Leri I Siku Ra Ku Ponisiwa!
“Maswivo! Sweswi ngopfu-ngopfu i nkarhi wa ku amukeriwa. Maswivo! Sweswi i siku ra ku ponisiwa.”—2 VAKORINTO 6:2.
1. I yini lexi lavekaka leswaku hi amukeleka eka Xikwembu ni le ka Kreste?
YEHOVHA u veke siku leri a nga ta avanyisa vanhu ha rona. (Mintirho 17:31) Loko ri ta va siku ra ku ponisiwa ka hina, hi fanele hi amukeleka eka yena ni le ka Muavanyisi wakwe la n’wi hlawuleke, Yesu Kreste. (Yohane 5:22) Leswaku hi amukeleka, hi fanele hi tikhoma hi ku pfumelelana ni Rito ra Xikwembu ni ripfumelo leri hi susumetelaka ku pfuna van’wana leswaku va va vadyondzisiwa va ntiyiso va Yesu.
2. Ha yini misava leyi ya vanhu yi tihambanisile ni Xikwembu?
2 Misava ya vanhu yi tihambanisile ni Xikwembu hikwalaho ka xidyoho lexi xi kumiweke tanihi ndzhaka. (Varhoma 5:12; Vaefesa 4:17, 18) Hikwalaho, lava hi va chumayelaka va nga ponisiwa ntsena loko va endla vunghana na yena. Muapostola Pawulo u swi veke erivaleni leswi loko a tsalela Vakreste va le Korinto. A hi kambisiseni Vakorinto va Vumbirhi 5:10–6:10, hi vona leswi Pawulo a swi vuleke malunghana ni ku avanyisa, ku vuyelelana ni Xikwembu ni ku ponisiwa.
“Hi Tshamela Ku Khorwisa Vanhu”
3. Xana Pawulo u ‘hambete a khorwisa vanhu’ njhani, naswona ha yini hi fanele hi endla tano namuntlha?
3 Pawulo u fanise vuavanyisi ni ku chumayela loko a tsarile a ku: “Hinkwerhu hi fanele hi kombisiwa emahlweni ka xitshamo xa vuavanyisi xa Kreste, leswaku un’wana ni un’wana a ta kuma hakelo yakwe hi swilo leswi endliwaka hi ku tirhisa miri, hi ku ya hi swilo leswi a a hanya hi swona, swi nga ha va swi ri swinene kumbe swi bihile. Hikokwalaho, hi ku tiva ku chava ka Hosi, hi tshamela ku khorwisa vanhu.” (2 Vakorinto 5:10, 11) Muapostola u ‘hambete a khorwisa vanhu’ hi ku chumayela mahungu lamanene. Ku vuriwa yini hi hina? Tanihi leswi hi langutaneke ni makumu ya mafambiselo lawa yo biha ya swilo, hi fanele hi lwa hi matimba hinkwawo ku khorwisa van’wana leswaku va teka magoza lama lavekaka leswaku Yesu a va avanyisa hi ndlela leyinene naswona va amukeriwa hi N’wini wa ku ponisa, Yehovha Xikwembu.
4, 5. (a) Ha yini hi nga fanelanga hi tibuma hi leswi hi swi endleke entirhweni wa Yehovha? (b) Xana Pawulo u tibume njhani “eka Xikwembu”?
4 Hambiswiritano, loko Xikwembu xi katekise vutirheli bya hina, a hi fanelanga hi tibuma. EKorinto, van’wana a va tidzunisa kumbe va dzunisa vanhu van’wana, xisweswo va vanga ku avana evandlheni. (1 Vakorinto 1:10-13; 3:3, 4) Loko a vulavula hi xiyimo lexi, Pawulo u tsarile: “Nakambe a hi tibumabumeli eka n’wina, kambe hi mi nyika xivangelo xa ku tibuma malunghana na hina, leswaku mi ta swi kota ku hlamula lava tibumaka hi ku languteka ka le handle kambe ku nga ri ka mbilu. Hikuva loko a hi hlanya, a hi ta va hi hlanya eka Xikwembu; loko hi hlutekile emianakanyweni, hi hlutekele n’wina.” (2 Vakorinto 5:12, 13) Vanhu lava tikukumuxaka a va nga byi tsakeli vun’we bya vandlha ni vuhlayiseki bya moya. A va lava ku tibuma hi ku languteka ka le handle ematshan’weni yo pfuna vapfumeri-kulobye leswaku va va ni timbilu letinene emahlweni ka Xikwembu. Hikwalaho, Pawulo u sole vandlha, kutani endzhakunyana a ku: “Loyi a tibumaka, a a tibume eka Yehovha.”—2 Vakorinto 10:17.
