Mphikamakaneta Yo Chumayela Eka Rin’wana Ra Mahlaluko Lamakulu Swinene eMisaveni

ROTTERDAM, leri kumekaka laha nambu wa Rhine lowu tirhisiwaka swinene eYuropa, wu hlanganaka ni Lwandle ra le N’walungwini kona, ri hlawulekile swinene hi mhaka ya leswi ri nga rin’wana ra mahlaluko ya lwandle, lamakulu swinene emisaveni. Leswi ri amukelaka swikepe swa tikhampani ta kwalomu ka 500, Rotterdam hi ku kongoma ri hlangana ni tindhawu to tlula 800 emisaveni hinkwayo. I hlaluko ra matiko hinkwawo hakunene.

Hambi swi ri tano, hlaluko leri ra malembe ya 650 hi vukhale ra Madachi a hi laha ku hlanganaka swikepe ntsena. Nakambe i ndhawu leyi vanhu va hlanganaka eka yona. Vatluti vo tala va fika vusiku ni nhlikanhi va huma ematlhelweni hinkwawo ya misava. Timbhoni ta Yehova ta le Netherlands ti va vonile vatluti lava. Ku fana ni Timbhoni ta matiko man’wana, va lava tindlela to chumayela timhaka letinene, leti tlulaka hinkwato emisaveni—ta leswaku Mfumo wa Xikwembu hi ku hatlisa wu ta hundzula misava yi va Paradeyisi—eka vanhu va tinxaka hinkwato, ku katsa ni vatluti.—Daniel 2:44; Luka 23:43; 1 Timotiya 4:10.

“Xiavelo Xa Vurhumiwa Hi Ndlela Leyi Hambaneke”

Malembe ma nga ri mangani lama hundzeke, Sosayiti ya Watch Tower le Netherlands yi kombele vachumayeri kumbe maphayona ya tsevu ya nkarhi hinkwawo, leswaku ma famba ma tirha exikepeni xin’wana ni xin’wana ehlalukweni hinkwaro ra le Rotterdam. Maphayona ma amukele lunghelo rero. Ma hlengelete vuxokoxoko eka valawuri va hlaluko, ma valanga hlaluko, kutani hi ku hatlisa ma vona leswaku a a ma ri na xiavelo lexi tlhontlhaka.

“Swi fana ni ku hetisisa xiavelo xa vurhumiwa hi ndlela leyi hambaneke,” ku vula Meinard, loyi a langutelaka ntirho wo chumayela ehlalukweni. U vula yini? “Hi ntolovelo murhumiwa u teka riendzo ro leha a ya evanhwini, kambe eka hina vanhu va teka riendzo ro leha va ta eka hina.” Wa engetela, “nsimu leyi hi chumayelaka eka yona onge hi yona ntsena leyi nga ni vanhu va tinxaka hinkwato.” Buku ya lembe leyi nge Rotterdam Europoort ya 1985 yi vule leswaku hi 1983, lembe leri maphayona ma sunguleke ntirho lowu wo hlawuleka ha rona, hlaluko ra Rotterdam ri amukele swibya swa 30 820 leswi fambaka elwandle swo huma ematikweni yo hambana ya 71. I swa matiko hinkwawo hakunene!

Hi ndlela leyi fanelekaka, “varhumiwa va le hlalukweni”—hi laha hi ku hatlisa vatluti va sunguleke ku vitana maphayona ha kona—na vona va ni xandla eka mpfangano lowu wa matiko hinkwawo. Geert, Peter na Karin nsati wakwe, i Madachi; Daniël na Meinard va huma hi le Indonesia; kasi Solomon i Muetiyopiya. Leswi va humaka eYuropa, Asia ni le Afrika, va tiva tindzimi ta nhungu, kambe leswaku va humelela eka ntirho lowu, a a va ri ni swihinga swin’wana leswi a va fanele ku swi hlula.

