Maindiya Ya Magoajiro Ma Angula Kahle

LESWI xi tshameke ehansi ka ndzhuti wa murhi lowukulu naswona xi ambale nguvu ya ntima leyi kukulaka ehansi, xikoxa lexi a xi tikomba xi ri xa ndhavuko wumbe hakunene. Nakambe a xi vulavula hi ririmi leri hi nga ri twiki. “Mi tlhela mi vuya,” xi vula hi ku tsaka. Loko xi kombetela eka vanhu van’wana va 50 va rixaka ra xona, lava va xi rhendzeleke, xi te: “Hinkwerhu hi lava leswaku mi tlhela mi vuya. Tanani vhiki rin’wana ni rin’wana!”

I vamani vanhu lava? Ha yini va swi hisekela swonghasi leswaku hi tlhela hi vuya, hambi leswi a a va sungula ku hi vona? Yingisa hi ku byela hi siku leri hi ri heteke exikarhi ka Maindiya ya Magoajiro lama akeke eka Nhlonhle ya La Guajira en’walungu-vuxa bya Colombia, ekusuhi na Venezuela, hi le n’walungu vupela-dyambu.

Angulo Wo Sungula

Loko hi suka entsindza wa Venezuela, ku nga Caracas, hi yime ro sungula eMaracaibo. Loko hi nghena endzeni ka doroba, hi vone vavasati vanharhu lava fambaka egondzweni va ambale tinguvu ta mavalavala. Xivumbeko xa vona a xi hambanile ni xa Muvenezuela la tolovelekeke—marhama lamakulu, nhlonge ya ribungu, misisi yo leha ya ntima. Loko hi vona ndlela leyi va fambaka ha yona, leyi tsakisaka, hi tsake ngopfu ku vona Maindiya ya Magoajiro ro sungula.

Siku ra riendzo ra hina ro ya eka Nhlonhle ya La Guajira a ri xe kahle swinene. Loko ku nga si hisa ngopfu mixo wolowo, hina va 50 hi khandziye bazi, hi nyanyukisiwe hi ku va ni xiphemu eka tsima ro hlawuleka eka tiko hinkwaro ro yisa rungula ra Bibele etindhawini leti nga toxe laha Venezuela. A hi kongome edorobeni ra Paraguachón, endzilakanini wa Colombia.

Hi siye muti wa Maracaibo, hi hundza swidorobana ni swimitana swo tala, xin’wana ni xin’wana xi ri na makete ni switolo swo xavisa maphaxana lama lukiweke ni tingoti to leha ta mivalavala leti vuriwaka ti-manta. Ximutana xin’wana ni xin’wana a xi ri na ndhawu ya mabindzu yo saseka ni kereke ya mavalavala, leswi endlaka ndhawu hinkwayo yi tsakisa. Vanhu hinkwavo a va ri na swivumbeko swa Maindiya. Hambi leswi a va hlamarisa eka hina, hi boheke ku titsundzuxa leswaku lava i van’wana va Mavenezuela ya xiviri.

Ku Lavisisa Tindlu

Hi kondze hi fika laha a hi ya kona. Bazi ra hina ri yime etlhelo ka pato ivi ri pakiwa ekusuhi ni khumbi ro koma endzhutini wa murhi lowukulu swinene. Eka tlhelo lerin’wana ra khumbi a ku ri ni xikolo xa ximutana xexo—a a xi pfariwile tanihi leswi a a ku ri Sonto.

Hi avane hi va mintlawa mimbirhi, hi ya eka matlhelo yo hambana hi lava tindlu. A hi fanele hi rhamba vanhu hinkwavo leswaku va ta yingisa nkulumo ya Bibele leyi a yi ta nyikeriwa hi ririmi ra Xigoajiro hi awara ya nharhu ndzhenga wolowo erivaleni ra xikolo. Evelinda, Muindiya wa Mugoajiro wa kwalaho, a a ri na hina. Handle ko kanakana, leswi a swi ta hi endla hi amukeleka, hikuva hambi leswi a hi swi kota ku vulavula Xipaniya, a hi nga ri tivi ririmi ra Xigoajiro.

Loko hi suka eka ximutana xexo, hi fambe swinene leswaku hi ya eka miti yin’wana. Loko hi ri karhi hi famba hi gondzo ro leha, ro ololoka, leri tlhumeke hi swimidyana ematlhelo, hi tikume hi fambisana ni xifanyeta xa malembe ya kwalomu ka khume ivi xi hi honokela hi ku hlamala lokukulu. Hi loko Evelinda a xi languta hi ku n’wayitela kutani a xi hlamusela hi Xigoajiro leswaku ha yini hi endzela ndhawu leyi. Vito ra xona a ku ri Omar, naswona loko hi xi rhambele enkulumeni xi tlula-tlurile hi ku tsaka.

