Vakulu, Avanyisani Hi Ku Lulama

“Yingisani timhaka ta v̌amakwenu, mi av̌anyisa hi ku lulama e mitengo ya v̌ona.”—DEUTERONOMA 1:16.

1. Emhakeni yo avanyisa, i ku nyikiwa kwihi ka matimba loku humeleleke, naswona leswi swi vula yini eka vaavanyisi lava nga vanhu va nyama?

TANIHI Muavanyisi la Tlakukeke, Yehova u nyike N’wana wakwe matimba yo avanyisa. (Yohane 5:27) Hi ku fanana, tanihi Nhloko ya bandlha ra Vukriste, Kriste u tirhisa ntlawa wa nandza lowo tshembeka ni wa vutlhari ni Huvo ya yena leyi Fumaka ku veka vakulu, lava hi minkarhi yin’wana va faneleke ku tirha tanihi vaavanyisi. (Matewu 24:45-47; 1 Vakorinto 5:12, 13; Tito 1:5, 9) Tanihi vaavanyisi lava yimelaka, va boheka ku landzelela swinene xikombiso xa Vaavanyisi va le tilweni, Yehova na Kriste Yesu.

Kriste—Muavanyisi Loyi A Nga Xikombiso

2, 3. (a) I vuprofeta byihi bya Vumesiya lebyi paluxaka timfanelo ta Kriste tanihi Muavanyisi? (b) I tinhla tihi leti lavaka ku xiyiwa hi laha ku hlawulekeke?

² Malunghana na Kriste tanihi Muavanyisi, ku tsariwe leswi landzelaka hi tlhelo ra vuprofeta: “Moya wa Yehova wu ta ṭhama henhla ka yena, moya wa v̌utlhari ni wa mianakanyo, moya wa nṭunḍušo ni wa matimba, moya wa ku tiv̌a ni wa šitšhav̌o ša Yehova. O ta ṭakela šitšhav̌o ša Yehova; a nga ka a nga av̌anyisi hi ngohe, hambi ku ri ku av̌anyisa hi ku twa mhaka ya širi. O ta av̌anyisa šisiwana hi ku lulama, a kanela timhaka ta la’v̌aṭongo v̌a misav̌a.”—Esaya 11:2-4.

³ Eka vuprofeta byebyo, xiya timfanelo leti endlaka leswaku Kriste a kota ku ‘avanyisa misava leyi akiweke hi ku lulama.’ (Mintirho 17:31) U avanyisa hi ku pfumelelana ni moya, vutlhari, ku twisisa, ku laya ni vutivi bya Yehova. Nakambe, xiya leswaku u avanyisa hi ku chava Yehova. Xisweswo, “xitshamo xa ku avanyisa xa Kriste,” xi yimela “xiluvelo xa Xikwembu [xo avanyisa].” (2 Vakorinto 5:10; Varhoma 14:10) U na vukheta leswaku a avanyisa timhaka hi ndlela leyi Xikwembu xi ti avanyisaka ha yona. (Yohane 8:16) A nga avanyisi hi xiyimo xa munhu kumbe hi mavari-vari. U avanyisa hi ku lulama leswaku a pfuna vanhu lava titsongahataka ni lavo rhula. I Muavanyisi la hlamarisaka swonghasi! Naswona mawaku xikombiso lexinene swonghasi eka vanhu lava nga hetisekangiki lava rhamberiwaka ku tirha etimhakeni ta vuavanyisi namuntlha!

Vaavanyisi Va Laha Misaveni

4. (a) Wu ta va wihi wun’wana wa mintirho ya lava 144 000 hi nkarhi wa ku Fuma ka Gidi ra Malembe ka Kriste? (b) I vuprofeta byihi lebyi kombisaka leswaku Vakriste van’wana lava totiweke a va ta vekiwa vaavanyisi loko va ha ri emisaveni?

