Xiviko Xa Vahuweleri Va Mfumo

U Kume Xikongomelo eVuton’wini

YESU u ri u tiva tinyimpfu takwe. (Yohane 10:14) Loko munhu a ri ni mbilu leyinene naswona a rhandza ku rhula ni ku lulama, yoloye u ta kokeriwa eka valandzeri va Yesu. Munhu wo tano u ta kuma xikongomelo evuton’wini, hi laha wansati un’wana wa le Belgium a endleke ha kona. Mhaka yakwe hi leyi:

“Loko Timbhoni ta Yehovha ti gongondza enyangweni wa mina, a ndzi ri ni gome naswona a ndzi ehleketa ni ku tihinga. Ndzi tsakele leswi Timbhoni ti swi vuleke mayelana ni ntlhantlho wa swiphiqo swa misava leyi yi vabyaka, kambe lexi ndzi nga xi tsakelangiki i mhaka ya leswaku Xikwembu xa katseka. A ndzi tshike ku ya ekerekeni malembe ya nhungu lama hundzeke, hikuva a ndzi venga vukanganyisi lebyi ndzi byi voneke kona. Hambi swi ri tano, ndzi twe Timbhoni ti ri ni ntiyiso eka leswi ti swi vuleke naswona ndzi xiye leswaku, a swi tika ku hanya handle ka Xikwembu.

“Lexi nga tsakisiki, endzhaku ka maendzo ma nga ri mangani a ndza ha vonananga ni Timbhoni. Ndzi titwe ndzi ri ni gome swinene. Ndzi dzahe maphakete mambirhi ya fole hi siku ni ku tirhisa swidzidzirisi. Hi ku lava ku vulavurisana ni kokwa wa mina la feke, ndzi tirhise mimoya. A ndzi chuhile swinene loko vusiku byin’wana ndzi ri swanga ndzi karhatiwe hi mademona hikwalaho ka sweswo! Leswi swi hete tin’hweti. Vusiku byin’wana ni byin’wana a ndzi chavisiwa, hi ku tiva leswaku a ndzi ri swanga.

“Kutani siku rin’wana loko ndzi ri karhi ndzi famba-famba ndzi tirhisa ndlela leyi a ndzi nga yi tirhisi hakanyingi, ndzi vone ndhawu leyikulu laha ku akiwaka kona. Lexi ndzi hlamariseke ndzi vone ntshungu lowukulu kwalaho. Loko ndzi tshinelela, ndzi kume leswaku a ku ri Timbhoni ta Yehovha leti a ti aka Holo ya Mfumo. Ndzi tsundzuke maendzo lawaya ya Timbhoni ekaya ra mina, ivi ndzi ehleketa hi ntsako lowu nga vaka kona loko misava hinkwayo yo hanya tanihi vanhu lava.

“Ndzi navele swinene leswaku Timbhoni ti tlhela ti ta ekaya ra mina, kutani ndzi vulavula ni van’wana va lava a va tirha eholweni yoleyo. Ndzi khongele eka Xikwembu, kutani endzhaku ka khume ra masiku wanuna loyi a ndzi endzeleke ro sungula u tile. U ringanyete leswaku hi tlhela hi ya emahlweni ni dyondzo ya Bibele, ndzi swi tsakerile sweswo. Ku sukela kwalaho u ndzi rhambele eminhlanganweni eHolweni ya Mfumo. Ndzi pfumela. Leswi ndzi swi voneke a ndzo sungula ku swi vona! I khale ndzi lavisisa vanhu lava rhandzanaka ni lava tsakeke. Kutani se ndzi va kumile eku heteleleni!

“Endzhaku ka sweswo ndzi ye eka minhlangano hinkwayo. Endzhaku ka kwalomu ka mavhiki manharhu, ndzi tshike mukhuva wo biha wa ku dzaha. Ndzi cukumete tibuku ta mina ta vungoma bya tinyeleti ni tirhekhodo ta mina ta tinsimu ta vusathana, naswona a ndzi swi twa leswaku mademona ma suka eka mina. Ndzi lulamise mahanyelo ya mina hi ku ya hi mimpimanyeto ya Yehovha ya Bibele naswona endzhaku ka tin’hweti tinharhu ndzi sungule ku chumayela mahungu lamanene. Ndzi khuvuriwile endzhaku ka tin’hweti ta tsevu. Endzhaku ka masiku mambirhi ndzi khuvuriwile ndzi sungule vuphayona bya nkarhinyana.

“Ndzi nkhensa Yehovha hikwalaho ka swilo hinkwaswo leswinene leswi a ndzi endleleke swona. Vutomi bya mina byi na xikongomelo eku heteleleni. Ina, vito ra Yehovha i khokholo ro tiya leri ndzi kumeke vutumbelo ni nsirhelelo eka rona. (Swivuriso 18:10) Ndzi titwa hi laha mupisalema a titweke ha kona loko a tsala Pisalema 84:10 a ku: ‘E ku ṭhama siku riṅwe e ndliwini ya wena, ŝi tlula khume ra madzana e kuṅwana. Nḍi ranḍa e ku ṭhama e rikupakupeni ra yindlu ya Šikwembu ša nga, ku tlula ku ṭhama e miṭongeni ya la’v̌o biha.’”

Wansati loyi la nga ni mbilu leyinene u kume xikongomelo evuton’wini. Kutani un’wana ni un’wana la lavisisaka Yehovha hi mbilu leyinene a nga n’wi kuma.