Loko hi nghena endleleni leyi hambukaka egondzweni, hi fambe hi ndlela leyi nga ni ritshuri kambe a ka ha tsakamanyana hikuva mpfula a ya ha ku na. Hi twe leswaku tindlela leti a ti tirhisiwa hi vatleketli va nhundzu leyi yirisiweke exikarhi ka Colombia na Venezuela. Moya a wu tele hi nhun’hwelo wa mirhi leyi nga kona. Hambi leswi nkahelo wa ku hisa a wu hi tshikelelanyana, a wu hi hetanga matimba. Hambi swi ri tano, mintshikilelo hinkwayo yi rivariwile loko xindledyana xa le xikarhi ka makhwati lama tlhumeke xi hi nghenisa endhawini leyikulu leyi pfulekeke—ku nga ximutana xa Magoajiro ya xiviri.

Ku Langutana Ni Magoajiro Hi Ku Kongoma

A ku ri ni timbuti ta kwalomu ka khume-mbirhi, leti nga ni mavala yo saseka yo basa, ya ntima ni yo kwalalanyana, ti etlele endzhutini, ti ri karhi ti gayela hi ku rhula. Ehenhla ka mubedo lowu andlariweke exikarhi ka mirhi yimbirhi, a ku etlele wansati, a ri karhi a an’wisa n’wana wakwe. Swihlangi swo hlayanyana a swi ri karhi swi tlanga ekusuhi. Laha a etleleke kona a a ku ri ehandlenyana ka yindlu yo fuleriwa hi byanyi yo phamiwa hi misava leyi nga ni tinhlanga leyi rhendzeriweke hi darata leyi tlhomeriweke timhandzi. A a ku ri na tindlu ti nga ri tingani leti nga nyawuriki kwalaho. Yin’wana handle ko kanakana a yi ri xitanga, laha a ku ri na ndzilo wa tihunyi exikarhi ka mapoto lamakulu lama fanaka ni ketlele. A ku hayekiwe madzovo ya timbuti kwalaho leswaku ma ta oma.

Loko wanuna la yimeke ehekeni a hi vona hi tshinela, u tsutsumile a hi vekela switulu swimbirhi ekusuhi ni wansati la nga emubedweni. Evelinda u xewete wanuna ni wansati hi ririmi ra vona ivi a hlamusela ntshembo wa Matsalwa hi vumundzuku a tirhisa broxara leyi nga ni swifaniso leyi nge Tsakela Vutomi eMisaveni Hi Masiku! Ku rhula loku nga kona kwalaho ku hi byele leswaku nkitsikitsi wa matiko hinkwawo kumbe vugevenga bya le madorobeni-nkulu a ku nge vi tinhloko-mhaka leti fanelaka laha. Mbhoni yin’wana eka ntlawa lowu yi vule leswaku tanihi leswi Maindiya ya Magoajiro ma rhuleke hi ntumbuluko, i swinene leswaku hi va khathalela ni ku va kombisa ku va tsakela. U te: “Hakanyingi a hi vutisa hi rihanyo ra ndyangu, ntshovelo, loko mpfula yi ri kona, ni swin’wana.” Leswi swi endle leswaku hi swi kota ku va byela hi Mfumo wa Xikwembu ni ku va kombisa leswaku ku nga ri khale Yehova u ta susa maxangu hinkwawo swin’we na Sathana Diyavulosi, loyi va n’wi chavaka swinene.”

Loko Evelinda a ri karhi a vulavula, vayingiseri va yena va kombise ku swi amukela, naswona endzhakunyana ku te wansati un’wana ni vana va nga ri vangani. Ana se a hi swi twile leswaku nawu wa Magoajiro wu pfumelela wanuna leswaku a teka tshengwe. Xana swi nga ha endleka ku ri rona ni laha? Leswi swi hi endle hi tsundzuka Yenny, Mugoajiro wa malembe ya 21, la kokaka mahlo swinene la tshamaka eMaracaibo. Mugoajiro la fumeke u n’wi humesele ndzovolo lowukulu. Kambe vatswari vakwe, lava va nga riki Timbhoni ta Yehova, a va twanananga. Hambi leswi mana wakwe a a swi lava leswaku a n’wi teka, tata wa Yenny u gime nenge ehansi. Wanuna loyi ana se a a tekane ni makwavo wa Yenny!