5 Xana Pawulo hi byakwe a nga si tshama a tibuma? Van’wana va nga ha va va ehlekete leswaku u tshame a tibuma hikwalaho ka leswi a swi vuleke malunghana ni ku va muapostola. Kambe a a fanele a tibumela “eka Xikwembu.” U tibumile hikwalaho ka ku faneleka ka yena ku va muapostola, leswaku Vakorinto va nga hambuki eka Yehovha. Leswi Pawulo u swi endlele ku va tlherisela eka Xikwembu hikuva vaapostola va mavunwa a va va hambukisa. (2 Vakorinto 11:16-21; 12:11, 12, 19-21; 13:10) Hambiswiritano, Pawulo a a nga tshameli ku ringeta ku tsakisa munhu un’wana ni un’wana hi leswi a swi endleke.—Swivuriso 21:4.
Xana Rirhandzu Ra Kreste Ra Ku Susumeta?
6. Xana rirhandzu ra Kreste ri fanele ri hi khumba njhani?
6 Tanihi muapostola wa ntiyiso, Pawulo u dyondzise van’wana malunghana ni xitlhavelo xa nkutsulo xa Yesu. A xi ri xa risima evuton’wini bya Pawulo, hikuva u tsarile: “Rirhandzu leri Kreste a nga na rona ra hi susumeta, hikuva leswi hi swona leswi hi swi avanyiseke, leswaku munhu un’we u fele hinkwavo; xisweswo hinkwavo va file; naswona u fele hinkwavo leswaku lava va hanyaka va nga ha tihanyeli, kambe va hanyela loyi a va feleke a tlhela a pfuxiwa.” (2 Vakorinto 5:14, 15) Mawaku rirhandzu lerikulu swonghasi leri Yesu a ri kombiseke hi ku nyikela vutomi byakwe hikwalaho ka hina! Kunene, ri fanele ri va matimba lama hi susumetaka evuton’wini. Ku tlangela Yesu hi ku va a nyikele vutomi byakwe hikwalaho ka hina swi fanele swi hi susumetela ku gingiriteka entirhweni wa ku huwelela mahungu lamanene ya ku ponisiwa lama humaka eka Yehovha hi ku tirhisa N’wana wakwe la n’wi rhandzaka. (Yohane 3:16; ringanisa na Pisalema 96:2.) Xana “rirhandzu leri Kreste a nga na rona” ra ku susumeta leswaku u hlanganyela hi ku hiseka entirhweni wo chumayela hi Mfumo ni ku endla vadyondzisiwa?—Matewu 28:19, 20.
