Xana Wa Aneriseka Hi Malunghiselelo Ya Yehova Ya Moya?
“Mi nḍi ringa ha kona, ku v̌ula Yehova wa mav̌andla, kutani mi ta v̌ona šana nḍi nga ka nḍi nga mi pfuleri mafester ya tilo, nḍi v̌a nḍi mi tšhululela e ku kateka hi mpimo lo’wu tlurisaka!”—MALAKIA 3:10.
1. Xana swivumbiwa swo tala leswi hanyaka swi anerisiwa hi malunghiselelo wahi?
LOKO wo tshika ku hefemula, u ta fa eka timinete ti nga ri tingani. Loko wo tshika ku nwa mati, u ta fa eka masiku ma nga ri mangani. Loko wo tshika ku dya swakudya, u ta fa eka mavhiki ma nga ri mangani. Loko wo tshika ku tiwundla hi malunghiselelo ya Yehova ya moya, kutani loko u fa u ta va u fele makumu. Yehova u lunghiselela moya, mati ni swakudya leswi swi laviwaka hi swivumbiwa hinkwaswo leswi hanyaka. Kutani ke, eka Yehova mupisalema u ri: “U funungula šandla ša wena, u šurisa hikwaŝo le’ŝi hanyaka.” (Psalma 145:16) Ku navela ka swilo swo tala leswi hanyaka ku hetisekisiwa hi malunghiselelo ya nyama. Kambe leswi a swi tano hi swivumbiwa swa vanhu.
2. Ku navela ka mbilu ya munhu i yini, naswona i lunghiselelo rihi leri lavekaka leswaku ku hetiseka?
2 Yesu u kombise leswi loko a te: “Munhu a nga ka a nga hanyi hi vuswa ntsena, kambe u ta hanya hi marito hinkwawo lama humaka enon’wini wa [Yehova].” (Matewu 4:4) Swivumbiwa swa le hansi a swi na mianakanyo ya hi laha ku nga heriki, kambe munhu u na yona, hi laha Eklesiasta 3:11 yi vulaka ha kona: “Ši v̌ekile ku anakanya ka v̌utomi le’byi nga heriki e timbilwini ta v̌ona.” Kumbe hi laha Revised Standard Version yi swi vekaka ha kona yi ri: “Xi veke vutomi lebyi nga heriki emianakanyweni ya munhu.” Kutani ke, ku navela ka mbilu ya munhu i ku hanya hi masiku, hi laha ku nga heriki. Moya, mati ni vuswa ntsena a swi anelanga eka sweswo. Leswaku u hanya hi laha ku nga heriki ku laveka malunghiselelo ya moya lama seketeriweke eka “marito hinkwawo lama humaka enon’wini wa [Yehova].” Namuntlha, ya kumeka ebukwini yin’we, ku nga Bibele, naswona mphamelo a wu karharisi—hinkwaswo leswi u swi lavaka, ku tlula leswi u nga swi tamelaka. Khabodo leyi a yi tshami yi nga ri na nchumu.
3. Xana i yini lexi Yesu a xi hlawuleke xi ri xa nkoka ngopfu, naswona i xihundla xihi lexi Pawulo a xi dyondzeke?
3 Yesu u hi dyondzise ku khongelela swakudya leswi lavekaka swa nyama hi ku: “U hi nyika namuntlha vuswa bya hina bya siku rin’wana ni rin’wana.” Kambe hi ku hatlisa endzhaku ka sweswo u rhangise timhaka ta moya loko a te: “Rhangani mi tilavela Mfumo wa yena ni ku lulama ka yena.” (Matewu 6:11, 33) Swakudya swa nyama swi hi hlayisa hi hanyile siku hinkwaro ntsena; mphamelo wa moya lowu hambetaka wu nga swi endla hi nkarhi hinkwawo wa vutomi, naswona hambi ku ri hi laha ku nga heriki. Kutani u nga vileli hi swilo swa nyama. Pawulo a a nga vileli. U vulavule hi mimpfuno ya moya leyi n’wi pfuneke ku aneriseka ku nga khathariseki swiyimo swa nyama, a ku: “Eminkarhini hinkwayo, ndzi dyondzile xihundla xa ku amukela ku taleriwa ni ndlala, ndzalo ni vusiwana, ndzi nga vileli. Ndzi nga endla hinkwaswo hi matimba ya Loyi a ndzi tiyisaka.”—Vafilipiya 4:12, 13.
