Ku Nyikela Marito Lama Twisisekaka Le Namibia

XANA xiga lexi nge “a ndzi swi twisisi” u xi twe hi tindzimi tingani? “Hi nokuzuva,” ku vule wansati wa Muherero, la ambaleke nguvu yo leha ni duku ra le nhlokweni leri bohiweke onge i timhondzo. Nhwanyana wa Mukwanyama u angule a ri karhi a n’wayitela a ku: “Nghi udite ko.” “Kandi uvite ko,” ku hlamule muaki wa Mundonga, a ri karhi a khindlata makatla. Murisi wa timbuti wa Mukwangali u hlamule a ku: “Kapi na kuzuvha.”

Vanhu lava hinkwavo a va vula leswaku, “a ndzi swi twisisi.” Vona ndlela leyi leswi swi kombisaka ha yona leswaku Timbhoni ta Yehovha eNamibia ti hlangana ni swiphiqo leswi hetaka matimba swa tindzimi loko ti ringeta ku fikelela vaaki va 1 370 000 ensin’wini leyi leyikulu ya kwalomu ka swikwerhe-khilomitara swa 824 000!

Lexi hlamarisaka! A hi Maherero ni Manama ntsena nakambe ku ni Vaovambo, Vakavango, Vatswana, Vacaprivian, Vahimba, Mabushman ni Madamara ya le Namibia lava nga ni tindzimi ta vona. Ku hambana na sweswo, Timbhoni a ti lo hloma hi tibuku ta Bibele ta Xinghezi na Xibunu ntsena. Entiyisweni, leswaku ntiyiso wu twisisiwa hi vanhu vo tala, ntirho wa ku hundzuluxela a wu laveka. Wona wu sungule hi ndlela leyitsongo eka malembe yo tala lama hundzeke eWindhoek, doroba-nkulu ra Afrika Dzonga Vupela-dyambu hi nkarhi olowo.

Dick Waldron wa tsundzuka: “Le Windhoek, a ku ri na ku kanetiwa lokukulu ka ntirho wa hina wa vumbhoni hi tikereke ni hi maphorisa.” Yena ni nsati wakwe Coralie, va te eka tiko leri hi 1953 tanihi mathwasana ya Xikolo xa Bibele xa Gilead xa Watchtower. “A hi nga pfumeleriwi etindhawini leti a ku tshama vantima, naswona nkarhi wun’wana a hi hlaseriwa loko ho voniwa hi ri karhi hi vulavula ni vantima. Eku heteleleni hi kume ndhawu laha hi tshameke hi nga kavanyetiwi—ndhawu leyi omeke ya Nambu wa Gammans! Yona a yi ri ehandlenyana ka doroba. Leswi a hi tumbetiwe hi khwati ra mirhi yo koma hi fambise tidyondzo ta Bibele kwalaho.”

Hi kona laha tibuku ta Watch Tower ti sunguleke ku hundzuluxeriwa hi tindzimi ta kwalaho. Ti katse swiphephana hi Xikwanyama ni xibukwana lexi nge “Mahungu Lamanene Ya Mfumo” hi Xinama. Makwerhu Waldron u tsundzuka ntokoto lowu hlekisaka mayelana ni xibukwana lexi, lexi munhu la tsakelaka a pfuneteke ku xi hundzuluxela. Xiga xa Xinama lexi vulaka leswaku “Adamu a ri munhu la hetisekeke” a xi nga ri kona. Kutani munhu loyi a a tsakela u te: “Tsalani leswaku Adamu a fana ni perekisi leri vupfeke. Vanama va ta swi twisisa leswaku a a hetisekile.” Kutani yeleyo hi yona ndlela leyi masungulo ya endliweke ha yona leswaku Matsalwa ya endliwa lama twisisekaka exikarhi ka vanhu vo tala va le Namibia.—Ringanisa Daniyele 11:33.

