“Swiletelo Swo Kurisa N’wana La Tsakeke, La Humelelaka”

EHANSI ka xihloko lexi, magazini lowu nge Medical Aspects of Human Sexuality wu humese xihloko lexi eka xona Dr. Irene Jakab, profesa wa le Yunivhesiti wa ntivo-miehleketo, a hlamuselaka leswi a voneke swi ri swa nkoka loko n’wana a ta kurisiwa a va munhu la humelelaka. Exikarhi ka tinxaka-xaka ta “swiletelo” swa yena a ku ri ni xilaveko xa vatswari xo rhandza n’wana wa vona, va n’wi letela leswi swi nga swinene ni leswi hoxeke, ni ku n’wi dyondzisa ku endla swiboho. U vone onge “swiletelo” entiyisweni a swi fanelanga swi katsa ku hlundzuka ka xihatla etlhelweni ra vatswari, ku langutela ku hetiseka, ku vilela ngopfu kumbe ku pfumelela vutilawuri.

“Swiletelo” swa Dr. Jakab swa twala hi mpimo wo karhi. Entiyisweni, magidi ya malembe lama hundzeke, Bibele yi nyikele xitsundzuxo lexi fanaka eka vatswari. (Hi xikombiso, vona Swivuriso 4:1; 13:24; 22:6; Vakolosa 3:21.) Hambi swi ri tano, Bibele yi katsa swin’wana leswi profesa Jakab a swi tluleke: Nkoka wo dyondzisa vana ku rhandza Muvumbi wa vona ni ku tolovelana ni Rito ra yena. Muapostola Pawulo u tsarile: “Na n’wina vatatana, mi nga dyisi vana va n’wina embitsi, kambe mi va kurisa, hi ku ya hi ku laya ni ku va dyondzisa [ta Yehova].”—Vaefesa 6:4; Deuteronoma 6:4-7.

Handle ka vuleteri byo tano, vana va nga ha kula kahle va ri hava nsirhelelo lowunene. Vuyelo byi nga ha va lebyi nga ni khombo emisaveni leyi ya mahanyelo yo biha leyi thyakeke.