Nkambisiso Wa Mahungu

Ha Yini U Twarisa Evhangeli?

Ku pfumala ka ku twarisa evhangeli eka lava yaka ekerekeni ku tshahiwe hi tibuku tin’wana tanihi loku yelanaka ni ku ehla ka swirho swa tikereke exikarhi ka vukhongeri lebyikulu. Ku vilela ehenhleni ka xiphiqo lexi hi 1988 swi susumetele United Church of Christ ku endla mhaka ya “vuevhangeli ni ku andza ka swirho” yi va yo sungula ku ringana malembe ya mune.

St. Petersburg Times yi vika leswaku mintlawa yin’wana leyikulu eUnited States, ku katsa ni Kereke ya Presbyterian ni Kereke ya Episcopal, yi endle hi laha ku fanaka. Hambi swi ri tano, nkambisiso wa sweswinyana wa mabandlha lama tlulaka 200 ya United Church of Christ wu paluxa leswaku vo tala va swirho swa yona va timiliyoni ta 1,6 a va ku kombisi ku tsakela ku byela van’wana hi ripfumelo ra vona. Xirho xin’wana xi vutisile: “Ha yini hi fanele ku vulavula ni van’wana loko hi endla leswinene?” Un’wana u te: “Loko u hanya hi ripfumelo ra wena, a wu fanelanga ku vulavula ha rona.”

Kambe, ebukwini ya yena leyi nge American Mainline Religion, Wade Clark Roof mutsari la hlanganyeleke, u pfumerile leswaku “ndlela leyi vanhu va vulavulaka ha yona hi vutomi bya vona bya vukhongeri ni bya moya i ya nkoka eku hlayisiweni ka ripfumelo hi roxe.”

Loko ku “endla leswinene” ni ku va ni “ripfumelo” swi ringanile ku tsakisa Xikwembu, ha yini muapostola Pawulo a tsarile a ku: “Ndzi ta va ni khombo loko ndzi nga twarisi Mahungu Lamanene”? U hlamusele vapfumeri-kulobye eRhoma a ku: “Loko u vula hi nomu wa wena, leswaku Yesu i Hosi, naswona loko u pfumela embilwini ya wena leswaku Xikwembu xi n’wi pfuxile exikarhi ka vafi, u ta ponisiwa. Hikuva munhu u pfumela hi mbilu, kutani sweswo swi n’wi endla a va la lulameke; u vula hi nomu, kutani sweswo swi n’wi endla a va la ponisiweke.”—1 Vakorinto 9:16; Varhoma 10:9, 10.

Ku Tirhisiwa Loko Biha Ka Rimbewu

Ku tlula hafu ya timagazini ta switori swo hlekisa ta kwalomu ka 1 100 leti humeleleke eka tibuku to hambana-hambana ta le Japani, ku katsa ni leti ta vana, ti hlamusela swiendlo swa rimbewu, ku vule Profesa Mamoru Fukutomi. A a rhangele nkambisiso le Tokyo wa timagazini leti tlulaka 390 ni tibuku tin’wana leti xaviweke hi n’hweti yin’we.

Profesa Fukutomi u ri, ‘swikombiso swo tala swa xiendlo xa rimbewu, swi landzela xikombiso xa vavanuna lava a va sindzisa vavasati lava alaka [leswaku va va ni vuxaka bya rimbewu] ni vavasati lava eku heteleleni va pfumeleke hi ku swi tsakela.’ Kwalomu ka 80 wa tiphesente eka 6 861 wa swifaniso eka timagazini leti dumeke ta le Japani leti kambisisiweke “a ti kombisa vavasati hi mukhuva lowu nyanyulaka hi tlhelo ra rimbewu,” ku vika The Daily Yomiuri. Kasi vo tala va vavasati lava nga eka swifaniso a va “ambale swirhangiso, swiambalo swo khida ha swona kumbe va nga ambalanga nchumu” naswona i 40 wa tiphesente ntsena lava a va ambarile, tiphesente ya 75 ta va xinuna eka swifaniso leswi kambisisiweke a va ambarile.

Xana ku tirhisiwa ko tano ko biha ka rimbewu ku ta va khumbisa ku yini vantshwa? Buku ya Bibele ya Swivuriso hi xikombiso yi hlamusela jaha “leri pfumalaka ku twisisa” leri kokiwaka mahlo hi yindlu ya nghwavava. (Swivuriso 7:7, Reference Bible, nhlamuselo ya le hansi) Kutani nghwavava yi endla yini? “Kumbe a yima miṭenḍeleni, kumbe riv̌aleni, a etlelela makhumbini hikwawo. A ṅwi khoma.” (Swivuriso 7:8-13) Eminkarhini ya manguva lawa hambi ku ri tluka leri gandlisiweke ‘ri rindzela ku khoma’ vantshwa. Hambi swi ri tano, Bibele ya tsundzuxa: “Mbilu ya wena yi nga hambukeli ndleleni ya yoloyi, u nga lahlekeli mintileni ya yena.”—Swivuriso 7:25.

I Mani Mukriste Wo “Antswa”?

“Ku nga khathariseki xiboho lexi Mukriste a xi endlaka, xa ku va socha, kumbe xa ku ala hikwalaho ka ripfalo, swi ta va swi hoxile eka yena ku tiveka eka xiyimo xa le henhla xa Vukriste ku tlula van’wana, kumbe hambi ku ri ku kanakana, ku va Mukriste ka lowun’wana hi mhaka ya leswi a seketelaka xiyimo lexi hambaneke ni xa yena.”

Nhlamuselo leyi yi humesiwe hi Huvo ya Evangelical Lutheran Church ya le Jarimani hi July 1989. Ha yini? Valawuri va vule leswaku va endlela ku antswisa xiyimo lexi tekiwaka hi van’wana ekerekeni xa leswaku ku ala hikwalaho ka ripfalo i “xikombiso lexinene” xa ku va Mukrsite ku tlula xa ntirho wa nyimpi. Loko hi tlhelo va pfumela leswaku Vakriste va nga herisa nyimpi hi “ku tshika vukari vona hi voxe,” Huvo ya Kereke yi hlamusele leswaku leswi swi nga ha endliwa hi ku lwisana ni vukari ni matimba ya nyimpi leswaku ku ta tisiwa ku rhula.

Ebukwini ya yena leyi nge History of Christianity, Edward Gibbon u tsale leswaku Vakriste va lembe xidzana ro sungula “va ale ku teka xiphemu xihi ni xihi eka vulawuri hinkwabyo bya vanhu kumbe nsirhelelo wa nyimpi wa mfumo,” ni leswaku “a swi nga ta koteka leswaku Vakriste, handle ko ala ntirho lowo kwetsima swinene, va amukela xikhundla xa masocha, vamajisitarata kumbe xa tihosana.”

Hikwalaho, mphikamakaneta a hi leswaku i mani la nga Mukriste wo “antswa” kambe hi loko munhu la landzelelaka xiendlo xo hambana ni Vukriste byo sungula a ri Mukriste hakunene. Pawulo u tsarile: “Hikuv̌a hambi hi famba hi nyama, a hi lwi hi mukhuv̌a wa nyama. Hikuv̌a matlhari ya hina a hi ya nyama.”—2 Vakorinto 10:3, 4, BX.