“Tiyisani Timbilu Ta N’wina”
“Hikuva ku laveka leswaku mi tiyisela, leswaku, loko mi endle ku rhandza ka Xikwembu, mi ta amukela ku hetiseka ka xitshembiso.”—VAHEVERU 10:36.
1, 2. (a) Ku humelele yini eka Vakreste vo tala hi lembe-xidzana ro sungula? (b) Hikwalaho ka yini swi olova leswaku ripfumelo ri tsana?
EKA vatsari hinkwavo va Bibele, a nga kona la vulavuleke hi ripfumelo makhamba yo tala hilaha muapostola Pawulo a endleke hakona. Hi ku phindha-phindha u vulavule hi lava ripfumelo ra vona ri tsaneke kumbe ri feke. Hi xikombiso, Himenayo na Aleksandro “ripfumelo ra vona ri tshovek[e] ku fana ni xikepe lexi tshovekeke.” (1 Timotiya 1:19, 20) Demasi u fularhele Pawulo “hileswi a rhandzeke mafambiselo ya swilo ya sweswi.” (2 Timotiya 4:10) Van’wana, hikwalaho ka swiendlo swa vona leswi nga riki swa Vukreste, swa vuhunguki, va “landzule ripfumelo.” Van’wana va xisiwe hi vutlhari bya mavunwa kutani va ‘hambuka eripfumelweni.’—1 Timotiya 5:8; 6:20, 21.
2 Hikwalaho ka yini Vakreste volavo lava totiweke va hluriwe hi swilo leswi? Phela, “ripfumelo i ku langutela loku tiyisekisiweke ka swilo leswi tshembiwaka, vumbhoni lebyi tiyeke bya leswi nga swa xiviri hambiloko swi nga voniwi.” (Vaheveru 11:1) Hi va ni ripfumelo eka leswi hi nga kotiki ku swi vona. A hi ri lavi eka swilo leswi hi swi vonaka. Swa olova ku tirhela rifuwo leri hi ri vonaka ku ri ni ku tirhela rifuwo leri nga vonakiki ra moya. (Matewu 19:21, 22) Swilo swo tala leswi vonakaka—swo tanihi “ku navela ka nyama ni ku navela ka mahlo”—swi koka swinene nyama ya hina leyi nga hetisekangiki naswona swi nga ri tsanisa ripfumelo ra hina.—1 Yohane 2:16.
3. Mukreste u fanele a hlakulela ripfumelo ra muxaka muni?
3 Kambe, Pawulo u ri, “la tshinelelaka Xikwembu u fanele a kholwa leswaku xi kona ni leswaku hi xona muhakeri wa lava xi lavaka hi mbilu hinkwayo.” Muxe a a ri ni ripfumelo ro tano. A a “languta swinene-nene eku nyikiweni ka hakelo” naswona “a a hambeta a tserhama onge hiloko a vona Loyi a nga vonakiki.” (Vaheveru 11:6, 24, 26, 27) Mukreste u fanele a va ni ripfumelo ra muxaka lowu. Hilaha swi voniweke hakona eka xihloko lexi hundzeke, Abrahama a a ri xikombiso lexinene emhakeni leyi.
Xikombiso Xa Abrahama Xa Ripfumelo
4. Xana vutomi bya Abrahama byi khumbiwe njhani hi ripfumelo rakwe?
4 Abrahama a a ri eUra loko a kuma xitshembiso xo huma eka Xikwembu xa leswaku u ta veleka mbewu leyi nga ta va nkateko eka vanhu va matiko hinkwawo. (Genesa 12:1-3; Mintirho 7:2, 3) Hikwalaho ka xitshembiso xexo, Abrahama u yingise Yehovha, a sungula hi ku rhurhela eHarani kutani endzhaku a ya eKanana. Kwalaho, Yehovha u tshembise leswaku tiko leri u ta ri nyika mbewu ya Abrahama. (Genesa 12:7; Nehemiya 9:7, 8) Hambiswiritano, swo tala swa leswi Yehovha a swi tshembiseke a a swi ta hetiseka loko Abrahama se a file. Hi xikombiso, Abrahama hi yexe a nga kalanga a va ni ndhawu leyi nga ya yena eKanana—handle ka bakwa ra Makapela, leri a ri xaveke leswaku ri va xilahlo. (Genesa 23:1-20) Hambiswiritano, a a ri tshemba rito ra Yehovha. Ku tlula kwalaho, a a ri ni ripfumelo eka “muti [wa nkarhi lowu taka] lowu nga ni masungulo lama tiyeke, muti lowu muaki ni muendli wa wona ku nga Xikwembu.” (Vaheveru 11:10) Ripfumelo ro tano ri n’wi tiyisile evuton’wini bya yena hinkwabyo.