Khombo Ri Wela Lava Nga Anerisekiki
4. I malunghiselelo wahi lama a ma nga anelanga eka mpatswa wo sungula wa vanhu, naswona i yini leswi engetelekeke leswi va swi laveke?
4 Hambi swi ri tano, vo tala a va aneriseki hi malunghiselelo ya Yehova. Vatswari va hina vo rhanga a va nga aneriseki. A va hanya entangeni wa paradeyisi—xivono xo saseka xi tsakise mahlo ya vona, swiluva swo saseka swi nun’hwerise moya lowu va wu hefemuleke, swakudya swo xawula swi nyanyule ririmi ra vona, tinsimu ta tinyanyana ti timule tindleve ta vona. Ku tlula kwalaho, a va ri na ntirho lowu tsakisaka wo hlayisa ntanga lowu, kun’we ni nkateko wo tata misava hi vana lava hetisekeke. Kambe a va ri na vutianakanyi. Leswi Xikwembu xi swi nyikeleke a swi nga enelanga. Va lave leswi engetelekeke. Va lave ku tikunguhatela hi voxe leswi a swi lulamile ni leswi a swi ri leswo biha. Kutani va endle tano, naswona kungu ro sungula leri va ri endleke a ri ri khombo, ri endle leswaku va lahlekeriwa hi hinkwaswo, swa vona ni swa vana va vona.—Genesa 3:1-7, 16-19.
5. Xana Yehova u katekise Vaisrayele hi yini, naswona xana xiendlo xa vona a xi ri xihi ke?
5 Vaisrayele va tekelele xikombiso xa vona lexo biha. Xikwembu xi va ntshunxe evuhlongeni aEgipta, xi va endla tiko, xi va nyike Nawu lowu hetisekeke, xi va kongomisile emaendzweni ya vona ya le mananga, xi va lunghiselele swiambalo leswi nga hlakariki, naswona xi va hlayise hi manna leyi weke yi huma etilweni ni mati lama humeke eribyeni hi hlori. Kambe a va anerisekanga hi malunghiselelo ya Yehova. (1 Vakorinto 10:1-5) Loko va ri karhi va famba emananga, va vilerile nkarhi na nkarhi.—Eksoda 13:21, 22; Tinhlayo 11:1-6; Deuteronoma 29:5.
6. I ndlela yini leyi tiseke ndzoviso ehenhla ka Israyele tanihi tiko?
6 A va ha n’unun’uta endzhaku loko va tshamisekile eTikweni leri Tshembisiweke—tiko lero nona, leri nga ni mati ‘leri khulukaka ntswamba ni vulombe.’ Hambi swi ri tano a va nga tlangeli, a va nga si aneriseka hi malunghiselelo ya Yehova, va fularhele vugandzeri byakwe, va hundzulukela eka vugandzeri bya swifaniso bya rimbewu, va nyikela vana va vona eka Molok, kutani va titisela ndzoviso eka vona vini tanihi tiko. Loko va humesiwe evuhlongeni bya Babilona, va landzele mikhuva leyo biha leyi endleke Rito ra Xikwembu swa hava. Va hetelele hi ku dlaya Mesiya wa vona la tshembisiweke, Kriste Yesu.—Deuteronoma 6:3; 8:7-9; Vaavanyisi 10:6; 1 Tihosi 14:22-24; 2 Tihosi 21:1-16; Esaya 24:1-6; Matewu 15:3-9; 27:17-26.
7. Xana vafundhisi va Vujagana va namuntlha va hambetise ku yini eka ndlela leyi fanaka tanihi vaprista lava nga tshembekiki va nkarhi wa Malakiya?
7 Ku fikela namuntlha vanhu hi ntolovelo va hambetile va hlawula tidyondzo ta vukhongeri byo hemba. Vafundhisi va sandza vito ra Yehova, ni ku ri tirhisa a va ri tirhisi. Va n’wi delela hi tidyondzo to tano leti nga riki ta matsalwa tanihi Vunharhu-un’we, moya lowu nga fiki ni nxaniso lowu nga heriki etiheleni ta ndzilo. Tidyondzo ta vona a ti thyakisiwanga hi mavunwa lama tekiweke eBabilona na Egipta wa khale ntsena kambe ni le ka timhaka to tala, leti nghenisiweke chefu hi ku ala gandzelo ra Kriste ni ku amukela hundzuluko. Va tekela Yehova ku dzuneka ka yena loku n’wi faneleke, hi laha ku endleke vaprista esikwini ra Malakiya ha kona.—Malakia 1:6-8; 3:7-9.