“Kereke Ya Swikanyakanya”

“A wu nge swi pfuketani u khandziya platifomo, u khandziya buloho ro nghena exikepeni, kutani u khandziya xikepe,” ku vula Peter wa malembe ya 32 hi vukhale, khale ka mutluti. “U fanele u va ni mimpfumelelo ya kona.” Hi leswaku mimpfumelelo yo nghena eplatifomo ni mimpfumelelo yo khandziya swikepe. Peter u tsundzuka leswi: “A swi karhata swi tlhela swi dya nkarhi, kambe endzhaku ko kuma mimpfumelelo ya nhungu yi helerile swin’we ni swifaniso ni swigandlo swa le nawini, a hi tiyimisele ku tirha hi matimba hinkwawo.” Va ave tikhilomitara ta 37 ta tiplatifomo ta hlaluko ti va swiyenge swinharhu, yin’wana ni yin’wana yi tirhiwa hi maphayona mambirhi.

Kambe, u swi kotisa ku yini ku tirhana ni tindzimi ta ntsandza-vahlayi leti vulavuriwaka hi vatluti vo huma ematikweni yo tala swonghasi? Hambi leswi maphayona lawa a a ma ri na tibuku ta Bibele hi tindzimi ta 30 va tlhela va rhwala to tala swinene hi laha va kotaka ha kona hi swikanyakanya swa vona, a a ti nga eneli. “A wu swi koti kahle ku tiva leswaku hi tihi tindzimi leti u nga ta ti lava,” ku tsundzuka Solomon wa malembe ya 30 a ri karhi a n’wayitela. “Swi tala ku endleka leswaku vatluti va lava tibuku hi ririmi leri u nga riki na rona, ivi va ku byela leswaku xikepe xa vona xi ta suka endzhaku ka kwalomu ka tiawara tinharhu.” Hi ku nga lavi ku khomisa vatluti tingana, un’wana wa maphayona a a tsutsuma, a ya teka tibuku leti lavekaka, a tlhela hi ku tsutsuma, ivi a ti nyika vatluti lava tilanguteleke hi mahlo-ngati. Peter u ri: “Loko xiphiqo lexi fanaka xi humelela loko hi chumayela etindhawini leti swi nga hi tekaka tiawara tinharhu hi xikanyakanya,” a swi va erivaleni leswaku a hi fanele hi kuma ndlela yin’wana yo tlhantlha xiphiqo lexi.”

Siku rin’wana Timbhoni leti tshamaka ekusuhi ni hlaluko ti hlamarise maphayona hi tigolonyi timbirhi leti kokiwaka hi xikanyakanya, yin’wana ni yin’wana a yi ringana ni bavhu ro hlantswela eka yona. Maphayona ma tate tigolonyi hi tibuku hi tindzimi hinkwato leti va nga na tona, ivi va ti khweketa eka swikanyakanya swa vona, va kongoma ehlalukweni. Hi ku hatlisa tigolonyi leti ti toloveleki. Un’wana wa maphayona u ri: “A hi voniwa ha tona. Loko muhlayisi wa nyangwa a hi vona hi ta, a a pfula nyangwa, a hi tlakusela voko leswaku hi nghena, ivi a huwelela a ku: ‘Hi yoleyo kereke ya swikanyakanya!’” Minkarhi yin’wana, loko murindzi a vona “kereke ya swikanyakanya” yi ta eka yena a a pfula nyangwa ivi a huwelela: “Vambirhi vo huma ePoland ni Muchayina un’we!” Mimpfuno yo tano yi pfuna maphayona leswaku ma ya ni tibuku ta tindzimi leti faneleke. Kambe ma fanele ma ya hi nkarhi lowu faneleke. Hikwalaho ka yini?