5, 6. Xana ripfumelo ra Abrahama ri ringiwe njhani malunghana ni xitshembiso xa Yehovha?
5 Leswi swi voniwa kahle ngopfu-ngopfu eka xitshembiso xa leswaku mbewu ya Abrahama a yi ta va tiko lerikulu. Leswaku leswi swi va tano, Abrahama a a fanele a va ni n’wana wa jaha, kutani u rindze nkarhi wo leha kukondza a katekisiwa ha yena. A hi swi tivi leswaku a a ri ni malembe mangani loko a twa xitshembiso xa Xikwembu ro sungula, kambe loko a teka riendzo ro leha ro ya eHarani, Yehovha a a nga si n’wi nyika n’wana. (Genesa 11:30) Nkarhi lowu a wu heteke a ri eHarani a wu lehe ku ringana leswaku a kota ku ‘hlengeleta nhundzu ni mimoya-xiviri,’ kutani loko a rhurhela eKanana, a a ri ni malembe ya 75 kasi Sara a a ri ni malembe ya 65 hi vukhale. Kambe, n’wana wa jaha a a nga si va kona. (Genesa 12:4, 5) Loko Sara a ri ni malembe ya kwalomu ka 70, u vone onge se u dyuhale ngopfu leswaku a nga kumela Abrahama n’wana. Hikwalaho, hi ku landza mukhuva wa nkarhi wolowo, u teke nandza wakwe wa xisati, ku nga Agara, a n’wi nyiketa Abrahama, kutani a kuma n’wana wa jaha ha yena. Kambe loyi a a nga ri yena n’wana la tshembisiweke. Agara ni n’wana wakwe, Iximayele va hetelele va hlongoriwile. Kambe, loko Abrahama a n’wi kombelerile, Yehovha u tshembise ku katekisa Iximayele.—Genesa 16:1-4, 10; 17:15, 16, 18-20; 21:8-21.
6 Hi nkarhi lowu faneleke wa Xikwembu—nkarhi wo leha swinene endzhaku ka loko va twe ro sungula hi ta xitshembiso lexi—Abrahama wa malembe ya 100 hi vukhale na Sara wa malembe ya 90 hi vukhale, va kume n’wana wa jaha, Isaka. Mawaku ntsako lowu va veke na wona! Eka mpatswa lowu lowu dyuhaleke a swi fana ni loko va lo pfuka eku feni, loko mimiri ya vona ‘leyi feke’ yi humese vutomi lebyintshwa. (Varhoma 4:19-21) Nkarhi lowu va wu rindzeke a wu lehile, kambe loko xitshembiso xi hetiseka eku heteleleni, ku rindza koloko a ku nga ha vuli nchumu.
7. Ripfumelo ri hlangana njhani ni ku tiyisela?
7 Xikombiso xa Abrahama xi hi tsundzuxa leswaku ripfumelo a ri fanelanga ri va nchumu wa xinkarhana. Pawulo u hlanganise ripfumelo ni ku tiyisela loko a tsarile a ku: “Hikuva ku laveka leswaku mi tiyisela, leswaku, loko mi endle ku rhandza ka Xikwembu, mi ta amukela ku hetiseka ka xitshembiso. . . . A hi muxaka wa vanhu lava tlhelelaka endzhaku eku lovisiweni, kambe hi muxaka lowu nga ni ripfumelo eku londzovotiweni ka moya-xiviri wu hanya.” (Vaheveru 10:36-39) Vo tala i khale va rindzele ku hetiseka ka xitshembiso. Van’wana va rindze vutomi bya vona hinkwabyo. Ripfumelo ra vona leri tiyeke ri va tiyisile. Kutani, ku fana na Abrahama, va ta yi kuma hakelo hi nkarhi wa Yehovha lowu faneleke.—Habakuku 2:3.