Loko Evelinda a heta ku nyikela rungula rakwe, wanuna yoloye u teke broxara. Wansati loyi a yimeke ekusuhi na yena u kombele yakwe, naswona a hi tsakile hi leswi hi aneriseke xikombelo xakwe. Hi nkarhi wolowo vanghana va hina se a a va hundzele mahlweni. Hi loko hi rhambela ndyangu wolowo eka nkulumo ya ni ndzhenga kutani hi famba, hi ku chava ku lahleka endhawini leyi yi nga tolovelekangiki.

Mbhoni yin’wana entlaweni yi hlamusele leswi swi yi humeleleke. Wanuna la nga emubedweni a a yingise hi vukheta loko nsati wakwe a ha lulamisa swo tima torha—tinghilasi timbirhi ta chicha leyi endliweke hi koroni. Hi ku titsongahata makwerhu wa hina u yi amukerile ivi a nwa. Endzhakunyana, Magaly, munghana wakwe wa Mugoajiro, u n’wi hlamusele ndlela leyi swakunwa leswi a swi endliwa ha yona. Hi ntolovelo, koroni a yi siriwa hi meno! U tsandzeke ku tikhoma, a fa hi ku hleka, loko a n’wi vona a sungula ku basuluka.

Wanuna un’wana wa Muindiya, u tsakisiwe swinene hi matshalatshala ya makwerhu wa hina yo ya ekaya ra yena ni rungula ra Bibele, ivi a xika emubedweni wakwe. Loko a ambale hembe, u va helekete endhawini leyi tumbeleke leyi a va nga yi xiyanga.

Loko hi hundza ndhawu yin’wana leyi pfulekeke laha van’wana va vanghana va hina a va bula kona ni vakulukumba va ndyangu, hi vone ntlawa wa swihlangi leswi a swi nga ambalanga, swi ri na makhwiri lamakulu, swi yime swi te whii, ehansi ka murhi. Hi twe leswaku leswi swi vangiwa hi ku sika ni swidyelela. Vo tala va vanhu lava a va na mati lama fambaka hi tiphayiphi ni gezi. Kavula, leswi swi vula leswaku va hava swigwitsirisi, swiberisa moya ni timboni.

Nhlayo Leyi Nga Rindzeriwangiki

Mixo wu hundze hi ku hatlisa. Loko hi ri karhi hi tlhelela ebazini leswaku hi ya dya swakudya swa nhlekanhi, hi tivutisile leswaku i vangani lava nga ta ta eka lava rhambiweke eka nkulumo ya Bibele.

Hi 2:45 p.m., hi tivutisile leswaku swi nga ha endleka leswaku ntlawa lowu hi teke na wona hi bazi wu va wona ntsena vayingiseri va makwerhu wa Mugoajiro loyi a lunghiseleleke nkulumo ya 45 wa timinete hi ririmi ra kwalaho. A swi vanga tano! Ndyangu lowu sunguleke ku fika wu te wu ri karhi wu n’wayitela ejarateni ra xikolo. Va fanele va hlamarile tanihi leswi un’wana ni un’wana a a va endla leswaku va titwa va amukelekile. Endzhaku ka timinetenyana, ku fike vo tala, van’wana handle ko kanakana va fambe mpfhuka wo leha. Ndyangu lowu a wu tshama laha ku pfulekeke lowu nga ni timbuti ta khume-mbirhi na wona a wu tile! A a cincile swinene wansati loyi a a tshame emubedweni, a ambale nguvu ya yena yo leha ya ntima! Hambi Omar lontsongo, loyi hi vulavuleke na yena epatwini, a a tile, swi tikomba onge u te a ri yexe. Loko van’wana va ta, xitupu xa semendhe xo leha xa xikolo lexi a xi tirhe tanihi bence a xi tele. Hi loko muchayeri wa bazi ra hina la nga ni musa a sungula ku humesa switulu swa bazi leswaku vanhu va ta tshama eka swona hi nkarhi wa nkulumo.

A ku ri ni ntsengo wa Maindiya ya Magoajiro ya 55 lowu tshameke wu yingisa loko Eduardo a nyikela nkulumo ya Bibele. Kambe a va nga lo tshama va ku whii! Loko va pfumelelana ni yinhla ya xivulavuri, a va endla huwanyana yo komba ku tsaka. Loko a vulavula hi ku hela ka vuhomboloki, xikoxa lexi boxiweke eku sunguleni xi vulavule hi rito lerikulu leswaku hinkwavo va swi twa, xi ku: “Ina, ku na vubihi byo tala. Naswona ku na vanhu vo biha lava tshameke laha sweswi. Ndza tshemba xi bela etindleveni!” Makwerhu Eduardo hi vutlhari u nkhense nhlamuselo leyi ivi a ya emahlweni ni nkulumo yakwe.

