Ku Humesiwa Ka Tibuku-nsongwa To Hetelela Ta Lwandle Leri Feke
HI September la hundzeke, xihingakanyo xa ntirho wa vadyondzi lexi tshameke makume ya malembe eku heteleleni xi tshovekile. Nkwetlembetano wa matimba exikarhi ka swichudeni hi Tibuku-nsongwa ta Lwandle leri Feke wu tikombe wu herile, hambi loko nkwetlembetano wun’wana wu nga ha va wu sungurile.
Tibuku-nsongwa ta Lwandle leri Feke ti kumiwe emabakweni ekusuhi na Lwandle leri Feke hi 1947 ni le malembeni lama landzeleke. A a ti ri ta nkoka swinene eku kombiseni ka ku pakanisa loku lavekaka, ka Matsalwa ya Xiheveru ni ku hlamusela swiyimo swa vukhongeri ePalestina loko Yesu a ha ri emisaveni. (Esaya 40:8) Hambi loko tibuku tin’wana ti hangalasiwe hi ku hatlisa, hi 1991, kwalomu ka tibuku ta 400 a a ti nga si hangalasiwa naswona a a ti nga kumeki eka vadyondzi vo tala. Vo tala va titwe hi laha Profesa Ben Zion Wacholder a titweke ha kona, a a “karhatekile hi ku vona leswaku hi mpimo lowu nga kona wa ku hangalasa, hinkwerhu hi ta va hi file loko tibuku leti heleleke ta matsalwa ya Lwandle leri Feke ti hangalasiwa emisaveni.”
Kambe xiyimo xexo xi cincile hi September la hundzeke. Xo sungula, Profesa Wacholder ni munghana wakwe, Martin Abegg, va tivise leswaku va tirhise khomphyuta hi vutlhari leswaku va tlhela va humesa matsalwa lawa, lama rindziwaka swinene. Kutani, Layiburari ya Huntington le San Marino, California, U.S.A, yi tivise leswaku yi na swifaniso swa matsalwa yo sungula naswona yi ta swi endla swi kumeka eka vadyondzi lava tivekaka handle ka nsivelo. Tikopi to hlayanyana ta tibuku-nsongwa ti andzisiwile leswaku va tiyiseka hi vuhlayiseki bya tona. Tisete ta swifaniso ti hlayisiwile eka tindhawu to hambana-hambana, naswona eku heteleleni yin’wana yi kumeke yi ri eLayiburari ya Huntington.
Mudyondzi un’wana loko a vulavula hi ku cinca loku ka swiendlakalo u te ‘swichudeni swi endle leswi fanaka ni ku mbindzimuxa Rirhangu ra Berlin.’ Vahleri lava hlawuriweke va vula leswaku ku hangalasiwa ka matsalwa hi khomphyutara ni ku humesiwa ka swifaniso i ‘vukhamba.’ Kumbexana, nkanerisano hi tidyondzo wa ha ta teka malembe. Sweswi, swi tikomba onge vadyondzi lava engetelekeke eku heteleleni va ta swi kota ku kambisisa Tibuku-nsongwa hinkwato ta Lwandle leri Feke.
[Xifaniso lexi nga eka tluka 32]
Xifaniso xa nhlamuselo ya Habakuk, yin’wana ya Tibuku-nsongwa ta Lwandle leri Feke