⁴ Matsalwa ma kombisa leswaku nhlayo leyitsongo hi xiringaniso ya Vakriste lava totiweke, ku sungula hi vaapostola va 12, va ta va vaavanyisi-kulobye na Kriste Yesu hi nkarhi wa Gidi ra Malembe. (Luka 22:28-30; 1 Vakorinto 6:2; Nhlavutelo 20:4) Masalela ya swirho leswi totiweke swa Israyele wa moya emisaveni ma avanyisiwile ni ku kondleteriwa hi 1918-19. (Malakia 3:2-4) Malunghana ni ku kondleteriwa loku ka Israyele wa moya, ku profetiwe leswi: “Nḍi ta ku tlherisela v̌aav̌anyisi la’v̌a fanaka ni v̌a khale, ni v̌aṭunḍuši la’v̌a fanaka ni la’v̌o ranga.” (Esaya 1:26) Xisweswo, hi laha a endleke ha kona hi Israyele wa nyama ‘eku sunguleni,’ Yehova u nyike masalela lama kondleteriweke vaavanyisi ni vatsundzuxi lavo lulama.

5. (a) I vamani lava ‘vekiweke ku va vaavanyisi’ endzhaku ka ku kondleteriwa ka Israyele wa moya, naswona va hlamuseriwa njhani ebukwini ya Nhlavutelo? (b) Valanguteri lava totiweke sweswi va pfuniwa hi vamani entirhweni wa vuavanyisi, naswona lava va leteriwa njhani leswaku va va vaavanyisi lava antswaka?

⁵ Xo sungula, ‘vavanuna lavo tlhariha’ lava a va ‘vekiwile ku va vaavanyisi’ hinkwavo a ku ri vakulukumba kumbe vakulu lava totiweke. (1 Vakorinto 6:4, 5) Valanguteri lava totiweke lava tshembekaka, lava xiximiwaka va hlamuseriwa ebukwini ya Nhlavutelo tanihi lava khomiweke hi voko ra xinene ra Yesu, hi leswaku va le hansi ka vulawuri ni vukongomisi bya yena. (Nhlavutelo 1:16, 20; 2:1) Ku sukela hi 1935 lava totiweke va kume nseketelo lowu tshembekaka eka “ntshungu lowukulu” lowu tshamelaka ku andza, lowu wu nga ni ntshembo wo pona ‘nhlomulo lowukulu’ kutani wu hanya hi laha ku nga heriki emisaveni ya paradeyisi. (Nhlavutelo 7:9, 10, 14-17) Loko “nkhuvo wa vukati bya Xinyimpfana” wu tshinela, lava engetelekeke va vona va hlawuriwa hi Huvo leyi Fumaka leyi totiweke leswaku va tirha tanihi vakulu ni vaavanyisi emabandlheni lama tlulaka 66 000 ya Timbhoni ta Yehova emisaveni hinkwayo.a (Nhlavutelo 19:7-9) Hi ku tirhisa swikolo leswi hlawulekeke, va leteleriwa ku tamela vutihlamuleri eka vanhu va “misava leyintshwa.” (2 Petro 3:13) Xikolo xa Vutirheli bya Mfumo, lexi khomiweke eku heleni ka 1991 ematikweni yo tala, xi kandziyise ku tamela loku faneleke ka timhaka ta vuavanyisi. Vakulu lava tirhaka tanihi vaavanyisi va boheka ku tekelela Yehova na Kriste Yesu, lava ku avanyisa ka vona ku nga ka ntiyiso ni loku lulameke.—Yohane 5:30; 8:16; Nhlavutelo 19:1, 2.

Vaavanyisi Lava ‘Tikhomaka Hi Xichavo’

6. Ha yini vakulu lava tirhaka eka tikomiti ta vuavanyisi va fanele ‘ku tikhoma hi xichavo’?

⁶ Loko Kriste hi byakwe a avanyisa hi ku chava Yehova na hi mpfuno wa moya wa Yena, vakulu lava nga hetisekangiki va fanele ku endla tano hi laha ku engetelekeke! Loko va averiwe ku tirha eka komiti ya vuavanyisi, va fanele ku ‘tikhoma hi xichavo,’ va kombela “Tatana loyi a nga yiki hi ngohe, kambe a av̌anyisa uṅwana ni uṅwana hi mitiro ya yena” leswaku a va pfuna ku avanyisa hi ku lulama. (1 Petro 1:17, BX) Va fanele ku tsundzuka leswaku va tirhana ni vutomi bya vanhu, ‘mimoya-xiviri’ ya vona, tanihi lava ‘nga ta tihlamulela.’ (Vaheveru 13:17) Hi ku ya hi leswi, entiyisweni va ta tlhela va tihlamulela emahlweni ka Yehova hikwalaho ka swihoxo swihi ni swihi swa vuavanyisi leswi papalatekaka leswi va swi endlaka. Loko a hlamusela hi Vaheveru 13:17, J. H. A. Ebrard u tsarile: “I vutihlamuleri bya murisi ku langutela mimoya-xiviri leyi a nyikiweke yona leswaku a yi khathalela, naswona . . . u fanele ku tihlamulela eka hinkwayo ka yona, ni le ka leyi lahlekeke hikwalaho ka xihoxo xa yena. Leri i rito ra nkoka. Mutirheli un’wana ni un’wana wa rito a a xiye leswaku u byarhe ntirho lowu wu nga ni vutihlamuleri lebyi chavisaka hi ku tirhandzela.”—Ringanisa Yohane 17:12; Yakobo 3:1.