Ku Yingisa Xikwembu
8. Xana Xikwembu hi xi yingisa hi ndlela yihi namuntlha, naswona sweswo swi ta ri tiyisa njhani ripfumelo ra hina?
8 Ku ni swilo swa mune leswi tiyiseke ripfumelo ra Abrahama, swilo sweswo swi nga hi pfuna na hina. Xo sungula, u kombise ku ‘tshemba ka yena leswaku Xikwembu xi kona’ hi ku yingisa loko Yehovha a vulavula. Xisweswo, a a hambanile ni Vayuda va le sikwini ra Yeremiya, lava a va pfumela eka Yehovha kambe va nga ma tshembi marito yakwe. (Yeremiya 44:15-19) Namuntlha, Yehovha u vulavula na hina hi ku tirhisa Bibele, Rito rakwe leri huhuteriweke, leri Petro a vuleke leswaku ri fana ni “rivoni leri voningaka endhawini ya munyama . . . etimbilwini ta n’wina.” (2 Petro 1:19) Loko hi hlayisisa Bibele, hi va lava “wundliweke hi marito ya ripfumelo.” (1 Timotiya 4:6; Varhoma 10:17) Ku tlula kwalaho, emasikwini lawa yo hetelela, “hlonga ro tshembeka ni ro tlhariha” ri hi nyika ‘swakudya swa moya hi nkarhi lowu faneleke,’ nkongomiso wo tirhisa misinya ya milawu ya Bibele ni ku twisisa vuprofeta bya Bibele. (Matewu 24:45-47) Ku yingisa Yehovha hi tindlela leti hi swona swi nga ta endla leswaku ripfumelo ra hina ri tiya.
9. Xana ku ta humelela yini loko hi wu kholwa hakunene ntshembo wa Vukreste?
9 Ripfumelo ra Abrahama a a ri fambisana swinene ni ntshembo wa yena. “A a ri ni ripfumelo leri seketeriweke hi ntshembo, ra leswaku a ta va tata wa matiko yo tala.” (Varhoma 4:18) Lowu i nchumu wa vumbirhi lowu wu nga hi pfunaka. A hi fanelanga hi rivala leswaku Yehovha i “muhakeri wa lava [va n’wi] lavaka hi mbilu hinkwayo.” Muapostola Pawulo u te: “Hi tirha hi matimba naswona ha tikarhata, hikuva hi veke ntshembo wa hina eka Xikwembu lexi hanyaka.” (1 Timotiya 4:10) Loko hakunene hi wu kholwa ntshembo wa Vukreste, vutomi bya hina hinkwabyo byi ta va xikombiso xa ripfumelo ra hina, hilaha a swi ri hakona hi Abrahama.
Ku Vulavula Ni Xikwembu
10. I xikhongelo xa muxaka muni lexi nga tiyisaka ripfumelo ra hina?
10 Abrahama u vulavule ni Xikwembu, naswona lowu i nchumu wa vunharhu lowu tiyiseke ripfumelo ra yena. Namuntlha, na hina hi nga vulavula na Yehovha, hi ku tirhisa nyiko ya xikhongelo ha Yesu Kreste. (Yohane 14:6; Vaefesa 6:18) Endzhaku ka ku vulavula hi xifaniso lexi kandziyisaka nkoka wa ku khongela nkarhi na nkarhi, Yesu u vutise xivutiso lexi: “Loko N’wana wa munhu a fika, xana kunene u ta ri kuma ripfumelo emisaveni?” (Luka 18:8) Xikhongelo lexi akaka ripfumelo hi lexi anakanyiweke kahle naswona a xi titeli. Xi ni xikongomelo hakunene. Hi xikombiso, xikhongelo xa mbilu hinkwayo xa laveka loko hi langutane ni swiboho swa nkoka kumbe loko hi tshikilelekile swinene.—Luka 6:12, 13; 22:41-44.
11. (a) Abrahama u tiyisiwe njhani loko a pfulele Xikwembu mbilu yakwe? (b) I yini lexi hi nga xi dyondzaka eka ntokoto wa Abrahama?
11 Loko Abrahama a dyuhala naswona Yehovha a nga si n’wi nyika mbewu leyi tshembisiweke, u vulavule ni Xikwembu hi xivilelo xa yena. Yehovha u n’wi tiyisekisile. Vuyelo byi ve byihi? Abrahama ‘u kombise ripfumelo eka Yehovha; kutani a swi hlaya eka yena leswaku i ku lulama.’ Hiloko Yehovha a n’wi nyika xikombiso xo tiyisekisa marito ya yena, lama nyikaka ntshembo. (Genesa 15:1-18) Loko hi pfulela Yehovha timbilu ta hina hi xikhongelo, hi amukela xitiyisekiso xa Yehovha xo huma eRitweni rakwe, ku nga Bibele, kutani hi n’wi yingisa hi ripfumelo leri heleleke, Yehovha na yena u ta tiyisa ripfumelo ra hina.—Matewu 21:22; Yuda 20, 21.
