Masimu Ma Vupfele Ku Tshoveriwa Le Brazil

“TLAKUSANI mahlo mi languta masimu: Ma vupfele ku tshoveriwa. Ni sweswi, la tshovelaka ú kuma hakelo, kutani ú hlengeleta mavele, a ma hlengeletela ku kuma vutomi lebyi nga heriki.” (Yohane 4:35, 36) Marito wolawo ya vuprofeta ya Yesu Kriste i ya ntiyiso namuntlha etindhawini ta le kule ta tiko-nkulu ra Brazil le Amerika Dzonga.

Hi malembe yo talanyana Timbhoni ta Yehova eBrazil a ti ri karhi ti tiphina hi ku engeteleka lokunene. Hi April 1991, nhlohlorhi ya vatshoveri va Mfumo va 308 973 va fambise tidyondzo ta le kaya ta Bibele ta 401 574. Hi March 30, 1991, ntsengo wa vanhu va 897 739 va hlengeletanile ku ta tsundzuka rifu ra Yesu, loyi a sunguleke ntirho wo tshovela.

Ku nga khathariseki mimbuyelo yo tano leyinene, xiphemu xa nsimu xa ha yimele ku tshoveriwa. Vanhu vo tlula ntlhanu wa timiliyoni va tshama etindhawini ta Brazil laha ntirho wo chumayela wu nga endliwiki kona hi Timbhoni ta Yehova. Xana ku endliwa yini leswaku ku engeteriwa ntshovelo etindhawini leti?

Maphayona Ma Hlanganyela eNtshovelweni

Enkarhini wa sweswinyana wa tin’hweti ta tsevu, hofisi ya rhavi ya Sosayiti ya Watch Tower eBrazil yi rhumele vahuweleri va Mfumo va nkarhi hinkwawo—maphayona yo hlawuleka ya nkarhinyana ya 100 ni maphayona ya nkarhi hinkwawo ya 97—eka madoroba ya 97, ngopfu-ngopfu eka xiphemu lexi nga ni vaaki vo tala evuxeni bya tiko rero. Vahuweleri va Mfumo lava humaka eka mabandlha yo hambana-hambana na vona va tinyiketele ku tirha eka tindhawu leti swa nkarhinyana. Ku nga khathariseki swiphiqo leswi a va fanele ku langutana na swona, vuyelo byi ve lebyi tsakisaka.

Hi xikombiso, le São João da Ponte, etikweni ra Minas Gerais, maphayona ma endzele mudyondzisi wa vukhongeri wa xikolo xa kwalaho. Endzhaku ko twa rungula, u odele tlilasi ya yena ya khatekizimu, tikopi ta 50 ta buku leyi nge Your Youth—Getting the Best Out Of It. Mudyondzisi un’wana u byele maphayona lama fambaka: “A mi nga fanelanga mi suka, tanihi leswi mi endlaka ntirho lowunene swinene laha. Hi n’wina ntsena lava mi kotaka ku nyikela nhlamuselo leyi twalaka ya Bibele.”

A hi hinkwavo lava tsakisiweke hi ntirho lowu lowunene. Hi xikombiso, xiya papila leri humesiweke hi phepha-hungu ra kwalaho (Diário de Montes Claros) ehansi ka nhloko-mhaka ya tluka ro sungula leyi nge “Muprista A Hehliwa Ku Hlohlotela Vukari Ni Xihlawu-hlawu.” Papila ri te: “Ekerekeni, [muprista] u na mukhuva wo sandza vanhu lava landzelaka mimpambukwa ni vukhongeri byin’wana, kambe vafundhisi va kona a va nyikeli nkongomiso lowu faneleke wa Khatoliki ni wa Vukriste hi Evhangeli eka vanhu lava tshembekaka. Eka Xilalelweni, u hlasele malandza ya Timbhoni ta Yehova lama nga edorobeni, hambi leswi va nga khomiki Makhatoliki hi ndlela yo biha.” Hi ku lwisana ni nkaneto wo tano, mutsari (mufundhisi) wa xihloko lexi u ve kona eka nkulumo ya Bibele leyi nyikeriweke hi maphayona naswona u te ni van’wana lava tsakelaka. Hinkwavo va wu tsakerile nhlangano.