7. (a) Vaavanyisi va manguva lawa va fanele ku tsundzuka yini, naswona xikongomelo xa vona xi fanele xi va xihi? (b) I tidyondzo tihi leti vakulu va faneleke ku ti dyondza eka Matewu 18:18-20?

⁷ Vakulu lava tirhaka entirhweni wa vuavanyisi va fanele ku tsundzuka leswaku Vaavanyisi va xiviri va mhaka yin’wana ni yin’wana i Yehova na Kriste Yesu. Tsundzuka leswi vaavanyisi eIsrayele va byeriweke swona: “A mi av̌anyisi mi rumiwa hi v̌anhu, kambe mi rumiwa i Yehova; kutani o na ṅwina loko mi ri kari mi av̌anyisa. Ŝeŝi, šitšhav̌o ša Yehova a ši v̌e henhla ka ṅwina; . . . Mi ta endlisa ŝeŝo leŝaku mi nga ṭhuki mi v̌a ni nanḍu.” (2 Tikronika 19:6-10) Hi ku chava ka ku xixima, vakulu lava avanyisaka mhaka va fanele va tikarhata swinene leswaku va tiyiseka leswaku Yehova hakunene u ‘na vona emhakeni ya vuavanyisi.’ Xiboho xa vona xi fanele xi kombisa ndlela leyi Yehova na Kriste va xiyaka mhaka ya kona ha yona. Leswi hi ku fanekisela va swi ‘bohaka’ (ku kumiwa u ri ni nandzu) kumbe ‘ku swi ntshunxa’ (ku kumiwa u ri hava nandzu) emisaveni ku fanele ku ri leswi ana se swi bohiweke kumbe ku ntshunxiwa etilweni—hi laha swi paluxiwaka ha kona hi leswi swi tsariweke eRitweni ra Xikwembu leri huhuteriweke. Loko va khongela eka Yehova hi vito ra Yesu, Yesu u ta va “exikarhi ka vona” leswaku a va pfuna. (Matewu 18:18-20, NW, nhlamuselo ya le hansi; Xihondzo xo Rindza, February 15, 1988, tluka 9) Moya lowu ku avanyisiwaka ha wona wu fanele ku kombisa leswaku Kriste u le xikarhi ka vona hakunene.

Varisi Va Nkarhi Hinkwawo

8. Hi byihi vutihlamuleri lebyikulu ehenhla ka ntlhambi, hi laha swi kombisiweke hi Yehova na Yesu Kriste? (Esaya 40:10, 11; Yohane 10:11, 27-29)

⁸ Vakulu a hi vaavanyisi va nkarhi hinkwawo. I varisi va nkarhi hinkwawo. I vahanyisi, hayi vaxupuri. (Yakobo 5:13-16) Mianakanyo-nkulu ya rito ra Xigriki leri vulaka mulanguteri (e·piʹsko·pos) yi vula nkhathalelo wo sirhelela. Theological Dictionary of the New Testament yi ri: “Loko ri nyikela nhlamuselo leyi engetelekeke eka murisi [eka 1 Petro 2:25], rito leri [e·piʹsko·pos] ri ringanyeta ntirho wa vurisi wa ku langutela kumbe ku rindza.” Ina, vutihlamuleri bya vona lebyikulu i ku langutela ni ku rindza tinyimpfu va ti hlayisa ti ri endzeni ka ntlhambi.

9, 10. (a) Pawulo u wu kandziyise njhani ntirho wo sungula wa vakulu, kutani hi xihi xivutiso lexi nga vutisiwaka hi laha ku faneleke? (b) Marito ya Pawulo lama nga eka Mintirho 20:29 ma vula yini, kutani vakulu va nga ha ringeta ku hunguta nhlayo ya timhaka ta vuavanyisi hi ndlela yihi?

