Mahanyelo Lama Kwetsimisaka Dyondzo Ya Xikwembu

Sweswinyana, vafambisi va khampani eCaracas, Venezuela, va tsale papila ri ya eka vakulu ni malandza ya vutirheli eka bandlha ra le kusuhi ra Timbhoni ta Yehova. Eka rona va tsale va ku: “Hi amukele tinhlamuselo letinene ngopfu mayelana ni vanhu lava nga evukhongerini bya n’wina leti khumbaka langutelo ra vona ra vutihlamuleri ni ku tshembeka. Hi xona xivangelo xa leswaku hi mi tshinelela sweswi. Hikwalaho ka ku pfumala ka hina vatirhi sweswi, hi xihatla hi lava vanhu vambirhi ku pfala swivandla leswi: un’wana u ta va muchayeri kutani un’wana u ta va mufambisi wa yindlu ya nhundzu ya hina. Hi nga tlangela swinene rungula rin’wana ni rin’wana leri mi nga ri nyikelaka mayelana ni un’wana ebandlheni ra n’wina kumbe rin’wana ra le kusuhi. Hakunene a hi swi tsakeli ku thola vatirhi lava va nga riki Timbhoni. Mi komberiwa ku hi tivisa hambi a nga ri kona la kumekaka, tanihi leswi hi nga ta rindzela nhlamulo ya n’wina hi nga si endla xiboho xin’wana ni xin’wana.”

Endzhaku ko kuma papila ehansi ka rivanti ra Holo ya Mfumo, un’wana wa vakulu va bandlha u endzele n’wini wa khampani loyi ku vulavuriwaka hi yena. N’wini wa khampani u tshame a tirhisana ni Timbhoni ta Yehova hi malembe ya 15 naswona u tsundzuka a nga vanga ni swiphiqo leswikulu ni vathoriwa va yena va Timbhoni. U kombetela eka vona tanihi vatirhi lava tinyiketeleke, lava byarhaka vutihlamuleri, vo tshembeka ni lava gingiritekaka. Kutani u engetile: “Ndza swi tiva leswaku a mi pfumeleli lava endlaka swo biha, naswona ma va tsema. Sweswo swi komba leswaku bandlha ra n’wina a ri lavi ku va ni ntirhisano ni vanhu vo tano.”

Mahanyelo yo tano ya kwetsimisa dyondzo ya Xikwembu. (Tito 2:10) I vuyelo bya ku navela ka ntiyiso ka ku namarhela swinene eka misinya ya milawu ya mahanyelo leswi andlariweke eBibeleni.