Ku Endza Hi Nkarhi Lowu Faneleke Ni Rungula Leri Nga eNkarhini

Maphayona ma nga vulavula ni vapfhumba ntsena loko ku ri nkarhi wa vona wo nwa kofi nimixo kumbe nindzhenga, kumbe hi nkarhi wa swakudya swa ni nhlikanhi. Kambe, lava swekaka va ni minkarhi ya vona yo tirha, kaputeni ni vatirhi van’wana va kumeka siku hinkwaro. Ku tlula kwalaho, maphayona ma twe leswaku swikepe swa le Britain leswi bohiweke le Rotterdam a swi tirhisa nkarhi wa le Britain (lowu hambanaka ni nkarhi wa Madachi hi awara), lerova mintlawa ya xona a a yi ya ekamareni ra swakudya loko mintlawa leyi nga riki ya le Britain yi tlhelela entirhweni. Kavula, phayona ra le hlalukweni, ri fanele ri va ni xikomba-nkarhi lexi tshembekaka.

Kambe, xana vatluti va swi tsakela ku tirhisa nkarhi wa vona wo wisa leswaku va va ni mabulo ya Bibele? “Kahle-kahle, ndzi va kuma va ri ni mianakanyo leyinene eka rungula ra Mfumo,” ku vula Geert wa malembe ya 31 hi vukhale. “Kumbexana hi leswi va ku vonaka kahle ku tsandzeka ka tihulumendhe ta vanhu.” Hi xikombiso, vatluti van’wana va byele Geert leswaku tinhulu ta tindzoho leti va ti xixeke ta Vaetiyopiya lava sikaka a ta ha tshame kwalaho tin’hweti to karhi ku kondza va vuya, hi nkarhi wolowo tindzoho a a ti borile naswona ti hlaseriwe hi makondlo. Geert wa xiya: “A swi hlamarisi leswi vatluti vo tala va lahlekeriweke hi ntshembo eka tipolitiki. Kutani xitshembiso xa Bibele xa hulumendhe yin’we eka vanhu hinkwavo xa va tsakisa swinene.”

Peter wa seketela. “Kaputeni un’wana wa Mujarimani u vule leswaku hi malembe ya khume lama hundzeke, ntlawa wa yena a a wu ta va se wu ndzi hlongorile exikepeni, kambe namuntlha ku cinca ka swiyimo swa misava ku va endla va tsakela rungula leri ri nga enkarhini ra Bibele.” Musweki un’wana wa Mukoriya u hlamusele leswaku hi nkarhi wa nyimpi ya Iran na Iraq, xikepe lexi nga ni mathangi lexi a a tirha eka xona xi biwe hi rhokhete ivi xi tshwa le Persian Gulf. U hlambanye leswaku loko o pona u ta lava Xikwembu. U ponile. Loko maphayona ma hlangane na yena endzhakunyana le Rotterdam, u lave tibuku hinkwato ta Xikoriya leti va nga kotaka ku n’wi tisela tona.

Swikepe swo tala swi tshama masiku yo hlayanyana ehlalukweni. Leswi swi pfumelela maphayona leswaku ma tlhelela kambirhi, kanharhu kumbe minkarhi yo hlayanyana leswaku va ya emahlweni va bula na vona hi Bibele loko va chayisile entirhweni. Kambe, loko xikepe xi onhake njhini, xi nga ha tshama xi bohiwile nkarhi wo ringana mavhiki manharhu. “Sweswo i khombo eka khampani,” ku vula phayona leri n’wayitelaka, “kambe i swinene entirhweni wa hina.” Kutani ke, handle ka bulo ra Bibele leri yaka emahlweni, maphayona ma tlhela ma hlela ku kombisa nongonoko wun’wana wa ti-slide ta Sosayiti lowu nge, “Bibele—Buku Ya Rixaka Leri,” ekamareni ro dyela ka rona. Vatluti van’wana va ta ni le minhlanganweni ya Timbhoni ta Yehova, eRotterdam, leyi katsaka tindzimi to tala ta matiko mambe, Leswi swi endliwa ku kondza njhini yi lulama. Kutani Tibibele ta pfariwa. Tingole leti bohaka xikepe ta ntshunxiwa, kutani xikepe xa nyamalala ehlalukweni—kambe ku nga ri emianakanyweni ya maphayona.