⁹ Loko a vulavula ni vakulu va bandlha ra le Efesa, muapostola Pawulo u kandziyise mhaka leyi faneleke loko a ku: “Nyikelani nyingiso eka n’wina vini ni le ka ntlhambi hinkwawo, lowu moya lowo kwetsima wu mi vekeke ku va valanguteri exikarhi ka wona, ku risa bandlha ra Xikwembu, leri xi ri kutsuleke hi ngati ya N’wana wa xona n’wini.” (Mintirho 20:28, NW) Pawulo u kandziyisa ku risa, hayi ku xupula. Vakulu van’wana va nga va va endla kahle loko va anakanyisisa hi xivutiso lexi landzelaka: ‘Xana hi nga hlayisa nkarhi wo tala lowu lavekaka ku kambisisa ni ku tamela timhaka ta vuavanyisi loko hi nyikele nkarhi ni matshalatshala lama engetelekeke eka vurisi?’

¹⁰ I ntiyiso, Pawulo u tsundzuxe ku tivonela eka “timhisi leto leva.” Kambe xana a nga ti solanga hikwalaho ka leswi ‘ti nga khomiki ntlhambi hi musa’? (Mintirho 20:29) Naswona hambi leswi a a vula leswaku valanguteri lava tshembekaka va fanele ku hlongola “timhisi” leti, xana marito yakwe a ma kombisi leswaku vakulu va fanele ku khoma swirho leswin’wana swa ntlhambi ‘hi musa’? Loko nyimpfu yi sungula ku tsana emoyeni ivi yi hola, xana yi lava yini ke—ku biwa kumbe ku tshunguriwa, ku xupuriwa kumbe ku risiwa? (Yakobo 5:14, 15) Xisweswo, vakulu va fanele ku tshama va lunghiselela nkarhi wa ntirho wa vurisi. Leswi swi nga ha tisa vuyelo lebyi tsakisaka bya ku hunguteka ka nkarhi lowu hetiwaka eka timhaka ta vuavanyisi leti dyaka nkarhi leti katsaka Vakriste lava hluriweke hi xidyoho. Entiyisweni, xikongomelo-nkulu xa vakulu xi fanele xi va ku endla vanhu va titwa va tshunxekile, va phyuphyile, xisweswo va tisa ku rhula, ku tsaka ni nsirhelelo eka vanhu va Yehova.—Esaya 32:1, 2.

Ku Tirha Tanihi Varisi Ni Vaavanyisi Lava Pfunaka

11. Ha yini vakulu lava tirhaka etikomitini ta vuavanyisi va fanele ku ka va nga yi hi nghohe ni ku lava “vutlhari byo ta hi le henhla”?

¹¹ Vurisi lebyikulu swinene emahlweni ko va Mukriste a teka goza leri hoxeke byi nga hunguta timhaka to tala ta vuavanyisi exikarhi ka vanhu va Yehova. (Ringanisa Vagalatiya 6:1.) Hambi swi ri tano, hikwalaho ka vudyoho ni ku nga hetiseki ka munhu, valanguteri va Vukriste nkarhi na nkarhi va nga ha boheka ku tamela milandzu. Xana hi yihi misinya ya milawu leyi faneleke ku va kongomisa? A yi hundzukanga ku sukela enkarhini wa Muxe kumbe lowuya wa Vakriste vo sungula. Marito ya Muxe lawa a ma kongomisiwe eka vaavanyisi eIsrayele ma ha tirha: “Yingisani timhaka ta v̌amakwenu, mi av̌anyisa hi ku lulama e mitengo ya v̌ona . . . Mi nga ṭhuki mi av̌anyisa hi ku ya hi ngohe ya v̌anhu.” (Deuteronoma 1:16, 17) Ku nga yi hi nghohe ku kombisa “vutlhari byo ta hi le henhla,” vutlhari lebyi nga bya nkoka swinene eka vakulu lava tirhaka eka tikomiti ta vuavanyisi. (Yakobo 3:17; Swivuriso 24:23) Vutlhari byo tano byi ta va pfuna ku twisisa ku hambana exikarhi ka ku tsana ni vuhomboloki.