7. Xana swi vula yini ku nga “tivi munhu hi tlhelo ra nyama”?
7 Vatotiwa va hanya vutomi bya vona hi ndlela leyi kombisaka leswaku va tlangela leswi Kreste a va endleleke swona, a va ‘ha tihanyeli, kambe va hanyela yena.’ Pawulo u te: “Hikwalaho ku sukela sweswi a hi tivi munhu hi tlhelo ra nyama. Hambiloko hi tive Kreste hi tlhelo ra nyama, hakunene sweswi a ha ha n’wi tivisi xisweswo nikatsongo.” (2 Vakorinto 5:16) Vakreste a va fanelanga va languta vanhu hi ndlela ya nyama, kumbexana va rhandza Vayuda ku tlula Vamatiko kumbe swigwili ku tlula swisiwana. Vatotiwa a va “tivi munhu hi tlhelo ra nyama,” hikuva nchumu wa nkoka i vuxaka bya vona bya moya swin’we ni vapfumeri-kulobye. Lava va ‘tiveke Kreste hi tlhelo ra nyama’ a ku nga ri vanhu lava voneke Yesu loko a ha ri emisaveni. Hambiloko van’wana lava a va langutele ku vona Mesiya va tshameke va languta Kreste hi ku ya hi nyama yakwe, a va nga ha fanelanga va n’wi languta tano. U nyikele miri wakwe wu va nkutsulo naswona u pfuxiwile a va moya lowu nyikaka vutomi. Van’wana lava pfuxeriweke evuton’wini bya le tilweni va ta lahlekeriwa hi mimiri ya vona ya nyama va nga kalanga va vona Yesu Kreste a ri ni miri wa nyama.—1 Vakorinto 15:45, 50; 2 Vakorinto 5:1-5.
8. Xana vanhu va swi kotise ku yini ku va “ni vun’we na Kreste”?
8 A ha vulavula ni vatotiwa, Pawulo wa engetela: “Loko un’wana a ri ni vun’we na Kreste, u va xivumbiwa lexintshwa; swilo swa khale swi hundzile, waswivo, ku ni swilo leswintshwa.” (2 Vakorinto 5:17) Ku va “ni vun’we na Kreste” swi vula ku fambisana na yena. (Yohane 17:21) Vuxaka lebyi byi va kona eka munhu loko Yehovha a n’wi tshineta eka N’wana wakwe ivi a tota munhu yoloye hi moya lowo kwetsima. Tanihi n’wana wa Xikwembu la totiweke hi moya, a a ri “xivumbiwa lexintshwa,” a ri ni ntshembo wo hlanganyela na Kreste eMfun’weni wa le tilweni. (Yohane 3:3-8; 6:44; Vagalatiya 4:6, 7) Vakreste volavo lava totiweke va nyikiwe lunghelo lerikulu ra ntirho.
“Vuyelelanani Ni Xikwembu”
9. Xana Xikwembu xi endle yini leswaku swi koteka ku vuyelelana na xona?
9 Mawaku ndlela leyi Yehovha a xi tsakeleke ha yona “xivumbiwa lexintshwa”! Pawulo u ri: “Swilo hinkwaswo swi huma eka Xikwembu, lexi endleke leswaku hi vuyelelana na xona ha Kreste xi tlhela xi hi nyika vutirheli bya ku vuyelelana, hileswaku, Xikwembu ha Kreste xi endle leswaku misava yi vuyelelana na xona, a xi yi hlayeli swivi swa yona, naswona xi hi nyike rito ra ku vuyelelana.” (2 Vakorinto 5:18, 19) Vanhu va hambanisiwe ni Xikwembu ku sukela loko Adamu a dyohile. Kambe hi rirhandzu Yehovha u teke goza ku sungula hi ku pfula ndlela ya ku vuyelelana hi xitlhavelo xa Yesu.—Varhoma 5:6-12.
10. Xana Yehovha u tamerise vamani vutirheli bya ku vuyelelana, naswona va endle yini leswaku va byi hetisisa?
10 Yehovha u tamerise vatotiwa vutirheli bya ku vuyelelana, hi yona mhaka leyi Pawulo a nga te: “Hikokwalaho hi vayimeri lava khomelaka Kreste, onge hi loko Xikwembu xi endla xikombelo ha hina. Leswi hi nga vakhomeri va Kreste ha kombela hi ku: ‘Vuyelelanani ni Xikwembu.’” (2 Vakorinto 5:20) Eminkarhini ya khale, vayimeri a va rhumeriwa ngopfu-ngopfu hi minkarhi ya nyimpi ku vona loko nyimpi yi nga siveriwa. (Luka 14:31, 32) Tanihi leswi misava ya vanhu lava nga ni vudyoho yi hambanisiweke ni Xikwembu, xi rhumele vayimeri va xona lava totiweke leswaku va byela vanhu malunghiselelo ya xona ya ku vuyelelana. Tanihi vayimeri va Kreste, vatotiwa va kombela: “Vuyelelanani ni Xikwembu.” Xikombelo lexi i xikhutazo xa tintswalo xa ku lava ku rhula ni Xikwembu ni ku amukela ku ponisiwa loku xi endlaka leswaku ku va kona ha Kreste.
