“Yindlu Leyi I Ya Wena”
“YINDLU leyi i ya wena—eka yona hi engeterile.” Vona ku faneleka ka marito lawa lama engeteleke eka mimpimanyeto ya lava va nga ha ku hetaka malembe mambirhi ya ntirho wo tika wa le hofisini ya rhavi ra Australia ra Sosayiti ya Watch Tower! Marito lawa a ya kongomisiwa eka Yehova Xikwembu, naswona a ya ri xiphemu xa risimu leri vumberiweke xiendlakalo xo hlawuleka. I xiendlakalo xihi? Ku nyikeriwa ka swiengetelo leswintshwa swa kaya ra Bethele na fektri.
Ku Engetela Hi Xihatla Swonghasi?
Leswi hlamarisaka, ku nga si hundza malembe ya nkombo, ku nyikeriwa loku fanaka ku humelerile eka muako lowuntshwa wa Bethele hi nkarhi wolowo eIngleburn, edzonga-vupela-dyambu bya ndzilakana wa Sydney, Australia. Ha yini ku engetela kun’wana a ku laveka hi xihatla swonghasi?
Hikuva nhlayo ya Timbhoni eAustralia yi kule ku suka eka leti nge hansi ka 32 000 hi 1981 ku ya eka nhlohlorhi ya 51 152 hi October 1989, naswona sweswo swi endle mfanelo yo kurisa vatirhi va Bethele. Nakambe, a ku ri na ku engeteleka lokukulu eka nhlayo ya tibuku leti Australia yi ti rhumeleke eka marhavi man’wana. Sweswi, Australia ri humesa tibuku hi tindzimi to hambana-hambana ta 37 ku anerisa swilaveko swa Fiji, Indonesia, Papua New Guinea, New Caledonia, New Zealand, Solomon Islands, Tahiti, Vanuatu, Niue, Vupela-dyambu bya Samoa, Tonga, Tuvalu, na Wallis Islands kun’we na Australia. Hikwalaho, ndyangu wa Bethele wu kule hi xihatla ku fika eka swirho swa 164.
Ku rhurhela ndyangu lowu wu kulaka, eku sunguleni ka 1987 ku engeteriwa ka hofisi ya swithezi swinharhu ku hetiwile, ku nyikela ndhawu leyi lavekaka swinene leyi engetelekeke ya hofisi. Endzhaku, Huvo leyi Fumaka yi amukele ku akiwa ka xiengetelo xa fektri ya swithezi swinharhu ni ku kurisiwa ka ndhawu yo tshama eka yona ya swithezi swa ntlhanu. Hi January 1988 ntirho wu sungurile eka xiengetelo lexintshwa xa fektri, leswi a swi ta nyikela ndhawu yin’wana ya le hansi ya 3 600 wa swikwere mitara. Tin’hweti ti nga ri tingani endzhakunyana, ntirho wu sungurile eku engeteleni ka ndhawu yo tshama eka yona, leyi a yi ta nyikela tikamara leti engetelekeke to etlela eka tona ta 51.
Ku Tinyikela Ni Ku Nyikela Ko Tirhandzela
Swirhambo swi rhumeriwile emabandlheni ya tiko hinkwaro ku rhamba vatinyiketeri lava nga vaka xiphemu xa “ndyangu wa vaaki” ku ringana malembe mambirhi. Nhlamulo a yi hlamarisa, naswona vatinyiketeri lava nga ni vutshila va hlamule hi xihatla. Ku tlula tifomo ta xikombelo ta 700 leti hambaneke ti amukeriwile, naswona hi nkarhi wa ku aka, ntsengo wa vatinyiketeri va 270 va tile va ta tirha eka muako hi nkarhi lowu sukelaka eka mavhiki mambirhi ku ya kwalomu ka malembe mambirhi.
Mbhoni yin’wana a yi ri na bindzu ro tleketla misava etikweni ra le n’walungwini ka Queensland. U xavise xiphemu xa bindzu ra yena, kutani yena ni nsati wa yena va ve xiphemu xa ndyangu wa vaaki ku sukela emasungulweni ya wona. U xave gandaganda leyikulu yo cela leyi fambaka hi tinketana kutani u pfunete swinene eku lunghiseni ka ndhawu a nga lavi nchumu eka Sosayiti. Loko ntirho wo lunghisa ndhawu wu herile, u xavise muchini kutani a tshama leswaku a tirha etindhawini tin’wana ta laha ku akiwaka kona. Lexi i xikombiso xin’we ntsena xa moya lowunene, wo pfumala vutianakanyi lexi kombisiweke entirhweni hinkwawo.
