Wa Tsundzuka Xana?

Xana u kume minkandziyiso ya sweswinyana ya Xihondzo xo Rindza yi ri ya nkoka ke? U nga kambela mianakanyo ya wena hi swivutiso leswi landzelaka:

▫ Loko hi ngheniwa hi mianakanyo leyi thyakeke hi nga swi rindzelanga, xana hi fanele hi endla yini?

Hi fanele hi hundzula miehleketo, hi famba hi tiolola milenge, hi hlayanyana tibuku, hi endla xintirhwana xa le kaya. Xikhongelo na xona xa pfuna swinene eka xiyimo xo tano. (Pisalema 62:8)—4/15, tluka 17.

▫ Ha yini vantshwa va fanele va va ni vuxiya-xiya eka muxaka wa vuyimbeleri lebyi va byi yingiselaka?

Vuyimbeleri byi na matimba yo nyanyula, yo phasa ni ku kucetela. Leswi mixaka ya vuyimbeleri lebyi dumeke yi nga na marito yo tala ya rimbewu ni ku tikhoma loko biha, swa olova ku vona leswaku ku laveka vukheta lebyikulu loko ku hlawuriwa tirhekhodo, tikhasete ni tidisk.—4/15, matluka 20-1.

▫ Xana xiga lexi nge “vukona bya Hosi ya hina Yesu Kreste” xi vula yini? (1 Vatesalonika 5:23, NW)

Xi vula vukona bya ximfumo bya Hosi Yesu Kreste tanihi Hosi, ku sukela hi 1914 ni le ndzhaku ka rona, endzhaku ka ku vekiwa ka yena exiluvelweni etilweni. (Pisalema 110:1, 2)—5/1, tluka 11.

▫ Xana ku basisa ka Yehovha tempele ya yena ya moya a swi hetisisa xikongomelo xihi? (Malakiya 3:1-4)

Yehovha a lava leswaku tempele yakwe yi va exiyin’weni lexi baseke leswaku loko vagandzeri lavo tala lava nga ni mintshembo ya la misaveni va tisiwe eka yona, va ta kota ku kuma ndhawu leyi vuhosi byakwe bya vuako hinkwabyo byi xiximiwaka eka yona, laha vito rakwe ra vukwembu ri kwetsimisiwaka kona, ni laha milawu ya yena leyo lulama yi yingisiwaka kona.—5/1, tluka 16.

▫ Xana i yini “rifuwo” leri Kreste Yesu a ri nyikaka nandza wakwe loyi a hlawuriweke? (Matewu 24:45-47)

“Rifuwo” leri i swilo hinkwaswo swa moya leswi nga emisaveni leswi nga hundzuka nhundzu ya Kreste mayelana ni vulawuri bya yena tanihi Hosi ya le tilweni. Leswi swi katsa ntirho wa ku endla vadyondzisiwa va Kreste hi vanhu va matiko hinkwawo. (Matewu 28:19, 20)—5/1, tluka 17.

▫ Vakulu va Vakreste va ku kombisisa ku yini ‘ku tirhandzela’ loko va risa, hi ku ya hi xitsundzuxo xa Petro eka 1 Petro 5:2?

Nkulu wa Mukreste la khathalelaka tinyimpfu u ta risa hi ku swi rhandza, hi ku swi tsakela ehansi ka nkongomiso wa Murisi Lonene, Yesu Kreste. Ku tirha hi ku swi rhandza nakambe swi vula leswaku murisi la nga Mukreste u tiveka ehansi ka vulawuri bya Yehovha naswona a kombisa xichavo eka lunghiselelo ra le tilweni.—5/15, tluka 20.

▫ Xana Yesu a a vula yini loko a vule leswaku un’wana ni un’wana loyi a n’wi landzaka u fanele a ‘titshika’? (Matewu 16:24)

Ku ‘titshika’ swi vula leswaku u tiveka ehansi ka Yehovha. (1 Vakorinto 6:19, 20) Swi vula leswaku a wu hanyeli ku titsakisa, kambe u tsakisa Xikwembu. (Varhoma 14:8)—6/1, tluka 9.

▫ I yini lexi endlaka munhu a tsaka?

Ku tiphina hi vuxaka lebyinene na Yehovha ni ku tshama u khomekile entirhweni wa yena swi tisa ntsako wa ntiyiso evuton’wini bya munhu.—6/1, tluka 22.

▫ Ha yini Yehovha a pfumelele Abrahama leswaku a vulavula na yena a ntshunxekile hi xikongomelo xa Yena xo lovisa Sodoma? (Genesa 18:22-32)

Xivangelo xin’wana hi leswaku Abrahama a a ri munghana wa Xikwembu. (Yakobo 2:23) Ku tlula kwalaho, Yehovha a a ri vona gome ra Abrahama. Xikwembu a xi swi tiva leswaku Lota, n’wana makwavo wa Abrahama, a a tshama le Sodoma, ni leswaku Abrahama a khumbeka ngopfu hi vuhlayiseki bya Lota. Hikwalaho ka leswi, Yehovha a a swi rhandza ku hlamula swivutiso swa Abrahama malunghana ni xikongomelo xa Yena xo lovisa Sodoma.—6/15, tluka 16.

▫ Xana Ndzhundzhunuko wa Protestente wa lembe xidzana ra vu-16 a wu vula ku vuya ka Vukreste bya ntiyiso?

Doo, a wu endlanga tano! Ematshan’wini yo vuyetela Vukreste bya xiviri, Ndzhundzhunuko wu vange vutiko kumbe tikereke ta vutiko leti lavaka ku rhandziwa hi matiko ya politiki ni ku ma seketela hi ku hiseka etinyimpini.—7/1, matluka 10-11.

▫ ‘Rifuwo etilweni’ leri Yesu a vulavuleke ha rona eka Matewu 6:20 i yini?

Leri i rifuwo leri nga heriki, ku katsa ni ku va ni vito lerinene na Yehovha ni rhekhodo ya ntirho wo tshembeka wa Vukreste. Leswi i swin’wana swa swilo leswi Yehovha a nga swi rivaliki. (Vaheveru 6:10)—7/1, tluka 32.

▫ I timfanelo tihi leti Petro a ti hlamuseleke tanihi switirho swa nkoka eka ripfumelo ra hina? (2 Petro 1:5-7)

Petro u vule leswaku vunene, vutivi, ku tikhoma, ku tiyisela, ku chava Xikwembu, rirhandzu ra vumakwerhu ni rirhandzu swi fanele swi nghenisiwa eka ripfumelo ra hina.—7/15, tluka 13.

▫ I xitsundzuxo xihi eka malandza ya Xikwembu lexi nga emhakeni ya xidyoho xa Davhida na Batixeba? (2 Samuwele 11:2-4)

Hambi leswi a a ntshunxekile leswaku a tiphina evukatini byakwe, Davhida u pfumelele ku navela kakwe ka vuoswi ku kula. Loko a xiye ndlela leyi nsati wa Uriya a a saseke ha yona, a nga yi lawulanga mianakanyo yakwe—ni xiendlo—xa ku tiphina hi vuoswi na yena. Leswi swi nga ha humelela eka un’wana wa malandza ya Xikwembu loko a nga fularheli muxaka lowu wa makwanga. (Yakobo 1:14, 15)—8/1, tluka 14.