Swivutiso Swa Vahlayi

Eka varhoma 9:3, muapostola Pawulo u tsale a ku: “A ndzi ta navela, mina hi xiviri xa mina, ku va loyi a cukumetiwaka, ndzi hambanisiwa na Kriste hikwalaho ka vona lava nga va rixaka ra ka hina hi ku velekiwa.” Xana a a vula leswaku a a ta fela ku ponisa Vayuda-kulobye?

Yesu u veke xikombiso lexikulu swinene xa rirhandzu. A a tiyimiserile ku nyikela hi moya-xiviri wakwe, kumbe vutomi, a nyikelela vanhu lava nga vadyohi. Hi nkarhi wa vutirheli byakwe bya le rivaleni, u tinyike nkarhi a pfuna varikwavo—Vayuda—leswaku hi laha swi nga kotekaka ha kona vo tala va ta pfuneka hi gandzelo rakwe ra nkutsulo. (Marka 6:30-34) Ku ala ni ku kaneta ka vona mahungu ya ku pona a ku kalanga ku hunguta nkhathalelo wa Yesu wa rirhandzu eka Vayuda. (Matewu 23:37) Kutani u hi siyele ‘ntila wo va hi landzela mikondzo yakwe.’—1 Petro 2:21.

Xana swa koteka eka vanhu lava nga hetisekangiki leswaku va landzela xikombiso xa Yesu xa rirhandzu? Ina, hi nga vona xikombiso xa leswi eka muapostola Pawulo. A a khathalela ngopfu Vayuda-kulobye lerova, hi ku va rhandza, u te u navela onge yena hi xiviri a ngo “hambanisiwa na Kriste” hikwalaho ka vona.

Laha Pawulo u tirhise xithathelo leswaku a vula mhaka leyi. Yesu u tirhise xithathelo lexi fanaka eka Matewu 5:18, loko a ku: “Tilo ni misava swi nga si nyamalala, xihikwana kumbe xirhatana, hambi xi ri xin’we, xi nga ka xi nga susiwi eNawini, ku kondza loko swilo hinkwaswo swi ta va swi hetisekile.” Yesu a a swi tiva leswaku tilo ni misava a swi nga ta hundza. Pawulo a a nga ta cukumetiwa, naswona a ku nga ta va Vayuda hinkwavo lava a va ta amukela Vukreste. Kambe yinhla ya Pawulo a ku ri leswaku a a ta endla matshalatshala hinkwawo leswaku a pfuna Vayuda va pfuneka hi malunghiselelo ya Xikwembu yo pona ha Yesu Kreste. A swi hlamarisi leswi muapostola Pawulo a khutazeke Vakreste-kulobye a ku: “Tekelelani mina, kukotisa leswi na mina ndzi tekelelaka Kriste”!—1 Vakorinto 11:1.

Namuntlha, Vakreste va fanele va va ni nkhathalelo lowu fanaka ni lowu Yesu na Pawulo a va ri na wona eka lava nga riki vapfumeri. Hi nga tshuki hi pfumelela vanhu lava nga tsakeriki kumbe lava kanetaka hi ku kongoma ensin’wini ya hina leyi hi nyikelaka vumbhoni eka yona leswaku va hi heta matimba ya ku rhandza vaakelani va hina ni ku hisekela ka hina ku va pfuna ku dyondza ndlela yo pona.—Matewu 22:39.