Vamakwerhu va mune lava humaka eFortaleza va fambe hi xihaha-mpfhuka va ya eXihlaleni xa Fernando de Noronha, 400 wa tikhilomitara ku suka etiko-nkulu. Vaaki va le xihlaleni va 1 500 a va nga kumanga vumbhoni lebyinene emalembeni yo tlula 15. Hi masiku ya khume, vamakwerhu va fambise tibuku ta 50 ni timagazini ta 245 ni tibroxara, naswona va sungule tidyondzo ta le kaya ta Bibele ta 15. Vanhu va khume-mbirhi va ve kona eka Xitsundzuxo xa rifu ra Kriste, lexi veke kona enkarhini wa ku endza ka vona. Maphayona ma tshemba leswaku hi mpfuno wa Yehova ntirho wu ta simekiwa kwalaho hi laha ku tiyeke hi xihatla. Vamakwerhu van’wana va kunguhate ku rhurhela exihlaleni.

Nkucetelo Wa Vafundhisi Wu Khumba Ntshovelo

Ntlawa wa vahuweleri va Mfumo wa Bandlha ra Arpoador le Rio de Janeiro wu tinyiketele ku heta mavhiki mambirhi wu chumayela etindhawini to tala etikweni ra Minas Gerais, mpfhuka wa kwalomu ka 200 wa tikhilomitara. Lexi va tsakiseke va kume vanhu va kwalaho va ri ni malwandla ni musa swinene. Vavanuna a va ri na mukhuva wo tlakula swihuku swa vona nkarhi wun’wana ni wun’wana loko Xikwembu kumbe vito ra xona, Yehova, ri vitaniwa. Hambi swi ri tano, hi ku xixima ka vona Xikwembu, a a va kuceteriwa hi ku olova hi vafundhisi.

Eka doroba rin’wana muprista u byele vanhu leswaku va nga ti yingiseli Timbhoni ta Yehova kumbe ku ya eka nhlangano lowu a va kunguhata ku va na wona. Nakambe u hlele ku va ni Xilalelo xo hlawuleka hi nkarhi lowu fanaka ni wa nhlangano wolowo naswona Xilalelo xi haxiwe hi rito lerikulu hi ku tirhisa xikurisa rito ehandle ka kereke ya yena. Hambi swi ri tano, ku nga khathariseki matshalatshala ya yena, vaaka-tiko va kwalaho va 29 va yile enhlanganweni, ku tlhandlekela eka vaendzi.

Doroba leri nga le kusuhi a ri hambanile hi ku helela. Kwalaho muprista u byele vanhu ku yingisa Timbhoni loko ti endza. Vuyelo, 168 va ve kona eka nhlangano wo sungula. Endzhakunyana, u va byele leswaku va nyikela nyingiso eka ndlela leyi Timbhoni ta Yehova ti endlaka Xitsundzuxo ha yona, hikuva hi laha a vuleke ha kona, “va swi endla hi ndlela leyi faneleke.” Emavhikini mambirhi ya ntirho wo chumayela hi Mfumo endhawini yoleyo, tibuku ta 1 014 na timagazini ta 1 052 ni tibroxara swi fambisiwile.

Matshalatshala Lama Hambetaka Ma Tise Mikateko

Endzhaku ka n’hweti vahuweleri va Mfumo va 34 va tlhelele endzhaku ku ya fambisa tidyondzo ta Bibele leti sunguriweke eka riendzo ro sungula. Nkulu wa Mukriste la rhangelaka u tsarile a ku: “A a swi tsakisa ku vona vanhu lava tsakelaka va hi amukela hi ku nkhensa na hi mihloti ya ntsako ematihlweni ya vona.” Makwerhu un’wana wa xisati u tsundzuka leswaku wansati un’wana u tshinelele yena ni Timbhoni tin’wana endhawini yo dyela eka yona “a kombela, a ri ni mihloti emahlweni ya yena, leswaku hi ya dyondza na yena.” Wansati un’wana u dyondze minkarhi yinharhu evhikini loko Timbhoni ti ri kwalaho. Nkarhi wun’wana ni wun’wana, a a lunghiselela dyondzo ya yena naswona a a rindzela dyondzo. Wansati u vule leswaku u sungule ku khongela eka Xikwembu xa ntiyiso, Yehova. U engeterile a ku, “embilwini ya mina leswi hi swona leswi nkarhi hinkwawo a ndzi swi rindzerile.”

