“Mfumo Wa Xikwembu Wu Le Kusuhi”

TANIHI leswi Mesiya a a ta va n’wana wa Abrahama, Isaka na Yakobo, xirho xa rixaka ra Yuda ni “n’wana wa Davhida,” a a fanele ku velekiwa hi munhu; a a fanele ku va “n’wana wa munhu,” hi laha vuprofeta bya Daniyele byi vuleke ha kona. Loko “nkarhi wu fikile hi ndlela leyi hetisekeke,” Yehova Xikwembu u rhumele N’wana wakwe, loyi a velekiweke hi wansati ni loyi a hetisiseke swilaveko hinkwaswo swa le nawini, leswaku a kuma ndzhaka ya “xiluvelo xa Davhida tata wakwe.” (Vagalatiya 4:4; Luka 1:26-33) Rhekhodo ya Bibele ni vumbhoni bya misava swi kombisa leswaku ku ve ni ntlhaveko lowu tolovelekeke eka Vayuda wa leswaku ku ta ka Mesiya a a ku tshinela. (Luka 2:36-38) Hambi swi ri tano, vo tala ngopfu-ngopfu a va tsakela ku ntshunxeka ejokweni ro tika ra mfumo wa Rhoma.

Yohane Mukhuvuri hi ku kongoma u byele vanhu leswaku a a va langutane ni nkarhi wa ku avanyisiwa hi Xikwembu, ni leswaku ‘mfumo wa matilo a a wu tshinele,’ a hatlisisa ku hundzuka ka vona endleleni ya ku tlula milawu ya Xikwembu. Leswi swi tlhele swi kandziyisa mpimanyeto wa Yehova wa ku va ni vafumiwa lava yingisaka ntsena, vanhu lava xiyaka ni ku twisisa ku lulama ka tindlela ni milawu ya yena.—Matewu 3:1, 2, 7-12.

Mesiya u fike hi nkarhi lowu Yesu a yeke eka Yohane ha wona leswaku a n’wi khuvula, naswona enkarhini wolowo u totiwe hi moya lowo kwetsima wa Xikwembu. (Matewu 3:13-17) Xisweswo u ve Hosi leyi Hlawuriweke, Loyi Huvo ya Yehova yi n’wi xiyaka a ri ni mfanelo ya le nawini ya xiluvelo xa Davhida, mfanelo leyi a yi nga si tshama yi tirhisiwa eka malembe xidzana ya tsevu emahlweni ka sweswo. Kambe hi laha ku engetelekeke Yehova u nghenise N’wana loyi a amukelekaka eka ntwanano wa Mfumo wa le tilweni, lowu eka wona Yesu a a ta va Hosi ni Muprista ku fana na Melkisedeke wa Salema ya khale. (Psalma 110:1-4; Luka 22:29; Vaheveru 5:4-6; 7:1-3; 8:1) Tanihi ‘mbewu leyi tshembisiweke ya Abrahama,’ Hosi ni Muprista loyi wa le tilweni a a ta va Muyimeri wa Xikwembu eku katekiseni ka vanhu va matiko hinkwawo.—Genesa 22:15-18; Vagalatiya 3:14; Mintirho 3:15.

“Mfumo Wa Xikwembu Wu Kona eXikarhi Ka N’wina”

Hi ku tshemba leswaku matimba ya Yehova ma ta n’wi hlayisa ni ku n’wi endla a humelela, Yesu u nghenele vutirheli bya yena bya le rivaleni, a huwelela eka vanhu va ntwanano va Yehova leswaku “minkarhi [leyi vekiweke, NW] yi hetisekile, Mfumo wa Xikwembu wu le kusuhi.” (Marka 1:14, 15) Leswaku hi vona ndlela leyi Mfumo a wu ri “kusuhi” ha yona, hi nga ha xiya marito yakwe lawa a ma vuleke eka Vafarisi van’wana, ya leswaku “Mfumo wa Xikwembu wu kona exikarhi ka n’wina.” (Luka 17:21) The Interpreter’s Dictionary of the Bible, loko yi hlamusela ndzimana leyi, yi ri: “Dyondzo ya leswaku mfumo wa Xikwembu i xiyimo xa le ndzeni xa mianakanyo kumbe xa ku ponisiwa ka munhu hi yexe, yi hambana ni mongo wa ndzimana leyi ni ndlela leyi T[estamente] L[eyintshwa] hinkwayo yi vekaka mianakanyo leyi ha yona.” (Yi hleriwe hi G. A. Buttrick, 1962, Vholumo 2, tluka 883) Tanihi leswi “mfumo [ba·si·leiʹa]” ri nga ha vulaka “xikhundla xa vuhosi,” swi le ri valeni leswaku Yesu a a vula leswaku yena, muyimeri wa Xikwembu wa vuhosi, loyi a totiweke hi Xikwembu leswaku a va hosi, a a ri exikarhi ka vona. A a ri kona endhawini yoleyo a tlhela a va ni matimba yo endla mitirho leyi kombisaka matimba ya Xikwembu ya vuhosi ni ku lunghiselela swikhundla swa vafumi eka vulawuri bya yena lebyi taka bya Mfumo. Hikwalaho ku ‘tshinela’ ka Mfumo; a a ku ri nkarhi wa lunghelo lerikulu.

