“Endzhaku A Nyika Ni Nuna Wa Yena Yin’wana”

XANA Adamu a a ri kona loko nyoka yi vulavule na Evha, yi n’wi xisela eku xandzukeleni ka Xikwembu? Bibele a yi swi kombisi leswi. Genesa 3:6 yi vika leswaku Evha “a kha mihandzu ya wona kutani a yi dya. Endzhaku a nyika ni nuna wa yena yin’wana, loko a ri na yena.” (NW) Hambi swi ri tano, ku hundzuluxela ka Tibibele tin’wana ku nyika nhlamuselo leyi hambanaka. King James Version yi hundzuluxela ndzimana hi ndlela leyi: “A kha mihandzu ya wona, kutani a yi dya, ivi a nyika ni nuna wa yena loyi a a ri na yena; kutani a dya.”

Riendli ra Xiheveru leri hundzuluxeriweke tanihi “nyika” i nkarhi lowu nga hetisekangiki naswona wu yelana ni xivumbeko lexi hlawulekeke xa rihlanganisi “ivi a” [hi Xiheveru, waw], leri kombisaka ntlhandlamano wa xinkarhana kumbe ntlhandlamanonene. Hikwalaho, New World Translation yi hundzuluxela ku humelela ko hlayanyana ka waw, loku hlanganisaka nxaxamelo wa swiendlakalo eka Genesa 3:6, hayi hi “kutani” ntsena kambe na hi marito man’wana lama cincaka, yo tanihi “eku heteleleni a,” “kutani a,” na “endzhaku a.” Xisweswo New World Translation yi na xisekelo lexi tiyeke xa mahundzuluxelo lama nga laha henhla.

Xana Adamu a nga va a ku yingisile hi ku kongoma ku vulavurisana exikarhi ka nsati wa yena ni nyoka, a yingisela mavunwa ni mhaka ya ku lumbeta ya muxandzuki la nga vonakiki la tirhisaka nyoka? Lexi tsakisaka, xichudeni xa Bibele xa le Jarimani J. P. Lange u kaneta mianakanyo leyi kutani a hlamusela: “Vukona bya wanuna hi nkarhi wa xiendlakalo xa ndzingo, hambi ku ri ku miyela ka yena, swa tika ku swi anakanya.” Naswona eku hlamuseleni ka xiga lexi nge “loyi a a ri na yena,” muhlamuseri wa Muyuda B. Jacob u hlamusela leswaku “a swi [vuli] loyi a a yime na yena (eka xiendlakalo lexi hundzeke kumbe loko a dya).”

Ku vulavurisana ka Evha ni nyoka swi paluxe leswaku nuna wa yena a a n’wi byerile hi nawu wa Xikwembu wa ku nga dyi murhi. (Genesa 3:3) Kutani tanihi nhloko ya Evha, Adamu a a byi hetisisile vutihlamuleri byebyo. Diyavulosi u honise lunghiselelo ra Xikwembu ra vunhloko naswona hi vutlhari u tirhise nkarhi lowu hi mhaka ya leswi Evha a a ri yexe. Endzhaku u hlamurile: “I nyoka le’yi nga nḍi kanganyisa, kutani nḍi dyile.” (Genesa 3:13) Evha u xisiwile hikuva u pfumele vunwa, kambe leswi a swi herisi xidyoho xa yena. Xikombiso lexi xo tsundzuxa xi komba leswaku a hi nge titsetseleli loko ho endla xin’wana lexi hoxeke emahlweni ya Yehova.—1 Timotiya 2:14.