Loko nkulumo yi herile, un’wana wa hina u teke xifaniso. Magoajiro ma swi tsakerile ivi ma kombela leswaku hi va teka xin’wana va tlakuse tibroxara ta vona ta Tsakela Vutomi. Hi loko van’wana va famba, kambe kwalomu ka hafu ya vona va tshamile va hi languta loko hi khandziya bazi. Va hi endle leswaku hi va tshembisa ku tlhela hi vuya, hi loko va yima va tlakusa mavoko ku kondza bazi ri nga ha vonaki.

Loko hi ri karhi hi famba, hi vone ku ri lunghelo swinene ku yisa mahungu lamanene ya Mfumo wa Xikwembu eka vanhu lava. Vo tala va vona a va ma twa ro sungula. Timbhoni ta le Maracaibo ana se a ti ri karhi ti vulavula hi riendzo ra tona leri landzelaka. Xana a ku ta va ni xiengetelo eka mhaka leyi?

Xiengetelo Lexi Humeleleke

Vamakwerhu va tlhelerile endzhaku ka mavhiki mambirhi. Ku fambisiwe tibuku to tala ta Bibele, ku endliwe maendzo yo vuyela eka lava tsakeleke, ku sunguriwa tidyondzo ta le kaya ta Bibele. Ku tlula kwalaho, Maindiya ya 79 ma ve kona eka nhlangano wa vumbirhi wa le rivaleni. Kwalaho vamakwerhu va hlamusele leswaku va ta tlhela va vuya endzhaku ka mavhiki manharhu ku nga ri mambirhi hi mhaka ya leswi ku nga ni nhlengeletano ya xifundza. Maindiya ma vilerile. Un’wana wa vona u te: “Swi nga endleka hi fa mi nga si vuya!” Va vutise leswaku nhlengeletano ya xifundza i yini. Swi twale swi tsakisa eka vona lerova va te va lava ku ya kona na vona! Ku endliwe malunghiselelo naswona 34 wa vona va swi kotile ku ya enhlengeletanweni eMaracaibo, laha vamakwerhu lava vulavulaka Xigoajiro va va pfuneke leswaku va twisisa nongonoko wa Xipaniya.

Ku rhandza ka Yehova hi leswaku “vanhu hinkwavo . . . va fika laha va kotaka ku tiva leswi swi nga ntiyiso.” (1 Timotiya 2:3, 4) Mawaku ntsako wonghasi wo vona ku angula lokunene ka Maindiya lama lavaka ntiyiso ya le Nhlonhleni ya La Guajira!

[Xifaniso lexi nga eka tluka 26]

Vutomi Byi Fuwisiwa Hi Ntiyiso Wa Bibele

Iris na Margarita, vana va kondlo-a-ndzi-dyi va Magoajiro, a a va tsakile ku va na broxara leyi nge Tsakela Vutomi eMisaveni Hi Masiku! Kambe a a va ri ni xiphiqo. A a va nga swi koti ku hlaya. Timbhoni leti va endzeleke ti tinyiketele ku va pfuna hi ku tirhisa xibukwana lexi nge Learn to Read and Write. Hi ku hatlisa, vanhwanyana lava a va nyanyukile loko va kota ku tsala ni ku vitana vito ra Yehova kahle.

Loko va ri karhi va endla nhluvuko, va tsakisiwe swinene hi ntshembo lowu hlamarisaka lowu nga eBibeleni. Va tsakisiwe swinene hi xitshembiso xa leswaku vanhu hinkwavo va ta kuma ntshunxeko ku nga ri khale. Va te: “Vutomi eka hina vana va kondlo-a-ndzi-dyi a byi tsakisi laha. Minkarhi yo tala hi hlawuleriwa munghana wa vukati ha ha ri vatsongo, naswona ku pfinyiwa i nchumu lowu nga ku humelelaka rini na rini.”

Leswi tsakiseke Iris na Margarita swinene a ku ri ku ya enhlengeletanweni ya le Maracaibo. Swikandza swa vona a a swi kombisa ntsako lowu va veke na wona etimbilwini ta vona, ngopfu-ngopfu loko ku yimbeleriwa tinsimu. Minkarhi hinkwayo a va yima enyangweni loko Mbhoni yi ta dyondza na vona Bibele, naswona minkarhi hinkwayo a a va va kona eka nkulumo ya le rivaleni leyi khomeriwaka eximutanini xa vona. Vanhwanyana lava va vone vutomi bya vona byi fuwisiwile swinene hi ku tiva Yehova Xikwembu ni xikongomelo xa yena.