11. Hi ku va ni ripfumelo eka nkutsulo, i vamani lava emakumu va amukeriwaka va lulamile emahlweni ka Xikwembu?
11 Vanhu hinkwavo lava kombisaka ripfumelo enkutsulweni va nga vuyelelana ni Xikwembu. (Yohane 3:36) Pawulo u ri: “Loyi [Yesu] a nga xi tivangiki xidyoho u endliwe [hi Yehovha] a va xidyoho hikwalaho ka hina, leswaku hina hi ta va ku lulama ka Xikwembu ha yena.” (2 Vakorinto 5:21) Yesu, munhu la hetisekeke a a ri gandzelo ra xidyoho eka vana hinkwavo va Adamu lava va kutsuriweke eka vudyoho lebyi kumiweke tanihi ndzhaka. Va va “ku lulama ka Xikwembu” ha Yesu. Ku lulama loku, kumbe ku va exiyin’weni xo lulama emahlweni ka Xikwembu, ku rhanga ku va eka vadyandzhaka swin’we na Kreste va 144 000. Eku Fumeni kakwe ka Malembe ya Gidi, ku va exiyin’weni xo lulama tanihi vanhu lava hetisekeke ku ta ta eka vana va le misaveni va Tatana la nga riki na Makumu, Yesu Kreste. U fanele a va tisa exiyin’weni xo lulama eku hetisekeni leswaku va ta tikombisa va tshembekile eka Xikwembu naswona va amukela nyiko ya vutomi lebyi nga heriki.—Esaya 9:6; Nhlavutelo 14:1; 20:4-6, 11-15.
‘Ngopfu-ngopfu Nkarhi Wa Ku Amukeriwa’
12. Hi byihi vutirheli bya nkoka lebyi endliwaka hi vayimeri ni varhumiwa va Yehovha?
12 Leswaku hi ponisiwa, hi fanele hi hanya hi ku pfumelelana ni marito ya Pawulo: “Leswi hi tirhaka na [yena Yehovha], ha mi kombela nakambe leswaku mi nga amukeli musa lowu nga faneriwiki wa Xikwembu kutani mi hupa xikongomelo xa wona. Hikuva xi ri: ‘Hi nkarhi wa ku amukeriwa ndzi mi twile, naswona hi siku ra ku ponisiwa ndzi mi pfunile.’ Maswivo! Ngopfu-ngopfu sweswi i nkarhi wa ku amukeriwa. Maswivo! Sweswi i siku ra ku ponisiwa.” (2 Vakorinto 6:1, 2) Vayimeri lava totiweke va Yehovha swin’we ni varhumiwa va yena, ku nga “tinyimpfu tin’wana,” a va amukeli tintswalo leti nga faneriwiki ta Tata wa vona la nge matilweni kutani va hupa xikongomelo xa tona. (Yohane 10:16) Hi ku tikhoma ka vona lokunene ni ku hiseka ka vona evutirhelini hi “nkarhi wa ku amukeriwa” lowu hi nga eka wona, va lava tintswalo ta Xikwembu naswona va tivisa vaaki va misava leswaku leri i “siku ra ku ponisiwa.”
13. Hi yihi yinhla-nkulu ya Esaya 49:8, naswona yi hetiseke njhani ro sungula?
13 Pawulo u tshaha Esaya 49:8, leyi hlayekisaka xileswi: “Ku v̌ula ŝeŝo Yehova: E nkarini wa tintŝalo, nḍi ku yingisile, hi siku ra ku hlayiseka, nḍi ku pfunile; nḍi ku tumbulušile, nḍi ku tiyisile leŝaku u lulamisa ntwanano ni tiko, ni ku pfuša tiko, e ku nyika v̌anhu e tinḍaka le’ti onhakeke.” Vuprofeta lebyi byi hetiseke ro sungula loko vanhu va Israyele va ntshunxiwile evukhumbini le Babilona kutani endzhaku va tlhelela etikweni ra vona leri nga rhumbi.—Esaya 49:3, 9.