Endzhakunyana, maphayona mambirhi ma averiwe ku khathalela ku tsakela endhawini yoleyo. Tanihi le ka lembe xidzana ro sungula C.E., “lava [faneriwaka hi] vutomi lebyi nga heriki, va pfumela.” (Mintirho 13:48) Naswona tanihi wansati wa Musamariya loyi Yesu a nyikeleke vumbhoni eka yena exihlobyeni xa Yakobo, va sungule ku vulavula ni van’wana hi leswi va swi dyondzeke. (Yohane 4:5-30) Namuntlha maphayona lawa mambirhi ma na van’wana va 6 lava tirhaka na wona, naswona avhareji ya vanhu va 20 yi va kona eka minhlangano ya vhiki na vhiki.

Hi ku tsakisiwa hi ku humelela ka ntirho lowu wo hlawuleka, vahuweleri va 29 va Bandlha ra Arpoador va ye va ya chumayela etikweni ra Mutum, kwalomu ka 500 wa tikhilomitara ku suka kwalaho. Nkulu la kongomisaka ntlawa u te: “Angulo a wu ri loku xiyekaka hakunene, vanhu vo tala va yingisele hi vukheta na hi ku tsakela swinene lerova tidyondzo ta Bibele ta 170 ti sunguriwile, naswona hi tshemba leswaku vo tala va vona va ta ya emahlweni.” Hi mavhiki mambirhi, vahuweleri va chumayele avhareji ya tiawara ta 90 un’wana ni un’wana naswona va fambise kwalomu ka tibuku ta 1 100 evanhwini. Nhlohlorhi ya 181 yi ve kona eka tinkulumo ta le rivaleni leti nyikeriweke hi vamakwerhu.

Tin’hweti ti nga ri tingani endzhaku, bandlha ri hakelele yindlu leyinene exikarhi ka Mutum ku yi tirhisa tanihi Holo ya Mfumo ni kaya ra maphayona. Xiviko xo sungula lexi rhumeriweke eka Sosayiti hi vamakwerhu vambirhi va xisati va maphayona lava averiweke kwalaho, hi ku komisa xi hlayeka hi ndlela leyi: “Leswi ku nga na tidyondzo to tala swinene leti se ti sunguriweke, hi lava maphayona lama engetelekeke. Hambi ku ri ni mpfuno wa vamakwerhu lava humaka eRio de Janeiro kan’we hi n’hweti, ntirho i wukulu. Vini va miti va kaye eka va khume lava hi vulavuleke na vona va hi kombele leswaku hi tlhela hi vuya. Nakambe hi lava mpfuno wo fambisa minhlangano.” Phayona rin’wana sweswi ri va joyinile.

Vutomi Byi Cinciwa

A a swi khutaza swinene ku vona ntiyiso wu dzima timitsu ivi wu humesa mihandzu leyinene. Munhu un’wana la tsakelaka u tsarile: “Ku kuma vutivi lebyi bya Bibele i nchumu wa nkoka swinene lowu wu tshameke wu humelela eka mina. Vutomi bya mina byi cincile, bya antswa, naswona a ndza ha swi lavi ku tirhisa swidzidzirisi. . . . Onge Yehova a nga mi hakela hikwalaho ka xin’wana ni xin’wana lexi mi ndzi endleleke xona.”

Munhu un’wana u vurile a ku: “Hakunene ndza hlamala hi ndlela leyi Yehova a pfuleke mahlo ya mina ha yona. Hambi leswi ndzi feriweke hi kokwana wa mina vhiki leri, sweswi ndzi na ntshembo wo n’wi vona nakambe. Ndzi lava ku khuvuriwa, kambe ndzi lava ku sungula ndzi lungheka kahle. Onge Yehova a nga mi katekisa hi ku ta laha mi ta hi komba ndlela yo khuma leyi yisaka evuton’wini lebyi nga heriki.” Nakambe munhu un’wana u vurile a ku: “Ndzi lava ku mi byela leswaku ndzi tshike ku dzaha n’hweti leyi nga hundza. Ndzi tsake swinene hi magazini lowu mi ndzi rhumeleke wona. A wu ri na swilo swo tala leswinene leswi ndzi pfuneke ku tshika.” Entiyisweni, ntshovelo wu nyikela xivangelo lexinene xo tsaka.