Timhaka Leti Khutazaka Ta Vatluti

Hi ku tirhisa nxaxameto lowu nga eka maphepha-hungu kumbe fambiselo ra khomphyuta ra mani na mani ra le hlalukweni, maphayona ya le hlalukweni a a ma swi kota ku vona leswaku swikepe leswi va swi endzelaka swi fika rini ni leswaku swi famba rini. Loko xin’wana xa swona xi tlhela xi vuya, maphayona hi ku hatlisa ma endzela vatluti, ku ya vona leswaku ku sale ku humelela yini, endzhaku ka riendzo ra vona leri hundzeke. Mawaku timhaka to khutaza leti ambiwaka hi vatluti!

Mutluti un’wana u nyike vanghana vakwe va ntlhanu va le xikepeni tikopi ta buku leyi nge U Nga Hanya Hi Masiku aParadeyisini eMisaveni loko xikepe se xi sukile, kutani hi vutsevu bya vona va ve ni dyondzo ya Bibele. U tlhele a rhekhoda ndzima leyi vulavulaka hi vutomi bya ndyangu ekhaseteni, ivi a yi tlangisa leswaku ntlawa hinkwawo lowu nga ekamareni ro dyela wu ta vuyeriwa. Eka xikepe xin’wana, mutluti loyi a endzeleke Holo ya Mfumo ehlalukweni leri nga ekusuhi ra Antwerp, u hayeke xitiviso ekhumbini ra kamara ro dyela, lexi tsariweke hi marito lamakulu lexi nge “Holo Ya Mfumo Ya Timbhoni Ta Yehova.” Kutani a rhamba ntlawa lowu nga kwalaho leswaku wu ta loko a fambisa dyondzo ya Bibele. A nga si susa xitiviso lexi, u rhambele ntlawa lowu eka nhlangano wun’wana. Vhiki leri tlhandlamaka, xitiviso lexi ni ntlawa lowu a swi ri kwalaho nakambe.

Maphayona ma kume leswaku vatluti van’wana a va nga ti veki tibuku ta vona. Meinard wa hlamusela: “Loko hi nghene ekamareni ra Isaac, mutirhi wa le ka ta vuhaxi eAfrika Vupela-dyambu, a a swi tika ku kuma ko tshama kona. Timagazini ta Sosayiti, tibuku, ni tikhonkodensi a a swi lo vuya—naswona a swi pfuriwile.” Isaac nakambe a a ri ni nxaxamelo wa swivutiso swa Bibele leswi a swi tsaleke khale, tanihi leswi a a rindzele riendzo ro vuyela ra maphayona.

Kambe, vatluti van’wana, a va yimeli maphayona ma ta eka vona. Hi vusiku byin’wana, riqingho ra Geert ri ririle loko se a etlele.

“Xana ku nga va ku ri mani?” Geert wa n’unun’uta a ri karhi a ambamba riqingho.

“Haloo, loyi i munghana wa wena!” ku huwelela rito leri tsakeke.

Geert u ringeta ku anakanya leswaku i mani.

“Munghana wa wena wa le xikepeni,” ku engeta rito nakambe.

“I awara ya nharhu ni mixo!” ku vule Geert.

“Ina, kambe u vule leswaku hi ku hatlisa loko xikepe xa mina xi tlhela xi fika eRotterdam, ndzi ku bela riqingho. Kutani ke, se ndzi fikile!” Endzhakunyana, Geert u kongome kona ku ya vona munghana wakwe loyi a tsakela Rito ra Xikwembu.