12. Vaavanyisi a va fanelanga ku va vavanuna lava lulameke ntsena, kambe va fanele va tlhela va va lavanene, hi matwisiselo wahi?

¹² Vakulu ‘va fanele ku avanyisa hi ku lulama,’ hi ku pfumelelana ni mimpimanyeto ya Yehova ya leswinene ni leswi hoxeke. (Psalma 19:9) Hambi swi ri tano, hambi loko va ringeta ku va vavanuna lava lulameke, va fanele ku tlhela va ringeta ku va vavanuna lavanene, hi ku ya hi ku hambanisa loku Pawulo a ku endlaka eka Varhoma 5:7, 8. Loko yi hlamusela hi tindzimana leti eka xihloko xa yona lexi hlamuselaka hi “Righteousness,” buku leyi nge Insight on the Scriptures yi ri: “Ku tirhisiwa ka rito ra Xigriki ku kombisa leswaku munhu la xiyekaka kumbe ku hlawulekisiwa hi vunene hi loyi a nga ni musa (loyi a voyameleke eku endleni ka leswinene kumbe ku pfuna van’wana) ni ku va la pfunaka (ku kombisa vunene byo tano swinene). A nga khathali ntsena hi ku endla leswi vululami byi lavaka swona, kambe u endla leswi tlulaka leswi, a susumetiwa hi ku anakanyela lokunene ka van’wana ni ku navela ku va pfuna.” (Vholumo 2, tluka 809) Vakulu lava nga riki lava lulameke ntsena, kambe ni ku tlhela va va vanene va ta khoma mudyohi hi ku anakanyela ka tintswalo. (Varhoma 2:4) Va fanele ku kombisa tintswalo ni ntwela-vusiwana. Va fanele va endla leswi va nga swi kotaka ku pfuna mudyohi leswaku a vona xilaveko xa ku hundzuka hambi loko eku sunguleni a nga ha vonaka a nga ri na mhaka na matshalatshala ya vona.

Langutelo Lerinene Hi Nkarhi Wa Vuavanyisi

13. (a) Loko nkulu a tirha tanihi muavanyisi, u tshama a ha ri yini? (b) I xitsundzuxo xihi lexi nyikeriweke hi Pawulo lexi na xona xi tirhaka etimhakeni ta vuavanyisi?

¹³ Loko xiyimo xi lava vuavanyisi, valanguteri va nga tshuki va rivala leswaku va ha ri varisi, lava tirhanaka ni tinyimpfu ta Yehova ehansi ka “murisi lonene.” (Yohane 10:11) Ndzayo leyi Pawulo a yi nyikeleke ya mpfuno wa nkarhi na nkarhi lowu nyikiwaka tinyimpfu leti nonon’hweriwaka yi tirha hi ndlela leyi fanaka hi nkarhi wa vuavanyisi. U tsarile: “Vamakwerhu, naloko un’wana a kumiwa a ri karhi a endla xihoxo, n’wina lava mi nga va Moya, n’wi vuyiseni hi moya wa musa. Eka un’wana ni un’wana wa n’wina, ndzi ri, tivonele leswaku na wena u nga ringiwi. Rhwalelanani mindzhwalo, kutani, hi ku endlisa sweswo, mi ta va mi hetisa nawu wa Kriste.”—Vagalatiya 6:1, 2.b

14. Valanguteri va fanele ku ti langutisa ku yini timhaka ta vuavanyisi, naswona langutelo ra vona hi mudyohi ri fanele ri va rihi?

¹⁴ Ematshan’wini yo titeka tanihi vaavanyisi lava tlakukeke lava hlanganeleke ku ta xupula, vakulu lava tirhaka eka komiti ya vuavanyisi va fanele ku teka vuavanyisi tanihi xiyenge xin’wana xa ntirho wa vona wa vurisi. Yin’wana ya tinyimpfu ta Yehova yi le khombyeni. Xana va nga endla yini ku yi ponisa? Xana a swi nge koteki leswaku va pfuna nyimpfu leyi hambukeke entlhambini? Vakulu va fanele ku va ni langutelo lerinene mayelana ni ku kombisa tintswalo laha leswi swi nga ta fanela kona. A hi swona leswaku va fanele ku olovisa mimpimanyeto ya Yehova loko ku endliwe xidyoho lexikulu. Kambe ku khathalela ka vona swiyimo swihi na swihi leswi nga riki swa nkoka swi ta va pfuna ku tsetselela laha swi kotekaka kona. (Psalma 103:8-10; 130:3) Lexi khomisaka gome, vadyohi van’wana va ni langutelo ro biha lerova vakulu va boheka ku kombisa ku tiya, hambi loko va nga ri na tihanyi.—1 Vakorinto 5:13.