8. (a) I xirhambo xihi lexi vaprista va siku ra Malakiya ni varhangeri va vukhongeri va namuntlha va xi aleke? (b) I vamani lava amukeleke xirhambo, naswona hi mbuyelo wihi?
8 Le ndzhaku Vaisrayele va khutaziwe ku tibasisa ni ku tlhelela eka Yehova. Yehova u te: “Tlhelelani ka mina, kutani nḍi ta tlhelela ka ṅwina.” U ye emahlweni a va rhamba a ku: “Mi nḍi ringa ha kona, ku v̌ula Yehova wa mav̌andla, kutani mi ta v̌ona šana nḍi nga ka nḍi nga mi pfuleri mafaster ya tilo, nḍi v̌a nḍi mi tšhululela e ku kateka hi mpimo lo’wu tlurisaka!” (Malakia 3:7, 10) I masalela ya tiko ra Yuda ntsena lawa ya tlheleleke; namuntlha, masalela lama tshembekaka ya Israyele wa moya ya humile eka vukhongeri byo hemba bya misava leyi. Vona, kun’we ni ntshungu lowukulu lowu kulaka wa vagandzeri lava fanaka ni tinyimpfu tin’wana, va dzunisa Yehova tanihi Timbhoni takwe. (Yohane 10:16) Eka vona, Yehova u hlayise xitshembiso xakwe naswona u ‘pfule mafasitere ya tilo ivi a va chululela mikateko hi mpimo lowu tlurisaka’—nkhuvo lowunene wa swakudya swa moya!—Esaya 25:6.
Ndzalo Ya Swakudya Swa Moya
9. I malunghiselelo wahi ya moya lama nga kona namuntlha, hi ku tirhisa yini, naswona hi vuyelo byihi?
9 “Nandza lowo tshembeka, lowa vutlhari” loyi Yesu a n’wi vhumbeleke siku ra hina u bizi ni ku lunghiselela swakudya swa moya hi xitalo. (Matewu 24:45) N’waxemu ntsena, eka 208 wa matiko ni swihlala swa lwandle, naswona hi kwalomu ka 200 wa tindzimi, Timbhoni ta Yehova leti nga ehenhla ka timiliyoni tinharhu ti endle leswaku malunghiselelo lawa ya moya ya kumeka hi ku tirhisa maendzo ya yindlu na yindlu ni ku hangalasiwa ka madzana ya timiliyoni ya tibuku, timagazini ni Tibibele. Vo tala va dyile swakudya leswi swa moya naswona va anerisekile: Lava tlulaka 225 000 lavantshwa va khuvuriwile hi lembe rin’we!
10. I malunghiselelo wahi lama nga kona eku hlayiseni ka xitsundzuxo xa Pawulo xo hlengeletana kun’we?
10 Malunghiselelo ya Yehova ya moya ma tlhele ma endliwa lama kumekaka hi ku tirhisa mintsombano ya muganga, tinhlengeletano ta xifundza ni minhlangano ya ntlhanu ya vhiki na vhiki leyi khomiwaka eka kwalomu ka 52 000 wa mabandlha ya Timbhoni ta Yehova nkarhi na nkarhi—hinkwawo ya yingisela xitsundzuxo xa Pawulo eka Vaheveru 10:25 ‘ku ka hi nga tshiki ku hlengeletana.’
11. I yini lexi kombisaka ndlela leyi navelekaka ya swakudya swa moya leswi faneleke ku lunghiseleriwa?
11 Loko wansati a rhambela vaendzi eswakudyeni, a nga virisi xitoki xa nyama ntsena ivi a xi phamela exibyeni. U tirhisa swichela-chelani ni switshongo ku engetela ku nun’hwela loku navetisaka ni swinandzihisi swin’wana swo sasekisa leswaku swi koka mahlo. Xivumbeko ni ku nun’hwela ka swona swi ringene leswaku swi tsakamisa nomu hi marha ni ku phomisa rihlakahla. Yoleyo i ndlela leyi malunghiselelo ya Yehova ya moya ya lunghiseleriweke ha yona—ku nga ri hi ndlela yo oma, leyi pfariweke, kambe hi ndlela yo nandziha leswaku swi tsakisa mianakanyo ni ku khumba mbilu. Mukriste un’wana ni un’wana u fanele ku landzela xikombiso xexo. “E ndlev̌e a yi nga hlawuli ku v̌ulav̌ula, kukota malaka lama kotaka ku hlawula ŝakudya ke?”—Yobo 12:11.
