Va Kuma Ntsako Wa Ntiyiso “eParadeyisini”

PARADEYISI! Rito rero hakanyingi ra ta emianakanyweni ya vanhu loko va anakanya hi Hawaii—naswona hikwalaho ka swivangelo leswinene. Laha ku ni maxelo lamanene ngopfu, matilo ya wasi, mirhi ya mincindzu leyi hungiwaka hi moya, rimoyana leri phyuphyisaka, ni timbuwu leti nga ni sava—swilo leswi vo tala va nga swi tekaka swi ri swa le paradeyisini.

Swilo leswi swi koke vanhu vo huma ekule ni le kusuhi. Va te hi le Asia, Pacific, eTiamerika ni le ka tindhawu tin’wana to tanihi swihlala swa Karibiya ni le Yuropa. Vo tala va rhurhele laha hikwalaho ka maxelo layo hola ya lembe hinkwaro. Van’wana va te hi ku lava vuhlayiseki bya ikhonomi—kavula ni ntsako. Leswi swi endle leswaku ku va ni ku hlangana ka matiko ni tinxaka, mikhuva yo hambana-hambana ya mindhavuko ni tidyondzo to hambana-hambana ta vukhongeri.

Hambi swi ri tano, ku ni xivumbeko xin’wana emhakeni leyi. Tanihi tindhawu tin’wana to saseka emisaveni, Hawaii ri weriwe hi khombo ra vugevenga, swidzidzirisi, ku tlula nawu, nthyakiso ni swiphiqo swin’wana leswi nghenaka endyangwini wa vanhu ku nga khathariseki laha munhu a nga vaka a tshama kona. Hikwalaho ka ku honisa ni makwanga ya munhu, ku saseka ka ntumbuluko ka swihlala swa Hawaii ku ya ku hunguteka hakatsongo-tsongo. Vanhu va lava paradeyisi, kambe a hi hinkwavo lava tshamaka laha lava khathalelaka ku endla kumbe ku hlayisa swihlala leswi swi ri paradeyisi. Ku endla paradeyisi a hi ku va ni xivono xo saseka ni maxelo lamanene ntsena.

Hambi swi ri tano, ku ni ntlawa lowu kulaka wa vanhu lava hanyaka laha lava nga ni ntsako wa xiviri endhawini leyi yi fanaka ni paradeyisi. Lava i vanhu lava khomelelaka entiyisweni wa Bibele naswona va khumbiwa hi xitshembiso xo tsakisa xa Xikwembu lexi nge: “Nḍi v̌umba matilo la’mantŝha, ni misav̌a le’yintŝha; timhaka ta khale a ti nga ha ṭunḍukiwi, ti nga ka ti nga ha tlheleri meehleketweni.” Vanhu lava va langutele vumundzuku hi ntsako va ri karhi va anakanya marito ya muapostola Petro lama nge: “Kambe, hi ku ya hi ku tshembisa ka Hosi, hi langutele matilo lamantshwa ni misava leyintshwa, laha ku nga ta va ni ku lulama.” (Esaya 65:17; 2 Petro 3:13) I vamani vanhu lava? Va swi kotise ku yini ku dyondza ntshembo wo tsakisa lowu nga eBibeleni? Naswona leswi swi hundzule yini evuton’wini bya vona?