Hambi swi ri tano, mikateko yo tano a yi tanga hi ku olova. Hi xikombiso, loko wansati un’wana ni n’wana wa yena wa nhwanyana va sungule ku dyondza, mufundhisi wa kwalaho u va layile leswaku loko vo ya eminhlanganweni ya Timbhoni, u ta va hlongola ekerekeni. Hi ku honisa nxungeto, va yile eminhlanganweni. Kutani khale ka vanghana va vona va va tshika, van’wana va vona va va hehla hi leswaku va penga hikuva “Yehova yoloye” a nga humeleli eka Bibele ya Khatoliki. Tanihi leswi wansati loyi a a nga swi koti ku kuma vito ra Yehova eka Bibele ya yena ya Khatoliki, u rhambe vaakelani ku n’wi endzela hi siku ra dyondzo ya yena ni maphayona. Wansati un’wana u te ni Bibele ya yena ya Khatoliki leyi hundzuluxeriweke hi Paulinas. Loko a hlaye vito ra Xikwembu eka nhlamuselo ya le hansi eka Eksoda 6:3, u amukele dyondzo ya Bibele ekaya ra yena.

Hlanganyela Hi Xitalo eNtshovelweni

Xana ku tirha eka nsimu leyi nga tirhiwiki hi xitalo ku ve ni nkucetelo wihi eka vatirhi hi voxe? Muhuweleri un’wana wa Mfumo u vurile a ku: “Ntirho lowu wu pfune ku tiyisa ripfumelo ra hina ni vuxaka bya hina na Yehova ni ku hi pfuna ku pfuxeta swilo swa hina leswi hi swi rhangisaka.” Muhuweleri un’wana u vurile a ku: “Nkarhi wolowo wa masiku ya 14 wu engetele rirhandzu ra mina eka vamakwerhu, lava tirhaka tanihi ndyangu wun’we lowu nga ni xikongomelo xin’we: ku lavisisa vo tala lava titsongahataka. Swi ndzi endle ndzi rhandza ngopfu lava amukelaka rungula ra hina, hakanyingi va ri ni mihloti emahlweni ya vona, va kombisa torha ra xiviri ra ntiyiso. Naswona ku tlula hinkwaswo, ndzi vone rirhandzu ra Yehova hi ku hi nyika lunghelo ro n’wi tirhela.”

Nkulu la hlanganyeleke eku chumayeleni ensin’wini leyi nga tirhiwiki hi xitalo u kombise ku hambana exikarhi ka vutomi bya kwalaho ni bya le madorobeni lamakulu. U te: “A ndzi swi koti ku tshika ku ehleketa hi ndlela leyi vutomi bya vamakwerhu vo tala byi nga fuwisiwaka ha yona hi ku rhurhela eka nsimu leyi. Kahle-kahle vuhomboloki a byi kona kwalaho. Vutomi emadorobeni lamantsongo ni ya mpimo lowu ringaneleke a byi hi pfumeleli ku hanya hi mali leyintsongo ntsena kambe ni ku va ni vunghana lebyikulu ni vamakwerhu ni ku nyiketela nkarhi wo tala eka mintirho ya moya. Xana vamakwerhu lava vo tala lava tshikeke mintirho hi ku dyuhala, vantshwa lava nga ni vutihlamuleri byintsongo bya ndyangu kumbe vamakwerhu lava ntirho wa vona wu va pfumelelaka ku rhurha va nga amukela lunghelo leri ri hlawulekeke kutani va tsakisa vona vini, Yehova, ni vaakelani va vona?”

Xiviko lexi xa nsimu leyi nga tirhiwiki hi xitalo eBrazil xi kombisa leswaku masimu ma vupfele ku tshoveriwa. Hi malembe mambirhi ntsena, ntirho ensin’wini leyi wu endle mabandlha lamantshwa ni mintlawa leyi nga yoxe ya 191. Swi tele leswi swa ha faneleke ku endliwa, kambe entiyisweni Yehova u ta ya emahlweni a hi nyika mikateko tanihi leswi vahuweleri vo tala va Mfumo va hlanganyelaka entshovelweni lowu nga ni mihandzu. Xana u nga va ni xiphemu lexikulu eka wona?

[Mepe/Xifaniso lexi nga eka tluka 25]

Timbhoni leti tsakeke leti humaka eRio de Janeiro ti hlanganyela entshovelweni

[Mepe]

(Leswaku u vona rungula leri hleriweke hi ku helela, vona nkandziyiso wa kona)

BRAZIL

[Xifaniso lexi nga eka tluka 26]

Ku nyikela vumbhoni emakaya le Minas Gerais