Ku Fikelela Nhlohlorhi

Nhlohlorhi yi fikeleriwile eku sunguleni ka va-1970 loko buku leyi nge Ntiyiso Lowu Yisaka eVuton’wini Lebyi Nga Heriki yi hundzuluxeriwile hi Xindonga na hi Xikwanyama. Leti hi tona tindzimi timbirhi letikulu leti vulavuriwaka hi vanhu vo tala va le Namibia ni le Ovamboland, kwalomu ka 700 wa tikhilomitara en’walungwini wa Windhoek. Kaya ra maphayona a ri simekiwile eOndangwa, endhawini ya Ovamboland. Leswaku ku pfuniwa vanhu lava tsakelaka endhawini leyi leswaku va vuyeriwa eka bulo ra Bibele ra vhiki na vhiki leri sekeriweke eka Xihondzo xo Rindza, maphayona yo hlawuleka lama tirhaka eOvamboland ya averiwe ku hundzuluxela nkatsakanyo wa swihloko leswi dyondziwaka swa Xinghezi wu ya eka Xindonga ni Xikwanyama.

“Hofisi” yo hundzuluxela a ku ri garaji leyi avanyisiweke, laha tikopi leti hundzuluxeriweke ta Xihondzo xo Rindza a ti gandlisiwa kona, eka muchini wa khale wo gandlisa. A swi nga olovi ku tshama entirhweni lowu, tanihi leswi swiyimo a swi nga hluvukanga naswona ku hisa a ku ri eka avhareji ya le xikarhi ka 38°-44°C. Hambi swi ri tano, hi kona laha tibroxara na buku leyi nge U Nga Hanya Hi Masiku aParadeyisini eMisaveni swi hundzuluxeriweke kona.

Loko mavandlha ma ri karhi ma vumbiwa eOvamboland ni kun’wana eNamibia, n’wangulo a wu ri wukulu ngopfu naswona miako yo antswa a yi laveka. Ku tlula kwalaho, a ku laveka muti lowu nga le xikarhi leswaku ku ta khathaleriwa swilaveko swa swiphemu swin’wana swa tiko. Hambi swi ri tano, ku vengiwa ka ntirho wa ku chumayela Mfumo a ku hungutekile. Kutani ku kumiwe mpfumelelo wa leswaku hi sungula ku aka eka ndhawu leyikulu leyi nyikeriweke hi un’wana wa Timbhoni ta Yehovha eWindhoek. Ku nga ri khale, vatirhi vo tirhandzela lava tlulaka 40 va tshamisisiwe endhawini leyi a ku akiwa eka yona, naswona hi December 1990 tihofisi ta vuhundzuluxeri ti hetiwile.

Sweswi, ntirho wo nyikela rivoningo eka vo tala wu ya emahlweni hi ku olova etihofisi letinene ni makamara lamanene eka muako lowu wuntshwa wa manguva lawa. Tibuku letintshwa ti hambeta ti hundzuluxeriwa hi Xiherero na hi Xikwangali. Loko ku ri nkandziyiso wa n’hweti na n’hweti wa Xihondzo xo Rindza wa swihloko swa Xindonga ni Xikwanyama swi hlanganile sweswi wu huma hi mivala ya mune. Wu na swihloko hinkwaswo leswi dyondziwaka kun’we ni swihloko swin’wana. Hakunene leswi swi hambane ngopfu ni masungulo lamatsongo ya le ribuweni ra nambu lowu omeke eka malembe yo tala lama hundzeke.

“A ndzi swi twisisi,” sweswi a yi twiwi ngopfu. Ematshan’wini ya sweswo ku tlula 600 wa Timbhoni ta Yehovha eNamibia ti nkhensa swinene Tata wa tona wa le tilweni, naswona sweswi ti nga vula ti ku: “Hlav̌utelo ya marito ya wena ya v̌oninga, yi nyika la’v̌o riv̌ala e ku twisisa.”—Pisalema 119:130.

[Swifaniso leswi nga eka tluka 25]

Ku twarisa mahungu lamanene exikarhi ka Maherero

Ku hundzuluxela tibuku ta Vukreste leswaku ku pfuniwa vanhu va le Namibia

Tihofisi ta vuhundzuluxeri eNamibia