12. I swikombiso swihi leswi hi nga na swona swa swakudya swa moya leswi lunghiseleriweke hi laha ku navetisaka?
12 Theocratic Ministry School Guidebook eka dyondzo ya yona yo sungula yi kandziyisa ku tirhisa marito lama tsakisaka. Solomoni a a nga tirhisi marito yo lulama ntsena kambe a a tirhisa ni yo tsakisa. (Eklesiasta 12:10) Psalma 45:2 yi vhumbe hi ta Mesiya, Yesu Kriste yi ku: “Tintŝalo ti halakile miloṅwini ya wena.” Swi ve tano. Vayingiseri va yena va hlamarile hi “marito ya tintswalo lama humaka enon’wini wa yena.” Va hambetile va n’wi tshinelela leswaku va n’wi twa, va tile etempeleni emahlweni ka nkarhi leswaku va ta n’wi yingisela, va n’wi yingisela hi ntsako, va hlamarisiwile hi ndlela ya yena yo dyondzisa. Vatirhela-mfumo lava rhumiweke ku ya n’wi khoma va te: “A ku si va na munhu na siku ni rin’we la vulavulaka ku fana ni munhu loyi.” (Luka 4:22; 19:48; 21:38; Marka 12:37; Matewu 7:28; Yohane 7:46) Guidebook yi lunghiseleriwe ku hi pfuna ku vulavula marito yo tsakisa ya ntiyiso. Xana u yi tirhisa hi laha ku teleke?
13. Xana Vaefesa 5:15-17 yi ku kandziyisa njhani ku ‘londzovota nkarhi,’ naswona ha yini leswi swi kandziyisiwa?
13 Vaefesa 5:15-17 ya hi tsundzuxa yi ku: “Xiyani swinene mahanyelo ya n’wina; mi nga hanyi tani hi vanhu lava nga twisisiki nchumu, kambe hanyani tani hi lavo tlhariha. Londzovotani nkarhi lowu mi nga na wona, hikuva masiku lawa hi nga ka wona ma bihile. Hikokwalaho ke, mi nga vi lavo pfumala mano, kambe ringetani ku twisisa leswi [Yehova a] rhandzaka swona.” Rito ra Xigriki laha leri hundzuluxeriweke va ku “nkarhi” a ri vuli nkarhi ntsena hi ku twisisa loku tolovelekeke kambe ri kombisa nkarhi lowu vekiweke, nkarhi wa nguva wa xikongomelo lexi hlawulekeke. Riendli ra Xigriki leri hundzuluxeriweke va ku “londzovotani” ri le ka xivumbeko xo kandziyisa, naswona “emhakeni leyi kahle-kahle ri vula ‘ku londzovota hi ku kandziyisisa’; hi leswaku, ku tirhisa nkarhi wun’wana ni wun’wana lowu taka.”a Xana u vekela nkarhi etlhelo eka xiyimiso xa wena leswaku u titlharihisa hi ku tirhisa malunghiselelo ya Yehova ya moya? U fanele ku endla tano. Hinkwerhu ka hina hi fanele ku endla tano. Ha yini? ‘Hikuva masiku ma bihile.’
Ku Suka Eka Mananga Ya Moya Ku Ya Eka Paradeyisi Ya Moya
14. I ndzimana yihi ya Bibele leyi tirhaka tanihi xikombiso lexi kombisaka New World Translation Reference Bible ya hina ya ririmi ra Xinghezi?
14 Lunghiselelo ra moya leri hlawulekeke i New World Translation of the Holy Scriptures—With References ya hina, leyi humesiweke hi 1984. Yi na timhaka to tala leti endlaka leswaku swi koteka ku tirhisa ‘nkarhi lowu londzovotiweke’ ku engetela vutivi bya hina.b Xikombiso xin’wana i tinhlamuselo ta yona leti kombeteriweke. Languta Psalma 1:3, leyi vulavulaka hi xiyimo xa wanuna loyi a anakanyisisaka hi nawu wa Xikwembu vusiku na nhlikanhi. Ndzimana yoleyo yi hlayekisa leswi: “O fana ni muri lo’wu simekiweke kusuhi ni milambu ya mati, lo’wu tŝalaka mihanḍu ya wona hi nkari wa wona, lowu matluka ya wona ma nga omiki: Hikwaŝo leŝi a ŝi endlaka ŝi ta kateka.” Ku na leswi engetelekeke, leswi engetelekeke ngopfu, eka ndzimana leyi ku tlula leswi voniwaka hi tihlo ra muhlayi loyi a hlayaka hi ku hatlisa ntsena ivi a hundza.