“Cukumeta Vuswa Bya Wena”

Ku tlangela tibuku ta Bibele nakambe ku phofuriwa na hi mapapila lama yaka eka maphayona ma huma eka vatluti. Hi leswi swin’wana leswi tshahiweke eka wona:

‘Ndzi sungurile ku hlaya buku leyi nge U Nga Hanya Hi Masiku aParadeyini eMisaveni . . . Sweswi ndzi twisisa swilo swo tala leswi khale a ndzi nga swi twisisi. Ndza tshemba leswaku xikepe xa hina xi ta tlhela xi ta eRotterdam.’—Angelo.

‘Ndzi yi hlayile buku, naswona ndzi ku rhumelela swivutiso leswi leswaku u swi hlamula epapileni ra wena.’—Alberta.

‘Sweswi se ndzi hlaya Bibele siku na siku. Ndza tsaka ku va munghana wa wena. Ku va ni vanghana lava ndzi yisaka eka Xikwembu i nchumu wo antswa swinene ku tlula hinkwaswo leswi tshameke swi humelela evuton’wini bya mina.’—Nickey.

Mapapila yo tano lama kufumetaka mbilu ma tsundzuxa maphayona hi leswi Bibele yi swi vulaka eka Eklesiasta 11:1: “Tšukumeta v̌uŝa bya wena e henhla ka mati, hikuv̌a e nḍaku ka masiku la’yo tala u ta tlhela u byi kuma.” Va tsakile swinene loko va twa leswaku vatluti van’wana va tinyiketerile eka Yehova.

Hi xikombiso, Stanislav, mutluti wa le Poland u nyanyuriwile hi leswi a swi hlayeke etibukwini ta Sosayiti. Hi ku hatlisa u tiendlele layiburari leyitsongo ya tibuku ta Bibele naswona loko a ri elwandle, a a dyondza yin’wana ni yin’wana ya tona. Meinard u ri: “Loko a tlhela a hi tsalela, u vule leswaku u khuvuriwile.”

Folkert mufambisi wa swikepe swa le ndzeni ka tiko, u twe rungula ra Mfumo ro sungula le Rotterdam. Endzhaku ka tin’hweti tin’wana ni tin’wana timbirhi a a vuya ehlalukweni a tshama nkarhi wo ringana vhiki ivi a dyondza Bibele hi masiku ya nkombo hi ku landzelelana. Kutani ke, a nga si teka riendzo rin’wana ra tin’hweti timbirhi, maphayona ma n’wi nyike nxaxamelo wa tiadirese ta Tiholo ta Mfumo laha xikepe xakwe xi fambelaka kona. Folkert a a yima laha ku nga ni tiholo naswona u tsakisiwe swinene hi malwandla lawa a kombisiweke wona. Ku nga ri khale, mufambisi yoloye wa swikepe u khuvuriwile naswona sweswi u tirhela Yehova hi ku chivirika.

Mike, Mutirheli-nkulu wa le Swikepeni swa le Britain, u tshame a vonana ni Timbhoni naswona a a dyondza Bibele loko a ri elwandle. Loko xikepe xo langutela lexi a a tirha ka xona xi yime le Rotterdam, u tirhise xikanyakanya lexi songekaka leswaku a ya eHolweni ya Mfumo. U tsakisiwe swinene hi rirhandzu ni vun’we lebyi a a byi voneke kutani u byele vanghana leswaku u ehleketa ku tshika ntirho wakwe. Hambi leswi a ku lo sala malembe ya mune ntsena leswaku a kuma mudende wakwe lowu nyawulaka, u namarhele xiboho xakwe naswona endzhakunyana u khuvuriwile.

Meinard u ri: “Ku hiseka ka Mike, Stanislav, Folkert ni van’wana leswaku va tirhela Yehova swi hi susumetela ku hambeta hi lavisisa vatluti van’wana vo fana na vona ehlalukweni.”

Xana U Nga Va Ni Xiphemu?