Nchavo Wa Rifu Wu Hluriwa

Isabel ni nuna wa yena, George, i va rixaka ra Mafilipino. U kule a ri karhi a landzelela vukhongeri bya vatswari va yena bya Rhoma Khatoliki, hambi leswi a a nga si tshama a kambisisa Bibele. Isabel a a dyondzisiwile leswaku moya-xiviri wa munhu a wu fi. Xana u endle yini hi dyondzo leyi ya mavunwa? Kahle-kahle u chave ku fa hikuva a a ri ni mianakanyo ya leswaku u ta celeriwa a ri ebokisini ra vafi a ri karhi a hanya hi laha ku nga heriki, kumbexana moya-xiviri wa yena wu tsandzeka ku pona. Hambi swi ri tano, hi 1973, Isabel u sungule ku dyondza Bibele ni Timbhoni ta Yehovha. Loko a dyondze leswaku moya-xiviri wa munhu wa fa ni leswaku Xikwembu xi ta herisa rifu hi ku pfuxa lava feke, a a tsake ngopfu naswona a a titwa a ntshunxiwile swinene. (Ezekiyele 18:4, 20; Yohane 5:28, 29) Ntiyiso wa Bibele wu n’wi susumete swinene lerova a hatlisa a endla nhluvuko.

Kambe ku vuriwa yini hi George? Na yena u hlanganyerile eku burisaneni hi Bibele kambe hi xikongomelo xo kombisa Timbhoni leswaku ti hoxile. Hambi swi ri tano, a nga kumanga nchumu lexi a xi hoxile eka leswi yena ni nsati wa yena a va dyondzisiwa swona. Entiyisweni, endzhakunyana ka loko va sungule ku dyondza, mhaka ya ngati yi sungurile. Ku fikela enkarhini wolowo, George a a swi tsakela ngopfu ku dya swakudya leswi hlanganisiweke ni ngati. Kambe loko a vone leswaku Bibele yi sola ku dya ngati hi ku helela u swi tshikile. (Genesa 9:3, 4; Levhitika 17:10-12; Mintirho 15:28, 29) U hambetile a hlanganyela eka dyondzo ya Bibele naswona a a tsakile ku vona leswaku u hetelele a kume ntiyiso. Namuntlha, George, Isabel, ni vana va vona va mune va kuma ntsako wa ntiyiso hi ku hanya hi mimpimanyeto ya Xikwembu.

Ku Kokiwa Hi Vukreste Bya Ntiyiso

Wanuna wa Mujapani la vitaniwaka George ni nsati wa yena wa Muputukezi, Lillian, va le malembeni ya vona ya va-60. Hinkwavo ka vona va velekiwile ni ku kulela le Hawaii. Tanihi leswi George a nga kumangiki vuleteri bya vukhongeri eka vatswari va yena, a nga kalanga a teka vukhongeri byi ri bya nkoka. Kambe, minkarhi hinkwayo a a pfumela eka Xikwembu. Hi tlhelo rin’wana, vatswari va Lillian va n’wi kurisele evukhongerini bya vona, tanihi Murhoma Khatholiki.

Hambi leswi George a nga ri muhlayi wa Bibele la hisekaka, a a hlaya timagazini ta Xihondzo xo Rindza ni Awake! kwalomu ka malembe ya 30. Xisweswo a a dyondze swo tala hi Bibele. Hambi swi ri tano, leswi a a ri xidzahi ni munwi lonkulu, u hlwerile ku hundzula vutomi bya yena. Loko malembe ma ri karhi ma famba, George u hambete a hlaya timagazini naswona minkarhi yin’wana a va kona eka minhlangano ya Vukreste eHolweni ya Mfumo. Ha yini? Hikuva hi laha a swi vekaka ha kona, “vukhongeri lebyi byin’wana byi tele hi vukanganyisi” hi ku pfumelela swilo swo tala leswi soriwaka eBibeleni. A a swi vona leswaku Timbhoni ta Yehovha a ti hambanile.

I yini lexi nga kokela nsati wa George, Lillian, la tshembekaka, entiyisweni wa Rito ra Xikwembu hambi leswi a a kuceteriwa swinene hi vukhongeri bya vatswari va yena? Sesi wa yena u n’wi rhambele eka minhlangano eHolweni ya Mfumo. Lillian wa tsundzuka: “Ndzi tsakele moya wa ndyangu lowu tsakisaka lowu a wu ri kona ni ku n’wayitela ka xinghana.” Rirhandzu ra xiviri leri a ri voneke exikarhi ka vanhu va Yehovha ri n’wi khorwisile leswaku lowu hi wona ntiyiso. (Yohane 13:34, 35) U amukele dyondzo ya Bibele, eku heteleleni a nyikela vutomi bya yena eka Yehovha Xikwembu, naswona u khuvuriwile endzhaku ka tin’hweti ti nga ri tingani loko nuna wa yena a khuvuriwile.