Xikongomelo Xa Vuavanyisi

15. Loko ku tlhekeka xiphiqo lexikulu exikarhi ka vanhu vo karhi, ku fanele ku tiyisekisiwa hi yini ku sungula?

¹⁵ Loko xiphiqo lexikulu xi tlhekeka exikarhi ka vanhu vo karhi, vakulu lava tlhariheke va ta rhanga hi ku tiyiseka loko lava va katsekaka va ringetile ku lulamisa mhaka exihundleni, hi ku ya hi Matewu 5:23, 24 kumbe Matewu 18:15. Loko leswi swi nga pfunanga nchumu, kumbexana xitsundzuxo hi nkulu un’we kumbe vambirhi xi ta va xi enele. Goza ra vuavanyisi ri boha ntsena loko ku endliwe xidyoho lexikulu lexi nga yisaka eku susiweni. (Matewu 18:17; 1 Vakorinto 5:11) Ku fanele ku va ni xisekelo lexinene xa Matsalwa xo vumba komiti ya vuavanyisi. (Vona Xihondzo xo Rindza, September 15, 1989, tluka 18.) Loko yo tshika yi vumbiwa, vakulu lava fanelekaka lava leteriweke va fanele ku hlawuriwa eka mhaka yoleyo.

16. I yini lexi vakulu va ringetaka ku xi fikelela loko ku va ni mhaka ya vuavanyisi?

¹⁶ Vakulu va ringeta ku fikelela yini hi ku tirhisa vuavanyisi? Xo sungula, a swi koteki ku avanyisa hi ku lulama handle ka loko ntiyiso wu tiviwa. Ku fana ni le Israyele, timhaka letikulu ti fanele ku ‘lavisisiwa kahle.’ (Deuteronoma 13:14; 17:4) Kutani xikongomelo xin’wana xa vuavanyisi i ku kuma mintiyiso ya mhaka. Kambe leswi swi nga endliwa hi rirhandzu, naswona swi fanele ku endliwa tano. (1 Vakorinto 13:4, 6, 7) Loko se mintiyiso yi tiviwa, vakulu va ta endla hinkwaswo leswi lavekaka ku sirhelela bandlha ni ku hlayisa mimpimanyeto leyi tlakukeke ya Yehova ni ku khuluka lokunene ka moya wa yena exikarhi ka rona. (1 Vakorinto 5:7, 8) Hambi swi ri tano, xikongomelo xin’wana xa ku avanyisa i ku ponisa mudyohi loyi a nga ekhombyeni loko swi koteka.—Ringanisa Luka 15:8-10.

17. (a) Munhu loyi a hehliweke u fanele ku khomisiwa ku yini hi nkarhi wa vuavanyisi, naswona hi xikongomelo xihi? (b) Leswi swi ta lava yini eka swirho swa komiti ya vuavanyisi?

¹⁷ Munhu loyi a hehliweke a nga fanelanga a khomiwa hi ndlela yin’wana, kambe tanihi nyimpfu ya Xikwembu. U fanele ku khomiwa hi musa. Loko ku endliwe xidyoho (kumbe swidyoho), xikongomelo xa vaavanyisi lava lulameke ku ta va ku pfuna mudyohi leswaku a lulamisa, ku twisisa ku hoxa ka ndlela ya yena, ku hundzuka, ivi xisweswo a humesiwa “entlhan’wini wa Diyavulosi.” Swi ta lava ‘vutshila byo dyondzisa,’ ‘ku letela hi musa.’ (2 Timotiya 2:24-26; 4:2) Ku vuriwa yini loko mudyohi endzhaku a xiya leswaku u dyohile, a tisola hakunene, kutani a kombela Yehova leswaku a n’wi rivalela? (Ringanisa Mintirho 2:37.) Loko komiti yi khorwiseka leswaku u lava mpfuno hakunene, hakanyingi a ku nge vi na xivangelo xo n’wi susa.—Vona The Watchtower, January 1, 1983, tluka 31, ndzimana 1.