15. I swivutiso swihi leswi tlakusiwaka ehenhleni ka murhi wa Psalma 1:3, naswona i ku voningeriwa kwihi loku Esaya 44:4 yi ku nyikaka?
15 Xiya: Murhi wu simekiwile. I mani loyi a wu simekeke? Wu le kusuhi ni milambu, vunyingi. Xana murhi wun’we wa mila etimbuweni ta milambu yo hambana-hambana? E-e. Kutani navela ku tiva. Xana murhi lowu wu vulavula ha yini? Tinhlamuselo leti kombeteriweke ti pfula mahlo ya mianakanyo ya hina. I Esaya 44:4, 61:3 na Yeremia 17:8. Esaya 44:4 yi vula leswaku vanhu va yena va ta fana ni mirhi “e matini lama khulukaka.” Migero yo tala ya mati yo tala? Kunene, ina! Swinambyana i migero yo cheleta leyi cheletaka mirhi entangeni!
16. I ku hlamuseriwa kwihi kun’wana loku nyikiwaka hi Esaya 61:3 na Yeremia 17:8?
16 Esaya 61:3 yi vitana yin’wana ya mirhi leyi “minkuhlu ya ku lulama, le’yi nga byariwa i Yehova e ku ṅwi ḍunisa.” Yehova hi yena la byalaka ni ku cheleta leswi, naswona hi yena la dzunisiwaka hi mihandzu leyi tswariwaka hi mirhi leyi! Yeremiya 17:8 yi fanisa munhu loyi a anakanyisisaka hi nawu wa Xikwembu vusiku ni nhlekanhi ni “murhi lo’wu simekiweke kusuhi ni mati, lowu timiṭu ta wona ti nav̌aka e matini; ni loko ku nga ta dyanḍa, a wu twi ntšhumu; ni matluka ya wona ma v̌a ya ntima; hi lembe ra dyanḍa a wu ṭhuki ntšhumu, kambe a wu ṭhiki ku v̌eka mihanḍu.” Matluka ya wona a ma hlanhleki; hinkwaswo leswi wu swi endlaka swa humelela!
17. I xifaniso xihi lexi sweswi xi humelelaka mayelana na Psalma 1:3, naswona i xiphemu xihi lexi hi xi endlaka eka yona?
17 Manuku munyama wa suka emahlweni ya hina! Psalma 1:3 yi tsala xifaniso xo xonga. Lava va anakanyisisaka hi nawu wa Yehova vusiku na nhlikanhi va fana ni murhi lowu byariweke ekusuhi ni xihlovo xa mati lexi nga phyiki. A va ha ri xiphemu xihi kumbe xihi xa tinhlengeletano ta misava leti nga ni dyandza ra moya kambe manuku va hlanganyela ni nhlengeletano ya Xikwembu leyi phameriwaka hi mati ya ntiyiso lama phyuphyisaka hi xitalo. Hakunene, va le paradeyisini ya moya, va phyuphyisiwile emoyeni, naswona va veka mihandzu ya moya leswaku ku dzunisiwa Yehova. Wa nga anakanya! Xikwembu xi tirhisa Timbhoni ta xona ku kongomisa vanhu va va susa eka tinhlengeletano ta misava leti nga ni dyandza, leti omeke, ku ta eparadeyisini ya moya leyi phyuphyisaka, leyi cheletiwaka kahle.
18. Xana van’wana va endla njhani loko va vona van’wana va humelela eku vekeni ka vumbhoni, naswona ha yini va nga hlulekaka?