Loko va tsundzuka nkarhi wo kwalomu ka khume ra malembe eka rin’wana ra mahlaluko lamakulu emisaveni, “varhumiwa va le hlalukweni,” va tsevu, hi mbilu hinkwayo va pfumela leswaku—xiavelo a ku ri ntlhontlho kambe a a xi vuyerisa. “Endzhaku ka siku rin’wana ni rin’wana ro chumayela,” ku katsakanya Meinard, “hi khandziye swikanyakanya hi ya ekaya hi ri karhi hi tsundzuka leswaku van’wana va vatluti a va rindzele riendzo ra hina.”

Xana swi nga ha endleka leswaku ku ni vatluti lava rindzeleke riendzo ehlalukweni leri nga le ndhawini ya ka n’wina? Kumbexana vakulu va le bandlheni ra ka n’wina va nga endla malunghiselelo ya leswaku u va ni xiphemu eka ntirho lowu wu tlhontlhaka kambe lowu vuyerisaka.

[Bokisi leri nga eka tluka 20]

KU FIKELELA MASIMU LAMA YIRISIWEKE

Eka lembe rin’wana ra sweswinyana, swikepe swo tlula 2 500 swo huma ematikweni lawa mintirho ya Timbhoni ta Yehova yi yirisiweke kona a swi fika eRotterdam. Naswona maphayona ya le hlalukweni ma tirhise nkarhi wolowo leswaku ma fikelela lava nga le masin’wini lawa hi rungula ra Bibele.

Eka xin’wana xa swikepe swo sungula swa le Asia lexi va xi endzeleke, maphayona ma fambise mphakelo hinkwawo wa tibuku ta 23, va siya ntlawa wun’wana wu hlundzukile hi mhaka ya leswi va pfumaleke kopi ya vona. Jaha leri tirhaka ekhixini eka xikepe xin’wana xa le Asia a a ri ri na vuxiyaxiya swinene. Endzhaku ko amukela buku eka phayona, u yi tlherisile yi phutseriwe hi phepha ku tsariwe adirese eka yona. Phayona ri swi twisisile. A swi ta nghenisa jaha leri ekhombyeni loko ro muka ni buku leyi. Hi siku rero a yi ri endleleni yi poseriwa le Far East.

Ehlalukweni ku te xikepe xo huma hi le Afrika ni mutluti la nga ni nxaxamelo lowu tsariweke tibuku leti Timbhoni le ka vona ti ti lavaka. Ku sukela hi nkarhi wolowo, nkarhi wun’wana ni wun’wana loko mutluti a tlhelela ekaya, putumendhe ya yena a yi tshama yi tele hi tibuku. Mutluti wo huma etikweni rin’wana ra Afrika, a hetiwe matimba swinene loko phayona leri hlayaka na yena ri n’wi nyika tikopi tinharhu ntsena ta buku leyi nge Making Your Family Life Happy. “Swi fana ni loko u nga ndzi nyikanga nchumu!” ku vula mutluti, a lahla mavoko hi ku hela matimba. “Vamakwerhu le kaya va lava 1 000 wa tona!” Leswaku a nga ngheni ekhombyeni, maphayona ma n’wi kombele leswaku a teka 20 wa tikopi ntsena nkarhi wun’wana ni wun’wana.

Kumbexana lexi va vaviseke swinene hi loko maphayona ma twe leswaku xikepe xi huma etikweni leri Timbhoni ti xanisiwaka kona hikwalaho ka ripfumelo ra vona, ni leswaku vo tala va lahlekeriwe hi mintirho ya vona swin’we ni nhundzu. Loko va twe leswaku musweki wa le xikepeni xexo a a ri Mbhoni, va vitane kaputeni ivi va kombela mpfumelelo wo rhumela xilamulela-mhangu hi xikepe xakwe. Kaputeni u pfumerile, naswona endzhaku ka masiku ma nga ri mangani, swikhwama leswikulu swa dzana swa mphahla, tintangu ni nhundzu yin’wana swi yisiwe eka Timbhoni ta tiko rero.