12, 13. (a) Abrahama u katekisiwe njhani loko a landzelele nkongomiso wa Yehovha? (b) I mintokoto ya njhani leyi nga tiyisaka ripfumelo ra hina?
12 Nchumu wa vumune lowu tiyiseke ripfumelo ra Abrahama a ku ri nseketelo lowu Yehovha a n’wi nyikeke wona loko a landzelela nkongomiso wa Xikwembu. Loko Abrahama a ye a ya ponisa Lota eka tihosi leti hlaselaka, Yehovha u n’wi pfunile leswaku a hlula. (Genesa 14:16, 20) Loko Abrahama a ha tshame tanihi muaki wa xinkarhana etikweni leri mbewu yakwe a yi ta nyikiwa rona, Yehovha u n’wi katekisile hi swilo leswi vonakalaka. (Ringanisa Genesa 14:21-23.) Yehovha u katekise matshalatshala ya nandza wakwe leswaku a kumela Isaka nsati la fanelekaka. (Genesa 24:10-27) Ina, Yehovha u “katekisile Abraham e ŝilweni hikwaŝo.” (Genesa 24:1) Sweswo swi endle ripfumelo rakwe ri tiya ni vuxaka bya yena byi va ekusuhi na Yehovha Xikwembu lerova Yehovha a kala a ku i ‘nakulobye wa mina.’—Esaya 41:8; Yakobo 2:23.
13 Xana hina namuntlha hi nga va na rona ripfumelo ro tiya hi ndlela leyi? Ina. Loko hina, ku fana na Abrahama, ho ringa Yehovha hi ku yingisa milawu ya yena, na hina u ta hi katekisa, kutani sweswo swi ta tiyisa ripfumelo ra hina. Hi xikombiso, loko hi hlometelanyana eka Xiviko xa Ntirho xa Lembe ra 1998 hi kuma leswaku vo tala va katekisiwile swinene loko va yingisa xileriso xa yena xo chumayela mahungu lamanene.—Marka 13:10.
Rhekhodo Ya Vutshembeki Namuntlha
14. Xana Yehovha u ri katekise njhani tsima ra Kingdom News No. 35?
14 Le ndzhaku hi October 1997, tsima ra misava hinkwayo ro fambisa Kingdom News No. 35 ri humelerile swinene, hikwalaho ka ku chivirika ni ku hiseka ka Timbhoni ta timiliyoni. Xikombiso lexinene hi lexi humeleleke le Ghana. Ku fambisiwe tikopi ta kwalomu ka 2,5 wa timiliyoni hi tindzimi ta mune, naswona ku komberiwe tidyondzo ta Bibele ta kwalomu ka 2 000 hikwalaho ka tsima leri. Le Cyprus, Timbhoni timbirhi leti hangalasaka Kingdom News ti vone mufundhisi a ri karhi a ti sele hi le ndzhaku. Endzhakunyana, ti n’wi fambisele kopi ya Kingdom News. Leswi se a a yi kumile kopi, u te: “Ndzi tsakisiwe swinene hi rungula ra kona lerova ndzi navela ku nkhensa vanhu lava va ri tsaleke.” Le Denmark, ku hangalasiwe tikopi ta Kingdom News ta kwalomu ka 1,5 wa timiliyoni, naswona vuyelo byi ve lebyinene. Wansati la tirhaka eka ndzawulo yo pfuna vanhu u te: “Xiphephana lexi xi ni rungula leri fanelaka vanhu hinkwavo. Ri twisiseka hi ku olova, naswona ri ku susumetela ni ku ku endla u navela ku tiva leswi engetelekeke. Ri ba nhloko ya mhaka hakunene!”
15. Hi yihi mintokoto leyi kombisaka leswaku Yehovha u ma katekisile matshalatshala yo fikelela vanhu kun’wana ni kun’wana?