14. Xana Esaya 49:8 yi hetiseke njhani eka Yesu?
14 Loko vuprofeta bya Esaya byi hetiseka ku ya emahlweni, Yehovha u nyike “nanḍa” wakwe ku nga Yesu leswaku a va “ku v̌onakala ka matiko, e ku fikisa ku pona ka [Xikwembu] e makuṅwini ya misav̌a.” (Esaya 49:6, 8; ringanisa Esaya 42:1-4, 6, 7; Matewu 12:18-21.) ‘Nkarhi wa tintswalo,’ kumbe “nkarhi wa ku amukeriwa” entiyisweni wu kombetela eka Yesu loko a ha ri emisaveni. U khongerile, kutani Xikwembu xi n’wi “yingisile.” Rero ku ve “siku ra ku ponisiwa” eka Yesu hikuva u tshembeke hilaha ku heleleke kutani “u ve ni vutihlamuleri bya ku ponisa hinkwavo lava n’wi yingisaka hilaha ku nga heriki.”—Vaheveru 5:7, 9; Yohane 12:27, 28.
15. Xana Vaisrayele va moya va sungule rini ku lwela ku tikombisa va faneriwa hi tintswalo leti nga faneriwiki ta Xikwembu, naswona hi xikongomelo xihi?
15 Pawulo u tirhise Esaya 49:8 eka Vakreste lava totiweke, a va khutaza leswaku va ‘nga hupi xikongomelo xa musa lowu nga faneriwiki wa Xikwembu’ hi ku tsandzeka ku kuma tintswalo hi “nkarhi wa ku amukeriwa” ni hi “siku ra ku ponisiwa” leri a ri humesaka. Pawulo wa engetela: “Maswivo! Sweswi ngopfu-ngopfu i nkarhi wa ku amukeriwa. Maswivo! Sweswi i siku ra ku ponisiwa.” (2 Vakorinto 6:2) Ku sukela hi Pentekosta ya 33 C.E., Vaisrayele va moya va lwele ku tikombisa va fanelekela musa lowu nga faneriwiki wa Xikwembu leswaku “nkarhi wa ku amukeriwa” wu va “siku ra ku ponisiwa” ka vona.
‘Ha Tibumabumela Tanihi Vatirheli Va Xikwembu’
16. Xana Pawulo u tibumabumele tanihi mutirheli wa Xikwembu ehansi ka swiyimo swihi leswi ringaka?
16 Vanhu van’wana lava a va hlanganyela ni vandlha ra le Korinto a va nga tikombisi va faneriwa hi tintswalo leti nga faneriwiki ta Xikwembu. Va hehle Pawulo, va ringeta ku n’wi endla a nga faneleki tanihi muapostola, hambileswi a papalateke ‘ku va nyika xivangelo ni xin’we xa ku khunguvanyeka.’ Hakunene u tibumabumele tanihi mutirheli wa Xikwembu “hi ku tiyisela swo tala, hi mahlomulo, hi swiyimo swa ku pfumala, hi ku nonon’hweriwa, hi ku biwa, hi makhotso, hi mimpfilumpfilu, hi mintirho, hi vusiku bya nkelunkelu, hi minkarhi yo pfumala swakudya.” (2 Vakorinto 6:3-5) Endzhakunyana, Pawulo u vule leswaku loko vakaneti vakwe va ri vatirheli, yena a a ri “lonkulu” hikwalaho ka ku va a khomiwe ko tala a pfaleriwa emakhotsweni, a biweke, a veke emakhombyeni ni le ku pfumaleni.—2 Vakorinto 11:23-27.