George a nga ha dzahi kumbe ku dakwa, naswona Lillian u lahle swifaniso swa yena swa vukhongeri hinkwaswo. Va avelana ni van’wana hi leswi va nga swi dyondza hi timbilu leti nga tala hi rirhandzu, ku katsa ni vatukulu va vona va 25 ni vatukulu-xinguwe va mune. Hi ku languta swikandza swa vona, u nga vona ndlela leyi George na Lillian va tsakeke ha yona!

Va Kuma Ku Rhula Ni Ntsako

Patrick, wanuna wa malembe ya le xikarhi wa le Ireland, ni nsati wa yena wa Muyuda, Nina, hinkwavo va rhurhele le Hawaii ku suka edzonga-vupela-dyambu bya United States. Emahlweni ka sweswo a va hanya vutomi bya ku nga khathali hi swidzidzirisi, ku ringetela vukhongeri, ni ku tikhoma loko biha. Naswona va hete malembe yo tala va ri swirho swa ntlawa wa vukhongeri, va lwela ku kuma ku twisisa lokukulu hi swidzidzirisi, ku anakanyisisa, ni mukongomisi wa vona va ri voxe. Hi ku famba ka nkarhi Patrick u karhatiwe hi mavondzo, ku phikizana, ni ku holovisana exikarhi ka swirho swa ntlawa wa vukhongeri leswi vulaka leswaku swi fikelele ‘mpimo wa le henhla wa ku twisisa.’ U tshike ntlawa wolowo ivi a tlhelela le Hawaii, laha a nga tshama a hanya kona, a tshemba leswaku u ta wisisa mianakanyo. Endzhaku ka sweswo, Patrick u kucetele Nina, loyi hi nkarhi wolowo a a ri ntombhi ya yena leswaku a endza. Eku heteleleni, va tekanile ivi va tshama le Hawaii.

Patrick na Nina a va swi xiyanga leswaku ku lava ka vona ka ku rhula ni ntsako eku heteleleni a ku ta va fikisa eku dyondzeni ka Bibele ni Timbhoni ta Yehovha. Nina, la nga pfumeriki eka Xikwembu hi ku tiyimisela evuton’wini bya yena hinkwabyo, u sungule ku kuma tinhlamulo leti enerisaka ta Bibele eka swivutiso leswi a a nga swi twisisi swo tanihi leswaku ha yini ku ri ni vubihi ni leswaku ha yini swilo leswo biha swi humelela eka vanhu lava lulameke. Ku lava ka Patrick ntiyiso hi malembe ya khume hi ku fanana ku ve ni makumu lama tsakisaka. Hi ku hatlisa, leswi yena na Nina a va swi dyondza eBibeleni swi sungule ku cinca vonelo ra vona ra mahanyelo. Endzhaku ka matshalatshala lamakulu, ya nkarhi wo leha, Patrick u swi kotile ku hlula ku godzomberiwa ka yena lokukulu hi fole. Sweswi kwalomu ka malembe ya khume, yena ni nsati wa yena va hanye vutomi lebyi baseke hi ku ya hi mimpimanyeto ya Xikwembu. Hi timbilu leti tengeke ni mapfalo lama baseke, va kuma ntsako lowu a va wu lava.

