzi fambe na Bibele exikolweni ivi ndzi byela un’wana ni un’wana leswaku ndzi un’wana wa Timbhoni ta Yehova. A ndzi ri na malembe ya khume ntsena hi vukhale.”
Swirhalanganya swi sungurile. Pietro u ya emahlweni: “Muprista loyi a a fambisa mintlawa ya vukhongeri exikolweni u byele vatswari va mina leswaku a ndzi tirhisa Bibele exikolweni, naswona u va tsundzuxile ku yi herisa. Loko ndzi vuya ekaya, manana u ringetile ku teka Bibele ya mina, kambe a ndzi yi khome yi tiya hi laha ndzi swi koteke ha kona. Kutani Manana u sungule ku ndzi himetela ivi a yi handzula emavokweni ya mina. Endzhaku ka kwalaho u ndzi sindzise ku hisa Bibele ya mina.” Pietro u lahlekeriwe hi Bibele ya yena kambe hayi ripfumelo rakwe. U anakanyile: ‘Loko ndzi kula, ndzi ta xava Bibele leyintshwa ivi ndzi ya eka van’wana ku ya va avela mahungu ya yona.’
Malembe mambirhi ma hundzile. Kutani Pietro u twe leswaku dyondzo ya Bibele a yi khomeriwa endlwini ya un’wana wa vanghana vakwe. Hi ku tumbela u ve kona edyondzweni. “Siku rin’wana,” ku vula Pietro, “ndzi byele vatswari va mina ndzi ku, ‘ndzi anakanye ku va un’wana wa Timbhoni ta Yehova. Sweswi ku hava lexi nga cincaka mianakanyo ya mina!’” Hi ku vona ku tiyimisela ka mufana wa vona wa malembe ya 12 hi vukhale, vatswari va n’wi tshikile. Pietro u sungule ku va kona eminhlanganweni eHolweni ya Mfumo ku sukela kwalaho. Malembe ya mune endzhaku u khuvuriwile tanihi un’wana wa Timbhoni ta Yehova. Namuntlha, endzhaku ka malembe ya 18 a dyondze ntiyiso ro sungula eBibeleni hikwalaho ka mahanyelo yo tshembeka ya munghana wakwe wa xikolo, Pietro u ‘londzovota nkarhi’ hi ku tirha tanihi mutirheli wa nkarhi hinkwawo eItaly.
Ku Hiseka Eka Malembe Ya 70 Hi Vukhale
Mafalda, wansati wa Mukriste wa le Livorno, hi un’wana wa maphayona lama chivirikaka yo tlula 22 000, kumbe vatirheli va nkarhi hinkwawo, eItaly. U sungule ku tirha tanihi phayona a ri na malembe ya 56. “Ntirho wa vuphayona,” wa hlamusela, “wu lava leswaku kwalomu ka maawara ya 1 000 hi lembe ya nyikeriwa entirhweni wo chumayela. Kambe tanihi leswi lawa ma nga mahungu ya nkoka, ndzi heta 2 000 wa maawara hi lembe tanihi mutirhi wa phayona.” Sweswi Mafalda u na malembe ya 70 hi vukhale. Makungu yakwe hi wahi? “Exikarhi ka Vakriste va lembe xidzana ro sungula, a ku ri na vavasati va mindyangu lava tirhaka swinene lava hlanganyeleke evutirhelini,” ku vula yena. “Ku fana na vona, ndzi lava ku hambeta ndzi twarisa Mfumo wa Xikwembu. Yoleyo i pakani ya mina evuton’wini.”
Hakunene, ku sukela etinhlohlorhini ta ntshava leyi lemiweke hi gamboko exifundzeni xa n’walungu ku ya fika exihlaleni xa Mediterranean xa Sicily edzongeni, timbhoni ta manguva lawa ta Yehova eItaly ti komba ku hiseka ka vanghana va vona va lembe xidzana ro sungula. Siku rin’wana ni rin’wana ra lembe, hi xiringaniso, va heta ku tlula 100 000 wa maawara entirhweni wo chumayela hi ta Mfumo. Vuyelo hi byihi? N’waxemu ntsena, kwalaho ka vanhu va 12 000 va khuvuriwile ivi va va vatirheli lava hlawuriweke va Yehova. Sweswi, kun’we ni timbhoni tin’wana ta Yehova ta 131 000, va ‘londzovota nkarhi’ eItaly.