15 Hi 1998 ku endliwe matshalatshala yo chumayela vanhu kun’wana ni kun’wana ku nga ri emakaya ya vona ntsena. Le Côte d’Ivoire, mpatswa lowu nga varhumiwa wu endzele swikepe swa 322 eswikhumulweni swa swikepe. Va fambise tibuku ta 247, timagazini ta 2 284, tibroxara ta 500 ni madzanadzana ya swiphephana, swin’we ni tivhidiyo leswaku vatluti va ta ti hlalela loko va ri elwandle. Le Canada Mbhoni yin’wana yi ye endhawini yo lunghisela mimovha. N’wini wa ndhawu u tsakerile, kutani makwerhu loyi u tshame mune wa tiawara ni hafu, hambileswi nkarhi lowu a wu heteke a ri karhi a nyikela vumbhoni, wu endleke awara yin’we ntsena, hikwalaho ko kavanyetiwa hi lava tiseke mimovha. Eku heteleleni, u hlele dyondzo leyi a yi ta fambisiwa hi awara ya khume nivusiku. Kambe minkarhi yin’wana a swi nga koteki ku sungula dyondzo ku kondza ku va xikarhi ka vusiku naswona dyondzo a yi hela hi awara ya mbirhi nimixo. Xiyimiso lexi a xi tika kambe ku ve ni vuyelo lebyinene. Wanuna loyi u kunguhate ku pfala xitolo xakwe hi Sonto leswaku a ta kota ku ta eminhlanganweni. Hi ku hatlisa yena ni ndyangu wakwe va endle nhluvuko lowunene.
16. Hi yihi mintokoto leyi kombisaka leswaku broxara leyi nge Leswi Xi Swi Languteleke ni buku leyi nge Vutivi i switirho swa matimba swinene entirhweni wo chumayela ni ku dyondzisa?
16 Broxara leyi nge I Yini Leswi Xikwembu Xi Swi Languteleke Eka Hina? ni buku leyi nge Vutivi Lebyi Yisaka eVuton’wini Lebyi Nga Heriki ta ha ri switirho swa matimba entirhweni wo chumayela ni ku dyondzisa. Le Italiya, nani leyi a yi rindzele bazi yi amukele kopi ya Kingdom News. Siku leri tlhandlamaka, ku vulavuriwe na yona nakambe, kutani yi amukela broxara leyi nge Leswi Xi Swi Languteleke. Siku rin’wana ni rin’wana endzhaku ka leswi, a a yi va ni dyondzo ya Bibele ya timinete ta 10 ku ya eka 15 loko ya ha rindzele bazi. Endzhaku ka n’hweti ni hafu, yi kunguhate ku suka ekaya ra tinani kutani yi tlhelela ekaya eGuatemala leswaku yi ta ya emahlweni ni dyondzo ya yona. Le Malawi, mungheni wa kereke la hisekaka swinene la vitaniwaka Lobina u hlundzukile swinene loko vana va yena va vanhwanyana va sungula ku dyondza Bibele ni Timbhoni ta Yehovha. Hambiswiritano, swinhwanyetana leswi a swi rungulela mana wa swona ntiyiso wa Bibele loko xiyimo xi pfumela. Hi June 1997, Lobina u vone buku leyi nge Vutivi kutani a tsakisiwa hi marito lama nge “Vutivi Lebyi Yisaka.” Hi July u amukele dyondzo ya Bibele. Hi August u ve kona entsombanweni wa muganga naswona u wu yingisise kahle nongonoko hinkwawo. Eku heleni ka n’hweti yoleyo, se a humile ekerekeni ya yena naswona a fanelekela ku va muhuweleri la nga khuvuriwangiki. U khuvuriwe hi November 1997.
17, 18. Xana tivhidiyo ta Sosayiti ti tikombise ti ri leti pfunaka ku endla vanhu va “vona” swilo swa moya hi ndlela yihi?