Ku Titsona Swilo Swin’wana Ni Tihakelo Ta Kona

“Ringetani hi matimba ku nghena hi nyangwa leyo khuma, hikuva ndza mi byela leswaku lavo tala va ta navela ku nghena, kambe va ta tsandzeka.” (Luka 13:24) Marito wolawo ya Yesu Kreste ma komba kahle leswaku a swi olovi ku tirhela Xikwembu ni ku hanya hi mimpimanyeto ya Matsalwa. Un’wana ni un’wana la lavaka ku endla sweswo u fanele a titsona swilo swin’wana ku nga ri ku endla matshalatshala lama lavekaka ntsena. Leswi hi leswi vanhu lava boxiweke emhakeni leyi va swi endleke. Mawaku ndlela leyi va hakeriweke ha yona!

Hi xikombiso, Patrick na Nina, lava ha ku boxiwaka. Va endle ku cinca lokukulu evuton’wini bya vona lebyi a byi va nyika mali yo tala swinene, va ya entirhweni wa nkarhi hinkwawo wa Vukreste laha va tihlayisaka hi mali ya ntirho wa nkarhinyana wo tihanyisa. Kambe, va tshemba leswaku leswi va swi kumeke hi tlhelo ra moya swi tlula ku titsona kwihi na kwihi ka swilo leswi vonakaka loku va ku endleke. Naswona va tsakile hakunene.

Hikwalaho ka malembe ya vona, ku cinca a ku endlekanga hi ku hatlisa eka George na Lillian. Ku hlanganyela eminhlanganweni ni le vutirhelini bya Vukreste swi lava nkarhi, ku nyikela nyingiso ni matshalatshala ya xiviri. Hambi swi ri tano, lexi xi va tsakiseke ngopfu hi leswaku rihanyo ra vona ri antswile, naswona vutomi lebyi va hanyaka byona namuntlha byi nga hlamuseriwa tanihi lebyi vangamaka, lebyi fuweke ni lebyi tsakisaka.

Mayelana na George na Isabel, ntlhontlho wa vona lowukulu i wa ku dyondzisa vana va vona ni ku va pfuna va nghena endleleni ya vutomi. Ku laveka nkarhi ni matshalatshala yo tala leswaku u lunghisa mune wa vana lavatsongo va ya eka minhlangano ya Vukreste kumbe ku famba na vona evutirhelini bya Vukreste. Eka nkarhi wun’wana ntshikilelo lowu hambetaka wu vangele George na Isabel leswaku va honisa vutihlamuleri bya vona bya vutswari. Kambe nkulumo ya Bibele leyi nge “Ku Pfuxeta Moya Wa Ku Tinyiketela” yi va susumetele ku antswisa matshalatshala ya vona hi matimba va nyikela nyingiso ni ndzetelo lowu lavekaka eka vana va vona va mune leswaku ‘va va kurisa hi ku va laya ni ku va dyondzisa milawu ya Yehovha.’ Kavula, matshalatshala yo tano ma hakeriwe hi laha ku fuweke.—Vaefesa 6:4.

A hi xivono xo saseka, maxelo lamanene, kumbe ku famba ka vutomi loku nga hatlisiki loku tisaka ntsako wa ntiyiso eka vanhu lava ni van’wana. Kambe ku ri na sweswo, i ku tiva leswaku va tirhisa vutomi bya vona hi ku fambisana ni ku rhandza ka Xikwembu naswona va hanya hi mimpimanyeto ya Rito ra xona, Bibele. (Eklesiasta 12:13) Ku tlula kwalaho, ntsako wa ntiyiso wu tala etimbilwini ta vona loko va anakanya hi nkarhi wa ntsako lowu misava ya paradeyisi yi nga ta vuyeteriwa ha wona emisaveni hinkwayo.—Luka 23:43, NW.

[Xifaniso lexi nga eka tluka 25]

George, Isabel, ni vana va vona va kuma ntsako hi ku hlaya Bibele

[Xifaniso lexi nga eka tluka 26]

George na Lillian va kuma ntsako evutirhelini bya Vukreste

[Xifaniso lexi nga eka tluka 27]

Patrick na Nina va kuma ku rhula ka ntiyiso entirhweni wa Yehovha