Ku Fana Ni Switsotso

XANA u tshama u chochovela ebyanyini hi ximumu ivi u vona switsotso swa ntsandza vahlayi swi thamuka-thamuka laha u fambaka kona? Swi vonaka swi tele hinkwako, hambi leswi u nga ha vaka u nga swi tekelanga nhlokweni. Phela swi vonaka swi nga ri na khombo naswona swi nga vuli nchumu.

Kambe, ku vonaka ka switsotso swi ri leswi nga vuliki nchumu ku swi endla swi fanekisela kahle vanhu. Hambi leswi vanhu van’wana lava dumeke va nga titekaka va ri va nkoka ngopfu, Muvumbi wa hina a nga va teki tano. Muprofeta wakwe Esaya u te: ‘Ku ni Loyi a tshamaka ehenhla ka xirhendzevutana xa misava, laha vaaki va kona va fanaka ni switsotso.’—Esaya 40:22.

Vukulu, matimba ni vutlharhi bya Yehovha Xikwembu swi n’wi tlakusa a va ehenhla ka vanhu, ku fana ni munhu leswi a tlulaka ngopfu switsotso hi vutlharhi ni matimba. Hambi swi ri tano, mfanelo ya Xikwembu leyikulu i rirhandzu. Naswona rirhandzu ra xona leri nga ringanisiwiki na nchumu ri xi susumetela ku hi khathalela, ku hi pfuna ni ku hi ponisa—loko hi xi rhandza ni ku xi yingisa. Yehovha u hanyisana na hina hi rirhandzu hambi leswi hi fanaka ni switsotso leswi nga vuliki nchumu. Mupisalema u te: “I mani l’a fanaka na Yehova, Šikwembu ša hina, l’a akeke šiv̌andleni ša le henhla-henhla, l’a koramelaka hansi, a hlometela e matilweni ne misav̌eni? A pfuša e nṭhurini l’a nge khombyeni.”—Pisalema 113:5-7.

Hi laha pisalema leyi yi hlamuselaka ha kona, Yehovha wa va pfuna lava nga ekhombyeni hi rirhandzu. Ina, U pfuna lava hi ku titsongahata va ‘lavaka Xikwembu leswaku va ta xi kuma hakunene.’ (Mintirho 17:27) Lava va kumaka Xikwembu—ni ku xi tirhela—va tlhela va va va nkoka emahlweni ya xona. (Ringanisa Esaya 43:4, 10.) Kutani xitsotso lexi nga nyawuriki xi hi tsundzuxa hi ku nga vuli nchumu ka hina ni rirhandzu ra Muvumbi wa hina wa matimba hinkwawo, loyi a vaka munghana wa vanhu lava yingisaka ni ku va komba tintswalo leti nga fanelangiki. Xana wa ku kombisa ku tlangela rirhandzu ra Xikwembu?