18. (a) Hi rini laha komiti ya vuavanyisi yi faneleke ku kombisa ku tiya eku suseni ka mudyohi? (b) Vakulu va fanele ku tikarhata hi tinyimpfu leti hambukaka hikwalaho ka xiyimo xihi lexi khomisaka gome?

¹⁸ Hi tlhelo rin’wana, loko swirho swa komiti ya vuavanyisi swi langutana ni mhaka leyi nga erivaleni ya vugwinehi byo kala ku hundzuka, ku xandzukela milawu ya Yehova hi vomu kumbe vuhomboloki byo tiyimisela, ntirho wa swona i ku sirhelela swirho leswin’wana swa bandlha hi ku susa mudyohi la nga hundzukiki. Komiti ya vuavanyisi a yi boheki ku hlangana ni mudyohi ko tala kumbe ku n’wi sindzisa leswi nga humiki embilwini ya yena ku n’wi endla leswaku a hundzuka, loko swi ri erivaleni leswaku a nga tisoli hi ndlela ya ku chava Xikwembu.c Emalembeni ya sweswinyana, ku susa emisaveni hinkwayo ku ve kwalomu ka phesente yin’we ya vahuweleri. Sweswo swi vula leswaku eka tinyimpfu ta kwalomu ka dzana leti tshamaka etshangeni, ku lahleka yin’we—hi nkarhinyana ntsena. Loko ku xiyiwa nkarhi ni matshalatshala lama lavekaka ku nghenisa munhu etshangeni, xana a swi khomisi gome ku tiva leswaku makume ya magidi ya ‘tlhelerisiwa eka Sathana’ lembe na lembe?—1 Vakorinto 5:5.

19. I yini lexi vakulu lava tirhaka eka komiti ya vuavanyisi va nga fanelangiki ku xi rivala, kutani kungu ra vona ri ta va rihi?

¹⁹ Vakulu lava sungulaka ku tamela mhaka ya vuavanyisi va fanele ku tsundzuka leswaku timhaka to tala ta vudyoho ebandlheni ti katsa ku tsana, hayi vuhomboloki. Va nga tshuki va rivala xikombiso xa Yesu xa nyimpfu leyi lahlekeke, lexi a xi gimeteke hi marito lama nge: “Ndza mi byela leswaku hi mukhuva wolowo, ku ta va ni ku tsaka etilweni hikokwalaho ka mudyohi a ri un’we la hundzukaka, ku tlula ku tsaka loku nga ta va kona hikokwalaho ka lava lulameke va 99 lava nga ha riki na fanelo ya ku hundzuka.” (Luka 15:7) Hakunene, ‘Yehova a nga swi lavi leswaku ku va na loyi a lovisiwaka kambe u lava leswaku hinkwavo va hundzuka.’ (2 Petro 3:9) Hi mpfuno wa Yehova, tikomiti to tala ta vuavanyisi emisaveni hinkwayo ta tikarhata swinene leswaku ti tisa ntsako etilweni hi ku pfuna vadyohi ku vona xilaveko xo hundzuka ni ku tlherisela mikondzo ya vona egondzweni lero khuma leri yisaka evuton’wini lebyi nga heriki.—Matewu 7:13, 14.

[Tinhlamuselo ta le hansi]

Swivutiso Swa Mpfuxeto

◻ Hi ku landzela xikombiso xa Murisi Lonkulu ni Murisi Lonene, i yini lexi vakulu va faneleke ku tikarhatela xona?

◻ Vakulu va nga ringeta ku hunguta nhlayo ya timhaka ta vuavanyisi hi ndlela yihi?

◻ Vaavanyisi a va fanelanga ku va lava lulameke ntsena, kambe va fanela va tlhela va va lavanene, hi matwisiselo wahi?

◻ Mudyohi u fanele ku khomisiwa ku yini hi nkarhi wa vuavanyisi, naswona hi xikongomelo xihi?

◻ Ha yini ku susa ku ri goza leri tekiwaka eku heteleleni?

[Xifaniso lexi nga eka tluka 16]

Loko ku endliwa vurisi lebyi nga ni nhluvuko ku nga ha papalatiwa timhaka to tala ta vuavanyisi

[Xifaniso lexi nga eka tluka 18]

Hambi ku ri hi nkarhi wa ku tenga, vakulu va fanele ku ringeta ku lulamisa mudyohi hi moya wa musa