17. (a) Xana hi nga tibumabumela tanihi vatirheli va Xikwembu loko hi kombisa timfanelo tihi? (b) Xana i yini “matlhari ya ku lulama”?
17 Ku fana na Pawulo ni vanghana vakwe, hi nga ha tibumabumela tanihi vatirheli va Xikwembu. Njhani? “Hi vutengi,” kumbe ku pfumala xisolo, ni hi ku hanya hi ku pfumelelana ni vutivi lebyi kongomeke bya Bibele. Hi nga ha tibumabumela “hi ku va ni mbilu yo leha,” hi tiyisela loko hi khomiwa hi ndlela yo biha kumbe hi karhatiwa, naswona hi va ni “musa” loko hi ri karhi hi endlela van’wana swilo leswinene. Tlhandla-kambirhi, hi nga tibumabumela tanihi vatirheli va Xikwembu hi ku amukela nkongomiso wa moya wa xona, hi kombisa “rirhandzu ro pfumala vukanganyisi,” hi vulavula ntiyiso naswona hi titshega hi xona leswaku hi kuma matimba yo hlanganyela evutirhelini. Lexi tsakisaka, Pawulo u tlhele a kombisa xiyimo xa vutirheli byakwe “hi matlhari ya ku lulama evokweni ra xinene ni ra ximatsi.” Etinyimpini ta khale, voko ra xinene hakanyingi a ri khoma savula kasi voko ra ximatsi a ri khoma xitlhangu. Loko a lwa nyimpi ya moya ni vadyondzisi va mavunwa, Pawulo a nga ma tirhisanga matlhari ya nyama leyi nga ni vudyoho—vukanganyisi, mano ni vuxisi. (2 Vakorinto 6:6, 7; 11:12-14; Swivuriso 3:32) U tirhise “matlhari” yo lulama kumbe tindlela to lulama, leswaku a byi yisa emahlweni vugandzeri bya ntiyiso. Na hina hi fanele hi endla tano.
18. Loko hi ri vatirheli va Xikwembu, xana hi fanele hi tikhoma njhani?
18 Loko hi ri vatirheli va Xikwembu, hi ta tikhoma ku fana na Pawulo ni vatirhi-kulobye. Hi ta tikhoma tanihi Vakreste ku nga khathariseki leswaku ha xiximiwa kumbe a hi xiximiwi. Swiviko swo biha leswi humesiwaka mayelana na hina a swi nge wu yimisi ntirho wa hina wa ku chumayela, naswona a hi nge tikukumuxi loko hi bumabumeriwa. Hi ta vulavula ntiyiso naswona hi nga ha xiyiwa hi mintirho ya ku chava Xikwembu. Loko hi ri ekhombyeni lerikulu ra ku hlaseriwa hi nala, hi ta tshembela eka Yehovha. Naswona hi ta amukela ndzayo hi ku tlangela.—2 Vakorinto 6:8, 9.
19. Xana hi nga “fuwisa vo tala” hi ndlela yihi hi tlhelo ra moya?
19 Loko a gimeta rungula rakwe hi vutirheli bya ku vuyelelana, Pawulo u vulavule hi yena ni vanghana vakwe “tanihi lava nga ni mbitsi kambe [va tshamaka va] tsakile, tanihi swisiwana kambe [va] fuwisa vo tala, tanihi lava nga riki na nchumu kambe [va] ni swilo hinkwaswo.” (2 Vakorinto 6:10) Hambileswi vatirheli volavo a va ri ni xivangelo xa ku va ni mbitsi hikwalaho ka miringo, kambe va ve ni ntsako endzeni. A va ri swisiwana, kambe va ‘fuwisiwile vo tala’ hi tlhelo ra moya. Entiyisweni, a va ‘ri ni swilo hinkwaswo’ hikuva ripfumelo ra vona ri va fuwisile hi tlhelo ra moya—ni ku tlhela va va ni ntshembo wa ku va vana va le tilweni va Xikwembu. Naswona a va ri ni vutomi lebyi fuweke ni lebyi tsakisaka tanihi vatirheli va Vakreste. (Mintirho 20:35) Ku fana na vona, hi nga ha “fuwisa vo tala” hi ku hlanganyela evutirhelini bya ku vuyelelana sweswi—esikwini leri ra ku ponisiwa!