17 Tivhidiyo ta Sosayiti ti pfune vanhu vo tala leswaku va “vona” swilo swa moya. Le Mauritius wanuna un’wana u tshike kereke yakwe hikwalaho ka ku avana loku a ku ri kona. Murhumiwa u n’wi kombe vun’we bya Timbhoni ta Yehovha, a tirhisa vhidiyo leyi nge United by Divine Teaching (Ku Hlanganisiwa Hi Dyondzo Ya Xikwembu). Hi ku tsakisiwa hi yona, wanuna loyi u te: “N’wina Timbhoni ta Yehovha ana se mi le Paradeyisini!” U amukele dyondzo ya Bibele. Makwerhu wa xisati le Japani u kombise nuna wakwe la nga riki mupfumeri vhidiyo leyi nge Jehovah’s Witnesses—The Organization Behind the Name (Timbhoni ta Yehovha—Nhlengeletano Leyi Vitaniwaka Hi Vito Rero) naswona u tsakisiwe hi yona lerova a va ni dyondzo ya Bibele ya nkarhi na nkarhi. Endzhaku ko hlalela vhidiyo leyi nge United by Divine Teaching, u navele ku va un’wana wa Timbhoni ta Yehovha. Tivhidiyo tinharhu leti tlhandlamanaka leti nga ni xihloko lexi nge The Bible—A Book of Fact and Prophecy (Bibele—Buku Ya Ntiyiso Ni Vuprofeta) ti n’wi pfune leswaku a kota ku tirhisa misinya ya milawu ya Bibele evuton’wini byakwe. Yo hetelela, Jehovah’s Witnesses Stand Firm Against Nazi Assault (Timbhoni Ta Yehovha Ti Yima Ti Tiyile eHansi Ka Nhlaselo Wa Manazi) yi n’wi kombe leswaku Yehovha wa va tiyisa vanhu Vakwe loko va hlaseriwa hi Sathana. Wanuna loyi u khuvuriwe hi October 1997.
18 Leyi yo va mintokoto yi nga ri yingani ntsena eka leyo tala swinene leyi veke kona eka lembe ra ntirho leri hundzeke. Yi kombisa leswaku Timbhoni ta Yehovha ti ni ripfumelo leri hanyaka ni leswaku Yehovha u tiyisa ripfumelo rero hi ku katekisa mintirho ya tona.—Yakobo 2:17.
Hlakulela Ripfumelo Namuntlha
19. (a) Xana hina hi le ka xiyimo xo antswa ku ri ni xa Abrahama hi ndlela yihi? (b) I vangani lava hlengeletaneke n’wexemu ku tlangela rifu ra gandzelo ra Yesu? (c) Hi wahi matiko lama veke ni tinhlayo leti tlakukeke n’wexemu eXitsundzuxweni? (Vona chati eka tluka 12 ku ya eka 15.)
19 Hina namuntlha hi le ka xiyimo xo antswa swinene ku tlula xa Abrahama hi tindlela to tala. Ha swi tiva leswaku Yehovha u swi hetisise hinkwaswo switshembiso swakwe eka Abrahama. Vatukulu va Abrahama va ri kumile tiko ra Kanana, naswona va hundzuke tiko lerikulu hakunene. (1 Tihosi 4:20; Vaheveru 11:12) Ku tlula kwalaho, malembe ya 1 971 endzhaku ka loko Abrahama a sukile eHarani, ntukulu-xinguwe wakwe, Yesu, u khuvuriwile ematini hi Yohane lowo Khuvula kutani endzhaku a khuvuriwa hi moya lowo kwetsima hi Yehovha hi yexe leswaku a va Mesiya, Mbewu ya Abrahama hi tlhelo ra moya hilaha ku heleleke. (Matewu 3:16, 17; Vagalatiya 3:16) Hi Nisan 14, 33 C.E., Yesu u nyikele vutomi bya yena byi va nkutsulo eka lava nga ta kombisa ripfumelo eka yena. (Matewu 20:28; Yohane 3:16) Sweswi timiliyoni ta vanhu ti nga tikatekisa ha yena. N’wexemu, vanhu va 13 896-312 va hlengeletanile hi Nisan 14 leswaku va tlangela xiendlo lexi lexi hlamarisaka xa rirhandzu. Mawaku ndlela leyi Yehovha a lweriweke ha yona, Muhlayisi Lonkulu wa switshembiso!
20, 21. Vanhu vo huma eka matiko hinkwawo va tikatekise njhani hi Mbewu ya Abrahama hi lembe-xidzana ro sungula, naswona xana va tikatekisa njhani namuntlha?
20 Hi lembe-xidzana ro sungula, vanhu vo tala vo huma ematikweni hinkwawo—ku sungula hi Israyele wa nyama—va kombise ripfumelo eka Mbewu leyi ya Abrahama kutani va va vana lava totiweke va Xikwembu, swirho swa “Israyele wa Xikwembu” lontshwa wa moya. (Vagalatiya 3:26-29; 6:16; Mintirho 3:25, 26) A va ri ni ku langutela loku tiyeke ko kuma vutomi bya moya lebyi nga riki na ku fa ematilweni, va ri vafumi-kulobye eMfun’weni wa Xikwembu. I vanhu va 144 000 ntsena lava nga ta katekisiwa hi ndlela leyi, naswona ku sele va nga ri vangani va vona. (Nhlavutelo 5:9, 10; 7:4) N’wexemu, 8 756 va kombise leswaku i va nhlayo leyi hi ku dya swifanekiselo hi nkarhi wa ku tlangeriwa ka Xitsundzuxo.