Timbhoni ti nyikele ku tirhisiwa ka tilori to pompa khonkhriti ku chela khonkhriti leyi lavekaka ya 3 300 wa tikhubiki mitara eka tifiloro ta nhungu eka miako mimbirhi. Van’wana va nyikele swiaki leswi a swi laveka eka mathangi ya mati ya khonkhriti ya tilitara ta 22 000, naswona Timbhoni leti a ti tirha efektri ti endle matshalatshala ya tona yo aka mathangi.
Kavula, a hi hinkwavo vatinyiketeri lava a va ri na vutshila. Entiyisweni, majaha yo tala ya dyondze vutshila lebyintshwa kona kwale ntirhweni. Vo talanyana va ve vaaki lavanene tanihi leswi va pfuneteke ku veketela hafu ya miliyoni ya switina leswi a swi laveka eka muako. Van’wana va dyondze ku vekela tithayili ta khumbi ni filoro, naswona hi mavhiki ma nga ri mangani ntsena, makwerhu un’wana wa xisati u ve ni vutshila swinene eku vekeleni ka phepha ra khumbi.
Siku Ro Nyiketela
Siku ro nyiketela, Mugqivela, November 25, 1989, ri tlhave kahle naswona ku ri hava mapapa—siku leri sasekeke ra le ku heleni ka ximun’wana. Levhele ya vumbirhi ya xiengetelo lexintshwa xa fektri yi basisiwile ku vumba holo leyikulu ya nongonoko wa ku nyiketela. Thelevhixini leyi khomaka ekusuhi ntsena a yi nghenisiwe ni le swiyengeni swa tifiloro letin’wana timbirhi ta fektri ni le filorweni ya vurhumeri, holo ya Bethele, ni kamara ro dyela eka rona ra Bethele. Leswi swi pfumelele vutshamo lebyinene bya vanhu vo tlula 3 000.
Hikwalaho ka leswi ndhawu a yi hikiwile, a ku rhambiwe ntsena lava va khuvuriweke ku ringana kwalomu ka 40 wa malembe leswaku va va kona, kun’we ni vaendzi lava rhambiweke va Bethele ni mindyangu ya vaaki. Swo timula mikolo a swi kumeka ni mixo, naswona swakudya leswi nandzihaka swi nyikeriwile ni nhlikanhi. Hi 9:00 a.m., nhlangano wa lembe na lembe wa Sosayiti ya Watchtower ya le Australia wu khomiwile, naswona swirho hinkwaswo swa 21 swa nhlangano wa Australia swi ve kona. Endzhaku ka loko vuxokoxoko lebyi fanelaka lebyi nga enawini byi khathaleriwile, van’wana va rhambiwile eka nhlangano, naswona hinkwavo a va tsakile ku yingisela nkulumo leyi a yi nyikeriwa hi Theodore Jaracz wa Huvo leyi Fumaka.
Hi 1:45 p.m., 15 wa timinete ta vuyimbeleri bya Mfumo ti sungule nongonoko wa ku nyiketela. Vayingiseri a va tsakile ku twa swiviko, switori swo tsakisa, mintokoto ni tinhlamuselo leti nyikeriweke hi swirho swinharhu swa Huvo leyi Fumaka leswi a swi ri kona. Eka swona, Carey Barber na Daniel Sydlik a ku ri riendzo ra vona ro sungula eka tiko rero. Makwerhu Barber u vulavule hi nhloko-mhaka leyi a yi ku “Ku Tshovela I Makumu Ya Nguva,” loko Makwerhu Sydlik a ve ni xihloko lexi a xi ku “Ku Katekile Vanhu Lava Yehova A Nga Xikwembu Xa Vona.” Makwerhu Jaracz loyi a a tirhela rhavi ra Australia tanihi mulanguteri wa marhavi, u nyikele nkulumo yo nyiketela.
Xivumbeko lexi tsakisaka xa nongonoko a ku ri ku yimbeleriwa ka risimu ra tindzimana ta mune emahlweni ka nkulumo yo nyiketela. Xi sekeriwe eka marito ya Esaya eka Esaya 60:22, xihloko xa risimu a xi ku “Lontsongo U Va Khume Ra Madzana.” Hi ku yimbelela, ku nkhensa ku phofuriwile eka Yehova leswi vatinyiketeri vo tala lava swi lavaka va veke na lunghelo ro engetela ‘yindlu ya yena’ eka xiphemu lexi xa nsimu ya misava hinkwayo.
[Swifaniso leswi nga eka tluka 15]
Xiengetelo lexintshwa eka vugandliselo bya Watch Tower eIngleburn, N.S.W., Australia
C. Barber
T. Jaracz
D. Sydlik