Tshembela Eku Ponisiweni Ka Yehovha
20. (a) Xana i yini leswi Pawulo a a swi navela hi mbilu yakwe hinkwayo, naswona ha yini a ku nga ha ri na nkarhi wo tlanga? (b) I yini lexi kombisaka leswaku siku leri sweswi hi hanyaka eka rona i siku ra ku ponisiwa?
20 Loko Pawulo a tsale papila rakwe ra vumbirhi leri yaka eka Vakorinto hi 55 C.E., fambiselo ra swilo ra Vayuda a ri lo salela hi malembe ya kwalomu ka 15 ntsena. Muapostola a a swi lava hi mbilu hinkwayo leswaku Vayuda ni Vamatiko va vuyelelana ni Xikwembu ha Kreste. Rero a ku ri siku ra ku ponisiwa, a ku nga ha ri na nkarhi wo tlanga hi wona. Ina, ku sukela hi 1914 hi nghene enkarhini wa makumu ya mafambiselo ya swilo lowu fanaka ni lowuya. Ntirho wa misava hinkwayo wa ku chumayela hi Mfumo lowu yaka emahlweni sweswi wu kombisa leswaku sweswi i nkarhi wa ku ponisiwa.
21. (a) Xana hi rihi tsalwa ra lembe leri hlawuleriweke 1999? (b) Xana i yini lexi hi faneleke hi xi endla esikwini leri ra ku ponisiwa?
21 Vanhu va matiko hinkwawo va fanele va twa hi lunghiselelo ra Xikwembu ra ku ponisa ha Yesu Kreste. A ka ha ri na nkarhi wa ku tlanga. Pawulo u tsarile a ku: “Maswivo! Sweswi i siku ra ku ponisiwa.” Marito wolawo ya 2 Vakorinto 6:2 ma ta va ndzimana ya lembe ya Timbhoni ta Yehovha ya 1999. Ma faneleka hakunene, hikuva hi langutane ni xiendlakalo lexikulu ngopfu ku tlula xa ku lovisiwa ka Yerusalema ni tempele ya wona! Kwala mahlweninyana ka hina, i makumu ya mafambiselo hinkwawo ya swilo, lama khumbaka un’wana ni un’wana emisaveni. Sweswi—hayi mundzuku—i nkarhi wa ku teka goza. Loko hi kholwa leswaku ku ponisiwa i ka Yehovha, loko hi n’wi rhandza, naswona hi languta vutomi lebyi nga heriki byi ri bya risima, a hi nge xi hupi xikongomelo xa tintswalo leti nga faneriwiki ta Xikwembu. Loko hi swi tsakela etimbilwini ta hina ku dzunisa Yehovha, hi ta swi kombisa hi rito ni hi swiendlo leswaku hakunene hi swi vula hi mbilu hinkwayo loko hi ku: “Maswivo! Sweswi i siku ra ku ponisiwa.”
Xana A Wu Ta Hlamula Njhani?
◻ Ha yini swi ri swa nkoka ngopfu ku vuyelelana ni Xikwembu?
◻ Xana i vamani vayimeri ni varhumiwa lava hlanganyelaka evutirhelini bya ku vuyelelana?
◻ Xana hi nga tibumabumela njhani tanihi vatirheli va Xikwembu?
◻ Xana ndzimana ya lembe ya Timbhoni ta Yehovha ya 1999 yi vula yini eka wena?
[Xifaniso lexi nga eka tluka 17]
Ku fana na Pawulo, xana u chumayela hi ku hiseka ni ku pfuna van’wana leswaku va vuyelelana ni Xikwembu?
United States
Furwa
Côte d’Ivoire
[Xifaniso lexi nga eka tluka 18]
Esikwini leri ra ku ponisiwa, xana u le xikarhi ka vunyingi lebyi vuyelelanaka na Yehovha Xikwembu?