[Bokisi leri nga eka tluka 21]

KU CHUMAYELA EXIKEPENI XIN’WANA NI XIN’WANA—LANGUTELO RA WANSATI

“Eku sunguleni, a ndzi kanakana ku famba na Peter,” ku tsundzuka Karin, wansati la nga yexe exikarhi ka maphayona, “hi mhaka ya leswi ndzi tweke leswaku vatluti i vanhu va tihanyi ni swindzendzele. Hambi swi ri tano, ndzi kume leswaku vo tala va rhurile. Hakanyingi, endzhaku ka loko mutluti a twe leswaku hi mpatswa lowu tekaneke, a humesa xifaniso xa nsati wakwe ni vana ivi a sungula ku bula hi dyangu wakwe. Hi ndlela yoleyo, hi fambise tikopi to tala ta buku leyi nge Making Your Family Life Happy.”

Ku endzela swikepe tanihi nuna na nsati swi endla leswaku swi olova ku vulavula ni vasati va ntlawa lowu tirhaka exikepeni ni vavasati van’wana lava minkarhi yin’wana va nga vaongori. “Hi ntolovelo a va swi rhandzi ku tolovelana ni vanhu vambe,” ku vula Karin, “kambe loko va ndzi vona, va tala ku lava ku vulavula.”

Xana i yini lexi a xi ri ntlhontlho lowukulu exiavelweni xakwe? Karin wa hlamula: “Switepisi swa tingoti. A ndzi swi venga swilo sweswo swo dewula.” Xana u swi kotile ku swi tolovela? “Ina. Loko ndzi kanakane ku khandziya xin’wana xa swona, ntlawa wa vatluti wo huma le Paraguay wu ndzi langutile ivi wu huwelela: ‘U ta swi kota. Tshemba Xikwembu ntsena.’ Kavula,” ku vula Karin a ri karhi a hleka, “endzhaku ko twa sweswo, ndzi boheke leswaku ndzi khandziya.” Nuna wakwe la hlamalaka u ri: “Endzhaku ka malembe ya mune yo khandziya switepisi swo tala swa tingoti, sweswi u swi kandziya ku fana ni mutluti.”

Karin ni nuna wakwe, Peter, va hlanganyele entlaweni wa vu-89 wa Xikolo xa Bibele xa Gilead xa Watchtower le United States. Hi September 28, 1990, va ya exiavelweni xa vona lexintshwa le Ecuador, tiko leri nga ni hlaluko. Handle ko kanakana va ta titwa va ri ekaya.

[Bokisi leri nga eka tluka 22]

XANA U MUTLUTI?

Xana wa swi lava ku va kona enhlanganweni wa Xinghezi wa Timbhoni ta Yehova loko xikepe xa wena xi yime eka rin’wana ra mahlaluko lamakulu emisaveni? Kutani tshama u ri ni nxaxamelo lowu wa le nkarhini wa tiadirese ta Tiholo ta Mfumo ni minkarhi ya minhlangano:

Hamburg, Schellingstr. 7-9; Mugqivela, 4:00 p.m.; riqingho: 040-4 208 413

Hong Kong, 26 Leighton Road; Sonto, 9:00 a.m.; riqingho: 5 774 159

Marseilles, 5 Bis, rue Antoine Maille; Sonto, 10:00 a.m.; riqingho: 91 79 27 89

Naples, Castel Volturno (40 wa tikhilomitara en’walungwini wa Naples), Via Napoli, corner of Via Salerno, Parco Campania; Sonto, 2:45 p.m.; riqingho: 081/5 097 292

New York, 512 W. 20 Street; Sonto, 10:00 a.m.; riqingho: 212-627-2873

Rotterdam, Putsestraat 20; Sonto, 10:00 a.m.; riqingho: 010-41 65 653

Tokyo, 5-5-8 Mita, Minato-ku; Sonto, 4:00 p.m.; riqingho: 03-3453-0404

Vancouver, 1526 Robson Street; Sonto, 10:00 a.m.; riqingho: 604-689-9796