21 Vo tala va Timbhoni ta Yehovha namuntlha i va “ntshungu lowukulu” lowu vhumbhiweke eka Nhlavutelo 7:9-17. Hi mhaka ya leswi va tikatekisaka ha Yesu, va ni ntshembo wo kuma vutomi lebyi nga heriki emisaveni leyi nga paradeyisi. (Nhlavutelo 21:3-5) Vanhu va 5 888 650 lava hlanganyeleke entirhweni wo chumayela hi 1998 va nyikela vumbhoni bya leswaku i ntshungu “lowukulu” hakunene. A swi nyanyula swinene ku vona Russia na Ukraine ma vika vahuweleri vo tlula 100 000 ro sungula. Nakambe xiviko xa le United States a xi ri lexi xiyekaka swinene—vahuweleri va 1 040 283 hi August! Lawa mo va matiko manharhu eka lawa ya 19 lama vikeke vahuweleri vo tlula 100 000 n’wexemu.
Ntshembo Lowu Nga Ta Hetiseka Ku Nga Ri Khale
22, 23. (a) Hikwalaho ka yini hi fanele hi tiyisa timbilu ta hina namuntlha? (b) Hi nga tikombisa njhani hi ri lava fanaka na Abrahama, hi nga fani ni lava pfumalaka ripfumelo lava boxiweke hi Pawulo?
22 Vanhu lava veke kona eXitsundzuxweni va tsundzuxiwile leswaku se hi fike kwihi malunghana ni ku hetiseka ka switshembiso swa Yehovha. Hi 1914, Yesu u vekiwe tanihi Hosi ya Mfumo wa Xikwembu wa le tilweni, a sungula vukona byakwe ematimbeni ya Mfumo. (Matewu 24:3; Nhlavutelo 11:15) Ina, Mbewu ya Abrahama sweswi ya fuma etilweni! Yakobo u byele Vakreste va siku rakwe a ku: “Lehisani mbilu; tiyisani timbilu ta n’wina, hikuva vukona bya Hosi byi tshinele.” (Yakobo 5:8) Ina, vukona byebyo se byi kona sweswi! Vona xivangelo lexinene swonghasi xo endla timbilu ta hina ti tiya!
23 Onge ku tshemba ka hina switshembiso swa Xikwembu ku nga ya emahlweni ku pfuxetiwa nkarhi na nkarhi hi dyondzo ya Bibele ni xikhongelo lexi humaka embilwini. Onge hi nga tshama hi ri karhi hi kuma mikateko ya Yehovha hi ku yingisa Rito rakwe. Kutani hi ta fana na Abrahama, a hi nge fani ni lava ripfumelo ra vona ri tsaneke ni ku fa, hilaha Pawulo a vuleke hakona. A xi kona lexi nga ta hi hambanisa ni ripfumelo ra hina ro kwetsima ngopfu. (Yudha 20) Onge leswi swi nga va tano eka malandza ya Yehovha hinkwawo hi lembe ra ntirho ra 1999 ni hilaha ku nga heriki.
Wa Swi Tiva Xana?
◻ Hi nga xi yingisa njhani Xikwembu namuntlha?
◻ Hi yihi mimpfuno ya ku khongela hi mbilu hinkwayo eka Xikwembu?
◻ Loko hi ku titsongahata hi landzela nkongomiso wa Yehovha, xana ri ta tiyisiwa njhani ripfumelo ra hina?
◻ I yini lexi xi ku tsakiseke swinene eka xiviko xa lembe na lembe (tluka 12 ku ya eka 15)?
[Chati leyi nga eka tluka 12-15]
1998 SERVICE YEAR REPORT OF JEHOVAH’S WITNESSES WORLDWIDE
(See bound volume)
[Xifaniso lexi nga eka tluka 16]
Loko ho yingisa Rito ra Yehovha, ku tshemba ka hina switshembiso swakwe ku ta pfuxetiwa
[Xifaniso lexi nga eka tluka 18]
Ripfumelo ra hina ra tiya loko hi hlanganyela entirhweni wa nsimu