Vumbhurhi Lebyi Nga Heriki

MUPHATI Walter De la Mare u te: “Vumbhurhi bya hela; vumbhurhi bya hundza.” Leswi swi tano hakunene hi swiluva swa cactus leswi kombisiweke laha. Ku saseka ka swona ku hela hi ku hatlisa.

Mudyondzisiwa wa Mukreste, Yakobo u tsarile: “Ku fana ni xiluva xa nhova, [mufuwi] ú ta hundza. Dyambu ri huma ri ri ni ku hisa ka rona, ri vunisa nhova; swiluva swi wela hansi, ni ku saseka ka swona ku onhaka. Hi mukhuva wolowo, mufuwi na yena ú ta vuna a herisiwa, a ri karhi a landzelela swilo swa yena.”—Yakobo 1:10, 11.

Emisaveni leyi yi cinca-cincaka, rifuwo ri nga nyamalala hi ku hatlisa hakunene. Ku tlula kwalaho, mufuwi—ku fana ni van’wana—u ‘hanya nkarhi wo koma, ku kotisa xiluva.’ (Yobo 14:1, 2) Yesu u vulavule hi xifaniso xa wanuna loyi a ri karhi a hlengeleta rifuwo leswaku a kota ku tshama ehansi a tiphina hi vutomi. Kambe loko a ehleketa leswaku se u kume xin’wana ni xin’wana xa vutomi leswaku a tsaka, hi loko a fa. Yesu u tsundzuxile: “Swi tano ni ka loyi a tihlengeletelaka xuma, a nga fuweri Xikwembu.”—Luka 12:16-21.

‘Ku fuwela Xikwembu.’ Xana Yesu a a vula yini hi sweswo? Munhu la fuweke hi ndlela leyi u ni “rifuwo etilweni”—ku nga vito lerinene ni Xikwembu. Rifuwo ro tano a ri si tshama ri hangalaka. (Matewu 6:20; Vaheveru 6:10) Ematshan’weni yo fana ni xiluva lexi vunaka, eBibeleni munhu wo tano u fanisiwa ni murhi, lowu matluka ya wona ma nga vuniki. Naswona hi tiyisekisiwa leswaku “hikwaŝo leŝi a ŝi endlaka ŝi ta kateka.”—Pisalema 1:1-3, 6.