‘Ku Hlamula Hi Ndlela Leyi Kongomeke’

EDYONDZWENI ya le Ntshaveni, Yesu u kombetele “eNawini wa Muxe ni ka Vaprofeta.” Xiyenge xa vunharhu xa Matsalwa ya Xiheveru a xi ri na Matsalwa lama katseke tibuku ta swiphato, to tanihi Tipisalema na Swivuriso. (Matewu 7:12; Luka 24:44) Leti na tona ti tamele vutlhari bya Xikwembu.

Hi xikombiso, swivuriso swi tsundzuxe vaavanyisi eka Israyele wa khale: “L’a nge ka mudyohi; u lulamile! V̌anhu v̌a ta ṅwi ruketela, matiko ma ta ṅwi nyenya, kambe la’v̌a ṅwi holov̌elaka v̌a ta ṭaka, v̌a ta humelela hi ku kateka lo’kunene. L’a hlamulaka hi marito manene, o ntŝontŝa munhu e noṅwini.”—Swivuriso 24:24-26.

Loko muavanyisi a hluriwe hi mintshikilelo ya ku ba mati kumbe ku ya hi nghohe ivi a vula leswaku mubihi u lulamile, van’wana a va ta n’wi vona a nga faneleki eka xikhundla xa yena. Phela, hambi swirho swa ‘mintlawa ya tinxaka’ ya Vamatiko lava tweke ku hombolokisiwa ko tano ka vuavanyisi a va ta n’wi langutela ehansi! Hi tlhelo rin’wana, loko muavanyisi a sola munhu wo biha hi xivindzi ivi a hlamula hi ndlela yo kongoma eka mhaka leyi tlhuvutsiwaka, a a ta kuma xichavo ni ku rhandziwa hi vanhu. Vanhu hi xitalo a va ta susumeteriwa ku n’wi navelela ‘ku kateka lokunene.’ Hi laha Swivuriso yi yaka emahlweni yi swi veka ha kona: “L’a hlamulaka hi marito manene, o ntŝontŝa munhu e noṅwini.”

Ku ntswontswa ko tano a ku vula xichavo—exikarhi ka mutsundzuxi ni lava yingisaka xitsundzuxo xa yena xo kongoma. Kumbexana hambi ku ri loyi a soriwaka a nga ha xi amukela ivi a kombisa rirhandzu eka muavanyisi. Swivuriso 28:23 yi ri: “L’a tshinyaka v̌anhu, e nḍaku o ta kuma tintŝalo e ku tlula wa ririmi ra ku sasela vaṅwana.” Lava tirhaka tanihi vakulu va bandlha namuntlha xisweswo va fanele va papalata ku pfumelela vunghana kumbe vuxaka bya ndyangu byi hambukisa ku avanyisa ka vona. Hi ku nyikela ndzayo leyi lavekaka hi ku kongoma, vakulu va ta kuma xichavo ebandlheni.