Madzolonga A Ma Nge Ma Yimisi Mahungu Lamanene

SIKU rin’wana hi February leyi hundzeke, mafambiselo lamantshwa ya ikhonomi eVenezuela lawa ku nga khale ma languteriwile ma tivisiwile. Minxavo a yi tlakusiwa ku tlula 100 wa tiphesente eswakudyeni swa xisekelo swo tanihi masi, mapa na xinkwa. Minxavo ya petirolo a yi tlakuka hi 90 wa tiphesente. Mali ya ntleketlo yi pfumeleriwe ku ya ehenhla hi 30 wa tiphesente. Tiko a ri hlamarisiwile xikan’we-kan’we. Hi Musumbunuku, hi February 27, vanhu va hlamule hi ku pfuxa dzolonga etikweni hinkwaro.

Mixo lowu landzelaka, swilo a swi onhiwa ni ku phangiwa. Mimpfumawulo ya swibalesa a yi twakala etindhawini to tala. Lavantsongo ni lavakulu a va makanyeka eswitarateni swa doroba, va siya ku onhaka loku fanaka ni rivala ra nyimpi leri onhakeke swinene.

Ndzhenga wolowo muungameri wa tiko u tivise xiyimo xa khombo kutani a yimisa milawu ya mfumo ku ringana khume ra masiku. Ku simekiwe nkarhi wa le xikarhi ka awara ya 6:00 p.m. na 6:00 a.m. leswaku ku lawuriwa dzolonga ha wona. Siku leri landzeleke, holobye wa vusirheleri u tivise leswaku nkarhi wolowo a wu ta hambetisa sweswo ku kondza ku va ni xitiviso xin’wana. Masocha ya tirhise matimba ya wona ku lawula switarata, ma nghena emakaya handle ka mpfumelelo, ma yimisa ni ku secha vanhu. “Madzana mambirhi ya file naswona gidi rin’we ri vavisekile eka masiku manharhu ya mpfilumpfilu,” ku vike phepha-hungu rin’wana.

Xana mabandlha ya Timbhoni ta Yehova a ma ri njhani hi nkarhi wa dzolonga leri? Vamakwerhu va tsundzuxiwile: Tlharihani naswona mi papalata tindhawu ta khombo. Cincani minkarhi ya minhlangano yi pfumelelana ni ya nkarhi wo lawula dzolonga, ni ku papalata ku chumayela hi mintlawa leyikulu. Hambi swi ri tano, ku chumayeriwa ka mahungu lamanene ya Mfumo wa Xikwembu ku ye emahlweni.—Matewu 24:14; 28:19, 20.

Hikwalaho ka leswi wanuna un’wana la nga pfumelangiki wa wansati un’wana wa Mukriste a karhatekeke hi ku hlayiseka ka yena loko a humela ehandle ku ya chumayela, u n’wi tshimbise ku huma. U te eka yena: “A wu swi twisisi leswaku ndzi ni ndzhwalo wo wu hetisisa. Kutani tana sweswi! Ndzi ta dyondza Bibele na wena!”

Lowu a wu ri nkarhi wo sungula emalembeni ya 22 ya wansati loyi tanihi Mbhoni leswaku nuna wa yena a kombisa ku tsakela ku dyondza Bibele. U tlhele a ku: “Hi swona, ntsendze loko u tshembisa ku ka u nga fambi. Kambe u nga ndzi vutisi swivutiso, ndzi hlayeli ntsena.” Hambi swi ri tano, makwerhu wa xisati u dyondze na yena ku ringana awara na hafu. “A ku ri dyondzo leyi nga xikombiso, dyondzo yo antswa leyi ndzi tshameke ndzi va na yona emalembeni ya mina ya 22 ndzi ri entiyisweni,” ku vule yena, loko mihloti yi xiririka emahlweni ya yena.

Eka xiendlakalo xin’wana, phayona ra nkarhi hinkwawo a ri kukula xitarata ehandle ka muti wa rona loko ri kongomiwa hi wansati loyi hi ntolovelo a a nga ti yingisi Timbhoni loko ti endzela muti wa yena. “A ndzi si mi vona n’wina Timbhoni mi chumayela masiku lawa,” ku vula wansati. “U nga ndzi byeli leswaku a mi nge he chumayeli!”

Makwerhu wa xisati u hlamusele leswaku va yimile ku chumayela hi yindlu na yindlu hi nkarhi wa dzolonga ntsena. “Kambe siku ri ta ta leri hi nga ta ka hi nga ha chumayeli eka vanhu, naswona sweswo swi ta vula ku hela ka misava,” ku vula makwerhu wa xisati. “U fanele ku tirhisa nkarhi lowu sweswi ivi u amukela dyondzo ya Bibele ekaya ra wena.”

“Hi nga ma endla rini malunghiselelo?” Wansati u vutise hi xihatla. Malunghiselelo yo sungula dyondzo ya Bibele ya le kaya ma endleriwe kwalaho.

Lexi nkhensekaka, dzolonga ri herile, ri pfumelela timhaka ta tiko ku tlhelela exiyin’weni xa tona. Hambi swi ri tano, eka swiyimo swo tano swo nonon’hwa, swa khutaza ku tiva leswaku ku nga ri khale misava leyintshwa ya ku rhula ni nsirhelelo yi ta ta. Rito ra Xikwembu ra tshembisa: “Hi ku ya hi ku tshembisa ka Hosi, hi langutele matilo lamantshwa ni misava leyintshwa, laha ku lulama ku tshameke kona.” (2 Petro 3:13) Naswona ntsendzeloko Xikwembu xa ha swi pfumelela, Timbhoni ta Yehova ti ta ya emahlweni ti chumayela mahungu lamanene ya Mfumo.

[Swifaniso leswi nga eka tluka 31]

Mpfilumpfilu a wu va yimisanga vahuweleri va Mfumo

[Xihlovo Xa Kona]

Xifaniso hi Publicaciones Capriles, Caracas, Venezuela.