Xiviko Xa Vahuweleri Va Mfumo

Yehova U Nyikela Mpfuno

SWESWINYANA, Timbhoni ta Yehova eAfrika Dzonga ti amukele xitiviso xa khombo lerikulu ra vamakwavo va vona va moya etikweni ra le kusuhi laha ntirho wa vona wo chumayela wu yirisiweke. Ti vikeriwe leswaku hikwalaho ka dyandza lerikulu, vamakwavo a va hanya hi ku dya timitsu to karhi. Nakambe a va pfumala swiambalo leswi faneleke, leswi vangeleke Timbhoni tin’wana ti tsana eku hlanganyeleni evutirhelini bya nsimu.

Hi ku hatlisa vamakwerhu eAfrika Dzonga va hlamurile. Xirhambo xi twarisiwile emabandlheni ya kwalaho endhawini ya Joni mayelana ni xilaveko xa swiambalo. Hi masikunyana, tithani tinharhu ta swiambalo ti hlengeletiwile. Kutani swilo swi hleriwe hi vatirhi vo tirhandzela. Malunghiselelo yo rhumela 3 wa tithani ta tinyawa, thani yin’we ya mafurha, thani yin’we ya swisibi na 17 wa tithani ta mugayo ma endliwile. Loko khampani ya mugayo yi twe hi ta khombo ra Timbhoni etikweni leri nga ni dyandza, yi nyikele ku tlula thani ya swakudya leswi lavekaka ngopfu.

Hi Musumbunuku, April 16, 1990, lori leyi a yi ri ni ndzhwalo wa 25 wa tithani ta mimphakelo yo phalala yi suke eAfrika Dzonga eka riendzo ra yona ra 5 500 wa tikhilomitara. Kambe sweswi a ku fanele ku kumiwa mpfumelelo eka valawuri leswaku ku fambisiwa mimphakelo leyi hi le tikweni ra vona leri nga ni nyimpi.

Valawuri lava hlawuriweke va vule leswaku hambi leswi Timbhoni ta Yehova a ti nga amukeriwi etikweni ra vona, a va byi vona kahle vukona bya tona. A va nga ta alela ku rhumela mimphakelo yo phalala eka vamakwerhu. Ku nyikiwe mpfumelelo. Mapapila lama faneleke ma humesiwile, kutani hi Ravuntlhanu, April 20, Timbhoni ti tsemakanya ndzilakana handle ka xiphiqo. Hambi swi ri tano, ti hlangane ni ku pfariwa ka mapato loku tlulaka 30, laha hakanyingi a ti komberiwa ku humesa mapapila ya tona. Hi le nkarhini wolowo ntsena laha ti xiyeke ndlela leyi mapapila wolawo a ma ri ya nkoka ha yona.

Endzhaku ka loko ti fambe kwalomu ka 140 wa tikhilomitara eka tiko rero, ku ya emahlweni ka tona ku siveriwile hi nambu lowukulu lowu khulukaka. Buloho ro sungula a ri onhiwile, naswona xibulohwana xa nkarhinyana lexi a xi ri endhawini ya rona a xi nga fanelekelanga ku tirhisiwa hi lori leyikulu. Hambi swi ri tano, va kume leswaku movha lowuntsongo lowu a wu famba na lori a wu ta pela buloho leri khulukaka handle ko karhateka. Ku kunguhatiwe ku avana hi mintlawa yimbirhi. Nxaxa wa ntlawa wun’we wu endliwile enambyeni lowu khulukaka wa ntlawa wun’we, loko ntlawa lowun’wana wu ya emahlweni ni ndlela ya wona ku ya hlangana ni vamakwerhu kwalomu ka 260 wa tikhilomitara etlhelweni ra n’walungu. A va tsakile swinene loko eku heteleleni va hlangane ni vamakwavo! A va nga ta tshika ku n’wayitela, va angarhana ni ku khomana hi mavoko. Hi ku hatlisa tilori timbirhi ta kwalaho a ti ri endleleni ya tona ku ya hlangana ni ntlawa lowun’wana wa vamakwerhu lava rindzeke enambyeni. Kwalaho, mimphakelo yo phalala yi susiwe eka lori leyikulu yi ya eka letintsongo.

Swiviko leswi amukeriweke swi kombisa ku nkhensa lokukulu ka lunghiselelo ra Yehova ra mpfuno wa leswi vonakaka. Hambi swi ri tano, ku nga khathariseki khombo ra vona ra nyama, ku rilela swakudya swa moya ka vamakwerhu a ku ri kukulu swinene. Bandlha rin’wana ri kume Xihondzo xo Rindza xin’we ntsena, lexi a xi fanele ku koperiwa ndyangu wun’wana ni wun’wana. Hi ku pfuniwa hi Yehova, sweswi malunghiselelo ma ya emahlweni leswaku ku phameriwa nkhuluko lowu tiyeke wa swakudya swa moya eka vamakwerhu etikweni rero.