18 Leswaku hi hetisisa ntirho lowu hi laha ku humelelaka, hi fanele ku dyondzisa mianakanyo ni timbilu ta hina leswaku hi ta tirhisa malunghiselelo ya Yehova hinkwawo ya moya. Van’wana va twa van’wana va hlamusela tindzimana ta Bibele ivi kutani va ku: “Loko a ndzo tiva Bibele ku fana na yena!” Kambe loko vanhu vo tano vo tidyondzisa ku dyondza Bibele, na vona va nga engetela vutivi bya vona bya Bibele. Van’wana va twa van’wana va veka vumbhoni etindlwini ivi kutani va ku: “Onge ndzi nga veka vumbhoni etindlwini hi laha a endlaka ha kona!” Kambe loko vo tidyondzisa ku hlanganyela nkarhi na nkarhi entirhweni wa nsimu va tirhisa buku leyi nge Reasoning From the Scriptures, na vona va nga va Timbhoni leti nga ni vutshila lebyi engetelekeke. Van’wana va twa van’wana va nyikela tinkulumo ta Bibele ivi kutani va ku: “Onge ndzi nga nyikela tinkulumo hi laha a nyikelaka ha kona.” Kambe, nakambe, loko vanhu lava vo tidyondzisa ku lunghiselela swiavelo swa vona swo vulavula kahle, va tswonga tidyondzo ta Theocratic Ministry School Guidebook, na vona va ta hluvuka eka vuswikoti byo vulavula.
19. Xana xilotlelo xa ku va ni matimba ya ku veka vumbhoni i yini ke?
19 Manuku, ku navela swi kahle, kambe ku navela handle ka ku tirha a swi endli leswaku ntirho wu endliwa. I ntirho lowu endlaka leswaku ku navela ku va ntiyiso. Tidyondzise ku londzovota nkarhi, naswona endla ntirho lowu wu endlaka leswaku ku navela ku va ntiyiso. Loko u nga tirhisi nsiha, wu ta tsana. Loko u nga tirhisi vutshila, byi ta nyamalala. Loko u nga tirhisi mianakanyo ya wena, matimba yo anakanya ya ta hlanhleka. Eka mhaka yin’wana ni yin’wana, nawu hi leswaku, “Yi tirhise kumbe u lahlekeriwa hi yona.” I ‘mhaka ya ku tirhisiwa leswi matimba yo anakanya ya leteriwaka.’ Kutani “ku anakanya ku ta ku langutela, ku twisisa ku ta ku hlayisa.”—Vaheveru 5:14; Swivuriso 2:11.
20. Hi ku tirhisa malunghiselelo ya Yehova ya moya, xana hi ta papalata yini, naswona hi ta vuyeriwa hi yini?
20 Kutani tirhisa malunghiselelo ya Yehova ya moya. Tsaka ni vanhu vakwe lava anerisekeke. Papalata ndlala leyi Amosi a yi vhumbeke loko a ku: “V̌onani, ku v̌ula Yehova, ma ta masiku lawa nḍi nga ta ruma ndlala e misav̌eni, yi nga ri ndlala ya v̌uŝa, ni loko ri ri tora ra mati, kambe yi nga ndlala ya marito ya Šikwembu.” (Amos 8:11) Hlanganyela ni lava va dyaka ni ku tsaka, ku nga ri lava va alaka swakudya ivi va karhatiwa hi gome: “Hikwalaho Hosi Yehova a v̌ulav̌ula ŝeŝo, a ku: Maŝiv̌o, malanḍa ya mina ma ta dya, kambe ṅwina mi ta v̌a ni ndlala; maŝiv̌o, malanḍa ya mina ma ta nwa, kambe ṅwina mi ta v̌a ni tora; maŝiv̌o, malanḍa ya mina ma ta ṭaka, kambe ṅwina mi ta v̌a ni tingana.”—Esaya 65:13.
[Tinhlamuselo ta le hansi]
a Vona The New International Dictionary of New Testament Theology, Vholumo 1, tluka 268, hi Colin Brown.
b Mi nga ha va mi nga ri na yona hi ririmi ra n’wina kambe a swi kanakanisi leswaku mi ta tsakisiwa hi xikombiso lexi nga laha henhla xa ku tirhisiwa ka yona.
Wa Tsundzuka Xana?
◻ Xana tiko ra Israyele ri kombise ku nga aneriseki ka rona hi malunghiselelo ya Yehova hi ndlela yihi?
◻ Xana Malakia 3:10 yi hetiseke hi ndlela yihi ehenhla ka Timbhoni ta Yehova?
◻ Xana nhlamuselo-nkulu ya Psalma 1:3 hi yihi ke?
◻ Ha yini swi ri swa nkoka ku tirhisa swilo leswi hi swi dyondzeke hi malunghiselelo ya Yehova ya moya?
[Xifaniso lexi nga eka tluka 15]
Lava va anakanyaka hi milawu ya Yehova va fana ni mirhi leyi simekiweke ekusuhi ni xihlovo lexi nga phyiki xa mati