“Mfumo Wa Hosi Ya Hina Ni Wa Kriste Wa Yona”

Muapostola Yohane, loko a tsala eku heleni ka lembe xidzana ro sungula C.E., hi nhlavutelo ya Xikwembu u vone nkarhi lowu taka laha Yehova Xikwembu hi N’wana wa yena a nga ta endla xikombiso lexintshwa xa vulawuri bya Xikwembu. Enkarhini wolowo ku ta vuriwa leswaku Yehova ‘u kombise matimba yakwe lamakulu naswona u sungule ku fuma tanihi hosi.’ Lowu a wu ta va nkarhi wa leswaku marito lamakulu ma huwelela etilweni ma ku: “Mfumo wa misava wu ve mfumo wa Hosi ya hina ni wa Kriste wa yona, kutani u ta fuma tanihi hosi hi laha ku nga heriki.”—Nhlavutelo 11:15, 17, NW.

I Yehova Hosi Leyikulu, “Hosi ya hina,” loyi a tiyisaka vulawuri bya yena ehenhla ka “mfumo wa misava,” a endla xikombiso lexintshwa xa vuhosi byakwe ehenhla ka misava ya hina. U nyika N’wana wakwe Yesu Kriste, xiphemu lexi engetelekeke eMfun’weni wolowo, lerova wu vitaniwa “mfumo wa Hosi ya hina ni wa Kriste wa yona.” Leswi swi endleke hi 1914 ‘loko minkarhi leyi vekiweke ya matiko’ yi herile.—Luka 21:24.

Loko a kuma xiphemu eka “mfumo wa misava,” Yesu Kriste u teke magoza lama faneleke yo susa ku kanetiwa ka vuhosi bya Xikwembu. Goza ro sungula ri endliwe etilweni; Sathana ni mademona yakwe va hluriwile ivi va cukumeteriwa ehansi emisaveni. Leswi swi vange ku huwelela loku nge: “Sweswi, ku hlayiseka ka Xikwembu xa hina ni matimba ya xona, ni mfumo wa xona, ni vuhosi bya Mesiya wa xona, swi fikile.” (Nhlavutelo 12:1-10) Hi nkarhinyana lowu n’wi saleleke, Sathana u ya emahlweni a hetisisa vuprofeta lebyi nga eka Genesa 3:15 hi ku lwa ni “lava saleke” va “mbewu” ya wansati. (Nhlavutelo 12:13-17, NW) Hi nkarhi lowu fanaka ‘swileriso swo lulama’ swa Yehova swa kombisiwa naswona marito ya yena ya ku avanyisa ma hlasela vakaneti vakwe. Leswi swi ta endla leswaku Babilona Lonkulu wa vukhongeri a lovisiwa. (Nhlavutelo 18:1-8) Endzhaku ka sweswo “mfumo wa Hosi ya hina ni wa Kriste wa yona” wu ta rhuma mavuthu ya wona ya le tilweni ma ta lwisana ni valawuri va mimfumo hinkwayo ya la misaveni ni mavuthu ya yona enyimpini ya Armagedoni, wu yi herisa. (Nhlavutelo 16:14-16; 19:11-21) Leyi i nhlamulo ya xikombelo lexi yaka eka Xikwembu lexi nge: “A ku te ku fuma ka wena; ku rhandza ka wena a ku endliwe misaveni, tanihi loko ku endliwa tilweni.” (Matewu 6:10) Enkarhini wolowo Sathana u ta hoxiwa ekheleni kutani nkarhi wa gidi ra malembe wu sungula, laha Kriste Yesu ni vanakulobye va fumaka tanihi tihosi ni vaprista ehenhla ka vaaki va misava.—Nhlavutelo 20:1, 6.